‘God i Lavem Man We i Givim Presen Wetem Gladhat’

JEOVA i stamba blong fasin blong givim presen. Baebol i talem se hem i Man ya we i Givim “evri samting we oli gud mo evri presen we oli nambawan.” (Jemes 1:​17) Eksampel, tingbaot ol samting we God i wokem. Hem i mekem ol kakae we i gat ol gudgudfala tes, ol flaoa we oli gat ol defdefren kaen kala, mo kala blong skae we yumi laekem tumas blong luk taem san i godaon. Yes, evri samting we Jeova i wokem, i soemaot klia se hem i gat lav mo hem i glad blong givim presen. (Ol Sam 19:​1, 2; 139:14) Mo tu, Jeova i Man blong Givim Presen wetem gladhat. Hem i laekem tumas blong mekem ol gudfala samting long ol man blong hem.​—Ol Sam 84:11; 149:4.

Ol man Isrel oli kasem oda se oli mas gat fasin olsem God, hemia blong givim presen long narafala. Moses i talem long olgeta se: “Sipos i gat wan man long laen blong yumi we i sot long sam samting, be yufala i mas givhan long hem . . . Yufala i no mas griri, yufala i mas givim mane long hem long gladhat blong yufala.” (Dutronome 15:​7, 10) Ol man Isrel oli mas glad blong givim samting long narafala, from we fasin ya blong givim presen i kamaot long hat.

Ol Kristin tu oli kasem advaes olsem. Jisas i talem se: “Man we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) Ol disaepol blong Jisas oli soemaot gudfala eksampel long fasin blong givim presen wetem gladhat. Baebol i talem se long Jerusalem, olgeta we oli bilif long Jisas, “oli stap salem ol graon mo ol samting blong olgeta, blong oli seraot ol mane we oli kasem, i go long ol puaman, stret olsem we ol puaman oli sot long hem.”​—Ol Wok 2:​44, 45.

Be, biaen, ol Kristin ya blong Judia, we oli kaengud tumas, oli kam pua. Baebol i no talem stret from wanem trabol ya i kamaot. Sam man blong stadi, oli talem se maet hadtaem blong kasem kakae, we Ol Wok 11:28, 29 i tokbaot, hemia nao samting we i mekem ol Kristin ya oli pua. Be, nomata wanem i hapen, i klia se ol Kristin ya long Judia oli trabol gud. Taswe, Pol i wantem faenem rod blong givim ol samting we oli nidim. ?Olsem wanem bambae hem i mekem samting ya?

Kleksin Blong Halpem Olgeta We Oli Gat Nid

Pol i askem help long ol kongregesen, go kasem Masedonia. Nao, hem i mekem plan se olgeta kongregesen ya oli sakem kleksin blong halpem ol Kristin long Judia we oli sot long plante samting. Pol i raet long ol Kristin long Korin se: “Nao long saed blong kleksin blong givhan long ol Kristin man long Judia, tingting blong mi i olsem. Yufala i mas mekem olsem we mi talem long ol man blong [kongregesen] long Galesia, blong oli mekem. Evri wik, long Sande, yufala evriwan i mas putumgud sam mane blong yufala i stap [long haos blong yufala], blong givim long ol Kristin man ya. Man we i kasem bigwan i save givim bigwan, mo man we i kasem smol i save givim smol.”a​—1 Korin 16:​1, 2.

Pol i wantem se oli sanem ol kleksin ya i go kwiktaem long ol brata long Jerusalem, be ol Kristin long Korin oli slou blong folem advaes blong Pol. ?From wanem? ?Oli no wari long ol brata blong olgeta long Judia we oli trabol? Si oli wari. Pol i savegud se ol Kristin long Korin oli ‘rij tumas long olgeta samting we oli gat, long fasin blong bilif, mo long fasin blong tok, mo long saed blong save, mo oli strong moa blong givhan.’ (2 Korin 8:7) Be oli slou from we maet oli stap bisi tumas long sam narafala impoten bisnes we Pol i bin tokbaot long faswan leta we hem i sanem long olgeta. Be naoia, ol Kristin long Jerusalem oli nidim help kwiktaem. Taswe, Pol i tokbaot bisnes ya long seken leta we hem i sanem long ol Kristin long Korin.

