Wan King We i Gat Fulap Sas Samting Mo Waes
?Yu yu ting se ol sas samting oli save mekem yu yu hapi? ?Sipos wan man i givim bigfala mane long yu, bambae yu yu harem nogud from? No gat, bambae yu glad ya. Ating bambae i no hadwok long yu blong tingbaot ol defren rod blong yusum mane ya.
TRU tumas, i gat plante samting blong pem blong mekem yumi haremgud mo glad moa long laef. Mane i save “lukaotgud long man” from i save givhan long man blong stretem sam problem we maet oli kasem hem kwiktaem, olsem taem hem i sik no sipos hem i lusum wok blong hem.—Eklesiastis 7:12.
Be, ?olsem wanem mane i save joen wetem fasin blong hapi? ?Yu yu gat semfala tingting olsem plante man, se glad i kamaot from ol sas samting? Ating i hadwok blong faenem ansa long ol kwestin ya from we i isi blong kaontem mane, be i no gat rod blong kaontem glad. Yu no save putum glad long wan skel blong faenemaot se hem i bigwan olsem wanem.
Tru, i gat sam rijman we oli hapi, mo sam narafala we oli harem nogud. Samting ya i sem mak long olgeta we oli pua. Nating se i olsem, bighaf blong ol man—wetem olgeta we oli gat plante sas samting tu—oli bilif se sipos oli gat moa mane bambae oli kasem moa glad.
Wan man we i raetem tok long saed blong bisnes ya, hemia King Solomon blong Isrel bifo. Hem i wan man we i rij moa long ol narafala man long wol. Sipos yu ridim japta 10 blong Fas King long Baebol, bambae yu save olgeta sas samting we hem i gat. Wan eksampel, vas 14 long japta ya i talem se: “Gol we Solomon i stap kasem long wan yia, hemia sikis handred mo sikiste sikis talen.” Namba ya i sem mak olsem 25 tan blong gol. !Tede, praes blong gol ya i save kasem bitim 20 bilyan vatu!
Be, Solomon i no jes gat fulap sas samting. God i blesem hem taem i givim waes long hem tu. Baebol i talem se: “King Solomon i gat plante moa sas samting mo plante moa waes i bitim olgeta narafala king blong wol. Mo olgeta man long wol oli stap wantem blong go luk Solomon blong harem waes we God i putum long hat blong hem.” (1 King 10:23, 24) Yumi tu i save kasem gudfala samting from waes blong Solomon, from we ol tok blong hem oli stap long Baebol. Bambae yumi luk wanem we hem i talem long saed blong ol sas samting mo glad.
[Foto Credit Line Blong Pija Long Pej 3]
Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart