Gohed Blong Wokbaot Wetem God
‘Sipos tabu speret i stap lidim yufala, bambae yufala i no stap mekem ol samting we tingting blong yufala nomo i wantem.’—GALESIA 5:16.
1. (a) ?Wanem ol fasin we oli stap raonabaot long Inok, mo hem i wokbaot wetem God blong hamas yia? (b) ?Noa i wokbaot wetem God blong hamas yia, mo wanem ol bigfala wok we hem i mekem?
BAEBOL i talem se Inok ‘i wokbaot wetem trufala God oltaem.’ Nating se ol man raonabaot long hem, oli tokbaot ol rabis samting mo mekem ol rabis fasin, hem i gohed blong wokbaot wetem God, go kasem we hem i ded taem i gat 365 yia blong hem. (Jenesis 5:23, 24; Jud 14, 15) Noa tu ‘i wokbaot wetem trufala God oltaem.’ Long semtaem, hem i tijim ol pikinini blong hem, hem i stanap strong agensem paoa blong ol rebel enjel mo ol stronghed pikinini blong olgeta we oli stap pulum ol man long taem ya, mo hem i bildim wan sip we i bigfala moa i bitim ol narafala sip long taem bifo. Afta we Bigfala Wora i ron, hem i gohed blong wokbaot wetem God, nating se fasin rebel agensem Jeova i kam antap bakegen long Babel. Yes, Noa i gohed blong wokbaot wetem God go kasem we hem i ded taem i gat 950 yia blong hem.—Jenesis 6:9; 9:29.
2. ?I minim wanem blong ‘wokbaot wetem God’?
2 Taem Baebol i talem se ol man ya blong bilif, olsem Inok mo Noa, oli ‘wokbaot’ wetem God, hemia i olsem wan pijatok. Hem i minim se oli mekem ol samting we i soemaot se oli gat strong bilif long God. Oli mekem ol samting we Jeova i talem long olgeta blong mekem, mo oli jenisim sam samting long laef blong olgeta blong mekem i laenap wetem ol save we oli gat long saed blong Jeova mo fasin we hem i mekem long ol man. (Skelem wetem 2 Kronikel 7:17.) Oli no jes talem nomo se oli agri wetem ol tok mo wok blong God. No gat. Oli obei long ol samting we hem i talem long olgeta. Oli no mekem haf nomo, be oli mekem evri samting go kasem mak we ol sinman oli naf blong mekem. Eksampel, Noa i mekem olgeta samting stret olsem we God i talem long hem. (Jenesis 6:22) Noa i no ron i go fastaem long God we i bitim mak long ol samting we Jeova i talem long hem, mo hem i no slou tumas tu mo slak blong mekem ol samting ya. Hem i frengud wetem Jeova, hem i no fraet blong toktok wetem God long prea, mo hem i tinghae tumas long fasin blong God blong lidim hem. Taswe, yumi save talem se hem i wokbaot wetem God. ?Yu yu stap mekem olsemia?
Wan Fasin Blong Laef We Yumi Mas Folem Oltaem
3. ?I impoten tumas se olgeta we oli givim laef blong olgeta i go long God mo tekem baptaes, oli mekem wanem?
3 Yumi haremgud tumas taem yumi luk se wan man i stat wokbaot wetem God. Taem hem i stat mekem ol wanwan samting we Jeova i wantem, hem i soemaot bilif. Hem i mas soemaot bilif olsem, blong mekem God i glad. (Hibrus 11:6) !Yumi glad tumas we, long faef yia we i pas, i gat 320,000 man evri yia we oli bin givim laef blong olgeta i go long Jeova mo tekem baptaes long wora! Be, i impoten we olgeta ya mo yumi evriwan i gohed oltaem blong wokbaot wetem God.—Matyu 24:13; Revelesen 2:10.
4. ?From wanem bighaf blong ol man Isrel we oli aot long Ijip oli no go insaed long Promes Lan, nating se oli gat sam bilif?