Man i Mas Givim Wetem Gladhat

Fastaem, Pol i talem long ol Kristin long Korin se ol Kristin long Masedonia oli soemaot gudfala eksampel long fasin blong givhan long olgeta we i trabol. Pol i raetem se: “Plante trabol i kasem olgeta blong traem olgeta, be long tingting blong olgeta, oltaem oli stap harem gud tumas. Olgeta ya oli puaman tru, be long gladhat blong olgeta, oli sakem kleksin ya we i bigwan tumas.” Ol Kristin long Masedonia oli no wet long narafala blong talem long olgeta blong givim presen. Defren olgeta, Pol i talem se “oli stap askem plante taem long mifala, blong mifala i givim janis long olgeta blong oli joen blong givhan.” Yumi sapraes moa long ol man Masedonia we oli givim presen wetem gladhat, taem yumi tingbaot se olgeta tu oli “puaman tru.”​—2 Korin 8:​2-4.

Taem Pol i presem ol Kristin long Masedonia, ?hemia i minim se hem i stap traem pulum ol Kristin long Korin blong winim ol narafala? Nogat. Pol i save se hemia i no wan gudfala rod blong pulum man blong givim presen. (Galesia 6:4) Mo tu, hem i save se i no nidim blong fosem ol Kristin long Korin, blong mekem samting we i stret. Be, hem i trastem se ol Kristin long Korin oli rili lavem ol brata blong olgeta long Judia, mo oli wantem tumas blong givim presen blong givhan long olgeta. Hem i talem long olgeta se: “Las yia, yufala nao i faswan blong tingbaot blong mekem wok ya, mo yufala i faswan tu blong mekem.” (2 Korin 8:​10) Yes, ol Kristin long Korin oli soem gudfala eksampel long sam fasin we oli folem blong givim help. Pol i talem long olgeta se: “Mi mi save finis we yufala i glad blong joen blong sakem kleksin blong givhan long ol Kristin man we oli trabol. . . . Mi mi leftemap nem blong yufala finis long fes blong ol man Masedonia from samting ya.” Nao hem i ademap se: “Fasin blong yufala, we yufala i glad blong givhan, hem i stikim bighaf blong olgeta finis.” (2 Korin 9:2) Be, naoia ol Kristin long Korin oli mas soem long fasin blong olgeta se oli gat strong tingting mo se oli rere blong givhan.

Taswe, Pol i talem long olgeta se: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Korin 9:7) Pol i no wantem fosem ol Kristin long Korin, from we fasin ya i save mekem se oli givim samting, be i no wetem gladhat. Pol i sua se ol Kristin ya oli gat gudfala tingting finis, mo se wanwan long olgeta i jusumaot finis blong givim presen. Antap long samting ya, Pol i talem long olgeta se: “Sipos yufala i glad blong givim, bambae God i glad blong tekem presen long ol samting nomo we yufala i gat. Hem i no save askem long yufala, blong yufala i givim ol samting we yufala i no gat.” (2 Korin 8:​12) Yes, taem wan man i rere blong givim presen​—from lav​—bambae God i agri long presen ya, nating se i wan smol presen nomo.​—Skelem wetem Luk 21:​1-4.

Ol Man We Oli Givim Wetem Gladhat Tede

Fasin ya we ol Kristin oli givhan long ol brata blong olgeta long Judia we oli trabol, i wan nambawan eksampel blong yumi tede. Ol Witnes blong Jeova oli stap mekem wan bigfala wok blong prij long olgeta ples long wol. Oli stap karem kakae i go long plante milyan man we oli hanggri long saed blong spirit. (Aesea 65:13, 14) Oli mekem wok ya folem oda blong Jisas se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta . . . mo yufala i mas tijim olgeta blong oli folem olgeta tok ya we mi mi givim finis long yufala.”​—Matiu 28:19, 20.

I no isi blong mekem wok ya. I gat ol haos blong ol misinari, mo bitim wan handred branj ofis raonabaot long wol we yumi mas lukaot long olgeta. Mo tu, yumi mas bildim ol Haos Kingdom mo Haos Asembli blong mekem se ol man we oli wosipim Jeova oli save gat wan stret ples blong joen wanples mo leftemap tingting blong olgeta. (Hibrus 10:24, 25) Samtaem, ol Witnes blong Jeova oli mas sanem sam help long ol kantri we disasta i kasem olgeta.

