Jeova i God Blong Ol Kontrak

“Bambae mi mi mekem wan nyufala kontrak wetem ol man Isrel mo ol man Juda.”​—JEREMAEA 31:31.

1, 2. (a) ?Wanem lafet we Jisas i stanemap long naet blong Naesan 14, 33 K.T.? (b) ?Jisas i tokbaot wanem kontrak we i joen wetem ded blong hem?

LONG naet blong Naesan 14, 33 K.T.,a Jisas i mekem lafet blong Pasova wetem ol 12 aposol blong hem. Hem i save se hemia laswan kakae we bambae hem i tekem wetem olgeta, mo se i no longtaem, bambae ol enemi blong hem oli kilim hem i ded. Taswe, Jisas i tekem jans ya blong eksplenem plante impoten samting long ol disaepol ya we oli bin wokbaot wetem hem oltaem.​—Jon 13:1 kasem17:26.

² Long taem ya nao, afta we Jisas i sanemaot Judas Iskariot, hem i stanemap wan lafet​—Memoriol blong ded blong hem. Lafet ya nomo, ol Kristin oli mas mekem evri yia. Baebol i talem se: “Taem olgeta oli stap kakae, Jisas i tekem bred, i prea blong talem tangkyu long God from. Nao i brekem, i givim long ol man blong hem, i talem se ‘Yufala i tekem, yufala i kakae. Hemia i minim bodi blong mi.’ Mo i tekem kap, i talem tangkyu long God from, nao i pasem i go long olgeta, i talem se: ‘Yufala evriwan, yufala i dring long hem. From we hemia i minim blad blong kontrak ya. Blad ya blong mi bambae i ron blong tekemaot ol sin blong plante man.’” (Matyu 26:26-​28, NW) Jisas i wantem se biaen, ol man blong hem oli mekem lafet ya blong tingbaot ded blong hem, long fasin we i no flas mo i soem respek. Mo Jisas i tokbaot wan kontrak we i joen long ded blong hem. Buk blong Luk i talem se hemia “nyufala kontrak.”​—Luk 22:​20, NW.

3. ?Wanem ol kwestin we yumi save askem long saed blong nyufala kontrak?

³ ?Wanem ya nyufala kontrak ya? Sipos hem i wan nyufala kontrak, ?i minim se i gat wan olfala kontrak tu? ?I gat sam narafala kontrak we oli joen wetem nyufala kontrak ya? Ol kwestin ya oli impoten, from we Jisas i talem se blad blong kontrak ya i mas ron blong “tekemaot ol sin blong plante man.” Yumi evriwan i rili nidim fasin fogif ya.​—Rom 3:​23.

Wan Kontrak Wetem Ebraham

4. ?Wanem promes we God i mekem long taem bifo i halpem yumi blong kasem save long nyufala kontrak?

⁴ Blong kasem save moa long saed blong nyufala kontrak ya, yumi mas tingtingbak 2,000 yia bifo we Jisas i prij long wol ya. Hemia taem we Teraha mo famle blong hem​—wetem Ebram (we biaen i kam Ebraham) mo waef blong hem, Sarae (we biaen i kam Sera)​—oli aot long rij taon blong Uru long Koldia, oli mekem longfala trep i go long Haran we i stap long not blong Mesopotemia. Oli stap long ples ya go kasem taem we Teraha i ded. Ale, folem oda blong Jeova, Ebraham we i gat 75 yia finis, i krosem Reva Yufretes mo i wokbaot i go long saotwes, go kasem kantri blong ol man Kenan. Long ful laef blong hem, hem i wokbaot olbaot long kantri ya, mo hem i slip long haos tapolen nomo. (Jenesis 11:31–​12:​1, 4, 5; Ol Wok 7:​2-5) Ebraham i kamtru long kantri ya long 1943 B.K.T. Taem Ebraham i stap yet long Haran, Jeova i bin talem long hem se: “Bambae mi mi mekem we yu yu gat plante pikinini we bambae oli kamaot biaen long yu, nao bambae olgeta ya oli kam plante we i plante. Bambae oli kam wan strongfala nesen. Mi bambae mi blesem yu, mo bambae mi mekem we plante man oli savegud nem blong yu, blong yu bambae yu kam olsem rod blong mi blong mi blesem plante man. Olgeta we oli singaot long mi blong mi blesem yu, mi bambae mi blesem olgeta, be olgeta we oli singaot trabol i kam long yu, mi bambae mi mekem trabol i kam long olgeta. Mi bambae mi yusum yu blong blesem ol man blong olgeta narafala kantri long wol.” Biaen, afta we Ebraham i kamtru long Kenan, Jeova i talem long hem se: “Hemia nao graon ya we bambae mi mi givim long olgeta we bambae oli kamaot biaen long yu.”​—Jenesis 12:​2, 3, 7.

