Onesiforas Wan Man Blong Leftemap Tingting, We i No Fraet

YUFALA i mas stap tingbaot ol man we i stap long kalabus, olsem we yufala tu i stap kalabus wetem olgeta. Mo yufala i mas stap tingbaot ol man we i stap harem nogud long bodi blong olgeta.” (Hibrus 13:3) Taem aposol Pol i raetem tok ya, kolosap long 61 K.T.,a hem i bin kalabus moa long wan taem finis, mo bambae hem i kalabus wan moa taem yet, bifo we oli kilim hem i ded from bilif blong hem. (Ol Wok 16:​23, 24; 22:24; 23:35; 24:27; 2 Korin 6:5; 2 Timote 2:9; Faelimon 1) Ale, long taem bifo, olsem long taem blong yumi, i impoten tumas we ol kongregesenb oli lukaot long ol brata sista we oli fesem traem from bilif blong olgeta.

Wan Kristin long faswan handred yia we i intres tumas blong mekem samting ya, hemia Onesiforas. Hem i visitim Pol long namba tu taem we hem i stap kalabus long Rom. Aposol Pol i raetem tok ya long saed blong hem, i se: “Hemia prea blong mi, we Masta blong yumi bambae i gat sore long famle blong Onesiforas, from we bifo, plante taem hem i stap mekem mi mi harem gud bakegen. Hem i no gat sem from we mi mi stap kalabus, no gat. Taem hem i kamtru long Rom, wantaem nomo hem i kam lukaot mi, gogo i faenem mi.” (2 Timote 1:​16, 17) ?Yu bin tekem taem blong tingting dip long mining blong sotfala tok ya? I sua se bambae yu yu laekem moa Onesiforas sipos yu mekem olsem. Bambae yu luk se hem i wan man blong leftemap tingting, we i no fraet.

Namba Tu Taem We Pol i Kalabus

Long faswan taem we Pol i fri long kalabus, hem i go long presin bakegen long Rom, be long wan fasin we i defren olgeta. Long faswan taem, ol fren blong Pol oli save kam luk hem long ren haos blong hem, mo i luk olsem we hem i sua se bambae i no longtaem hem i kam fri. Be long namba tu taem, i no gat plante man we ol stap kam luk Pol, mo i luk olsem se ol man Rom bambae oli kilim hem i ded from bilif blong hem.​—Ol Wok 28:30; 2 Timote 4:6-8, 16; Faelimon 22.

Namba tu taem ya we Pol i kalabus, hemia samwe long 65 K.T. Raonabaot wan yia bifo​—long Julae 64 K.T.​—wan bigfala faea i bonem Rom, mo i spolem kolosap evri samting long 10 blong ol 14 eria blong Rom. Tacitus, man Rom we i raetem histri, i eksplenem se, Hedgavman Nero i no naf blong “jenisim bilif blong ol man se hem nao i bin givim oda blong laetem faea ya. Taswe, blong blokem ol nogud toktok we i stap goraon, Nero i putum fol i go long wan grup, we ol man oli no laekem olgeta nating from ol fasin blong olgeta, hemia grup ya we oli kolem ol Kristin. Ale, Nero i ronem ol Kristin mo i mekem i nogud bitim mak long olgeta. . . . Hem i kilim olgeta oli ded long fasin we i nogud tumas, blong mekem oli sem mo blong jikim olgeta. Ol man oli putum skin blong anamol long olgeta, ale ol dog oli kakae mo terem bodi blong olgeta gogo oli ded. Oli nilim olgeta long kros, oli sakem olgeta long faea mo bonem olgeta blong yusum olgeta olsem ol faea tos long naet, taem san i godaon finis.”

Ol samting oli stap olsem, taem oli putum Pol long kalabus bakegen, mo oli save mekem ol nogud fasin ya long hem tu. !Yumi no sapraes se hem i gat bigfala tangkyu long fren blong hem Onesiforas we i stap kam luk hem! Naoia, bambae yumi traem tingbaot hadwok we Onesiforas i mekem blong faenem Pol mo leftemap tingting blong hem.

