Ol Jyos Oli Talemaot Sin Blong Olgeta
“Pop i Mekem Jyos i Pas Long Kot.” “Inkwisisin mo Fasin Blong Agensem Ol Man Jyu—Jyos i Stap Mekemrere Mea Kulpa Blong Hem.”a “Mea Kulpa From Raf Fasin Blong Ol Nasi.” “Ol Metodis Oli Talem Sore Long Ol Indian Long Wes.”
?YU YU bin ridim ol store olsem long nyuspepa? I luk olsem we plante moa jyos naoia oli stap talemaot se oli gat fol, mo oli sore from plante samting we oli bin mekem long ol handred yia we oli pas. Ol nyuspepa oli stap talemaot oltaem ol nyufala ‘mea kulpa’ blong pop.
Taem Pop i Askem Fogif
Wan man we i raetem ol store blong Vatikan, Luigi Accattoli, i talem long buk blong hem, Quando il papa chiede perdono (Taem Pop i Askem Fogif) se, stat long 1980 go kasem 1996, bitim 94 taem, Jon Pol 2 ‘i talemaot se Jyos i gat fol, mo i askem fogif’ from ol sin we jyos i bin mekem long ol yia we oli pas. Man ya Accattoli i talem se, “long Katolik Jyos, pop nomo i gat raet blong mekem wan mea kulpa.” Mo hem i mekem olsemia, taem hem i talemaot sam nogud samting we Katolik Jyos i mekem long ol yia we oli pas, we plante toktok i bin kamaot from. Hemia ol Krusad, ol bigfala faet, fasin blong sapotem ol strong rula we oli bin mekem i raf bitim mak long ol man, fasin seraot insaed long jyos, fasin blong agensem ol man Jyu, ol Inkwisisin, Mafia, mo fasin blong agensem man blong narafala kala no kantri. Long wan leta we Jon Pol 2 i sanem i go long ol kadinol blong jyos long 1994 (samfala oli talem se leta ya i moa impoten i bitim olgeta narafala leta blong pop), hem i tokbaot “ol sin we jyos i bin mekem long taosen yia we i pas.”
Plante lida blong jyos oli folem fasin ya blong pop. Long Desemba 1994, nyuspepa blong Itali, Il Giornale, i talem se: “Plante bisop blong Amerika oli toktok long televisen blong askem ol man blong fogivim olgeta.” ?From wanem? From we oli no bin tinghevi long problem ya, we plante pris oli stap mekem nogud long saed blong seks wetem ol pikinini, mo spolemgud ol yangfala ya. Long Janewari 1995, nyuspepa ya La Repubblica i tokbaot “wan samting we neva Katolik jyos i mekem bifo”—oli lukluk long bisnes ya, se from wanem Pop Pius 12 i no bin tok agensem ol raf fasin blong ol Nasi. Long Janewari 1995, semfala nyuspepa ya i talem se bisop blong Jemani i askem fogif from “plante rong” blong ol Katolik we oli bin sapotem raf fasin blong ol Nasi. Plante Protestan jyos tu oli bin talemaot sam rong blong olgeta.
?From Wanem Oli Askem Fogif?
Baebol i talem se yumi mas askem fogif taem yumi mekem wan nogud samting, taswe plante man oli tinghae long ol jyos taem oli talemaot rong blong olgeta. (Jemes 5:16) ?Be from wanem ol jyos oli mekem olsemia? ?Fasin ya i mas jenisim tingting we yumi gat long saed blong olgeta ya?
[Futnot]
a Hemia Latin tok we i minim, “fol blong mi.” Hem i haf blong wan prea blong ol Katolik (Confiteor, no, “Mi mi talemaot sin blong mi”). Long prea ya, ol man blong jyos oli talem Latin tok ya.