5. ?Promes we Jeova i mekem long Ebraham i joen wetem wanem impoten profet tok?

⁵ Promes ya we i go long Ebraham i joen wetem wan narafala promes blong Jeova tu. Yes, promes ya i mekem se Ebraham i kam wan impoten man, from we hem i givhan blong mekem faswan profet tok blong Baebol i kamtru. Afta we Adam moIv i sin long garen blong Iden, Jeova i talemaot jajmen blong hem long tufala. Long semtaem, hem i tok long Setan we i bin gyaman long Iv, i se: “Bambae mi mi mekem we yu mo woman ya, yutufala i enemi blong yutufala, mo laen blong yu mo laen blong hem, tufala i enemi blong tufala. Hem bambae i kilim hed blong yu, mo yu bambae yu givim kil long bak blong leg blong hem.” (Jenesis 3:​15, NW) Kontrak we Jeova i mekem wetem Ebraham i soemaot se Laen ya we i mas spolem olgeta wok blong Setan, bambae i kamaot long olfala Ebraham ya.

6. (a) ?Jeova i yusum hu blong mekem promes blong hem long Ebraham i kamtru? (b) ?Wanem ya kontrak blong Ebraham?

⁶ From we promes blong Jeova i joen wetem wan laen, i minim se Ebraham i nidim wan pikinini boe we Laen ya i save kamaot long hem. Be, Ebraham mo Sera i olfala finis mo tufala i no gat pikinini yet. Smoltaem biaen, Jeova i blesem tufala, i mekem wan merikel nao tufala i kam naf blong karem pikinini. Ale, Sera i bonem wan pikinini boe blong Ebraham, nem blong hem Aesak. Long rod ya, promes blong laen ya i no lus. (Jenesis 17:15-​17; 21:​1-7)Sam yia biaen, Jeova i traem bilif blong Ebraham taem i askem long hem blong kilim boe blong hem, Aesak, we Ebraham i laekem hem tumas, olsem wan sakrifaes. Afta long samting ya, Jeova i talemaot promes blong hem bakegen long Ebraham, i se: ‘Mi mi promes long yu se bambae mi blesem yu tumas. Olgeta we bambae oli kamaot biaen long yu, bambae oli plante tumas. Bambae oli plante olsem ol sta long skae. Bambae oli plante tumas olsem ol sanbij daon long solwora. Olgeta ya bambae oli stap winim ol enemi blong olgeta. From laen blong yu, olgeta nesen blong wol bambae oli kasem blesing. Samting ya bambae i kamaot from we yu yu lesin long tok blong mi.’ (Jenesis 22:15-​18) Plante taem, ol man oli kolem promes ya se kontrak blong Ebraham. Nyufala kontrak we bambae i kamaot biaen, i joen wetem hem.

7. ?Olsem wanem namba blong ol man long laen blong Ebraham i stat kam plante, mo from wanem oli go stap long Ijip?

