Gat Tangkiu From “O Man We Oli Olsem Presen”

“Yufala i ona gud long olgeta ya we oli stap wok [“strong,” NW ] wetem yufala. . . . Yufala i mas ona gud long olgeta from ol wok ya we oli stap mekem, mo yufala i mas lavem olgeta.”​—1 TESALONAEKA 5:​12, 13.

1. Folem Ol Wok 20:35, ?fasin blong givim presen i save mekem wanem? Eksplenem.

“MAN we i stap givim presen i go, hem i save harem gud moa, i winim man we i stap kasem presen blong hem.” (Ol Wok 20:35) ?Yu yu tingbaot wan taem we ol tok ya blong Jisas oli kamtru long yu? Maet yu givim presen long wan we yu lavem tumas. Yu bin jusumgud presen ya, from we yu wantem se hem i givim glad long hemia we bambae i kasem. !Yu yu glad tumas long hat blong yu, taem yu luk se hemia we yu lavem tumas i haremgud! Fasin blong givim presen wetem fulhat i wan rod blong soem lav, mo fasin blong soem lav i givim bigfala glad long yumi.

2, 3. (a) ?From wanem yumi save talem se i no gat wan man i hapi moa bitim Jeova? ?Mo olsem wanem “ol man we oli olsem presen” oli save mekem hat blong Jeova i glad? (b) ?Yumi wantem mekem wanem wetem presen we God i givim long yumi?

² ?Be, hu long yumi i save hapi moa i winim Jeova, God ya we i stap givim ol “presen we oli nambawan”? (Jemes 1:​17; 1 Timoti 1:​11) Evri presen we hem i givim, oli kamaot from lav blong hem. (1 Jon 4:8) Lav nao i pusum God blong givim “ol man we oli olsem presen” i go long kongregesen​—tru long Kraes. (Efesas 4:8) Taem God i givim ol elda blong lukaot long ol sipsip blong hem, hem i soemaot se hem i lavem tumas ol man blong hem. Jeova i no jusum ol elda ya olbaot​—oli mas kasem ol hae mak blong Baebol. (1 Timoti 3:​1-7; Taetas 1:​5-9) Ol elda oli save se oli mas ‘lukaot long ol sipsip wetem kaen fasin.’ Olsem nao, bambae ol sipsip oli save soem tangkiu long olgeta. (Ol Wok 20:29; Ol Sam 100:3) !Hat blong Jeova i fulap long glad taem hem i luk se hat blong ol sipsip blong hem i fulap wetem fasin tangkiu!​—Ol Proveb 27:11.

³ I sua se yumi wantem tinghae long praes blong wan presen we God i givim. Mo tu, yumi wantem soemaot se yumi gat tangkiu from ol presen ya. Taswe, i gud blong askem tufala kwestin ya se: ?Olsem wanem ol elda oli mas tingbaot wok blong olgeta insaed long kongregesen? ?Mo olsem wanem ol sipsip oli save soemaot se oli gat tangkiu from “ol man we oli olsem presen”?

‘Mifala i Wantem Wok Wetem Yufala’

4, 5. (a) ?Pol i talem se kongregesen i sem mak long wanem samting, mo from wanem pijatok ya i stret nomo? (b) ?Pijatok blong Pol i soem wanem long saed blong tingting mo fasin we yumi mas soem long narafala?

⁴ Jeova i givim raet long “ol man we oli olsem presen” blong mekem sam wok long kongregesen. I tru se ol elda oli no wantem yusum raet ya long fasin we i no stret. Be, oli save se, from we oli sinman, i no isi blong yusum raet ya long fasin we i stret oltaem. ?Nao, wanem stret tingting we ol elda oli mas gat long saed blong olgeta wanwan mo ol sipsip? Tingbaot wan pijatok we aposol Pol i talem. Afta we hem i eksplenem from wanem God i givim “ol man we oli olsem presen,” hem i raetem se: “Long olgeta fasin blong yumi, bambae yumi save gru blong kam bigman, blong joen long Kraes. Yumi olsem ol haf blong bodi blong hem, we hem nomo i hed blong bodi ya, mo hem i stap mekem yumi joen blong kam wan bodi nomo. Mo ol joen blong bodi ya oli stap holem bodi ya, blong i stap strong oltaem. Nao taem yumi ya, we yumi olsem ol haf blong bodi ya blong hem, yumi mekem ol samting we i stret nomo blong yumi mekem, bodi ya blong hem i save gru. Taem yumi stap lavlavem yumi, bodi ya blong Kraes i save kam strong moa.” (Efesas 4:​15, 16) Pol i soem se kongregesen, hemia ol elda tugeta wetem ol memba blong kongregesen, oli olsem wan bodi. ?From wanem pijatok ya i stret nomo?

