Wokbaot Wetem God—Wetem Tingting We i Stap Oltaem Long Laef We i No Save Finis
“Bambae yumi . . . wokbaot long nem blong Jeova oltaem, gogo i no save finis.”—MAEKA 4:5, NW.
1. ?From wanem yumi save singaot Jeova se ‘King blong olwe’?
JEOVA GOD i no gat stat blong hem. I stret nomo we Baebol i kolem hem se, “Olfala we i stap fastaem bifo olgeta,” from we hem i stap finis longtaem bifo we bifo olgeta. (Daniel 7:9, 13) Mo tu, Jeova i gat wan fiuja we i no gat en blong hem. Hem nomo i ‘King blong olwe.’ (Revelesen 10:6; 15:3) Mo long lukluk blong hem, wan taosen yia “i olsem wan dei nomo, i olsem yestede we i pas finis, i olsem wan aoa nomo long naet, we i pas kwiktaem nomo.”—Ol Sam 90:4.
2. (a) ?Wanem stamba tingting blong God long saed blong ol man we oli obei long hem? (b) ?Ol hop mo ol plan blong yumi oli mas stanap long wanem samting?
2 Man ya blong Givim laef, hem i no save ded samtaem. Taswe, hem i naf blong givim hop blong laef we i no save finis long Paradaes, long faswan man mo woman, Adam mo Iv. Be from we Adam i no obei, hem i lusum raet ya blong laef blong olwe, mo hem i pasem sin mo ded i go long olgeta pikinini blong hem. (Rom 5:12) Nating se i olsem, fasin rebel blong Adam i no jenisim faswan stamba tingting blong God. Jeova i wantem se olgeta man we oli obei long hem, oli laef blong olwe, mo bambae hem i mekem stamba tingting blong hem i kamtru. (Aesea 55:11) Ale, i stret we yumi mekem olgeta hop mo plan blong yumi i stanap long wosip blong Jeova, wetem tingting we i stap oltaem long laef we i no save finis. I tru, yumi wantem tumas blong tingbaot oltaem “dei ya blong God.” Be, i impoten tumas blong tingbaot se mak blong yumi i blong wokbaot wetem God blong olwe.—2 Pita 3:12.
Jeova i Tekem Aksin Long Stret Taem Blong Hem
3. ?Olsem wanem yumi save se Jeova i gat wan ‘stret taem’ blong mekem ol stamba tingting blong hem oli kamtru?
3 From we yumi man blong wokbaot wetem God, yumi intres tumas blong save olsem wanem hem i stap mekem tingting blong hem i kamtru. Yumi save se Jeova i Bigfala man we i Bos long Taem, mo yumi trastem fulwan se, olgeta stamba tingting blong hem, i no gat wan we bambae i mestem, olgeta evriwan oli mas kamtru long stret taem blong hem. Eksampel, “long stret taem we God i makem, hem i sanem stret Pikinini blong hem i kam.” (Galesia 4:4) Wan enjel i talem long aposol Jon se, ol saen we hem i luk, we oli olsem profet tok, i gat wan ‘stret taem’ blong oli kamtru. (Revelesen 1:1-3) I gat wan ‘stret taem blong jajem ol dedman.’ (Revelesen 11:18) Bitim 1,900 yia bifo, tabu spirit i pusum aposol Pol blong talem se God “i putum dei finis we bambae hem i jajem olgeta man long wol, mo bambae hem i mekem long fasin we i stret nomo.”—Ol Wok 17:31.
4. ?Olsem wanem yumi kasem save se Jeova i wantem tumas blong finisim rabis wol ya?