4 Long taem blong Moses, ol famle blong ol man Isrel oli nidim bilif blong mekem Pasova long Ijip, mo blong sakem blad i go long wansaed blong doa mo antap long doa blong haos blong olgeta. (Eksodas 12:1-28) Be, long Red Si, taem oli luk we ol ami blong Fero oli stap jes biaen long olgeta, bilif blong plante man i seksek. (Eksodas 14:9-12) Ol Sam 106:12 i soem se, afta we oli wokbaot long drae graon blong krosem reva, mo oli luk we bigfala wora i draonem ol ami blong Ijip, long taem ya nomo, oli jes “bilif long promes [blong Jeova]” bakegen. Be, smoltaem biaen, taem oli stap long draeples, oli stat toktok smol agens, from wora blong dring, kakae, mo from ol man we oli stap lidim olgeta. Mo tu, wan nogud ripot we 10 long ol 12 spae oli givim afta we oli bin lukluk Promes Lan, i mekem ol man Isrel ya oli fraet. Olsem Ol Sam 106:24 i talem, taem ol samting ya oli hapen, “oli no bilif long promes blong [God].” Oli wantem tanraon mo gobak long Ijip. (Namba 14:1-4) Long taem ya nomo we oli luk sam bigbigfala saen we God i mekem blong soemaot paoa blong hem, oli jes gat smol bilif. Oli no wokbaot wetem God oltaem. From samting ya, plante oli no go insaed long Promes Lan.—Ol Sam 95:10, 11.
5. ?Olsem wanem 2 Korin 13:5 mo Proveb 3:5, 6 i joen long fasin blong wokbaot wetem God?
5 Baebol i givim advaes ya se: ‘I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot we yufala i stap holem bilif ya, no yufala i no moa holem.’ (2 Korin 13:5) ‘Holem bilif ya’ i minim se yumi holemstrong long ol Kristin tijing. Hemia i impoten sipos yumi wantem wokbaot wetem God oltaem long laef blong yumi. Be, blong wokbaot wetem God, yumi mas soemaot fasin blong bilif tu, hemia se, yumi mas trastem Jeova fulwan. (Proveb 3:5, 6) Olgeta we oli no mekem olsemia, oli save foldaon long plante trap mo traem. ?Wanem sam long olgeta ya?
Blokem Fasin Blong Trastem Yu Wan Tumas
6. ?Olgeta Kristin oli save wanem long saed blong fasin blong slip olbaot mo slip wetem hasban no waef blong narafala, mo oli gat wanem tingting long ol sin olsem?
6 Olgeta man we oli stadi Baebol, mo biaen oli givim laef blong olgeta i go long Jeova mo tekem baptaes, oli save se Tok blong God i agensem fasin blong slip olbaot mo fasin blong slip wetem waef no hasban blong narafala. (1 Tesalonaeka 4:1-3; Hibrus 13:4) Ol man ya oli agri se loa ya blong God i stret. Oli wantem folem loa ya long laef blong olgeta. Be, rabis fasin long saed blong seks i stap yet olsem bigfala trap blong Setan we i winim moa man i bitim ol narafala trap. ?From wanem i olsem?
7. Long Flatples blong Moab, ?wanem i pulum ol man Isrel blong joen long fasin we oli save se i no stret?
7 Ating, olgeta we oli foldaon long rabis fasin long saed blong seks oli no plan blong mekem olsem. Maet samting ya i sem mak long ol man Isrel long Flatples blong Moab. Long tingting blong ol man Isrel ya we oli taed blong stap laef long draeples ya, ating fasin blong ol woman Moab mo Midian we oli stap switim olgeta, i olsem fasin fren mo kaengud fasin nomo. ?Be wanem i kamaot taem ol man Isrel ya oli agri blong kampani wetem ol man we oli no wosip long Jeova be oli wosip long Bal, ol man (ol haeman tu) we oli letem ol gel blong olgeta oli slip olbaot wetem ol narafala man we oli no hasban blong olgeta? Ol man Isrel oli stat haremgud long kampani blong olgeta ya. Ale, oli letem ol man ya oli pulum olgeta blong mekem ol samting we oli save se i no stret, mo biaen oli ded from.—Namba 22:1; 25:1-15; 31:16; Revelesen 2:14.
8. Long taem blong yumi, ?wanem i save lidim wan Kristin blong mekem rabis fasin long saed blong seks?
8 ?Wanem i save mekem man i foldaon long semfala trap ya long taem blong yumi? Hem i save se rabis fasin long saed blong seks i nogud tumas. Be, ating hem i no luksave se i denja blong trastem hem wan tumas. Taswe, hem i no fraet blong joen wetem sam man we oli save pulum hem blong no moa tingting stret, nao samting ya i lidim hem blong mekem nogud.—Proveb 7:6-9, 21, 22; 14:16.
9. ?Wanem ol woning blong Baebol we oli save givhan long yumi blong blokem rabis fasin long saed blong seks?
