Jeova i Rul Wetem Fasin Sore

LONG ol yia we oli pas, plante lida blong wol oli bin yusum paoa blong olgeta long fasin we i mekem ol man oli safa tumas. Be Jeova i mekem i defren long nesen we hem i jusumaot, hemia Isrel. Hem i rul long olgeta wetem fasin sore.

Taem ol man Isrel oli slef long Ijip bifo, Jeova i harem krae blong olgeta blong singaot hem blong halpem olgeta. “Taem oli harem nogud, Hem tu i harem nogud. . . . Hem i pemaot olgeta from lav mo fasin sore blong hem.” (Aesea 63:⁠9) Jeova i sevem Isrel, i mekem wan merikel blong givim kakae long olgeta, mo i tekem olgeta oli go long wan kantri we hem i givim long olgeta.

Ol loa we Jeova i givim long nesen ya tu oli soemaot se hem i gat fasin sore. Hem i givim oda long ol man Isrel se oli mas sore long ol pikinini we oli no gat papa mama, long ol wido, mo ol strenja. Oli mas mekem i gud long ol handikap tu.

Loa i talem se oli mas sore long ol man we oli no gat plante samting. Ol puaman oli save pikimap haf kakae we i stap afta we ol man oli karem kakae long garen. Long yia blong Sabat (yia namba seven), oli mas fogetem ol kaon we ol narafala oli gat long olgeta. Long yia blong Jubili (yia namba fefte), olgeta graon we oli bin salem long narafala i mas kambak long olgeta. Buk ya, Ancient Israel​—Its Life and Institutions, i talem se: “Long Isrel, i no gat ol rijman mo ol puaman olsem tede.” “Long ol faswan yia blong nesen ya Isrel, olgeta man evriwan oli sem mak, oli gat ol samting we oli nidim blong laef.”​—Levitikas 25:10; Dutronome 15:​12-​14; 24:17-​22; 27:18.

Folem Fasin Sore Blong Jeova

Fasin sore blong Jeova i bin pusum ol man blong hem blong mekem semfala fasin ya. Eksampel, long ol yia we oli pas longtaem finis, sam king we oli tekem paoa oli kilim i ded olgeta famle blong king ya we i rul bifo long olgeta. Be Deved, wan man blong Jeova, i no mekem olsem. Afta we King Sol i ded, Deved i lukaotgud long Mefiboset, smol bubu blong Sol we i laef i stap, mo we i mas kam king. “King Deved i sore long Mefiboset, pikinini blong Jonatan we i pikinini blong Sol.”​—2 Samuel 21:⁠7.

I no gat wan narafala man we i folem fasin sore blong Jeova olsem Jisas i bin mekem. Hem i mekem plante merikel from we hem i folem fasin sore blong God. Wan taem, wan man we i gat leprosi i askem long Jisas se: “Plis, sipos yu yu wantem, yu save mekem mi mi gud bakegen.” Jisas i sore long hem, i putum han blong hem long man ya, mo i talem se: “Mi mi wantem, bodi blong yu i klin.” (Mak 1:​40-​42) Wan narafala taem, plante man oli biaen long Jisas, mo i gat plante noes. Be nating, Jisas i harem krae blong tu blaenman we oli singaot se: “ ‘Masta, yu Laen blong Deved, plis yu sore long mitufala.’ . . . Nao Jisas i gat sore long tufala, i putum han blong hem long ae blong tufala. Nao wantaem nomo, ae blong tufala i kamgud.”​—Matyu 20:29-​34.

Nating se fulap man wantaem oli kam hivap raon long Jisas, samting ya i no mekem se hem i no moa soem sore. Wan taem, ol man oli no kakae longtaem lelebet, ale hem i talem se: “Mi mi sore tumas long ol man ya.” Nao hem i mekem wan merikel blong givim kakae long olgeta. (Mak 8:​1-8) Taem Jisas i wokbaot i go long ol defren ples, hem i no jes tijim ol man nomo, be hem i luksave ol nid blong olgeta tu. (Matyu 9:​35, 36) Afta long wan wokbaot olsemia, Jisas mo ol man blong hem oli no gat taem blong spel smol, mo blong kakae tu. Baebol i talem se: “Ale, olgeta nomo oli tekem wan bot, oli aot blong go long wan ples we i no gat man. Be plante man oli luk olgeta taem oli go, mo oli save olgeta. Nao ol man oli aot long ol velej raonabaot, oli wokbaotsoa, oli resis, nao oli gotru long ples ya fastaem, oli winim Jisas wetem ol man blong hem. Taem Jisas i gosoa, hem i luk we plante man oli stap, nao hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i girap, i tijim olgeta long plante samting.”​—Mak 6:31-​34.

Jisas i sore long ol man we oli sik mo pua, be i no hemia nomo. Hem i sore tu from we oli harem nogud long saed blong speret. Ol lida blong olgeta oli bin mekem i nogud long olgeta, taswe Jisas i “sore tumas long olgeta.” Grik tok we yumi tanem i kam “sore tumas,” i minim se “man i harem long gat blong hem we i wantem tumas blong givhan.” !Tru ya, Jisas i rili gat fasin sore!