4 Bambae Jeova i finisim ol nogud fasin blong wol ya, from we wol ya i sakem doti long nem blong hem. Ol man nogud oli kam plante. (Ol Sam 92:7) Oli agensem God wetem ol toktok mo fasin blong olgeta. Mo God i harem i soa tumas, taem hem i luk we ol man oli stap mekem i nogud mo ronem ol man blong wok blong hem. (Sekaraea 2:8) !Yumi no sapraes we Jeova i talem se i no longtaem, bambae hem i finisim fulwan ogenaesesen blong Setan! God i save finis stret taem we bambae samting ya i hapen, mo ol profet tok blong Baebol, we oli stap kamtru finis, oli soem klia se naoia, yumi stap laef long “en blong wol ya.” (Daniel 12:4) I no longtaem, bambae God i tekem aksin blong givim blesing long olgeta we oli lavem hem.
5. ?Lot mo Habakuk, tufala i gat wanem tingting long saed ol samting we oli stap hapen raonabaot long tufala?
5 Ol man blong Jeova long taem bifo, oli bin wantem tumas blong luk en blong ol rabis fasin. Stret man ya, Lot, “hem i stap harem nogud tumas from ol fasin nogud we ol rabis man long ples ya oli stap mekem.” (2 Pita 2:7) Profet Habakuk i harem nogud tumas from fasin blong ol man raonabaot long hem. Hem i prea, se: “Hae God. Naoia, long ples blong mifala, ol man oli stap faet, oli stap kilkilim olgeta oli ded. Oltaem, mi stap krae i kam long yu blong yu givhan long mifala. ?Be wetaem bambae yu harem mi, yu tekemaot mifala long ol trabol ya? ?From wanem yu letem mi mi stap luk ol trabol ya olsem? ?Bambae yu stap lukluk ol trabol ya gogo kasem wetaem? Naoia raonabaot long mi, ol man oli stap faet oli stap kilkilim olgeta, mo oli stap spolem olgeta samting. Olbaot long evri ples, ol man oli stap rao, mo oli stap faet.”—Habakuk 1:2, 3.
6. ?Jeova i talem wanem blong ansa long prea blong Habakuk, mo yumi save lanem wanem from stori ya?
6 Jeova i ansa long Habakuk, mo wan haf blong ansa blong hem i olsem: “Taem blong ol samting ya i no kam yet, be bambae oli mas kamtru i no longtaem. Olgeta samting we mi mi soemaot long yu long vison ya bambae oli mas olsem. Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” (Habakuk 2:3) Wetem ol tok ya, God i talemaot se bambae hem i tekem aksin “long stret taem blong hem.” !Nating sipos i tektaem lelebet, be bambae Jeova i mekem stamba tingting blong hem i kamtru—hem i no save mestem!—2 Pita 3:9.
Wok Wetem Strong Tingting
7. Nating se Jisas i no save stret taem we dei blong Jeova bambae i kam, ?olsem wanem Jisas i gohed long ol wok blong hem?
7 ?Yumi nidim blong save stret taem blong Jeova blong gat strong tingting blong wokbaot wetem God? Nogat. Tingbaot sam eksampel. Jisas i wantem tumas blong save taem we God bambae i mekem ol samting we hem i wantem, oli kamaot long wol ya, olsem oli kamaot finis long heven. Jisas Kraes i tijim ol man blong hem blong prea se: “Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu, mo we yu yu kam king blong olgeta man, mo we olgeta man long wol oli mekem ol samting we yu yu wantem, olsem we olgeta long heven oli stap mekem.” (Matiu 6:9, 10) Jisas i save se bambae God i ansa long prea ya. Nating se i olsem, hem i no save stret taem blong samting ya. Long bigfala profet tok blong hem long saed blong en blong wol ya, hem i talem se: “Be dei blong samting ya, mo taem blong hem, i no gat man i save. Ol enjel blong heven, mo mi tu we mi Pikinini blong God, be mifala i no save. Papa blong mi, hem nomo i save.” (Matiu 24:36) Jisas Kraes i impoten man we God i stap yusum blong mekem ol stamba tingting blong Hem oli kamtru. Taswe, Jisas bambae i mekem wok ya blong kilim i ded ol enemi blong Papa blong hem long heven. Be taem Jisas i stap long wol ya, hem i no save yet stret taem we bambae God i yusum hem blong mekem wok ya. ?Samting ya i mekem se hem i kam slak long wok blong Jeova? !Nogat! Taem ol disaepol blong Jisas oli luk strong tingting we hem i gat blong klinim tempel, “oli tingbaot tok blong Baebol we i talem se, ‘Mi mi wantem tumas we evri samting long haos blong yu oli mas stret gud. Oltaem tingting ya i stap wok insaed long mi, olsem faea we i stap laet.’ ” (Jon 2:17; Ol Sam 69:9) Jisas i bisi oltaem long wok we Papa blong hem i sanem hem i kam blong mekem, mo hem i mekem wok ya wetem strong tingting. Taem hem i mekem wok blong God, tingting blong hem i stap oltaem long laef we i no save finis.
8, 9. Taem ol disaepol oli askem Jisas long saed blong taem we Kingdom bambae i stanap bakegen, ?Jisas i talem wanem long olgeta, mo biaen oli mekem wanem?
8 Ol disaepol blong Jisas Kraes tu oli mekem olsem. Jisas i kam wanples wetem olgeta bifo we hem i go antap long heven. Stori i talem se: “Taem ol aposol oli kam wanples wetem Jisas, oli askem long hem se, ‘Masta ?I stret taem nao blong yu mekem we ol laen blong Isrel oli gat king blong olgeta bakegen, no i no taem blong hem yet?’ ” Olsem Masta blong olgeta, ol disaepol oli wantem tumas we Kingdom blong God i kam. Be Jisas i ansa long olgeta, i se: “Ol dei mo ol taem blong samting ya, i no blong yufala i save, Papa blong mi nomo i gat raet blong jusumaot. Be taem tabu spirit i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo long Sameria, gogo yufala i finisim olgeta ples long wol.”—Ol Wok 1:6-8.
9 I no gat wan tok long Baebol we i soem se ansa blong Jisas i mekem tingting blong ol disaepol i foldaon. Oli gohed blong stap bisi long wok blong prij. Long sam wik nomo, oli mekem Jerusalem i fulapgud wetem ol tijing blong olgeta. (Ol Wok 5:28) Mo 30 yia biaen, oli prij go kasem wan mak we Pol i save talem se gud nius ya, “ol man oli talemaot finis long olgeta man long wol.” (Kolosi 1:23) Nating se Kingdom i no ‘stanap bakegen long Isrel’ olsem rong tingting we ol disaepol oli gat, mo nating se Kingdom ya i no stanap long heven long taem blong olgeta, oli gohed strong blong mekem wok blong Jeova wetem tingting we i stap oltaem long laef we i no save finis.
Jekemap Samting We i Stap Pusum Yumi
10. Yumi no save stret taem we God bambae i spolem wol blong Setan. ?Samting ya i givim jans long yumi blong pruvum wanem?
10 Ol man blong wok blong Jeova tede, olgeta tu oli wantem tumas blong luk en blong rabis wol ya. I tru, yumi wantem luk we God i sevem yumi, i tekem yumi i go insaed long niufala wol we hem i bin promes blong givim. Be faswan samting we yumi wantem luk, hemia we bambae Jeova i mekem nem blong hem i tabu mo i leftemap hae rul blong hem. Taswe, yumi save glad se God i no talem long yumi stret ‘dei mo aoa’ we bambae hem i spolem rabis wol ya blong Setan. Samting ya i givim jans long yumi blong pruvum se, yumi gat strong tingting blong wokbaot wetem God oltaem from we yumi lavem hem, i no from we yumi wantem kasem wan samting long hem.
11, 12. ?Long wanem rod, fasin blong Job blong holem strong long God i kasem traem, mo olsem wanem ol traem ya oli joen wetem yumi?