9 Long ol klia tok, Baebol i givim woning se yumi no mas letem wan gyaman tingting i lidim yumi, we yumi ting se yumi strong mo se ol rabis fren oli no save spolem yumi. Hemia i minim tu se, yumi no mas lukluk ol store long televisen we oli soemaot ol man we oli stap folem ol rabis fasin long laef blong olgeta, mo yumi no mas ridim ol buk we oli wekemap filing we i no stret long saed blong seks. (1 Korin 10:11, 12; 15:33) Mo tu, nating se yumi joen wetem ol man blong bilif, sipos yumi no lukaotgud long ol samting we yumi mekem taem yumi joen wanples, yumi save kasem bigfala trabol. Filing blong man mo woman we i pulum tufala blong laeklaekem tufala, i strong tumas. Taswe, ogenaesesen blong Jeova we i laekem yumi tumas mo i wari long yumi, i givim woning se man mo woman we tufala i no mared no we tufala i no blong semfala famle, oli no mas stap tufala nomo long wan ples we i longwe long ol narafala man. Blong gohed blong wokbaot wetem God, yumi mas blokem fasin blong trastem yumi wan tumas, mo yumi mas lesin long ol woning mo advaes we God i givim.—Ol Sam 85:8.
No Letem Fraet Long Man i Bos Long Yu
10. ?Olsem wanem “fraet long man” i olsem wan trap?
10 Proveb 29:25 i soemaot wan narafala denja, i se: “Fraet long man i wan trap.” Plante man we oli ronem ol anamol, oli yusum wan string olsem wan trap. String ya i jokem nek blong anamol we i fas long hem, sipos no, i fasem leg blong hem. (Job 18:8-11) Yumi save talem se fraet long man i save jokem wan man tu, from we i save mekem se hem i fraet blong toktok klia, mo i fraet blong mekem ol samting long fasin we God i wantem. I stret nomo we yumi wantem mekem narafala man i glad. I no stret we wan Kristin i no kea nating long tingting blong narafala man. Be yumi mas skelemgud bisnes ya. Taem wan man i fraet tumas long tingting blong narafala nao samting ya i pulum hem blong brekem loa blong God, no blong no mekem samting we Baebol i talem, ale, man ya i fas long wan trap.
11. (a) ?Wanem i save blokem fraet long man blong i no bos long yumi? (b) ?Olsem wanem Jeova i bin halpem ol man blong hem we oli traehad blong winim fraet long man?
11 Ol prapa fasin blong yumi wanwan oli no naf blong blokem fraet long man we i olsem wan trap. Yumi mas “trastem Jeova.” (Proveb 29:25b) Man we i trastem God, nating se hem i wan man blong sem stret, be hem i save gat strong tingting mo fasin blong no fraet. Oltaem we wol ya blong Setan i stap raon long yumi wetem ol wari mo traem blong hem, bambae yumi nidim blong lukaotgud se yumi no fas long trap ya, fraet long man. Profet Elaeja i wok wetem strong tingting blong longtaem, be taem Jesebel i talem long hem se bambae i kilim hem i ded, Elaeja i fraet mo i ronwe. (1 King 19:2-18) Taem ol man oli agensem aposol Pita, hem i fraet mo i gyaman se hem i no save Jisas Kraes. Plante yia biaen, fraet long man i lidim hem bakegen blong mekem fasin we i defren olgeta long fasin blong man we i gat bilif. (Mak 14:66-71; Galesia 2:11, 12) Be, Elaeja mo Pita, tufala tugeta oli lesin long advaes long saed blong speret, mo wetem tras long Jeova, tufala i gohed blong mekem wok blong Hem long fasin we Hem i wantem.
12. ?Olsem wanem samfala long taem blong yumi oli bin kasem help blong no letem fraet long man i blokem olgeta blong mekem God i glad?