Mo tu, tingbaot hamas mane Sosaeti i nidim blong prentem olgeta buk. Evri wik, hem i prentem moa long 22,000,000 kopi blong Wajtaoa mo samwe 20,000,000 kopi blong Wekap! Antap long ol kakae ya long saed blong spirit we yumi stap kasem oltaem, evri yia, Sosaeti i wokem plante milyan buk, buklet, kaset, mo video kaset.

?Ol mane blong mekem olgeta wok ya oli kam weples? Hemia from ol presen mane. Yumi givim ol presen mane ya i no blong soemaot yumi no blong kasem samting we yumi nomo i wantem, be blong leftemap trufala wosip. Taswe, ol man we oli givim ol presen ya, oli glad mo God i blesem olgeta. (Malakae 3:​10; Matiu 6:​1-4) Ol pikinini blong ol Witnes blong Jeova tu, oli gat fasin ya blong givim presen wetem gladhat. Eksampel, Allison we i gat fo yia, i harem nius se wan hariken i spolemgud wan taon long Yunaeted Stet. Ale, hem i givim 2 dola olsem presen mane. Smol gel ya i raetem se: “Hemia olgeta mane we mi mi gat long bang. Mi save se hariken ya i spolemgud olgeta pleplei, ol buk, mo ol doli, blong ol pikinini. Maet yufala i save yusum mane ya blong pem wan buk blong wan smol gel we i gat sem yia olsem mi.” Maclean, we i gat 8 yia, i raetem se hem i hapi tumas we i no gat wan brata i ded long hariken ya. Hem i gohed se: “Mi winim 17 dola taem mi mo papa blong mi, mitufala i salem sam pat blong wil blong trak. Mi wantem yusum mane ya blong pem wan samting blong mi, be mi tingbaot ol brata.”​—Lukluk bokis antap.

I sua se, hat blong Jeova i glad tumas taem hem i luk se ol yangfala mo ol olfala oli putum intres blong Kingdom blong hem long fasples. Oli mekem olsem taem oli ‘ona long God wetem ol nambawan samting blong olgeta.’ (Proveb 3:​9, 10) Evri samting we yumi givim long Jeova, oli no naf blong mekem hem i rij, from we olgeta samting ya oli blong hem. (1 Kronikel 29:14-​17) Be, taem wan man we i wosipim Jeova i sapotem wok blong Hem, hem i soemaot se hem i laekem Jeova tumas. Yumi talem bigfala tangkiu long evriwan we hat blong olgeta i pusum olgeta blong givim presen olsem.

[Futnot]

[Bokis blong pija long pej 26, 27]

Ol Rod We Samfala Oli Folem Blong Givim Presen Mane Blong Sapotem Wok Long Olgeta Ples Long Wol

Plante man oli makemaot, no mekem plan, blong stret mane we bambae oli putum long bokis blong presen mane, we oli raetem long hem se: “Presen Mane Blong Sapotem Wok Blong Sosaeti Long Ful Wol​—Matiu 24:14.” Evri manis, ol kongregesen oli sanem mane ya i go long hedkwota blong wol long Bruklin, Niu Yok, no long ofis we i lukaot long wok blong kantri blong olgeta.

Yu tu, yu save sanem presen mane i go long ofis blong Sosaeti we i lukaot long kantri blong yu. Ol gol jen mo sas ston mo ol narafala sas samting, yu save givim tu olsem presen. Yu mas sanem wan sotfala leta i go wetem presen ya blong talemaot se yu givim samting ya olsem wan presen nomo.

Presen Mane We Man i Save Kasembak Sipos i Nidim

Man i save givim mane long Wajtaoa Sosaeti blong oli kipim go kasem we man ya i ded, be sipos hem i nidim mane ya, bambae Sosaeti i givimbak long hem. Blong kasem moa save long saed ya, plis raet i go long branj ofis we i lukaot long kantri blong yu.