11 Mo tu, taem yumi holem strong long God, yumi pruvum se Devel Setan i rong taem hem i talem se stret man ya Job—mo ol narafala man olsem hem—oli stap wosip long God jes from we hem i stap givim ol samting long olgeta. Afta we Jeova i tokbaot Job olsem wan man we i no gat poen, i stret man, mo i fraetgud long God, Setan i talem se: “No, be hem i stap mekem wosip long yu from we yu stap givhan gud long hem. Oltaem yu stap lukaot gud long hem wetem ol pikinini blong hem mo olgeta samting blong hem, mo yu stap blokemgud olgeta. Evri samting we hem i stap mekem, be yu yu stap blesem olgeta, mo ol anamol ya we yu givim long hem, kantri ya i fulap gud long olgeta. Be sipos yu tekemaot ol samting ya, bambae hem i tok nogud long yu, stret long fes blong yu.” (Job 1:8-11) Job i holem strong long Jeova taem hem i kasem traem ya. Long rod ya, hem i pruvum se ol tok we Setan i talem agensem Jeova oli giaman.
12 Sipos yumi holem strong oltaem long God, bambae yumi save pruvum se Setan i giaman taem hem i talem se yumi stap wosip long God, jes from we yumi save se bambae i no longtaem, hem i givim pei long yumi. Yumi no save stret taem we God bambae i givimbak long ol man nogud. Samting ya i givim jans long yumi blong pruvum se yumi rili laekem God mo yumi wantem wokbaot long ol rod blong hem blong olwe. Yumi soem se yumi stap strong long God mo yumi trastem rod we hem i yusum blong stretem ol bisnes. Mo tu, from we yumi no save stret dei mo aoa, samting ya i givhan long yumi blong wekapgud long saed blong spirit, from we yumi luksave se en i save kam enitaem nomo, olsem we man blong stil i kam long naet. (Matiu 24:42-44) Taem yumi wokbaot wetem Jeova evri dei, yumi mekem hat blong hem i glad mo yumi givim wan gudfala ansa long Devel Setan, hemia we i stap jikim Jeova.—Proveb 27:11.
!Mekem Plan From Laef We i No Save Finis!
13. ?Baebol i soem wanem long saed blong fasin ya blong mekem plan from fiuja?
13 Olgeta we oli stap wokbaot wetem God, oli save se i waes blong mekem gudfala plan long saed blong fiuja. Plante man, oli luksave ol problem mo trabol we oli save kasem taem oli kam olfala. Taswe, oli yusumgud yangtaem mo paoa blong olgeta blong winim inaf mane we i save givhan long olgeta biaen. ?Nao, olsem wanem long fiuja blong yumi long saed blong spirit we i moa impoten? Proveb 21:5 i talem se: “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.” Taem yumi mekem plan wetem tingting we i stap oltaem long laef we i no save finis, samting ya i givhan bigwan long yumi. Yumi no save wetaem en blong rabis wol ya bambae i kam, taswe i stret we yumi tingting long ol samting we yumi nidim long fiuja. Be taem yumi mekem olsem, i gud we yumi skelemgud ol samting, mo putum ol intres blong God oli stap fasples long laef blong yumi. Ol man we oli no gat bilif, maet oli talem se fasin ya i no waes. Be ?i tru se fasin ya i no waes?
14, 15. (a) ?Jisas i mekem wanem parabol long saed blong ol plan blong fiuja? (b) ?From wanem rijman we Jisas i tokbaot long parabol blong hem i no waes?