12 Plante man blong Jeova long taem blong yumi tu oli winim fasin ya blong fraet long man. Wan yangfala Wetnes gel long Gyana i talem se: “Long skul, i strong blong no letem ol fren oli pulum mi.” Hem i gohed, i se: “Be bilif blong mi long Jeova i strong tu.” Taem tija i jikim hem long fored blong ful klas from bilif blong hem, hem i prea long hat blong hem long Jeova. Biaen, taem hem mo tija nomo i stap, hem i wetnes long tija ya long kaen fasin. Wan yangfala man long Benin tu, i stat kasem save long ol samting we Jeova i wantem. Nao hem i wokbaot i gobak long ples blong hem blong smoltaem, from we hem i gat strong tingting blong sakemaot wan aedol we papa blong hem i bin wokem blong hem. Yangfala man ya i save se aedol ya i no laef, mo hem i no fraet long aedol ya. Be hem i save tu se ol man blong velej oli save kam kros tumas mo maet oli traem kilim hem i ded. Ale, hem i prea long Jeova, nao taem tudak i kam, hem i karem aedol ya i go sakem long bus. (Skelem wetem Jajes 6:27-31.) Wan woman long Dominikan Ripablik i stat wosip long Jeova. Nao man blong hem i kros, i talem se woman ya i mas jusum Jeova no hem. Hem i talem tu se bambae i mekem divos long woman ya. ?Olsem wanem? ?Fraet i pusum woman ya blong lego bilif blong hem? Hem i ansa se: “Sipos mi no bin stap tru long man blong mi, bambae mi sem. !Be mi no save sem blong wosip long Jeova God!” Hem i gohed blong wokbaot wetem God. Afta we sam taem i pas, hasban blong hem i joen wetem hem blong mekem wok blong Jeova. Sipos yumi trastem fulwan Papa blong yumi long heven, yumi naf blong winim fraet long man, we i save blokem yumi blong mekem samting we yumi save se Jeova i glad long hem.
No Ting Nating Long Advaes
13. ?Fas Timote 6:9 i givim woning long saed blong wanem trap?
13 Sam trap we ol man blong ronem anamol oli yusum, oli kasem enikaen anamol we i pas. Be sam narafala trap oli pulum ol anamol oli kam, from oli gat wan bet we anamol i luk se i gud tumas. Long laef blong plante man, ol sas samting nao oli olsem bet ya. (Matyu 13:22) Long 1 Timote 6:8, 9, Baebol i givim advaes se yumi mas haremgud long kakae mo klos we oli naf nomo long yumi. Biaen, hem i givim woning ya se: “Ol man ya we oli wantem kam rijman, be oltaem ol samting blong traem yumi oli stap mekem olgeta oli folfoldaon. Ol samting we oli wantem, we oli krangke, mo we oli stap spolem olgeta, oli olsem trap blong kasem olgeta. Nao fasin ya blong wantem evri samting, hem i save pulum olgeta oli kamdaon olgeta, we laef blong olgeta i kam nogud olgeta.”
14. (a) ?Wanem i save blokem wan man blong i no folem advaes blong haremgud long kakae mo klos nomo? (b) ?Olsem wanem mining we i no stret long saed blong rijman i save mekem samfala oli ting nating long woning blong 1 Timote 6:9? (c) ?Olsem wanem fasin blong ‘wantem ol samting we ae i luk’ i save mekem se samfala oli no luksave trap we i stap kasem olgeta?
14 Nating se woning ya i stap, plante man oli fas long trap ya from we oli no ting se advaes ya i stret long olgeta. ?From wanem oli gat tingting olsem? Maet fasin flas i stap pusum olgeta blong holem wan fasin blong laef we oli nidim plante moa samting i bitim ‘kakae mo klos’ nomo, we Baebol i talem se yumi mas haremgud long olgeta. Maet oli ting nating long woning blong Baebol, from we oli ting se hem i stap tokbaot ol man nomo we oli rij bitim mak. Baebol i talem se tingting blong wantem kam rijman, hemia nao samting we i defren olgeta long fasin blong haremgud long kakae mo klos we yumi nidim nomo. (Skelem wetem Hibrus 13:5.) Maet fasin blong ‘wantem ol samting we ae blong olgeta i luk,’ i mekem se oli putum trufala wosip long seken ples long laef blong olgeta. Hemia i min se, oli wantem kasem ol samting we oli luk, nating se oli mas livim sam wok long saed blong speret blong kasem. (1 Jon 2:15-17; Hagae 1:2-8) !Olgeta we oli folemgud ol advaes blong Baebol mo wokbaot wetem Jeova long fasin we oli putum wok blong Hem long fasples long laef blong olgeta, olgeta ya oli glad moa!
No Letem Ol Wari Blong Laef Oli Daonem Yumi
15. ?Wanem sam trabol we oli mekem plante man blong Jeova oli wari, mo yumi mas wekapgud long wanem trap we i save kasem yumi taem yumi gat ol wari olsem?
15 Samting we i kasem plante moa man i bitim tingting blong wantem kam rijman, hemia wari long saed blong ol samting we oli nidim blong laef. Plante man blong Jeova oli gat smol samting nomo. Oli wok strong blong plante haoa evri dei jes blong pem naf klos, wan rum we famle blong olgeta i save slip long hem long naet, mo smol kakae. Sam narafala oli stap harem nogud from oli sik no oli stap kam olfala, no maet wan famle blong olgeta i gat problem olsem. !I isi nomo blong letem ol trabol ya oli winim ol samting long saed blong speret long laef blong yumi!—Matyu 13:22.