⁷ Samtaem biaen, Aesak i gat tu pikinini boe we oli twin, hemia Esao mo Jekob. Jeova i jusum Jekob blong i kam bubu blong Laen ya we hem i promes blong mekem i kamtru. (Jenesis 28:10-​15; Rom 9:​10-​13) Ale, Jekob i gat 12 pikinini boe. I klia se, hemia nao stret taem blong mekem laen blong Ebraham i kam plante. Taem ol pikinini boe blong Jekob oli kam bigman, we plante blong olgeta oli gat prapa famle blong olgeta finis, kantri we oli stap long hem i kam sot long kakae. From samting ya, olgeta evriwan oli mas aot i go long Ijip. Long ples ya, God i lidim finis wan pikinini blong Jekob, hemia Josef, blong i mekem rod i rere. (Jenesis 45:​5-​13; 46:26, 27) Afta long sam yia, i no moa gat hadtaem long saed blong kakae long Kenan. Be, famle blong Jekob i stap long Ijip nomo​—fastaem, oli olsem ol strenja we oli kam visitim kantri ya, be biaen, oli kam ol slef. Long yia 1513 B.K.T., 430 yia afta we Ebraham i krosem Reva Yufretes, Moses i jes lidim ol pikinini blong Jekob oli aot long Ijip blong gofri. (Eksodas 1:​8-​14; 12:40, 41; Galesia 3:​16, 17) Naoia, Jeova i stat lukluk moa long saed blong kontrak we hem i bin mekem wetem Ebraham.​—Eksodas 2:​24; 6:​2-5.

“Olfala Kontrak”

8. ?Jeova i mekem wanem kontrak wetem ol pikinini blong Jekob long Sinae, mo olsem wanem samting ya i joen wetem kontrak blong Ebraham?

⁸ Taem Jekob mo ol pikinini blong hem oli go stap long Ijip, oli olsem wan famle nomo. Be, taem oli aot long Ijip, oli wan bigfala grup blong man we oli blong plante defren laen. (Eksodas 1:​5-7; 12:37, 38) Bifo we Jeova i lidim olgeta oli go long Kenan, hem i pulum olgeta blong go long saot, kolosap long wan bigfala hil we nem blong hem Horeb (no, Sinae) long Arebia. Long ples ya nao, hem i mekem wan kontrak wetem olgeta. Kontrak ya i karem nem ya “olfala kontrak,” blong makemaot hem se i defren long ‘nyufala kontrak.’ (2 Korin 3:​14) Tru long olfala kontrak ya, Jeova i mekem kontrak blong hem wetem Ebraham i kamtru long smol fasin.

9. (a) Long kontrak blong Ebraham, ?wanem fofala samting we Jeova i promes blong mekem? (b) ?Kontrak we Jeova i mekem wetem Isrel i givim wanem jans long olgeta, mo samting ya i dipen long wanem?

⁹ Jeova i eksplenem ol rul blong kontrak ya long nesen blong Isrel, i se: ‘Sipos yufala i obei long mi, mo yufala i holemgud kontrak ya we mi mekem wetem ol bubu blong yufala bifo, bambae yufala i nambawan man blong mi, i winim ol narafala man long wol. Nating we olgeta man blong wol ya oli blong mi, be bambae yufala i wan tabu nesen, mo bambae yufala i wan kingdom blong ol pris.’ (Eksodas 19:​5, 6) Jeova i bin promes finis se laen blong Ebraham bambae (1) i kam plante we i plante, (2) i winim ol enemi blong hem, (3) i tekem kantri blong Kenan olsem graon blong hem, mo (4) i kam rod blong blesem ol narafala nesen. Ale, hem i soemaot se ol man Isrel nao oli save kasem ol blesing ya olsem wan spesel grup blong man we oli blong hem. Mo oli save kam wan ‘kingdom blong ol pris mo wan tabu nesen,’ sipos oli obei long olgeta loa blong hem. ?Ol man Isrel oli agri blong joen long kontrak ya? Olgeta evriwan oli ansa wantaem se: “Bambae mifala i mekem olgeta samting we Hae God i talem.”​—Eksodas 19:8.

10. ?Olsem wanem Jeova i mekem Isrel i kam wan nesen, mo hem i wantem olgeta blong mekem wanem?

¹⁰ Taswe, Jeova i mekem wan plan we ol man Isrel oli save folem blong wok olsem wan nesen. Hem i givim sam loa long olgeta long saed blong fasin blong wosip, mo sam loa long saed blong laef. Mo tu, hem i stanemap wan haos tapolen blong oli save mekem wosip long hem (biaen oli yusum haos prea long Jerusalem), mo i putumap sam pris blong mekem tabu wok long haos tapolen ya. Blong holem kontrak ya, oli mas obei long olgeta loa blong Jeova, antap moa, oli mas wosip long Hem nomo. Faswan blong ol Ten Komanmen, we oli olsem faondesen blong olgeta loa, hemia se: “Mi mi [Jeova], mi God blong yufala. Mi ya nao mi tekemaot yufala long Ijip, long ples ya we yufala i stap wok slef long hem. Bambae yufala i no mekem wosip long ol narafala god, yufala i mas mekem wosip long mi nomo.”​—Eksodas 20:​2, 3.