14 Jisas i talem wan parabol we i mekem poen ya i kam moa klia. Hem i talem se: “I gat wan rijman we garen blong hem i stap karem fulap kakae. Nao hem i stap tingting hem wan se, ‘?Bambae mi mekem olsem wanem? Ol haos blong mi oli no moa naf nao blong mi save putum ol kakae ya i stap gud long hem.’ Nao hem i talem se, ‘I gud mi mekem olsem. Bambae mi mas tekemaot ol haos ya, mo mi mas wokem sam narafala haos bakegen we oli bigwan moa. Nao mi save putum ol kakae ya i stap gud insaed, wetem ol narafala samting tu we mi mi gat. Nao bambae mi save talem se, !Man! !Mi mi wan laki man! Naoia mi gat plante samting we mi save yusum long plante yia. I stat naoia, mi save spel, mi save kakae, mi save dring, we mi gat hapi taem olwe nomo.’ Be God i talem long hem se, ‘Yu yu no gat hed. Long naet ya nomo, bambae mi mi tekemaot laef blong yu. ?Nao hu man bambae i tekem ol samting ya we yu yu hivimap rere i stap? . . . Bambae i mas olsem nomo long olgeta man we oli stap hivimap plante samting we oli blong olgeta nomo, be long fes blong God oli no rijman nating.’ ”—Luk 12:16-21.
15 ?Jisas i minim se i nogud rijman ya i stap wokhad blong kasem olting we oli save givhan long hem long fiuja? Nogat. Baebol i sapotem fasin blong wok strong. (2 Tesalonaeka 3:10) Mastik blong rijman ya, hemia se hem i no mekem wanem we hem i nidim blong ‘kam rijman long fes blong God.’ Nating sipos hem i bin haremgud long ol rij samting blong hem long plante yia, be biaen, hem i mas ded. Rijman ya i lukluk ol samting blong naoia nomo, hem i no stap tingbaot laef we i no save finis.
16. ?From wanem yumi save dipen fulwan long Jeova blong gat wan fiuja we i sefgud?
16 I gud tumas mo i waes blong wokbaot wetem Jeova wetem tingting we i stap oltaem long laef we i no save finis. Hemia i beswan rod blong plan from fiuja. I tru se i waes blong mekem gudfala plan long saed blong skul, wok, mo ol responsabiliti long famle. Be oltaem, yumi mas rimemba se Jeova i neva lego ol trufala man blong hem. King Deved i singsing se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.” (Ol Sam 37:25) Long sem fasin, Jisas i talem se God bambae i givim ol samting we yumi nidim sipos yumi lukaot Kingdom fastaem mo wokbaot long ol stret rod blong Jeova.—Matiu 6:33.
17. ?Olsem wanem yumi save se en i klosap?
17 Nating se yumi stap mekem wok blong God wetem tingting we i stap oltaem long laef we i no save finis, yumi no mas fogetem dei blong Jeova. Ol profet tok blong Baebol we oli kamtru finis, oli soem klia se dei ya i klosap tumas. Ol faet, ol sik, graon i seksek, hadtaem blong kasem kakae, fasin blong ronem ol trufala Kristin, mo wok blong talemaot gud nius blong Kingdom blong God long fulwol, oli kam antap bigwan long laswan handred yia. Hemia ol defren saen we oli makem en blong rabis wol ya. (Matiu 24:7-14; Luk 21:11) Wol ya i fulap long ol man we ‘oli tingbaot olgeta nomo, oli wantem mane tumas, oli tok flas, tingting blong olgeta i go antap tumas, oli tok nogud long ol man, oli no save ona long papa mo mama blong olgeta, oli no man blong talem tangkiu, oli no save tingbaot God, oli no gat sore long man, oli man blong mekem i strong tumas long narafala man, oli man blong spolem nem blong narafala man, oli man blong lusum hed, oli wael olgeta, oli no wantem ol fasin ya we i gud, oli man blong spolem ol fren blong olgeta, oli no kea, oli praod tumas, oli wantem tumas ol samting we oli stap haremgud long hem, i winim we oli stap laekem God.’ (2 Timoti 3:1-5) Long ol lasdei ya we laef i strong tumas, yumi ol man blong Jeova, yumi fesem hadtaem. !Yumi wantem tumas se dei ya we bambae Kingdom blong Jeova i finisim ol nogud fasin, i kam kwik! Go kasem taem ya, i gud we yumi gat strong tingting blong wokbaot wetem Jeova wetem tingting we i stap oltaem long laef we i no save finis.
