Kristin Kongregesen Wan Rod Blong Halpem Yumi

POPI, wan woman we i gat raonabaot 20 yia, i harem nogud long famle blong hem from we hem i no gat fasin blong toktok gud wetem papa mo mama blong hem.a Biaen, hem i talemaot filing blong hem long wan elda mo waef blong hem. Hem i raetem se: “!Tangkiu tumas from we yutufala i spenem taem blong toktok wetem mi! Ating yutufala i no luksave olsem wanem fasin kea blong yutufala i impoten tumas long mi. Mi talem tangkiu long Jeova, from we hem i givim ol man olsem yutufala, we mi save trastem olgeta mo toktok wetem olgeta.”

Toula, we man blong hem i jes ded i no longtaem, i stap lukaot long tu yangfala blong hem. Hem i harem nogud long filing blong hem mo hem i sot long mane. Oltaem, Toula mo ol pikinini blong hem oli kam strong moa from visit blong wan man mo woman blong hem we tufala i blong Kristin kongregesen blong olgeta. Afta we hem i winim ol traem blong hem, hem i raetem wan leta long tufala ya, i se: “Oltaem mi stap tingbaot yutufala long prea blong mi. Mi no fogetem se plante taem yutufala i stap wetem mi mo yutufala i sapotem mi.”

?Yu yu harem se samtaem yu “stap karem ol hevi samting” from ol trabol blong wol we oli stap kam antap? (Matiu 11:28) ?“Ol taem mo ol samting we man i no save long hem” maet oli mekem se wan trabol i kasem yu we yu harem nogud from? (Prija 9:11) Be long ol taem olsem, yu no stap yu wan. Kristin kongregesen blong ol Witnes blong Jeova, we i bin halpem plante taosen man we tingting blong olgeta i foldaon, hem i save halpem yu tu. Long faswan handred yia K.T.,b aposol Pol i luksave se samfala Kristin we oli wok wetem hem oli ‘givhan long hem mo oli mekem hem i harem gud tumas.’ (Kolosi 4:10, 11) Yu save kasem samting ya tu.

Sapot Mo Help

Long Kristin Grik haf blong Baebol, tok ya “kongregesen” i kamaot long Grik tok ya ek·kle·siʹa, we i minim wan grup blong man we oli singaot olgeta blong kam wanples. Wan stamba tingting we i kamaot long tok ya hemia tingting blong wok tugeta mo givgivhan long narawan.

Kristin kongregesen i sapotem trutok blong Tok blong God mo hem i talemaot gud nius blong Kingdom blong God. (1 Timoti 3:15; 1 Pita 2:9) Be tu, kongregesen i sapotem mo i givim help long saed blong spirit, long ol memba blong hem. Long kongregesen man i save faenem ol trufala fren we oli gat lav, fasin kea, we oli rere mo oli wantem tumas blong givhan mo sapotem ol narafala long taem blong trabol.​—2 Korin 7:5-7.

Oltaem, ol man we oli wosipim Jeova oli harem se oli sefgud insaed long kongregesen blong hem. Wan man blong raetem Ol Sam i soemaot se hem i faenem glad mo i sefgud long medel blong ol man blong God. (Ol Sam 27:4, 5; 55:14; 122:1) Tede tu, Kristin kongregesen i wan grup blong man we oli gat sem bilif mo we oli stap leftemap mo sapotem olgeta.​—Ol Proveb 13:20; Rom 1:11, 12.

Tijing we ol memba blong kongregesen oli kasem i pulum olgeta blong ‘mekem i gud long olgeta man, antap moa, long olgeta ya we oli brata mo sista blong yumi from we olgeta tu oli bilif long Kraes.’ (Galesia 6:10) Tijing we oli kasem long saed blong Baebol, i pusum olgeta blong lavlavem olgeta olsem wan brata nomo, mo blong soemaot fasin kea long olgeta. (Rom 12:10; 1 Pita 3:8) Long kongregesen ol brata mo sista long saed long spirit oli mas kaengud, mekem pis, mo soem sore long olgeta. (Efesas 4:3) Oli no man blong go long jos nomo, be oli soem trufala fasin lav mo kea long narafala.​—Jemes 1:27.