⁵ Bodi blong yumi i gat plante haf blong hem, be i gat wan hed nomo. Evri samting blong bodi​—olsem masel, nev,a mo ol string blong blad​—olgeta evriwan oli impoten. Ol wanwan haf ya blong bodi oli givhan blong mekem se bodi i strong mo i naes. Samting ya i sem mak wetem kongregesen. Kongregesen i gat plante memba blong hem, be ol wanwan memba ya​—ol yangfala no ol olfala, olgeta we oli strong no olgeta we oli no strong​—oli save givhan blong mekem kongregesen i strong mo i naes long saed blong spirit. (1 Korin 12:14-​26) I no mas gat wan long yumi we i gat filing ya se hem i no impoten. Be tu, i no mas gat wan long yumi we i ting se hem i hae moa i winim ol narafala, from we yumi evriwan​—ol man blong lukaot sipsip mo ol sipsip​—yumi olsem wan bodi, mo yumi gat wan hed nomo, hemia Kraes. Taswe, pijatok blong Pol i nambawan. Pijatok ya i makem lav, fasin kea, mo respek, we yumi mas soemaot long narafala. Taem ol elda oli luksave samting ya, bambae oli gat tingting daon, mo stret tingting long saed blong wok blong olgeta long kongregesen.

6. ?Olsem wanem Pol i soem tingting daon nating se hem i kasem raet blong wok olsem aposol?

⁶ “Ol man we oli olsem presen,” oli no traem blong bos long laef no bilif blong ol Kristin brata sista blong olgeta, nogat. Tingbaot Pol. God i givim paoa long hem blong wok olsem aposol. Nating se i olsem, be wetem tingting daon, hem i talem long ol Kristin long Korin se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, nogat. Bilif blong yufala i stanap finis. Mifala i wantem wok wetem yufala, blong mekem yufala i harem gud moa.” (2 Korin 1:​24) Pol i no wantem bos long bilif mo laef blong ol Kristin brata sista blong hem. Hem i luk se i no nid blong mekem olsem. Hem i trastem se ol brata sista blong hem oli gat strong bilif, mo se oli stap long ogenaesesen blong Jeova from we oli wantem mekem wanem we i stret. Taswe, taem Pol i stap tokbaot hem wan mo fren blong hem, Timoti, we i stap kampani wetem hem, i olsem we hem i talem se: ‘I wok blong mifala blong joen wetem yu blong mekem wok blong God wetem glad.’ (2 Korin 1:1) !Pol i rili soem tingting daon!

7. ?Ol elda we oli gat tingting daon oli luksave wanem samting long saed blong wok blong olgeta long kongregesen, mo oli sua long wanem samting long saed blong ol brata sista blong olgeta?

⁷ “Ol man we oli olsem presen” tede, oli mekem sem wok. Oli ‘wok wetem yumi blong mekem yumi harem gud.’ Taswe, ol elda we oli gat tingting daon, oli luksave se oli no gat raet blong putum mak long wanem we narafala i mas mekem long wok blong God. Oli save se oli mas leftemap tingting blong ol narafala blong gohed moa long wok blong prij mo blong kam gud moa long wok ya. Be tu, oli save se wok we man i mekem i go long God, i mas kamaot from gladhat. (Skelem wetem 2 Korin 9:7.) Oli sua se sipos ol brata sista blong olgeta oli glad, bambae oli mekem wanem we oli naf blong mekem. Taswe, ol elda oli wantem tumas blong halpem ol brata sista blong olgeta blong “mekem wok blong Jeova wetem glad.”​—Ol Sam 100:​2, NW.

Halpem Evriwan Blong Wok Wetem Glad

8. ?Wanem sam rod we ol elda oli save folem blong halpem ol brata sista blong olgeta blong mekem wok blong God wetem glad?