Wok Wetem Tingting We i Stap Oltaem Long Laef We i No Gat En Blong Hem
18, 19. ?Wanem i soem se ol man blong bilif bifo, oli mekem wok blong God wetem tingting we i stap oltaem long laef we i no save finis?
18 Taem yumi stap wokbaot wetem Jeova, i gud yumi tingbaot strong bilif blong Ebel, Inok, Noa, Ebraham, mo Sera. Afta we Pol i tokbaot olgeta ya, hem i raetem se: “Olgeta man ya oli stap bilif strong long God, be taem oli ded, oli no kasem ol samting ya yet we God i promes finis blong givim long olgeta. Olgeta oli stap luk ol samting ya olsem we ol samting ya oli stap longwe yet long olgeta, be oli glad tumas blong luk. Nao olgeta oli stap talemaot we oli stap long wol ya, be i olsem we oli strenja nomo, wol ya i no prapa ples blong olgeta.” (Hibrus 11:13) Ol man ya, we oli gat strong bilif, oli “wantem wan narafala ples blong olgeta we i gud moa, we ples ya i stap long heven nomo.” (Hibrus 11:16) Wetem strong bilif, oli wet long wan ples we i moa gud, aninit long Kingdom blong God we Mesaea i rulum. Yumi save se bambae God i givim blesing long olgeta, bambae hem i mekem oli laef blong olwe long wan ples we i moa gud—Paradaes wol aninit long rul blong Kingdom.—Hibrus 11:39, 40.
19 Profet Maeka i talemaot strong tingting we ol man blong Jeova oli gat blong wosipim God gogo i no save finis. Hem i raetem se: “Nating we olgeta man long wol ya oli stap mekem wosip long ol god blong olgeta, mo oli stap obei long olgeta, be yumi ya, [Jeova] i God blong yumi, mo bambae yumi stap mekem wosip long hem, mo yumi stap obei long hem nomo, gogo i no save finis.” (Maeka 4:5) Maeka i mekem wok blong God gogo kasem we hem i ded. Taem bambae hem i girap, i laef bakegen long niufala wol, yumi sua se profet ya bambae i gohed blong wokbaot wetem God gogo i no save finis. !Hemia wan nambawan eksampel long yumi ya we yumi stap laef naoia we en i klosap tumas!
20. ?Wanem samting we yumi mas traehad blong mekem?
20 Jeova i rili glad from lav we yumi soemaot long nem blong hem. (Hibrus 6:10) Hem i save se, long wol ya we Devel Setan i bos long hem, i no isi blong holem strong long hem. Nating se i olsem, “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17; 5:19) Ale, wetem help blong Jeova, i gud we yumi traehad blong stanap strong tru long ol traem we yumi fesem evridei. I gud yumi mekem tingting mo fasin blong laef blong yumi i laenap wetem ol nambawan blesing we Papa blong yumi long heven, we i gat lav, i promes blong givim long yumi. Yumi save kasem ol blesing ya sipos yumi gohed blong wokbaot wetem God wetem tingting we i stap oltaem long laef we i no save finis.—Jud 20, 21.
?Bambae Yu Ansa Olsem Wanem?
◻ ?Wanem stamba tingting blong God long saed blong ol man we oli obei long hem?
◻ ?From wanem Jeova i no tekem aksin yet blong finisim rabis wol ya?
◻ Yumi no save stret taem we bambae God i tekem aksin. ?Be from wanem samting ya i no mas mekem yumi kam slak?
◻ ?Wanem ol blesing we yumi save kasem from fasin blong wokbaot wetem God wetem tingting we i stap oltaem long laef we i no save finis?
[Tok Blong Pija Long Pej 17]
Blong wokbaot wetem God, yumi mas gat strong tingting blong mekem wok blong hem