Gohed Blong Wokbaot Long Rod Blong Jeova

“Yu mas putum tingting blong yu i stap strong long Hae God, mo yu mas [folem rod blong hem oltaem], nao bambae hem i ona long yu, i givim graon ya long yu.”​—OL SAM 37:34.

1, 2. Long tingting blong King Deved, ?i minim wanem blong wokbaot long rod blong Jeova, mo samting ya i minim wanem long yumi tede?

“OLTAEM prea blong mi i stap go antap long yu. Plis yu soemaot rod long mi, blong mi mi folem.” (Ol Sam 143:8) Tede, ol Kristin oli stap talem bakegen ol tok ya blong King Deved wetem fulhat blong olgeta. Oli wantem tumas blong mekem Jeova i glad mo blong wokbaot long rod blong hem. ?Samting ya i minim wanem? Long tingting blong Deved, i minim se hem i mas folem loa blong God. I minim tu se hem i mas trastem Jeova, bitim we hem i trastem ol nesen. Hem i mas wosip long Jeova oltaem, be i no ol god blong ol man raonabaot. Long saed blong yumi ol Kristin, yumi mas mekem sam samting moa blong wokbaot long rod blong Jeova.

² Wan samting se tede, blong wokbaot long rod blong Jeova, yumi mas soem bilif long ransom sakrefaes blong Jisas Kraes, mo luksave se Jisas nomo i ‘rod, i stamba blong trutok, mo i stamba blong laef.’ (Jon 3:​16; 14:6; Hibrus 5:9) I minim tu se yumi mas folem “loa blong Kraes.” Blong folem loa ya, yumi mas soem lav long narafala, antap moa, long ol tabu brata blong Jisas. (Galesia 6:2; Matiu 25:34-​40) Olgeta we oli stap wokbaot long rod blong Jeova, oli lavem ol rul mo loa blong hem. (Ol Sam 119:97; Ol Proveb 4:5, 6) Oli tinghevi long nambawan blesing we oli gat, hemia blong joen long Kristin wok blong prij. (Kolosi 4:​17; 2 Timoti 4:5) Olgeta oli prea evridei. (Rom 12:12) Mo oli ‘lukaot gud long fasin blong olgeta. Oli no mekem fasin blong man we i no gat hed, be oli mekem fasin blong man we i waes.’ (Efesas 5:​15) Oli no lego ol rij samting long saed blong spirit jes blong kasem ol samting blong harem gud long bodi blong smoltaem nomo. (Matiu 6:​19, 20; 1 Jon 2:​15-​17) Antap long olgeta samting ya, i impoten tumas blong stap tru long Jeova mo trastem hem oltaem. (2 Korin 1:9; 10:5; Efesas 4:​24) ?From wanem samting ya i impoten tumas? From ol samting we oli stap kamaot tede, oli klosap sem mak long taem blong ol man Isrel bifo.

?From Wanem Yumi Mas Trastem Jeova Mo Stap Tru Long Hem Oltaem?

3. ?From wanem fasin blong trastem, bilif, mo stap tru long Jeova i save givhan long yumi blong wokbaot long rod blong hem?

³ Smol nesen blong Isrel i stap long medel blong ol nesen we oli gat fasin agens. Ol nesen ya oli bitim mak long rabis fasin blong seks, taem oli stap mekem ol lafet blong wosipim ol god blong olgeta. (1 Kronikel 16:26) Ol man Isrel nomo, oli wosipim wan trufala God ya we man i no save luk, hemia Jeova. Mo God ya nomo i askem olgeta blong folem ol gudfala fasin. (Dutronome 6:4) Samting ya i sem mak tede. Sam milyan man nomo oli stap wosipim Jeova. Olgeta ya, oli stap long wan wol we i gat klosap sikis bilyan man we fasin mo tingting blong olgeta long saed blong skul i defren olgeta long tingting blong Jeova. Sipos yumi wan long olgeta ya we i stap wosipim Jeova, yumi mas lukaot gud blong no folem rong rod. ?Olsem wanem blong lukaot gud? Yumi mas stap tru long Jeova God, bilif long hem, mo trastem fulwan se bambae hem i mekem ol promes blong hem oli kamtru. (Hibrus 11:6) Samting ya bambae i givhan long yumi, nao bambae yumi no trastem ol samting we ol man blong wol oli stap trastem.​—Ol Proveb 20:22; 1 Timoti 6:17.