Kontrak Blong Loa i Givim Blesing

11, 12. ?Long wanem rod, ol promes blong olfala kontrak oli kamtru long Isrel?

¹¹ ?Ol promes we God i talem long Kontrak blong Loa, oli kamtru long Isrel? ?Ol man Isrel oli rili kam wan ‘tabu nesen’? Olgeta ya oli gat sin from we oli pikinini blong Adam. (Rom 5:​12) Be, aninit long Loa, oli givim sam sakrifaes oli go long God blong tekemaot sin blong olgeta. Jeova i tokbaot ol sakrifaes we oli mas mekem evri yia long Dei Blong Stretem Sin, i se: “Long dei ya, bambae ol pris oli mekem wan spesel wok blong yu blong bambae yu save kam klin. Bambae yu klin long olgeta sin blong yu long fored blong Jeova.” (Levitikas 16:30) Taswe, taem ol man Isrel oli obei, oli stap olsem wan tabu nesen, mo oli klingud blong mekem wok blong Jeova. Be blong stap klin oltaem, oli mas gohed blong obei long Loa mo givim ol sakrifaes.

¹² ?Olsem wanem? ?Ol man Isrel oli kam wan ‘kingdom blong ol pris’? Stat long taem ya we kontrak i stanap, oli wan kingdom we Jeova i King blong olgeta long heven. (Aesea 33:22) Mo tu, aninit long kontrak blong Loa, ol man Isrel oli save gat wan man we i olsem king blong olgeta. Taswe, biaen, i gat sam king oli rul long Jerusalem long nem blong Jeova. (Dutronome 17:14-​18) ?Be ol man Isrel oli rili wan kingdom blong ol pris? I tru se, i gat sam pris we oli mekem tabu wok long haos tapolen. Haos tapolen (biaen hem i haos prea) i stampa ples blong trufala wosip blong ol man Isrel wetem ol man we oli no blong Isrel tu. Mo nesen ya, hem i rod ya nomo we God i yusum blong talemaot ol nyufala trutok blong hem long ol man. (2 Kronikel 6:​32, 33; Rom 3:​1, 2) Ol man Isrel we oli stap tru long God, olgeta evriwan oli “wetnes” blong Jeova, i no jes ol pris long laen blong Livae nomo. Ol man Isrel oli “wokman” blong Jeova. God i putumap nesen ya blong i ‘talemaot ol nambawan wok blong hem.’ (Aesea 43:10, 21) Plante man blong narafala kantri, we oli gat tingting daon, oli luk paoa blong Jeova taem hem i sevem ol man blong hem, mo samting ya i pulum olgeta blong joen long trufala wosip. Oli kam ol proselaet. (Josua 2:​9-​13) Be i gat wan laen nomo long nesen ya we i rili wok olsem ol tabu pris.

Ol Proselaet Long Isrel

13, 14. (a) ?From wanem yumi save talem se ol proselaet oli no joen long kontrak blong Loa? (b) ?Olsem wanem ol proselaet oli stap aninit long kontrak blong Loa?

¹³ ?Olsem wanem long ol proselaet? Jeova i mekem kontrak wetem ol man Isrel nomo. ‘Ol narafala man we oli go wetem olgeta,’ oli no joen long kontrak ya, nating se oli stap long taem ya we God i mekem kontrak ya. (Eksodas 12:38; 19:​3, 7, 8) Ol man Isrel oli no kaontem ol fasbon pikinini blong ol narafala man ya taem oli pem wan ransom praes blong ol fasbon blong Isrel. (Namba 3:​44-​51) Plante yia biaen, Isrel i seraotem graon blong Kenan i go long ol wanwan laen. Long taem ya, i no gat wan pis graon i go long olgeta we oli no man Isrel, nating se oli joen long wosip blong ol man Isrel. (Jenesis 12:7; Josua 13:​1-​14) ?From wanem? From we God i no mekem kontrak blong Loa wetem ol proselaet. Nating se i olsem, ol man we oli proselaet oli sakomsaes folem Loa. Oli folem ol rul blong Loa ya, mo oli kasem plante gudfala samting from Loa ya. Ol proselaet wetem ol man Isrel tu oli stap aninit long kontrak blong Loa.​—Eksodas 12:48, 49; Namba 15:14-​16; Rom 3:​19.