⁸ Ol elda. ?Olsem wanem yufala i save halpem ol brata sista blong yufala blong wok wetem glad? Eksampel blong yufala i save leftemap tingting blong olgeta. (1 Pita 5:3) Soemaot strong tingting mo glad we yufala i gat long wok blong prij. Nao eksampel blong yufala bambae i pulum ol narafala blong mekem sem mak. Presem ol narafala from traehad we oli mekem wetem fulhat blong olgeta. (Efesas 4:​29) Sipos yufala i kaen gud long ol narafala mo presem olgeta wetem fulhat blong yufala, bambae samting ya i givhan long ol narafala blong harem se oli gat wok blong mekem mo se yumi nidim olgeta. Fasin blong presem ol narafala from wok we oli mekem, i leftemap tingting blong ol sipsip blong wantem givim bes blong olgeta long wok blong God. No skelem wok blong wan brata wetem narawan. (Galesia 6:4) Sipos yufala i stap skelem wok blong wan brata wetem narafala, samting ya i no save givhan long ol narafala blong gohed moa, be bambae i mekem tingting blong olgeta i foldaon. Antap long hemia, save blong olgeta sipsip blong Jeova wanwan mo ol samting long laef blong olgeta, oli no sem mak. Olsem Pol, yufala i mas soemaot long ol brata sista se yufala i trastem olgeta. Man we i stap lavem man tumas, “oltaem hem i stap bilif strong.” Taswe, i gud we yumi bilif strong se ol brata sista blong yumi oli lavem God mo oli wantem mekem hem i glad. (1 Korin 13:7) Taem yufala i “rere blong ona” long narafala, yufala i mekem se ol narafala oli soemaot beswan samting we i stap insaed long olgeta. (Rom 12:10) Yufala i save sua se, taem yufala i leftemap tingting blong ol sipsip, bambae bighaf blong olgeta i mekem wanem we oli naf blong mekem long wok blong God, mo bambae oli faenem glad long wok ya.​—Matiu 11:28-​30.

9. ?Olgeta elda wanwan oli mas gat wanem tingting long saed blong ol narafala elda, we bambae i halpem olgeta blong wok wetem glad?

⁹ Taem yu mekem tingting blong yu i stap daon mo tingbaot se yu man blong ‘wok wetem narafala,’ samting ya bambae i halpem yu blong wok wetem glad mo luksave spesel presen blong ol narafala elda. Waes mo save we ol wanwan elda oli gat blong givhan long kongregesen, i no sem mak. (1 Pita 4:​10) Maet wan elda i gat gudhan blong tij. Maet narawan i gat gudhan blong mekem plan. Maet narawan bakegen i kaen gud mo i gat filing long narafala, mekem se yumi no fraet blong toktok wetem hem. I tru, wan elda i no save kasem olgeta mak ya wantaem. ?Olsem wanem sipos wan elda i gat gudhan blong mekem wan wok​—maet blong tij? ?Samting ya i mekem se hem i hae moa long ol narafala elda? !No gat! (1 Korin 4:⁠7) Defren olgeta, i no nid blong jalus long narafala from save no waes blong hem. Mo tu, i no nid blong ting se yu no naf jes from we ol narafala oli presem wan elda from gudhan we hem i gat blong mekem wan wok. Tingbaot, yu wan yu gat sam gud fasin we Jeova i luk long yu. Mo hem i save halpem yu blong wokem ol fasin ya mo yusum olgeta blong givhan long ol brata sista blong yu.​—Filipae 4:⁠13.

‘Yumi Mas Obei Gud Mo Putum Yumi Wan i Stap Daon’

10. ?From wanem i stret nomo we yumi soem tangkiu from “ol man we oli olsem presen”?

¹⁰ Taem yumi kasem wan presen, i stret nomo blong soem tangkiu from presen ya. Kolosi 3:15 (NW) i talem se: “Oltaem yufala i mas soem fasin tangkiu.” ?Nao, olsem wanem long “ol man we oli olsem presen,” we Jeova i givim fri nomo long yumi? Yes, fastaem yumi mas talem bigfala tangkiu long Jeova, God ya we i stap givim presen long yumi long gladhat blong hem. Be tu, yumi mas soem tangkiu long “ol man we oli olsem presen.” ?Olsem wanem yumi save soem tangkiu long olgeta?