4. ?From wanem “tingting blong ol nesen i stap long tudak”?

⁴ Aposol Pol i soem se ol Kristin oli mas defren long ol man blong wol. Hem i raetem se: “Mi mi talem tok ya long yufala long nem blong Masta blong yumi, mo mi tok strong blong wonem yufala. Bambae yufala i no moa folem ol fasin blong ol hiten man, we tingting blong olgeta i krangke nomo. Tingting blong olgeta ya i stap long tudak nomo. Nao oli stap longwe tumas long laef ya we God i stap givim, from we tingting blong olgeta i kam strong olsem ston nomo, nao oli no gat save.” (Efesas 4:​17, 18) Jisas “hem i prapa laet.” (Jon 1:9) Olgeta we oli tanem baksaed long Jisas, no oli talem se oli bilif long hem be oli no obei long “loa blong Kraes,” “tingting blong olgeta ya i stap long tudak nomo.” Oli no stap wokbaot long rod blong Jeova, “oli stap longwe tumas long laef ya we God i stap givim.” Nomata we oli ting se oli waes olsem wanem long wol ya, be oli ‘no gat waes’ nating, oli no gat save ya we i blong lidim man long laef, hemia save long saed blong Jeova God mo Jisas Kraes.​—Jon 17:3; 1 Korin 3:​19.

5. Nating se laet blong trutok i stap saen long wol, ?from wanem plante man oli no wantem lesin?

⁵ !Nating se i olsem, laet blong trutok i stap saen long wol ya! (Ol Sam 43:3; Filipae 2:​15) “!Yufala i lesin! Naoia waestok i olsem man we i stap singaot olbaot long big rod.” (Ol Proveb 1:​20) Las yia, ol Witnes blong Jeova oli spenem moa long wan bilyan aoa blong tokbaot Jeova God mo Jisas Kraes long ol man raonabaot long olgeta. Plante handred taosen man oli lesin long mesej we oli talemaot. Be tu, plante man oli no wantem lesin long olgeta. ?Bambae yumi sapraes long samting ya? No gat. Pol i bin tokbaot olgeta ya we “tingting blong olgeta i kam strong olsem ston nomo.” Samfala, hat blong olgeta i kam strong olsem ston from we oli tingbaot olgeta nomo no oli lavem mane tumas. Sam narafala, ol giaman skul no tingting blong wol tede i pulum olgeta, nao oli no wantem lesin. Samfala, oli tanem baksaed long God from ol nogud ekspiryens we oli kasem long laef blong olgeta. Sam narafala bakegen, oli no wantem folem ol hae rul blong Jeova long saed blong stret fasin. (Jon 3:​20) ?Olsem wanem long olgeta we oli stap wokbaot long rod blong Jeova? ?Hat blong olgeta i save kam strong olsem ston?

6, 7. Nating se ol man Isrel oli wosip long Jeova God, ?oli foldaon long wanem trap mo from wanem?

⁶ Pol i soem se samting olsem i hapen long ol man Isrel bifo. Hem i raetem se: “Olgeta samting ya i olsem wan saen, we i blong wekemap yumi. I nogud yumi stap wantem ol rabis fasin, olsem olgeta ya bifo. Mo i nogud yumi stap prea long ol narafala god, olsem we sam long olgeta ya oli stap mekem. Baebol i talem se, ‘Olgeta ya oli go sidaon, oli kakae mo oli dring, mo biaen, oli girap, oli go pleplei wetem woman.’ I nogud yumi stap mekem ol fasin nogud wetem woman, olsem we sam long olgeta ya bifo oli stap mekem, nao long wan dei nomo, i gat twanti tri taosen blong olgeta oli ded.”​—1 Korin 10:​6-8.

⁷ Fastaem, Pol i tokbaot taem ya we ol man Isrel oli wosipim wan buluk we oli wokem long gol klosap long Hil Sinae. (Eksodas 32:​5, 6) Oli no obei long God nating, oli brekem wan loa we, sam wik nomo bifo, oli bin promes long Hem se bambae oli folem. (Eksodas 20:​4-6; 24:3) Biaen, Pol i tokbaot taem ya we ol man Isrel oli joen wetem ol gel Moab blong wosip long Bal. (Namba 25:​1-9) Taem oli wosip long buluk, oli bitim mak long samting blong harem gud long saed blong bodi, nao oli girap, ‘oli pleplei wetem woman.’a Taem oli wosip long Bal, oli mekem ol rabis fasin blong seks we i nogud olgeta. (Revelesen 2:​14) ?From wanem ol man Isrel oli mekem ol bigfala sin ya? From we oli letem hat blong olgeta i ‘wantem tumas ol rabis samting’​—maet fasin blong wosip long aedol no ol rabis fasin blong seks we i joen wetem wosip ya.