Taswe, kongregesen i olsem wan famle blong soem lav long olgeta we tingting blong olgeta i foldaon. (Mak 10:29, 30) From we oli harem se oli haf blong wan grup we i joengud mo we i gat lav, oli kam strong moa. (Ol Sam 133:1-3) Tru long kongregesen, “slef we i stret mo waes” i givim strong kakae long saed long spirit “long stret taem.”​—Matiu 24:45, NW.

Help From Ol Elda We Oli Gat Lav

Insaed long Kristin kongregesen, ol memba oli save faenem ol man we oli nafgud blong lukaot long ol sipsip. Ol man ya oli gat fasin kea, fasin luksave mo oli sapotem mo leftemap tingting blong narafala long saed long spirit. Ol man blong lukaot ol sipsip we oli gat ol fasin ya oli olsem “strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren.” (Aesea 32:1, 2) Ol elda we tabu spirit i putumap olgeta, no ol man blong lukaot, oli kea long ol man blong God we oli olsem sipsip. Oli leftemap tingting blong olgeta we oli sik mo olgeta we tingting blong olgeta i foldaon bigwan. Mo tu, oli traem blong pulum olgeta we oli lusum rod, blong kambak.​—Ol Sam 100:3; 1 Pita 5:2, 3.

Samting ya i no minim se grup blong ol elda long kongregesen i wan grup olsem ol dokta, we oli naf blong stretem olgeta trabol we ol brata blong olgeta oli kasem long bodi mo tingting blong olgeta. Long wol blong yumi, man “i nidim wan dokta” taem hem i safa. (Luk 5:31) Nating se i olsem, ol elda oli save givhan long olgeta we oli nidim help long saed long spirit. (Jemes 5:14, 15) Taem oli save mekem, ol elda oli plan blong givhan long sam narafala rod bakegen.​—Jemes 2:15, 16.

?Hu i mekem plan ya? !Jeova God hem wan! Profet Esikel i tokbaot fasin blong Jeova long saed ya taem hem i talem se: “Mi bambae mi go lukaot ol sipsip blong mi gogo mi faenem olgeta, mo bambae mi stap lukaot gud long olgeta. . . . Oli go stap wanwan olbaot long ol narafala ples, be mi bambae mi tekem olgeta oli kambak bakegen. . . . Mi nao bambae mi man blong lukaot long ol sipsip ya blong mi, mo bambae mi putum olgeta long ples we oli save slip long hem.” God i kea tu long ol sipsip we oli no gat paoa mo oli no strong tumas.​—Esikel 34:11, 12, 15, 16.

Trufala Help Long Stret Taem

?I tru se yumi save faenem trufala help insaed long Kristin kongregesen? Yes, mo ol eksampel we oli kam biaen oli soemaot ol defdefren samting we kongregesen i mekem blong givhan.

◆ Taem wan we yumi laekem tumas, i ded. Hasban blong Anna i ded from wan strong sik. Anna i talem se: “Stat long taem ya, ol Kristin brata sista oli soemaot bigfala lav long mi. Oltaem ol brata mo sista ya oli gat ol tok we oli kaengud blong talem long mi blong sapotem mo givhan long mi, oli putum han blong olgeta i go raon long hem, oli leftemap tingting blong mi mo oli no letem hat blong mi i harem nogud bitim mak. Taswe, mi talem tangkiu long Jeova. Lav blong olgeta i mekem mi mi harem se i gat man i sapotem mi, i leftemap tingting blong mi bigwan, mo i rili kea long mi.” Maet yu tu yu bin pastru long wan hadtaem olsem taem yu lusum wan we yu laekem tumas. Long taem olsem, ol memba long kongregesen oli save leftemap tingting blong yu mo givhan long yu blong harem gud bakegen.

