?Yu Yu Rimemba?

?Yu faenem se ol Wajtaoa we oli jes kamaot i no longtaem oli bin givhan long yu? Ale, traem luk sipos yu save ansa long ol kwestin ya.

◻ ?Olsem wanem “dei blong Masta” i defren long “dei blong Jeova”? (Revelesen 1:​10; Joel 2:​11)

Long “dei blong Masta,” ol 16 vison we Revelesen japta 1 kasem 22 i tokbaot, oli kamtru. Mo tu, ol stampa samting we Jisas i talemaot blong ansa long kwestin we ol man blong hem oli askem, long saed blong saen we i soemaot se hem i stap finis, oli kamtru long dei ya. Taem dei blong Masta i kasem fulmak blong hem, dei blong Jeova we i mekem ol man oli fraet, bambae i faerap. Hemia taem we Jeova bambae i mekem jajmen blong hem i kamtru long rabis wol ya blong Setan. (Matyu 24:​3-​14; Luk 21:11)​—12/15, pej 11.

◻ ?Wanem sam nambawan poen long Baebol blong Makarios?

Nem blong Jeova i stap bitim 3,500 taem long Baebol blong Makarios. Wan man we i stadi long ol buk blong jyos long lanwis blong Rasia i talem se: “Baebol [ya] i folemgud olgeta tok long Hibru hanraet, mo ol tok we hem i yusum oli tru mo stretgud long ol samting we Baebol i tokbaot.”​—12/15, pej 27.

◻ ?Wanem ya “trutok” we i save mekem yumi kam friman, olsem Jisas i talem? (Jon 8:​32)

Taem Jisas i talem “trutok” long ples ya, hem i minim ol save we oli kamaot long God, we yumi save ridim yet long Baebol. Save ya i long saed blong samting we God i wantem yumi blong mekem.​—1/1, pej 3.

◻ ?Jehu mo Jonadab oli pija blong hu long taem blong yumi?

Jehu i pija blong Jisas Kraes, we “Isrel blong God,” hemia ol tabu Kristin, oli wok long nem blong hem long wol ya. (Galesia 6:​16; Revelesen 12:17) Olsem Jonadab we i kam blong mitim Jehu, wan “bigfala hif blong man” blong ol defren kantri, oli sapotem ol man blong Jisas long wol ya. (Revelesen 7:​9, 10; 2 King 10:15)​—1/1, pej 13.

◻ ?I minim wanem blong ‘wokbaot wetem God’? (Jenesis 5:​24; 6:9)

Hemia i minim se olgeta we oli mekem samting ya, olsem Inok mo Noa, oli mekem ol samting we i soemaot se oli gat strong bilif long God. Oli mekem ol samting we Jeova i talem long olgeta blong mekem, mo oli jenisim sam samting long laef blong olgeta blong mekem i laenap wetem ol save we oli gat long saed blong Jeova mo fasin we hem i mekem long ol man.​—1/15, pej 13.

◻ ?From wanem i gud we wan man i mekem plan, blong givhan long famle blong hem sipos hem i ded?

Yumi save talem se fasin ya blong wan man blong mekem plan naoia, we i save lukaot long famle blong hem sipos hem i ded, i olsem wan presen we hem i givim long olgeta. Samting ya i soem lav blong hem. Hem i soemaot se hem i wantem ‘lukaotgud long olgeta we oli stap long haos blong hem,’ nating sipos hem i no moa stap wetem olgeta. (1 Timote 5:8)​—1/15, pej 22.

◻ ?“Olfala kontrak” i soemaot wanem samting? (2 Korin 3:​14)

Hem i olsem wan pija blong sam samting long nyufala kontrak. Wetem ol sakrifaes we ol man oli mas mekem bakegen mo bakegen, Loa i soemaot se ol man oli rili nidim wan samting blong sevem olgeta long sin mo ded. Loa i wan ‘tija we i lidim ol man oli go long Kraes.’ (Galesia 3:​24)​—2/1, pej 14.

◻ ?Long wanem fasin nyufala kontrak i no save finis? (Hibrus 13:20)

Faswan samting, nyufala kontrak i defren long kontrak blong Loa, from we bambae i neva gat wan narafala kontrak i tekem ples blong hem. Namba tu samting, ol blesing we oli kamaot from nyufala kontrak ya bambae oli stap blong olwe. Mo namba tri samting, olgeta we oli laef long wol, aninit long Kingdom blong God bambae oli gohed blong kasem ol gudfala samting long Wan Taosen Yia, from plan blong nyufala kontrak ya.​—2/1, pej 22.

◻ ?Wanem ol gudfala samting we oli kamaot taem man i gat fasin tangkyu?

Gudfala filing we wan man i kasem from fasin tangkyu we i stap long hat blong hem, i mekem se hem i hapi mo i gat pis. (Lukluk Proveb 15:13, 15.) From we fasin tangkyu i wan gudfala fasin, hem i givhan long man blong blokem ol nogud filing olsem kros, jelas, mo fasin agens.​—2/15, pej 4.

◻ ?Ol Kristin we tabu speret i makemaot olgeta, oli joen long wanem kontrak?

Faswan, oli joen long nyufala kontrak, we Jeova i mekem wetem ol man Isrel long saed blong speret. Namba tu, oli joen long kontrak long saed blong Kingdom, we Jisas i mekem wetem ol man we oli folem hem, mo we tabu speret i makemaot olgeta. (Luk 22:20, 28-​30)​—2/15, pej 16.

◻ Ol man Isrel oli kasem oda blong go long tri bigfala lafet. ?Wanem ol lafet ya?

Lafet Blong Bred We i No Gat Is Long Hem, we i kam stret afta long Pasova blong Naesan 14; Lafet Blong Ol Wik, we i stap long namba 50 dei afta Naesan 16; Lafet Blong Karem Kakae Long Garen, no Lafet Blong Ol Wansaed Haos, long namba seven manis. (Dutronome 16:​1-​15)​—3/1, pej 8, 9.

◻ ?From wanem, fasin blong joen wanples wetem ol Kristin i wan blesing?

Jisas i talem se: “Taem tu tri man oli joen wanples long nem blong mi, mi mi stap long medel blong olgeta.” (Matyu 18:20; 28:20) Mo tu, wan impoten rod blong kasem kakae long saed blong speret, hemia ol miting blong kongregesen mo ol asembli. (Matyu 24:45)​—3/1, pej 14.

◻ ?Wanem stampa blong nem ya, Nimrod?

Plante man blong hae save oli agri se nem ya Nimrod hem i no prapa nem we man ya i kasem taem hem i bon. Be, oli ting se ol man oli givim nem ya long hem afta nomo, taem fasin stronghed blong hem i kam long klia ples.​—3/15, pej 25.

◻ ?Famle i impoten olsem wanem long ol man?

Yumi evriwan i nidim famle laef. Ol samting we oli hapen long ol yia we oli pas, oli soem se taem famle laef i kam nogud, ol velej mo kantri oli no moa gat paoa. Taswe, famle i givhan bigwan long ol man blong gat strong tingting we i no olbaot, mo i givhan long ol pikinini mo ol pikinini blong olgeta bakegen, blong oli haremgud.​—4/1, pej 6.

◻ ?Wanem trifala pruf we oli soemaot se Baebol i rili Tok blong God:

(1) Hem i laenap wetem sayens; (2) i gat plante gudfala rul insaed long hem we oli stretgud long laef blong yumi tede mo long eni narafala taem tu; (3) i gat plante profet tok we oli kamtru finis, olsem histri i pruvum.​—4/1, pej 15.