8. ?Yumi save lanem wanem long stori blong ol man Isrel?

⁸ Pol i soemaot se ol eksampel ya oli mas tijim yumi long sam samting. ?Oli tijim yumi long wanem? Yes, i krangke nomo sipos wan Kristin i bodaon long buluk we oli wokem long gol, no i wosip long god blong ol man Moab. ?Be olsem wanem long rabis fasin blong seks mo fasin blong harem gud bitim mak long ol samting long saed blong bodi? Tufala fasin ya i kam antap bigwan tede. Sipos yumi letem hat blong yumi i laekem tumas ol fasin ya, bambae yumi go longwe olgeta long Jeova. Frut blong samting ya i sem mak long frut blong fasin blong wosip long aedol​—stap longwe long God. (Skelem wetem Kolosi 3:5; Filipae 3:​19.) Yes, long en blong stori we Pol i talem long saed blong ol samting ya, hem i givim advaes long ol Kristin brata sista blong hem se: “I nogud yufala i stap wosip long ol narafala god.”​—1 Korin 10:14.

Help We Yumi Kasem Blong Wokbaot Long Rod Blong Jeova

9. (a) ?Yumi kasem wanem samting we i givhan long yumi blong wokbaot oltaem long rod blong Jeova? (b) ?Wanem wan rod blong harem ‘tok ya we i kamaot biaen long yumi’?

⁹ Sipos yumi stap traehad blong wokbaot long rod blong Jeova oltaem, yumi no mas ting se yumi stap yumi wan, we yumi no kasem help nating. Aesea i talem profet tok ya se: “Sipos yufala i lusum rod, we yufala i gowe long hem long saed i go long lef no long saed i go long raet, be bambae yufala i save harem voes blong hem biaen long yufala, we hem i stap stanap long baksaed blong yufala, i talem se, ‘Hemia rod ya. Yufala i folem.’” (Aesea 30:21) ?Olsem wanem ‘yumi save harem voes ya biaen long yumi’? Yes, i no gat wan man long taem blong yumi we i harem voes blong God stret no i kasem wan mesej long hem, no gat. “Voes” ya we yumi harem, i kam long yumi evriwan long sem fasin. Faswan mo impoten samting we hem i yusum blong toktok long yumi, hemia tru long Tok blong hem Baebol. Long Baebol, i gat ol tingting blong God mo ol stori long saed blong ol wok we hem i mekem wetem ol man. Evridei, yumi harem ol tingting blong ol man we oli “longwe long laef ya we i blong God.” Taswe, sipos yumi wantem stap strong oltaem long saed blong spirit, yumi mas ridim Baebol mo tingting dip long hem evridei. Samting ya bambae i halpem yumi blong tanem baksaed long “ol narafala god ya we oli no gat paoa” mo blong “kam waes long olgeta samting, nao bambae yumi savegud ol rod blong mekem ol gudfala wok.” (Ol Wok 14:14, 15; 2 Timoti 3:​16, 17) Mo tu, samting ya bambae i givim paoa long yumi, i mekem yumi strong, mo bambae i givhan long yumi blong ‘win long evri samting we yumi mekem.’ (Josua 1:​7, 8) Taswe, Tok blong Jeova i talem strong long yumi se: “!Ol yang man! Yufala i lesin gud long mi. Sipos yufala i stap mekem olsem we mi mi talem, bambae yufala i save harem gud. Yufala i mas lesingud long ol samting ya we mi stap tijim yufala long hem. Yufala i mas waes, yufala i no mas tanem baksaed long ol samting ya.”​—Ol Proveb 8:32, 33.

10. ?Wanem narafala rod blong harem ‘tok ya we i kamaot biaen long yumi’?