◆ Sik. Arthur, i wan elda blong Polan we i stap visitim ol kongregesen long medel Esia, blong mekem oli kam strong moa long saed long spirit. Long taem we hem i visitim wan kongregesen, hem i sik bigwan mo bifo we hem i kamgud bakegen, hem i bin safa bigwan. Arthur i tingtingbak wetem fasin tangkiu se: “Mi wantem talem long yufala, olsem wanem ol brata mo sista [long wan taon blong Kasakstan] oli lukaot long mi. Ol brata mo ol sista, plante long olgeta we mi no save olgeta​—wetem sam fren blong trutok tu​—oli karem mane, kakae, mo meresin i kam long mi. . . . Mo oli mekem samting ya wetem bigfala glad.”

“Tingbaot filing blong mi taem mi kasem wan leta wetem sam mane insaed long hem, mo leta ya i talem se: ‘Dia Brata, halo long yu. Mama blong mi i givim mane long mi blong pem aeskrim, be mi mi wantem givim mane ya long yu blong yu pem meresin blong yu. Mi hop se bambae yu kamgud bakegen i no longtaem. Jeova i nidim yumi blong longtaem. Olsem bambae yu save talem sam moa gudfala stori blong tijim mifala. Vova.’ ” Yes, olsem stori ya i soem, ol yangfala mo ol olfala long kongregesen oli save givim help long olgeta we oli sik blong oli kam strong moa.​—Filipae 2:25-29.

◆ Tingting we i foldaon olgeta. Teri i wantem tumas blong kam wan paenia, no man blong talemaot kingdom fultaem. Be, from we hem i kasem sam trabol, hem i mas stop long wok blong paenia. Hem i talem se: “Mi tingting nogud long saed long mi from we mi statem wok ya be mi no naf nating blong stap wan yia long wok ya.” Teri i gat rong tingting ya se Jeova i save glad long hem sipos hem i mekem fulap wok. (Skelem wetem Mak 12:41-44.) From we tingting blong hem i foldaon, hem i no moa joen plante wetem ol narafala. Be, kongregesen i halpem hem.

Teri i talem se: “Wan olfala paenia sista i glad blong givhan long mi mo hem i lesingud long mi taem mi tokbaot ol filing blong mi. Taem mi aot long haos blong hem, mi harem olsem se wan hevi samting i kamaot long solda blong mi. Stat long taem ya i go, sista ya we i paenia mo hasban blong hem we i wan elda long kongregesen, tufala i rili givhan long mi. Evri dei oli telefon i kam long mi blong save sipos mi oraet . . . Samtaem oli singaot mi blong joen long famle stadi blong olgeta, samting ya i soem long mi olsem wanem i impoten blong famle i joengud tugeta.”

Yumi no mas sapraes se plante man​—wetem ol Kristin we oli givim laef blong olgeta i go long Jeova finis​—oli harem nogud from tingting blong olgeta i foldaon bigwan, mo oli harem se oli no gat fren. !Yumi gat tangkiu from we kongregesen i givim wan help we i kamaot long lav, be i no kamaot from we hem i wantem kasem sam samting long yumi!​—1 Tesalonaeka 5:14.

◆ Long taem blong bigfala trabol mo aksiden. Tingbaot wan famle blong fo man we i lusum olgeta samting we oli gat taem faea i bonem haos blong olgeta. I no longtaem biaen, oli kasem wan samting we oli kolem “wan gudfala ekspiryens we bambae mifala i tingbaot oltaem mo i makem tingting blong mifala long saed long trufala lav we ol man blong Jeova oli gat.” Oli talem se: “Kwiktaem nomo ol brata sista blong mifala long saed long spirit oli telefon i kam long mifala blong leftemap tingting blong mifala mo soem sore blong olgeta long mifala. Telefon i ring oltaem. Fasin kea mo lav we evriwan i soemaot long mifala i mekem se mifala i krae from fasin tangkiu.”