¹⁴ Eksampel, sipos wan proselaet i kilim wan man i ded we hem i no minim, hem i gat raet blong ronwe i go long ol spesel taon blong haed, long sem fasin we ol man Isrel oli save mekem. (Namba 35:15, 22-​25; Josua 20:9) Long Dei Blong Stretem Sin, ol pris oli mekem wan sakrifaes “blong fulwan kampani blong ol man Isrel.” Ol proselaet, we oli haf blong kampani ya, oli joen long ol samting we ol man oli mekem long taem ya, mo sakrifaes ya i tekemaot sin blong olgeta tu. (Levitikas 16:​7-​10, 15, 17, 29; Dutronome 23:​7, 8) Samting we i kamaot long Pentekos 33 K.T. i soem se ol proselaet wetem ol man Isrel tugeta, oli stap aninit long Loa. Long taem ya we oli yusum faswan ‘ki blong kingdom’ blong givhan long ol Jyu, ol proselaet tu oli kasem blesing from. Taswe, ‘Nikolas wan man Antiok, we hem i wan proselaet,’ i kam wan Kristin. Mo, hem i wan long ol ‘seven man we oli gat gudnem long fes blong ol man,’ we oli bin putumap olgeta blong lukaot long ol nid blong ol Kristin long Jerusalem.​—Matyu 16:19; Ol Wok 2:​5-​10; 6:​3-6; 8:​26-​39.

Jeova i Blesem Laen Blong Ebraham

15, 16. ?Olsem wanem kontrak blong Loa i mekem kontrak blong Jeova wetem Ebraham i kamtru?

¹⁵ Taem ol pikinini blong Ebraham oli kam wan nesen aninit long Loa, Jeova i blesem olgeta folem promes we hem i bin mekem long olfala Ebraham. Long 1473 B.K.T.,Josua, we i tekem ples blong Moses, i lidim ol man Isrel oli go insaed long Kenan. Nao, oli seraotem graon blong kantri ya i go long ol wanwan laen blong Isrel. Samting ya i mekem promes blong Jeova i kamtru se bambae hem i givim graon ya long laen blong Ebraham. Taem Isrel i stap tru long Jeova, Hem i mekem promes blong hem i kamtru, se bambae oli winim ol faet agensem ol enemi blong olgeta. Samting ya i tru moa long taem we King Deved i rul. Namba tri haf blong kontrak blong Ebraham, i kamtru long taem blong pikinini blong Deved, hemia Solomon. “Juda mo Isrel oli kam plante, olsem sanbij kolosap long solwora, mo oli stap kakae, dring mo haremgud tumas.”​—1 King 4:​20.

¹⁶ Be, ?olsem wanem olgeta nesen bambae oli kasem blesing tru long Isrel, laen ya blong Ebraham? Olsem yumi talem finis, Isrel i spesel nesen blong Jeova we i wok long nem blong Jeova long medel blong ol narafala nesen. Smoltaem bifo we Isrel i wokbaot i go insaed long Kenan, Moses i talem se: “Yufala ol nesen i mas stap glad wetem ol man blong God.” (Dutronome 32:43) Plante man blong narafala kantri oli lesin long tok ya. Wan bigfala grup blong ol “narafala man” oli folem Isrel finis blong aot long Ijip. Taem oli wokbaot long draeples, ol narafala man ya oli bin luk paoa blong Jeova, mo oli bin harem tok blong Moses blong stap glad wetem ol man blong God. (Eksodas 12:​37, 38) Biaen, wan woman Moab we nem blong hemRut, i maredem Boas, wan man Isrel, mo woman ya i kam bubu blong Mesaea. (Rut 4:​13-​22) Jonadab, wan man Kenaet, wetem olgeta pikinini blong hem, mo Ebedmelek, wan man Itiopia, oli soemaot klia se oli stap obei long God taem oli fasgud long ol stret rul, nating se plante man Isrel oli no stap tru long God. (2 King 10:15-​17; Jeremaea 35:​1-​19; 38:​7-​13) Taem gavman blong Pesia i rul, plante man blong ol narafala kantri oli kam proselaet, mo oli faet wetem ol man Isrel agensem ol enemi blong olgeta.​—Esta 8:​17, futnot NW.