¹⁰ Yumi stap harem ‘voes we i kamaot biaen long yumi’ tru long wan narafala rod bakegen. Hemia ‘slef we i stret mo waes’ we i stap ‘givim kakae long yumi long stret taem blong hem.’ (Matiu 24:45-​47) Wan rod we slef ya i stap yusum blong givim kakae long yumi, hemia tru long ol buk we oli tokbaot Baebol. Long ol yia we oli jes pas, slef ya i bin givim fulap kakae long yumi. Eksampel, hem i yusum Wajtaoa magasin blong eksplenem gud ol profet tok long yumi. Magasin ya i leftemap tingting blong yumi blong gohed long wok blong prij mo blong mekem disaepol, nating se plante man oli no intres. Mo tu, hem i givhan long yumi blong luksave ol trap, mo i leftemap tingting blong yumi blong wokem ol gudfala Kristin fasin. !Yumi mas tinghevi long ol kakae ya we yumi kasem long stret taem blong hem!

11. Eksplenem namba tri rod blong harem ‘tok ya we i kamaot biaen long yumi.’

¹¹ Slef we i stret mo waes i stap yusum wan narafala rod bakegen blong givim kakae long yumi. Hemia ol miting we yumi gat evri wik. Yumi gat ol miting long ol wanwan kongregesen, ol smol asembli we yumi mekem evri sikis manis, mo ol bigfala asembli we yumi mekem evri yia. Ol trufala Kristin oli no save ting nating long ol miting ya. Oli impoten tumas, from we oli givhan long yumi blong wokbaot long rod blong Jeova. Plante long yumi oli spenem plante taem wetem ol man we oli gat defren bilif, long ples blong wok mo long skul. Taswe, fasin blong joen oltaem long ol Kristin miting i save sevem laef blong yumi. Taem yumi go long ol miting, yumi gat nambawan jans blong “givgivhan long yumi blong mekem yumi strong blong lavem ol man.” (Hibrus 10:24) Yumi lavem ol brata blong yumi tumas, mo yumi laekem joen wetem olgeta.​—Ol Sam 133:1.

12. ?Ol Witnes blong Jeova oli gat strong tingting blong mekem wanem, mo i no longtaem i pas, olsem wanem oli soemaot strong tingting blong olgeta?

¹² Tede, ol kakae ya long saed blong spirit oli givhan long klosap sikis milyan man blong wokbaot long rod blong Jeova. Mo i gat plante milyan narafala man oli stap stadi long Baebol blong lanem olsem wanem blong wokbaot long rod ya. Namba ya i smol nomo taem yumi skelem wetem ful namba blong olgeta man long wol. ?Be olsem wanem? ?Samting ya i mekem tingting blong yumi i foldaon? !No gat! Yumi gat strong tingting blong obei long ‘voes we i kamaot biaen long yumi,’ nao yumi stap gohed nomo blong mekem ol samting we Jeova i wantem. Blong soemaot long pablik se yumi gat strong tingting ya, long 1998/99 Intenasnal mo Distrik Asembli ya “Fasin Blong Laef We God i Glad Long Hem,” ol man we oli stap long taem ya oli agri long wan impoten disisen wetem fulhat blong olgeta. Bambae yumi luk olgeta tok we i stap insaed long impoten disisen ya.

Wan Impoten Disisen

13, 14. ?Wanem tingting blong ol Witnes blong Jeova long saed blong ol samting we oli stap hapen long wol?

¹³ “Yumi, ol Witnes blong Jeova we yumi stap joen long Distrik Asembli ya ‘Fasin Blong Laef We God i Glad Long Hem,’ yumi agri fulwan se rod blong God i beswan rod blong folem long laef. Be, yumi luksave se bighaf blong ol man tede, oli no agri long samting ya. Ol man oli stap folem fulap tingting, waes blong wol, mo advaes blong skul, long saed blong ol beswan rod blong laef. Taem yumi lukluk gud long histri blong man mo laef long wol ya, yumi luksave se tok ya we i kamaot long God, hemia Jeremaea 10:​23, i tru nomo se: ‘Man i no save bos long laef blong hem.’