Fasin Sore Long Wol Ya We i Raf

Naoia, Jisas Kraes i King long Kingdom blong Jeova long heven. Olsem long Isrel bifo, God i rul long ol man blong hem tede wetem fasin sore. “ ‘Long dei ya we mi wokem wan spesel samting blong mi,’ Jeova blong ol ami i talem, ‘bambae oli kam man blong mi. Mo bambae mi mi sore long olgeta.’ ”​—Malakae 3:⁠17.

Ol man we oli wantem se Jeova i sore long olgeta, oli mas folem ol fasin blong hem. Ol man blong wol ya, oli tingbaot moa blong holemtaet fasin blong laef we oli stap folem longtaem finis, i bitim we oli givhan long ol narafala we oli nidim help. Plante masta oli stap lukaot ol rod blong winim moa mane, be oli no wari sipos ol rod ya oli mekem denja long ol man blong wok blong olgeta, mo long ol man we oli pem ol samting blong olgeta. Tok blong Baebol long 2 Timote 3:​1-4 i stret nomo long ol fasin blong wol naoia, ol fasin we oli kilimaot fasin sore long hat blong plante man.

Nating se i olsem, yumi gat jans yet blong soem fasin sore. Maet yumi save givhan long sam man raonabaot long yumi we oli nidim help. Maet i gat wan sikman we yumi save go luk hem. Maet yumi save leftemap tingting blong olgeta we tingting i foldaon, olsem advaes ya i talem se: “Yufala i mas mekem tingting blong ol man ya we oli fraet, i strong bakegen. Yufala i mas givhan long olgeta we oli no gat paoa.”​—1 Tesalonaeka 5:​14.

Fasin sore bambae i givhan long yumi blong no kam kros taem ol narafala oli mestem. Baebol i talem se: “Yufala i mas lego olgeta fasin blong kros. Yufala i mas no holem kros, mo yufala i mas no kros kwik. Yufala i mas no sakem tok blong yufala i go antap, mo yufala i mas no tok nogud long yufala. Mo yufala i mas finis long fasin ya we yufala i stap badfren long yufala. Yufala i mas wokem i gud long yufala, yufala i mas gat gladhat long yufala. Mo yufala i mas fogivim yufala, olsem we God i fogivim yufala finis, we yufala i joen long Kraes.”​—Efesas 4:​31, 32.

Mo tu, fasin sore bambae i givhan long yumi blong no yusum paoa we yumi gat antap long sam narafala man, blong mekem i strong tumas long olgeta. Baebol i talem se: “Yufala i mas putum nyufala laef ya blong yufala olsem prapa klos blong yufala. Yufala i mas gat sore long ol man. Yufala i mas mekem i gud long ol man. Tingting blong yufala i mas stap daon. Yufala i mas kwaet man. Mo tingting blong yufala i mas longfala.” (Kolosi 3:​12) Tingting daon bambae i mekem se yumi kasem save long filing blong olgeta we oli wok aninit long yumi. Fasin sore i joen wetem tingting daon mo kwaet fasin, i no wetem fasin we i strong tumas, we ol narafala oli faenem i hadwok blong mekem yumi glad. Yumi no mas mekem long ol man olsem we oli wan mesin, jes from we yumi wantem se oli wok strong mo mekem gudfala wok. Insaed long famle tu, ol hasban oli mas tingbaot se waef blong olgeta i no strong olsem olgeta. (1 Pita 3:⁠7) Eksampel blong Jisas i save halpem yumi long ol rod ya, sipos yumi tingting dip long fasin sore blong hem.

From we Jisas i sore tumas long ol man taem hem i stap long wol ya, yumi sua se naoia mo long fyuja tu, hem i wan Rula we i gat sore. Profet tok blong Ol Sam 72 i tokbaot hem, i se: “Plis yu mekem we king bambae i stap jajem ol puaman long fasin we i stret, mo i stap halpem ol man we oli sot long ol samting, mo i stap daonem ol man we oli stap spolem ol puaman ya. Bambae hem i king long olgeta ples, i stat long solwora narasaed, i go kasem solwora narasaed, i stat long Yufretes Reva, i go kasem en blong wol. Hem bambae i gat sore long ol puaman, mo long olgeta we oli no strong, hem bambae i stap sevem laef blong olgeta we oli sot long ol samting.”​—Ol Sam 72:​4, 8, 13.

Tok blong God i talem se: “Long stret fasin, bambae hem i jajem ol man we oli no gat nem, mo long fasin we i stret bambae hem i stretem ol man, blong givhan long olgeta we oli gat tingting daon. . . . Bambae hem i kilim ol rabis man oli ded.” Profet tok ya i soem se sam man we oli bin mekem raf mo nogud fasin olsem ol anamol, bambae oli jenisim fasin blong olgeta. Nao hem i gohed, i se: “Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap long save blong Jeova olsem we ol wora oli kavremap solwora.” (Aesea 11:4-9) !Profet tok ya i promes se bambae wol ya i fulap long ol man we oli save Jeova mo folem fasin sore blong hem!