11. (a) ?Olsem wanem yumi save soemaot se yumi gat tangkiu from “ol man we oli olsem presen”? (b) ?Wanem mining blong tok ya “ona” mo ‘putum yumi wan i stap daon’?

¹¹ Yumi mas kwik blong obei long ol advaes mo disisen blong Baebol we “ol man we oli olsem presen” oli givim long yumi. Olsem nao, yumi soem se yumi gat tangkiu long olgeta. Baebol i givim advaes long yumi se: “Yufala i mas ona long ol lida blong yufala, mo yufala i mas obei long ol tok blong olgeta [“putum yufala i stap daon long olgeta,” NW]. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya olsem wanem. Yufala i mas mekem olgeta oli harem gud long wok ya. Sipos yufala i stap mekem olgeta oli harem nogud, fasin ya bambae i no givhan long yufala nating.” (Hibrus 13:17) Makemgud se yumi “mas ona,” be tu, yumi ‘mas putum yumi wan i stap daon’ long olgeta ya we oli stap lidim yumi. Grik tok we oli tanem i kam ‘putum yumi wan i stap daon’ i minim se “obei nomo.” R. C. H. Lenski, wan man blong stadi dip long Baebol, i tokbaot tufala tok ya, “ona” mo “putum yumi wan i stap daon,” i se: “Yumi ona long wan man taem yumi agri nomo long samting we hem i talem long yumi blong mekem, mo yumi bilif se samting ya i stret mo gud. Defren nao, taem yumi gat wan defren tingting, . . . yumi mas obei nomo.” Taem yumi kasem save mo agri long ol disisen blong olgeta ya we oli stap lidim yumi, bambae yumi rere blong obei. ?Be olsem wanem sipos yumi no kasem save risen blong wan disisen we ol elda oli tekem?

12. ?From wanem yumi mas putum yumi wan i stap daon, nating sipos yumi no save risen biaen long wan disisen?

¹² Long taem olsem, yumi nidim blong putum yumi wan i stap daon. ?From wanem? Hemia from we yumi mas trastem se ol man ya we oli kasem ol mak long saed blong spirit, oli tingbaot ol samting we oli blong mekem i gud long yumi. Traem tingbaot, ol elda oli save se oli mas talemaot long Jeova we oli holem wok ya blong olgeta olsem wanem. (Jemes 3:1) Antap long hemia, i gud blong tingbaot se yumi no save ol trufala samting we i lidim ol elda blong tekem wan disisen.​—Ol Proveb 18:13.

13. ?Wanem i save halpem yumi blong putum yumi wan i stap daon taem ol elda oli mekem wan kot komiti?

¹³ ?Olsem wanem sipos ol elda oli mekem wan kot komiti? ?Yumi rere blong putum yumi wan i stap daon? I tru, samting ya i no isi, antap moa, sipos oli mekem disisen blong sakemaot wan we yumi lavem tumas​—maet wan memba blong famle no wan bes fren blong yumi. Bakegen, i gud blong putum yumi wan i stap daon mo akseptem disisen blong “ol man we oli olsem presen.” Olgeta ya oli mas traem savegud ol samting we oli hapen bitim yumi, mo oli gat moa save mo pruf long saed blong ol samting we oli rili bin hapen. Plante taem, oli harem nogud tumas taem oli tekem ol disisen olsem. I wan bigfala responsabiliti blong ‘jajem man long nem blong Jeova.’ (2 Kronikel 19:⁠6) Oli traem bes blong olgeta blong soem fasin sore, from we oli save se God i “rere blong fogif.” (Ol Sam 86:​5, NW) Be tu, oli mas lukaot gud se kongregesen i stap klin oltaem. Taswe, God i askem olgeta blong putumaot ol man we oli no wantem tanem tingting from sin blong olgeta. (1 Korin 5:​11-​13) Plante taem, man we i mekem i nogud, hem nomo i agri blong oli sakemaot hem. Maet fasin stretem ya i naf blong mekem se gudfala tingting blong man ya i kambak. Sipos yumi, we yumi lavem man ya tumas, yumi putum yumi wan i stap daon long taem olsem, yumi stap halpem man ya blong kasem gudfala frut from fasin stretem ya.​—Hibrus 12:11.