Plan We Man i Folem Blong Givim Presen

Antap long ol presen mane we man i save givim stret, mo mane we hem i save kasembak sipos i nidim, i gat sam narafala rod blong givim presen we oli save givhan long wok blong Kingdom long olgeta ples blong wol. Sam long olgeta ya hemia:

Insurens: Man i save mekem se Wajtaoa Sosaeti i kasem mane blong wan laef insurens, no mane blong pem yia blong hem taem i ritae long wok, no mane we sam kampani oli givim long ol olfala.

Ol Bang Akaon: Man i save mekem se bang i holem mane long kaon blong hem, mane we maet sam narafala oli putum i go stret long kaon blong hem long bang, no mane we hem i kasem taem i ritae, gogo Sosaeti i nidim. Sipos no, hem i save mekem se mane ya i go long Wajtaoa Sosaeti taem hem i ded, folem ol rul blong bang long ples blong hem.

Ol Stok mo Bon: Man i save givim stok mo bon oli go fulwan long Wajtaoa Sosaeti olsem presen nomo, no folem wan plan we ol profit blong ol stok mo bon ya oli stap go oltaem long man ya we i givim.

Graon mo Haos: Man i save givim graon no haos blong hem i go olsem presen long Wajtaoa Sosaeti, blong oli salem biaen. Sipos no, man i save folem plan se Sosaeti i kasem haos no graon ya taem hem i ded, be man ya i save gohed blong stap long haos ya long fulwan laef blong hem. Man i mas toktok wetem Sosaeti bifo we hem i givim graon no haos blong hem long Sosaeti.

Lastok blong Man Bifo we Hem i Ded mo Plan blong Holem Mane i Stap Kasem Ded: Man i save givim graon no haos no mane blong hem long Wajtaoa Sosaeti taem hem i raetem wan pepa folem loa, we i olsem lastok blong hem bifo we hem i ded. Sipos no, bang i save holem sam mane blong man ya i stap, blong i go long Sosaeti taem man ya i ded. Mane we bang i holem blong givhan long wan skul, maet man ya i no nidim blong pem takis long hem.

[Bokis blong pija long Pej 28]

!Ol Pikinini Tu Oli Save Givim Presen Wetem Gladhat!

Mi wantem givim samting ya long yufala blong bambae yufala i mekem moa buk blong mifala. Mi winim mane ya taem mi givhan long papa blong mi long wok blong hem. Tangkiu tumas from olgeta hadwok we yufala i stap mekem.​​—Pamela, 7 yia.

Mi sanem 685 dola ya i go long yufala blong halpem yufala blong bildim plante moa Haos Kingdom. Mi winim mane ya taem mi salem limonad long ol man long rod, long hot taem we i jes pas.​​—Selena, 6 yia.

Mi gat wan faol we i karem tu pikinini, wan i man faol mo narafala i woman. Seken wan ya we i woman, mi talem se i blong Jeova. Biaen, hem i karem tri pikinini. Ale, mi salem trifala faol ya. Hemia mane we mi winim. Mi sanem i kam blong givhan long wok blong Jeova.​​—Thierry, 8 yia.

!Hemia olgeta mane blong mi! Plis yufala i yusum long waes fasin. Mi wokhad blong winim mane ya. Hemia 21 dola.​​—Sarah, 10 yia.

Long wan lesen blong skul, mi winim fas praes, taswe oli putum nem blong mi blong joen long kompetisen blong ol narafala skul blong taon blong mi. Mi winim fas praes long kompetisen ya tu. Ale, biaen bakegen, mi winim seken praes long ol faenal wetem ol skul blong ol narafala taon. Oli givim mane long mi olsem praes blong mi. Mi wantem givim haf blong mane ya long Sosaeti. Mi tingting se, mi winim ol praes ya from gudfala trening we mi bin kasem long Tiokratik Skul. Taswe, mi no seksek taem mi ridimaot ripot blong mi long fored blong ol jaj.​​—Amber, klas sikis.

Mi wantem sanem mane ya i go long yufala blong givim long Jeova. Yufala i askem hem blong i talem long yufala olsem wanem blong yusum mane ya. Hem i save evri samting.​​—Karen, 6 yia.

[Tok blong pija long pej 25]

Ol Kristin oli glad blong givim mane blong sapotem wok blong ol Witnes blong Jeova