Fasin Blong Stap Kam Luk Pol Long Kalabus

I luk olsem se famle blong Onesiforas i laef long Efesas. (2 Timote 1:​18; 4:​19) Baebol i no talem stret sipos Onesiforas i kam long bigfala taon blong gavman blong Rom from wan bisnes blong hem, no blong luk Pol nomo. Nating se i olsem wanem, aposol Pol i talem se: ‘Taem Onesiforas i kam long Rom, plante taem hem i stap mekem mi mi haremgud bakegen.’ (2 Timote 1:​16, 17) ?Olsem wanem hem i mekem Pol i haremgud bakegen? Maet Onesiforas i bin givim sam samting we Pol i nidim long saed blong laef, be tu, i klia se Pol i haremgud, i kasem paoa, mo tingting blong hem i kam strong bakegen, taem hem i jes luk Onesiforas nomo. Tru ya, sam Baebol oli tanem vas ya olsem: “Plante taem hem i mekem mi mi glad bakegen,” no, “plante taem hem i leftemap tingting blong mi.”

Long taem bifo, wan man we i wantem go luk wan Kristin presina i mas winim plante problem. I klia se, taem ya i defren long faswan taem we Pol i kalabus, from we naoia ol Kristin blong Rom oli no moa save weples Pol i stap. Long wan bigfala taon olsem Rom, i gat fulap man we oli stap kalabus, from plante defren nogud samting we oli mekem. I sua se, long medel blong olgeta ya, i no isi blong faenem wan presina we plante man oli no save hem. Taswe, Onesiforas i mas traehad blong faenem Pol. Wan man blong stadi dip, Giovanni Rostagno, i eksplenem samting ya olsem: “Hem i save gat plante defren kaen hadtaem. Samting we i impoten moa, hem i mas lukaotgud taem hem i stap traehad blong faenem Pol. Tingbaot, ol man oli luk Pol olsem wan olfala man we i krangke nomo, mo we i mekem plante nogud samting. Nao, sipos Onesiforas i asaskem olbaot mo soem se hem i wantem tumas blong faenem presin we Pol i stap long hem, samting ya i save mekem plante moa toktok mo trabol i kamaot.”

Man blong raetem buk, P. N. Harrison, i soem wan klia pija blong taem ya, i talem se: “Long store ya blong Baebol, yumi luk wan man long medel blong wan bigfala hif blong man, we fes blong hem i soem se hem i gat strong tingting. Taem yumi folem strenja ya, we i bin wokbaot i kam long narasaed long solwora blong Aejin, yumi intres moa long hem. Hem i godaon long plante defren rod we hem i no savegud olgeta, i stap kilkilim plante doa, i stap folem evri smosmol save we ol man oli givim long hem, yes, hem i gohed nomo blong traem faenem Pol, nating se ol man oli givim woning long hem se hem i stap long denja. Hem i gohed gogo i harem wan voes we hem i save finis, i kamaot long wan presin haos we i haed lelebet. Saye, hem i faenem Pol, we ol jen oli fasem hem long wan soldia blong Rom.” Sipos ples ya i sem mak long ol narafala presin blong Rom long taem ya, i sua se hem i wan ples we i kolkol, i tudak, mo i doti tumas, wan ples we i fulap long jen mo fasin safa.

Wan man we i soemaot se hem i fren blong wan presina olsem, i save kasem plante trabol. Be i denja moa blong kambak plante taem blong luk presina ya. Wan man we i soem klia nomo se hem i wan Kristin, i mas rere blong safa, from we oli save holem hem mo mekem hem i harem nogud bitim mak long bodi blong hem, go kasem we hem i ded. Be Onesiforas i go luk Pol “plante taem,” i no wan no tu taem nomo. Neva hem i sem no i fraet blong mekem samting ya. Onesiforas i rili soemaot mining blong nem blong hem, hemia “Man We i Karem Gudfala Samting i Kam.” Hem i no fraet blong givhan long narafala wetem lav, nomata wanem trabol hem i save kasem from.