“Ona Gud Long Olgeta”

14, 15. (a) Folem 1 Tesalonaeka 5:​12, 13, ?from wanem yumi mas ona gud long ol elda? (b) ?From wanem yumi save talem se ol elda ‘oli stap wok strong long medel blong yumi’?

¹⁴ I gat wan narafala rod we yumi save folem blong soem tangkiu long “ol man we oli olsem presen.” Yumi mas ona gud long olgeta. Taem Pol i raet long kongregesen blong Tesalonaeka, hem i givim advaes long olgeta se: “Yufala i ona gud long olgeta ya we oli stap wok [“strong,” NW] wetem yufala. Hemia olgeta ya we Masta blong yumi i jusumaot olgeta blong lidim yufala, mo blong oli tijim yufala. Yufala i mas ona gud long olgeta from ol wok ya we oli stap mekem, mo yufala i mas lavem olgeta.” (1 Tesalonaeka 5:​12, 13) Ol elda oli rili “wok strong.” Samting ya i minim se oli mas lego sam samting we oli laekem tumas, blong givhan long yumi. Tekem smoltaem mo tingbaot bigfala wok we ol gudfala brata ya oli stap mekem.

¹⁵ Plante elda oli gat famle. Taswe, oli mas wok blong givim ol samting we famle blong olgeta i nidim long saed blong bodi. (1 Timoti 5:8) Sipos wan elda i gat ol pikinini, hem i nidim blong spenem taem mo blong kea long ol pikinini blong hem. Maet hem i mas halpem olgeta blong mekem ol homwok blong olgeta. Mo tu, hem i mas putumap sam taem blong pleplei no spel wetem olgeta. (Prija 3:​1, 4) Samting we i moa impoten se, hem i givim ol samting we famle blong hem i nidim long saed blong spirit. Hem i mas mekem stadi wetem famle blong hem oltaem, prij wetem olgeta, mo tekem olgeta oli go long ol Kristin miting. (Dutronome 6:​4-7; Efesas 6:4) Yumi no mas foget se, antap long ol wok ya we plante long yumi tu i mekem, ol elda oli mas mekem sam narafala wok bakegen. Oli mas rerem ol haf blong miting, visitim ol sipsip, lukaot long nid blong kongregesen long saed blong spirit, mo mekem kot komiti, sipos i nidim. Samfala oli mas karem moa responsabiliti. Oli mas lukaot long ol seket asembli, distrik asembli, wok blong bildim Haos Kingdom, mo Komiti we oli toktok wetem ol dokta. !Ol brata ya oli rili “wok strong”!

16. Talem sam rod we yumi save folem blong soem fasin blong ona gud long ol elda.

¹⁶ ?Olsem wanem yumi save soem ona long olgeta? Wan waestok blong Baebol i talem se: “!Tok we man i talem long stret taem blong hem, hem i gud we i gud tumas!” (Ol Proveb 15:23, NW; 25:11) Taswe, taem yumi talem tangkiu long ol elda mo leftemap tingting blong olgeta, yumi soem se yumi no ting nating long ol hadwok blong olgeta. Mo tu, yumi no mas strong tumas long olgeta, long ol samting we yumi wantem olgeta blong mekem. Be, yumi mas harem se yumi fri blong askem help long olgeta. Maet i gat sam taem we ‘yumi harem nogud tumas long hat blong yumi’ mo yumi nidim ol tok blong Baebol we oli leftemap tingting mo soem rod long yumi. No, maet yumi nidim wan man we i “savegud fasin blong tij” long Tok blong God blong givim advaes long yumi. (Ol Sam 55:​4, NW; 1 Timoti 3:2) Long sem taem, yumi mas tingbaot se ol elda oli no save spenem tumas taem wetem yumi, from we oli mas lukaot long ol nid blong famle blong olgeta mo ol narafala long kongregesen. Sipos yumi “soem filing” long ol brata ya we oli rili wok strong, bambae yumi no mekem wan samting we i save tekem tumas taem blong olgeta. (1 Pita 3:​8, NW) Be, i gud yumi gat tangkiu from smol taem mo fasin kea we oli traehad blong givim long yumi.​—Filipae 4:5.

17, 18. ?Plante waef we hasban blong olgeta i elda, oli gat strong tingting blong lego wanem samting, mo olsem wanem yumi save soem se yumi no ting nating long fasin traehad blong ol sista ya?