I Nidim Wan Nyufala Kontrak

17. (a) ?From wanem Jeova i sakemaot ol kingdom blong Isrel long not mo saot? (b) ?Wanem i mekem se God i sakemaot ol man Jyu olgeta?

¹⁷ Be, blong kasem promes blong God fulwan, spesel nesen ya i mas stap tru long Hem. Be, Isrel i no mekem olsem. I tru se, i gat samfala man Isrel we oli soemaot nambawan fasin blong holemtaet bilif. (Hibrus 11:32 kasem 12:1) Be, plante taem, ol man Isrel olsem wan nesen, oli wosipim ol gyaman god. Oli hop se bambae oli kasem plante samting blong olgeta from. (Jeremaea 34:​8-​16; 44:​15-​18)Sam man oli obei long Loa folem tingting blong olgeta nomo, mo samfala oli no obei long Loa nating. (Nehemaea 5:​1-5; Aesea 59:​2-8; Malakae 1:​12-​14) Afta we Solomon i ded, Isrel i seraot long tu haf, wan kingdom long not mo wan long saot. Taem kingdom blong not i rebel fulwan, Jeova i talem se: “From we yufala i sakemaot save, mi tu bambae mi sakemaot yufala blong yufala i no moa mekem wok olsem pris blong mi.” (Hosea 4:6) Kingdom blong saot i kasem bigfala panis tu, from we i no stap tru long kontrak ya. (Jeremaea 5:​29-​31) Taem ol man Jyu oli sakemaot Jisas olsem Mesaea, Jeova i sakemaot olgeta. (Ol Wok 3:​13-​15; Rom 9:31 kasem10:4) Ale, Jeova i wokem wan nyufala plan blong mekem kontrak blong hem wetem Ebraham i kamtru kasem fulmak blong hem.​—Rom 3:​20.

18, 19. ?Wanem nyufala plan we Jeova i stanemap blong mekem se kontrak blong Ebraham i kamtru fulwan?

¹⁸ Nyufala plan ya, hemia nyufala kontrak. Jeova i talemaot samting ya taem hem i se: “Jeova blong ol ami i talem se: ‘!Yufala i luk! Ol dei oli stap kam we bambae mi mi mekem wan nyufala kontrak wetem ol man Isrel mo ol man Juda . . . ’ Jeova i talem se: ‘Hemia nao kontrak ya we bambae mi mi mekem wetem ol man Isrel taem ol dei ya oli finis. Bambae mi mi putum loa blong mi insaed long olgeta, bambae mi raetem loa ya long hat blong olgeta. Bambae mi mi kam God blong olgeta, mo olgeta bambae oli kam ol man blong mi.’”​—Jeremaea 31:31-​33.

¹⁹ Hemia nao nyufala kontrak we Jisas i tokbaot long Naesan 14, 33 K.T. Long dei ya, hem i soemaot se stret taem i kam blong Jeova i mekem kontrak ya we hem i bin promes blong mekem wetem ol disaepol blong Jisas, mo Jisas nao i olsem man blong tekem kontrak ya i kamtru long olgeta. (1 Korin 11:25; 1 Timote 2:5; Hibrus 12:24) Nyufala kontrak ya bambae i mekem se promes blong Jeova long Ebraham bambae i kamtru bakegen long fasin we i bigwan moa, mo we i stap longtaem. Bambae yumi lukluk moa long saed ya long nekiswan stadi.

[Futnot]

?Yu Yu Save Eksplenem?

◻ ?Jeova i mekem wanem promes long kontrak blong Ebraham?

◻ ?Olsem wanem Jeova i mekem kontrak blong Ebraham i kamtru long ol prapa man Isrel?

◻ ?Olsem wanem ol proselaet oli kasem blesing from olfala kontrak?

◻ ?From wanem i nidim wan nyufala kontrak?

[Tok blong pija long pej 9]

Jeova i yusum kontrak blong Loa, blong mekem kontrak blong Ebraham i kamtru long smol fasin