¹⁴ “Evridei, yumi luk plante samting we i pruvum se tok ya i tru nomo. Bigfala risen, hemia se ol man oli no folem rod blong laef we God i soem. Ol man oli folem wanem we olgeta nomo oli ting se i stret. Trabol nomo i kamaot​—famle i brokdaon, mo ol pikinini oli stap nomo olsem, i no gat wan i soem rod long olgeta; fasin blong ronem ol samting blong laef, we i mekem se laef blong man i kam olsem we i emti nomo mo tingting i foldaon; fasin blong brekem loa, we i mekem fulap man i lusum laef blong olgeta; ol rao mo faet bitwin ol laen, we plante man oli ded from; rabis fasin blong seks i kam antap bigwan, we i mekem se plante man oli kasem sik we i pas i go long narafala tru long seks. Hemia sam nomo long plante problem we i blokem man blong kasem glad, pis, mo seftaem.

15, 16. Long saed blong rod blong laef we God i glad long hem, ?wanem strong tingting i stanap long impoten disisen ya?

¹⁵ “Taem yumi tingbaot ol trabol ya mo se ‘bigfala dei blong God ya we i gat Olgeta Paoa,’ hemia Amageden, i stap kam klosap, (Revelesen 16:14, 16) yumi, ol Witnes blong Jeova, yumi agri se:

¹⁶ “Faswan: Yumi tingbaot oltaem se yumi man blong Jeova God, we yumi givim laef blong yumi i go fulwan long hem, mo bambae yumi bilif strong oltaem long rod we Jeova i mekem tru long Pikinini blong hem, Jisas Kraes. Yumi gat strong tingting blong wokbaot long rod blong God, wok olsem ol Witnes blong hem, mo stap aninit long hae rul blong hem we hem i soemaot long yumi tru long rul blong Jisas Kraes.

17, 18. ?Bambae ol Witnes blong Jeova oli gohed blong holemtaet wanem samting long saed blong ol fasin mo Kristin fasin joen blong ol brata sista?

¹⁷ “Namba tu: Bambae yumi gohed blong fasgud long ol hae rul blong Baebol long saed blong fasin mo long saed blong spirit. Yumi no wantem folem fasin blong ol man blong ol nesen, we oli stap mekem ol krangke fasin we tingting blong olgeta nomo i wantem. (Efesas 4:​17-​19) Yumi gat strong tingting blong stap klin long fored blong Jeova, we ol fasin blong wol ya oli no spolem yumi.​—Jemes 1:27.

¹⁸ “Namba tri: Bambae yumi holemtaet fasin ya blong stap olsem wan Kristin brata mo sista long fulwol, olsem Baebol i talem. Bambae yumi no save tekpat long politik no faet blong ol nesen, bambae yumi no fas long trap ya blong seraot from kala, nesen, mo rao from laen.

19, 20. (a) ?Bambae ol Kristin papa mama oli mekem wanem? (b) ?Bambae ol trufala Kristin oli gohed blong mekem wanem blong soemaot se oli disaepol blong Kraes?

¹⁹ “Namba fo: Yumi, ol papa mama, bambae yumi tijim ol pikinini blong yumi blong folem rod blong God. Bambae yumi folem Kristin laef blong soem eksampel long olgeta. Hemia i minim se yumi ridim Baebol evri dei, mekem famle stadi, mo joen fulwan wetem Kristin kongregesen mo long wok blong prij.

²⁰ “Namba faef: Bambae yumi evriwan i traehad blong wokem ol gudfala fasin we oli kamaot long Man we i wokem yumi, mo bambae yumi traehad blong folem ol fasin mo ol rod blong hem, olsem Jisas i bin mekem. (Efesas 5:1) Bambae yumi letem lav i lidim evri samting we yumi mekem. Long rod ya yumi soemaot se yumi disaepol blong Kraes.​—Jon 13:35.

21-23. ?Bambae ol Witnes blong Jeova oli gohed blong mekem wanem, mo oli bilif strong long wanem samting?

²¹ “Namba sikis: Bambae yumi no letem wan samting i blokem yumi blong gohed blong talemaot gud nius blong Kingdom blong God, mo pulum ol man oli kam disaepol. Bambae yumi tijim olgeta blong folem rod blong God long laef blong olgeta, mo leftemap tingting blong olgeta blong kasem moa trening long ol miting blong kongregesen.​—Matiu 24:14; 28:​19, 20; Hibrus 10:​24, 25.