¹⁷ ?Olsem wanem long ol waef blong ol elda? ?Yumi nidim blong ona gud long olgeta? !Yes! Tingbaot, oli joen wetem hasban blong olgeta blong givhan long kongregesen. Plante taem, ol sista ya oli mas lego sam samting we oli laekem. Sam samtaem, ol aoa we wan elda i mas spenem wetem famle blong hem, hem i spenem blong mekem ol wok blong kongregesen. Long plante kongregesen, ol Kristin waef olsem, oli rere blong lego ol samting ya blong mekem se hasban blong olgeta i save kea long ol sipsip blong Jeova.​—Skelem wetem 2 Korin 12:15.

¹⁸ ?Olsem wanem yumi save soem se yumi no ting nating long ol Kristin sista ya? Hemia taem yumi no tekem tumas taem blong ol hasban blong olgeta from ol samting we oli no impoten. I gud blong tingbaot tu se, wan smol tok nomo blong talem tangkiu i gat bigfala paoa. Proveb 16:24 i talem se: “Man we i kaen gud, tok blong hem i olsem gudfala kakae. Taem man i kakae, hem i harem i swit, mo i mekem bodi blong hem i strong.” Tingbaot stori ya. Afta long wan Kristin miting, wan brata mo waef blong hem, tufala i kam long wan elda mo askem long hem sipos tufala i save storeyan wetem hem long saed blong yangfala boe blong tufala. Taem elda ya i stap storeyan wetem tufala, waef blong elda ya i stap wet wetem longfala tingting. Biaen, mama ya i go luk waef blong elda mo i talem se: “Mi wantem talem bigfala tangkiu from taem we hasban blong yu i tekem blong halpem famle blong mi.” Smol tok ya blong talem tangkiu i rili kasem hat blong waef blong elda ya.

19. (a) ?Ol elda oli stap gohed strong blong mekem wanem wok? (b) ?Yumi evriwan i mas gat strong tingting blong mekem wanem samting?

¹⁹ Jeova i givim ol elda blong lukaot long ol sipsip blong hem. Hemia i wan long ol “presen we oli nambawan” we hem i givim long yumi. (Jemes 1:​17) Yes, ol man ya oli no stret gud olgeta. Oli sem mak olsem yumi, oli save mekem mastik samtaem. (1 King 8:​46) Nating se i olsem, ol elda long ol kongregesen raon long wol, oli stap mekem wok we Jeova i wantem olgeta blong mekem​—hemia blong stretem ol sipsip, bildimap olgeta, mekem oli joengud, mo protektem olgeta. I gud we ol elda wanwan oli gohed strong blong lukaot long ol sipsip blong Jeova wetem kaen fasin. Long rod ya, oli pruvum se oli wan presen, no wan blesing long ol brata sista blong olgeta. I gud we yumi evriwan i gat strong tingting blong soem tangkiu long “ol man we oli olsem presen.” Blong mekem olsem, yumi mas obei gud long ol elda mo putum yumi wan i stap daon, mo soem bigfala ona long olgeta from hadwok we oli stap mekem. !Yumi talem bigfala tangkiu long Jeova from we hem i lavem yumi tumas, nao i givim ol man we oli stap talem long ol sipsip blong hem se: ‘I wok blong mifala blong halpem yufala blong mekem wok blong God wetem glad’!

[Futnot]

?Bambae Yu Yu Ansa Olsem Wanem?

◻ ?From wanem i stret nomo blong talem se kongregesen i olsem wan bodi?

◻ ?Olsem wanem ol elda oli save halpem ol brata sista blong olgeta blong mekem wok blong Jeova wetem glad?

◻ ?From wanem yumi mas ona, be tu, yumi mas putum yumi wan i stap daon long olgeta we oli stap lidim yumi?

◻ ?Olsem wanem yumi save soem se yumi ona gud long ol elda?

[Tok Blong Pija Long Pej 16]

Ol elda, presem ol narafala from ol traehad we oli mekem wetem fulhat blong olgeta

[Tok Blong Pija Long Pej 17]

Eksampel we ol elda oli soem blong wok strong long wok blong prij i save halpem famle blong olgeta mo ol narafala blong wok wetem glad

[Tok Blong Pija Long Pej 18]

!Yumi gat bigfala tangkiu from ol elda blong yumi we oli rili wok strong!