Smoltaem biaen, ol elda blong kongregesen oli mekem plan blong plante brata oli bildim wan niufala haos blong famle ya, long sam dei nomo. Wan woman we i stap klosap long famle ya i talem se: “!Sipos yufala i luk samting ya bambae yufala i sapraes! I gat ol kaen man we oli wok long ples ya​—!man, woman, blak man, man blong Spen!” Samting ya i soemaot klia se oli gat fasin blong laeklaekem narafala olsem wan brata.​—Jon 13:35.

Mo tu, ol Kristin brata oli givim ol klos, kakae, mo mane. Papa blong famle ya i talem se: “Ol samting ya i hapen long taem blong ‘Krismas’ taem we ol narafala man oli stap givim presen, be i stret blong talem se i no gat wan long olgeta narafala man ya we oli glad moa bitim mifala, from we fasin blong givim we mifala i kasem, i truwan.” Mo oli talem tu se: “Sloslou mifala i stap fogetem faea ya taem mifala i tingbaot kaen fasin we mifala i kasem mo ol nambawan fren. Mifala i tangkiu long Jeova, Papa blong yumi long heven, from nambawan famle blong brata long wol we oli joengud. Mifala i glad tumas blong joen long bigfala famle ya.”

I tru se, i no long olgeta trabol we bambae yumi save kasem help olsemia. Be stori ya i soemaot olsem wanem kongregesen i save givhan.

Waes We i Kamaot Long Heven

Plante man oli faenem wan narafala rod we Kristin kongregesen i mekem blong givhan long man mo mekem oli strong. ?Wanem rod ya? Ol buk we “slef we i stret mo waes” i wokem. Sam long ol buk ya, hemia Wajtaoa mo Wekap! Tufala magasin ya i yusum waes blong God we i stap long Baebol, blong givim ol gudfala advaes mo ol save blong givhan long laef blong yumi. (Ol Sam 119:105) Antap long ol save blong Baebol, ol brata blong yumi oli mekem dip stadi mo oli traem faenem ol gudfala tingting blong eksplenem ol trabol olsem tingting we i foldaon olgeta, olsem wanem man i save kamgud bakegen from strong fasin we narafala i mekem long hem, ol trabol we wol i fesem mo problem long saed blong mane, traem we ol yangfala oli kasem, mo ol trabol we man i kasem long ol pua kantri. Antap moa, tufala magasin ya i leftemap rod blong God olsem beswan rod blong laef.​—Aesea 30:20, 21.

Evri yia, Wajtaoa Sosaeti i kasem plante taosen leta blong ol man we oli talem tangkiu. Eksampel, long saed long wan haf blong Wekap! we i tokbaot fasin we man i kilim hem wan i ded, wan yangfala man long Rasia i raetem se: “From we klosap tingting blong mi i foldaon olgeta, . . . plante taem mi bin tingbaot blong kilim mi wan i ded. Wekap! ya i mekem bilif blong mi i strong moa se bambae God i halpem mi blong stretem ol problem blong mi. God i wantem se mi stap laef. Mi talem tangkiu long Jeova from help we hem i givim long mi tru long Wekap! ya.”

Sipos ol strongfala wef blong trabol blong wol ya oli raf tumas blong winim, yu save sua se Kristin kongregesen i wan sefples blong haed long hem. Yes, sipos fasin blong wol ya blong no soem lav long narafala i daonem tingting blong yu, yu save faenem lav ya long ogenaesesen blong Jeova. Taem yu kasem help olsemia, maet yu harem olsem Kristin woman ya, we i faenem rod blong winim problem blong hem taem hasban blong hem i sik bigwan, se: “From lav mo fasin kea we mitufala i kasem, mi harem olsem se Jeova i karem mitufala long han blong hem mo tekem mitufala i pastru long trabol ya. !Mi talem tangkiu tumas long Jeova from nambawan ogenaesesen blong hem!”

[Ol futnot]

[Tok Blong Pija Long Pej 26]

Yumi save givhan long olgeta we oli sik, olgeta we oli krae from famle no fren we i ded, mo narafala man bakegen