²² “Namba seven: Long laef blong yumi wanwan no long ogenaesesen blong yumi, bambae yumi gohed oltaem blong putum samting we God i wantem long fasples long laef blong yumi. Bambae yumi yusum Tok blong hem oltaem blong lidim yumi, we bambae yumi no tanem i go long lef no long raet. Olsem nao, bambae yumi soemaot se rod blong God i hae moa long ol rod blong wol. Yumi gat strong tingting blong folem rod blong God long laef blong yumi. !Bambae yumi folemgud rod ya naoia mo oltaem gogo i no save finis!

²³ “Yumi mekem impoten disisen ya from we yumi trastem fulwan promes ya blong Jeova se, man we i mekem samting we God i wantem, bambae hem i stap we i no save lus samtaem. Yumi mekem disisen ya from we yumi bilif se ol rul mo advaes blong Baebol oli beswan rod blong folem long laef tede, mo oli olsem wan nambawan fandesen blong fiuja, blong yumi save holemtaet laef ya we i prapa wan. (1 Timoti 6:​19; 2 Timoti 4:7b, 8) !Antap long olgeta samting ya, yumi mekem impoten disisen olsem from we yumi lavem Jeova God long fulhat, laef, tingting, mo paoa blong yumi!

24, 25. ?Ol man oli givim wanem ansa taem oli harem impoten disisen ya, mo olgeta we oli stap wokbaot long rod blong Jeova oli gat strong tingting blong mekem wanem samting?

²⁴ “Evriwan long yumi we i stap long asembli ya we i agri long disisen ya, plis talem !YES!”

²⁵ I olsem wan bigfala tanda i kamaot long ol haos blong spot mo ol stad taem olgeta evri wan we oli stap long asembli ya oli ansa se “!YES!” Ol Witnes blong Jeova oli gat wan tingting nomo se bambae oli gohed blong wokbaot long rod blong Jeova. Oli trastem Jeova fulwan mo oli bilif se bambae hem i mekem ol promes blong hem oli kamtru. Oli stap tru long hem oltaem, nomata wanem samting i hapen. Mo oli gat strong tingting blong mekem samting we hem i wantem.

“God i Stap Wetem Yumi”

26. ?Olgeta we oli stap wokbaot long rod blong Jeova bambae oli kasem wanem glad?

²⁶ Ol Witnes blong Jeova oli tingbaot advaes ya blong man we i raetem Ol Sam se: “Yu mas putum tingting blong yu i stap strong long Hae God, mo yu mas obei long ol tok blong hem, nao bambae hem i ona long yu, i givim graon ya long yu.” (Ol Sam 37:34) Oli no fogetem tok ya blong Pol we i leftemap tingting se: “God i stap wetem yumi, mo i no gat man nating we i strong moa, we bambae i save agens long yumi. God i no holemtaet stret Pikinini blong hem, i letem hem i ded blong sevem yumi evriwan. Hem i givim stret Pikinini blong hem finis, blong i sevem yumi. Bambae hem i no moa save holemtaet ol narafala samting blong hem, bambae i givim olgeta oli kam nomo long yumi.” (Rom 8:​31, 32) Yes, sipos yumi gohed blong wokbaot long rod blong Jeova, bambae hem i givim “plante samting long yumi, blong yumi harem gud long hem.” (1 Timoti 6:​17) I no gat wan narafala ples we i gud moa i winim ples we yumi stap long hem​—hemia blong wokbaot long rod blong Jeova​—wetem ol gudfala brata sista blong yumi. Jeova i stap long saed blong yumi. I gud yumi holem strong tingting, yumi wokbaot oltaem long rod ya mo stanap strong go kasem en. Yumi mas trastem fulwan se long stret taem blong hem, bambae yumi luk we Jeova i mekem ol laswan promes blong hem oli kamtru.​—Taetas 1:2.

[Futnot]

?Yu Yu Tingbaot?

◻ ?Wan Kristin i nidim wanem blong wokbaot long rod blong Jeova?

◻ ?From wanem yumi nidim blong trastem Jeova mo stap tru long hem oltaem?

◻ ?Yumi save kasem wanem help taem yumi stap wokbaot long rod blong Jeova?

o◻ Talem sam bigfala poen long impoten disisen we i kamaot long Distrik Asembli ya “Fasin Blong Laef We God i Glad Long Hem.”

[Tok Blong Pija Long Pej 18]

Wan impoten disisen i kamaot long Distrik Asembli ya “Fasin Blong Laef We God i Glad Long Hem”