Oli Mekem Samting We Jeova i Wantem
Man We i Hae Moa Long Olgeta Man i Mekem Wan Wok Wetem Tingting Daon
JISAS i save se ol laswan aoa we hem i stap wetem ol aposol blong hem, bifo we hem i ded, oli impoten tumas. I no longtaem, bambae ol man oli holem Jisas mo oli traem bilif blong hem. Be, Jisas i save tu se bambae hem i kasem ol bigfala blesing. I no longtaem, bambae hem i go antap long heven mo bambae hem i sidaon long raet saed blong God, mo bambae God “i givim nem long hem we i hae moa long ol narafala nem. Nao olgeta long heven, mo long wol, mo [aninit long graon], bambae oli bodaon oli ona long nem blong hem.”—Filipae. 2:9, 10.
Jisas i save se i no long taem bambae hem i ded mo bambae hem i kasem bigfala blesing. Be hem i no letem ol filing blong hem olsem fasin blong wari tumas no fasin blong no gat longfala tingting, oli blokem hem blong tijimgud ol aposol blong hem. Biaen, Jon i raetem long Gospel blong hem se: “Hem i stap lavem olgeta olwe, gogo hem i givim laef blong hem from olgeta.” (Jon 13:1) Long ol laswan aoa blong laef blong Jisas olsem wan man we i stretgud olgeta, hem i tijim wan impoten lesen long olgeta.
Wan Lesen Blong Tingting Daon
Jisas i stap wetem ol disaepol blong hem long wan rum antap long wan haos long Jerusalem, blong mekem lafet blong Pasova. Jes bifo long samting ya, Jisas i harem se ol aposol oli stap rao se hu man long olgeta i hae moa. (Matiu 18:1; Mak 9:33, 34) Hemia i no faswan taem we Jisas i mas stretem ol aposol from we olgeta oli rao long bisnes ya. (Luk 9:46) Be naoia, Jisas i yusum wan defren rod blong stretem olgeta. Hem i no jes tokbaot tingting daon, be hem i mekem wan samting blong tijim olgeta.
Jon i raetem se, Jisas “i girap, i aot long tebel, i tekemaot kot blong hem, mo i tekem wan tawel i parpar long hem. Nao i tekem wan besin, i kafsaedem wota i go long hem. Nao i stat wasem ol leg blong ol man blong hem, mo i waepem leg blong olgeta long tawel ya we hem i parpar long hem.”—Jon 13:4, 5.
Ples i hot tumas long Medel Is, mekem se bifo, ol man oli putum sandel blong wokbaot long ol rod we i gat fulap das long hem. Taem oli go insaed long haos blong eniman, man blong haos ya i mas welkamem olgeta, mo givim wan besin wota blong oli wasem leg blong olgeta. Long haos blong ol rijman, i gat wan man blong wok we i lukaot long bisnes ya blong wasem leg.—Jajes 19:21; 1 Samuel 25:40-42.
Be long bigfala rum ya we Jisas mo ol aposol blong hem oli stap long hem, i no gat man we i stap blong welkamem olgeta. I no gat man blong haos we i givim besin wota long olgeta, mo i no gat man blong wok blong wasem leg blong olgeta. Taem Jisas i stat wasem leg blong ol aposol, hem i mekem olgeta oli sem tumas. !Long ples ya, Man ya we i Hae moa i bitim olgeta, hem nomo i mekem wok blong ol narafala wetem tingting daon!
Fastaem, Pita i no wantem se Jisas i wasem leg blong hem. Be Jisas i talem long hem se: “Sipos mi mi no wasem leg blong yu, bambae yu no save kam man blong mi.” Taem Jisas i wasem leg blong ol aposol finis, hem i askem se: “?Yufala i save mining blong samting ya we mi jes mekem long yufala? Yufala i stap singaot mi se ‘Tija’, mo ‘Masta’, mo hemia i gud nomo, from we tufala nem ya i nem blong mi. Be from we mi, mi Masta mo mi Tija blong yufala, mi wasem leg blong yufala, yufala i mas waswasem leg blong yufala. Mi mi putum wan eksampel blong yufala, blong bambae yufala i save mekem sem fasin ya nomo we mi mi mekem long yufala.”—Jon 13:6-15.
Samting ya i no minim se Jisas i stanemap wan niufala kastom blong wasem leg. Be hem i halpem ol aposol blong hem blong gat wan niufala fasin blong tingting: tingting daon, mo rere oltaem blong mekem wok blong narafala, nating se ol wok ya oli daon olgeta. I klia se, ol aposol oli kasem poen ya. Tingbaot wanem i hapen sam yia biaen, long saed blong kwestin blong sakomsaes. Nating se ol aposol “oli stap toktok longtaem lelebet”, be olgeta we oli stap, oli toktok gud tugeta long pis mo oli gat bigfala respek long olgeta. Ol aposol oli stap long miting ya. Be i luk olsem se disaepol Jemes nao i lidim miting ya—we hem i no wan long ol aposol. Smol samting ya long stori blong Ol Wok i soemaot se ol aposol oli kam moagud long fasin blong soem tingting daon.—Ol Wok 15:6-29.
Wan Lesen Blong Yumi
Taem Jisas i wasem leg blong ol disaepol blong hem, hem i givim wan impoten lesen long saed blong tingting daon. Yes ol Kristin oli no mas ting se oli impoten tumas, ale, ol narafala oli mas mekem wok blong olgeta oltaem. Mo tu, i nogud ol Kristin oli wantem kasem ol posisen we i givim ona mo haenem long olgeta. Be oli mas folem gudfala eksampel blong Jisas, we ‘i no kam blong bambae ol man oli mekem wok blong hem, hem i kam blong mekem wok blong olgeta, mo blong givim laef blong hem blong pem rod blong plante man oli gofri.’ (Matiu 20:28) Yes, ol man mo woman we oli folem Jisas oli mas wantem tumas blong mekem wok blong narafala wetem tingting daon.
I stret nomo nomo we Pita i raetem se: “Yufala i mas holemtaet tingting daon. God i agensem olgeta we oli praod, be long olgeta we tingting blong olgeta i stap daon, hem i stap givhan long olgeta long gladhat blong hem”. (1 Pita 5:5, NW) Grik wod ya blong talem “holemtaet,” i kamaot long wan wod we i minim “kaliko blong man blong wok,” we ol slef oli yusum blong taetem longfala klos blong olgeta taem oli wok. ?Maet Pita i tingbaot fasin blong Jisas blong taetem wan tawel raon long hem olsem wan strap, bifo we hem i wasem leg blong ol aposol blong hem? I no sua. Be fasin ya blong mekem wok blong narafala wetem tingting daon, i gat bigfala paoa long Pita. Fasin ya i mas gat paoa long ol narafala man blong Jisas tu.—Kolosi 3:12-14.