16. ?Olsem wanem Jeova i stap givhan long yumi blong winim ol wari blong laef?
16 Wetem lav, Jeova i talem se ol trabol ya bambae oli finis aninit long Kingdom blong Mesaea. (Ol Sam 72:1-4, 16; Aesea 25:7, 8) Mo hem i givhan long yumi naoia tu, blong yumi no letem ol trabol blong laef oli daonem yumi. Blong mekem olsem, hem i givim advaes olsem wanem blong makemaot ol samting we oli impoten moa. (Matyu 4:4; 6:25-34) Ol store we Jeova i pusum ol man blong raetem long Baebol long saed blong fasin we hem i mekem blong givhan long ol man blong hem bifo, oli leftemap tingting blong yumi. (Jeremaea 37:21; Jemes 5:11) Hem i mekem yumi strong taem hem i givim save ya long yumi se, nomata wanem trabol i kasem yumi, hem i no save stop blong laekem ol man we oli stap tru long hem. (Rom 8:35-39) Jeova i talem long ol man we oli trastem hem, i se: “Bambae mi mi no save livim yu yu stap yu wan. Bambae mi mi no save lego yu samtaem.”—Hibrus 13:5.
17. Tokbaot samfala we oli bin gohed blong wokbaot wetem God nating se oli kasem bigfala trabol.
17 Save ya i stap givim paoa long ol trufala Kristin blong oli gohed blong wokbaot wetem God, i bitim we oli lego stret rod mo folem ol fasin blong wol. Sam man long ol pua kantri oli folem waes blong wol. Oli talem se sipos puaman i karem samting we i blong wan rijman from we hem i no gat naf kakae blong famle blong hem, hemia i no fasin blong stil. Be ol man we oli wokbaot from bilif, oli no folem tingting ya. Oli wantem mekem God i glad i bitim eni narafala samting, mo oli wet long hem nomo blong givim pei long olgeta from stret fasin we oli folem. (Proveb 30:8, 9; 1 Korin 10:13; Hibrus 13:18) Wan wido woman long India i faenem se taem hem i wok strong mo i no westem wan samting, hem i save kasem naf samting blong laef. Hem i no kros from we laef blong hem i had. Hem i save se sipos hem i putum Kingdom blong God mo stret fasin i stap long fasples long laef blong hem, bambae Jeova i blesem ol traehad blong hem blong kasem ol samting we hem mo pikinini blong hem i nidim. (Matyu 6:33, 34) Plante taosen man raon long wol we laef blong olgeta i had, oli stap soemaot se Jeova i olsem wan strong haos mo sefples blong olgeta. (Ol Sam 91:2) ?Yu tu yu stap mekem olsemia?
18. ?Wanem nao bigfala samting we i save givhan long yumi blong no foldaon long ol trap blong wol blong Setan?
18 Oltaem we yumi stap laef long rabis wol ya, bambae i gat ol trap we yumi mas lukaotgud blong no foldaon long olgeta. (1 Jon 5:19) Baebol i makemaot olgeta ya mo i soem long yumi olsem wanem blong ronwe long olgeta. Ol man we oli laekem Jeova tumas mo oli fraet blong mekem hem i harem nogud, oli save blokem ol samting ya we oli olsem trap. Sipos ‘tabu speret i gohed blong lidim olgeta,’ bambae oli no lego stret rod mo folem ol fasin blong wol. (Galesia 5:16-25) Ol man we oli rili mekem fasin fren blong olgeta wetem Jeova i faswan samting long laef blong olgeta, oli save putum tingting blong olgeta i stap strong long wan nambawan fyuja, we oli save wokbaot wetem God mo frengud wetem hem blong olwe.—Ol Sam 25:14.
Wanem Ansa Blong Yu?
◻ ?Olsem wanem fasin blong trastem yumi wan tumas i save kam wan trap?
◻ ?Wanem i save blokem fraet long man blong i no bos long yumi?
◻ ?Wanem i save mekem se yumi no folem advaes long saed blong denja blong ronem ol sas samting?
◻ ?Wanem i save givhan long yumi blong no foldaon long trap we yumi wari tumas long ol trabol blong laef?
[Tok blong pija long pej 16, 17]
Plante man oli gohed blong wokbaotwetem God long ful laef blong olgeta