?Blong wanem Onesiforas i mekem olgeta samting ya? Brian Rapske i talem se: “Presin i no wan ples we ol man oli safa long bodi blong olgeta nomo, be oli wari tumas tu from hadtaem we oli kasem long ples ya. Long wan ples olsem ya, sipos wan presina i luk wan fren blong hem mo i harem tok blong hem blong leftemap tingting, samting ya i save mekem presina ya i haremgud tumas long tingting mo filing blong hem.” I klia se Onesiforas i save samting ya, mo i no fraet blong kam luk mo givhan long fren blong hem. !I sua se Pol i gat bigfala tangkyu long hem from help ya we hem i givim!

?Wanem i Hapen Long Onesiforas Biaen?

Long namba tu leta we Pol i raetem i go long Timote, hem i talem halo long famle blong Onesiforas, mo i talem long saed blong hem se: “Hemia prea blong mi, we long dei ya, bambae Masta blong yumi i letem man ya i kasem sore blong Jeova.” (2 Timote 1:​18, NW; 4:​19) Plante man oli ting se tok ya “long dei ya” i minim dei ya we God bambae i jajem olgeta man, mo oli talem se samting ya i soem se Onesiforas i ded finis long taem ya. Sipos samting ya i tru, ating i olsem P. N. Harrison i eksplenem se, “laswan taem we Onesiforas i bin kam long presin ya we i denja tumas, hem i lusum laef blong hem.” Be maet i tru tu se Onesiforas i no stap long haos blong hem taem Pol i raetem leta ya, no maet Pol i talem halo long hem semtaem we hem i talem halo long ful famle blong hem.

Sam man oli ting se i gat wan spesel mining long tok ya: “Hemia prea blong mi, we long dei ya, bambae Masta blong yumi i letem man ya i kasem sore blong Jeova.” Oli bilif se tok ya i soem se i stret blong prea from olgeta we oli ded finis, we maet oli stap laef mo safa long ples blong ol speret man. Be, tingting ya i no stret wetem tijing blong Baebol we i soem se ol dedman oli no save wan samting nating. (Eklesiastis 9:5, 10) Mo tu, nating sipos Onesiforas i ded finis, Pol i stap talem nomo se hem i wantem we fren blong hem bambae i kasem sore blong Jeova. Man ya, Horton i talem se: “Yumi gat raet blong wantem samting ya blong olgeta man. Be fasin blong prea from ol dedman, mo mekem Lames blong olgeta, i no stap nating long tingting blong [aposol] Pol.”

!Yumi Save Stap Tru, Mo Leftemap Tingting Blong Ol Narafala!

Nomata sipos Onesiforas i ded from hem i stap halpem Pol no nogat, i sua se hem i bin rere blong lusum laef blong hem blong faenem aposol Pol mo go luk hem long kalabus. Mo i klia nomo se Pol i rili haremgud long fasin blong Onesiforas blong sapotem hem mo leftemap tingting blong hem.

Taem sam Kristin brata mo sista blong yumi oli kasem traem, fasin agens, no stap long kalabus, maet yumi naf blong leftemap tingting blong olgeta, mo mekem oli haremgud. Ale, yumi mas prea from olgeta, mo wetem fasin lav, mekem olgeta samting we yumi naf blong mekem blong halpem olgeta. (Jon 13:35; 1 Tesalonaeka 5:​25) Olsem Onesiforas, yumi save kam wan man blong leftemap tingting, we i no fraet.

[Ol futnot]

[Tok Blong Pija Long Pej 31]

Onesiforas i no fraet blong go leftemap tingting blong aposol Pol long kalabus