Haremgud Long Jeova Mo Stap Glad

OL PLAN we oli wokgud mo we oli kasem mak blong olgeta, oltaem oli mekem man i harem gud. Yes, i gat wan hapi taem olsem long Maj 13, 1999, long Wajtaoa Edukesen Senta long Pateson, Niu Yok. Hemia taem blong givim ol stefeket long 48 studen blong klas namba 106 blong Wajtaoa Baebol Skul blong Gilead.

Theodore Jaracz, wan memba blong Hed Kampani, hem i bin kasem stefeket long klas namba seven blong Gilead. Hem i jeaman long program ya blong givim stefeket. Long fastok blong hem, hem i makemgud ol tok blong Ol Sam 32:11 (NW) se: “Yufala we fasin blong yufala i stret, i gud yufala i haremgud long Jeova mo yufala i glad.” Theodore Jaracz i talem from wanem i stret blong haremgud long taem ya, hem i se: “From ol samting we Jeova i stap mekem long ol man we hat blong olgeta i stret, olsem ol studen blong yumi long Gilead, ale, yumi save harem gud long ol taem olsem tede.” Nating se ol studen ya oli mekem plan blong joen long Gilead Skul mo oli traehad blong kam naf blong wok olsem misinari, Jeova hem wan i mekem rod blong bambae plan ya i wokgud fulwan. (Ol Proveb 21:5; 27:1) Yes, tok blong Brata Jaracz i makemgud stret risen from wanem yumi ‘haremgud long Jeova.’

Long bigfala haos blong miting ya, i gat famle mo fren blong ol studen ya, we oli kam long 12 defren kantri blong joen long gudfala taem ya. I gat 5,198 man oli stap​—ol memba blong famle blong Betel long Bruklin, Pateson mo Wolkil, oli folem program tru long maekrofon mo televisin. Evriwan i wet se program i stat, mo i klia se bigfala glad i stap long medel blong olgeta.

Ol Tok We Oli Pulum Yumi Blong Stap Glad

Afta we Brata Jaracz i mekem lastok blong hem, hem i singaot faswan long ol faef brata i kam. Olgeta ya oli rerem ol tok we oli kamaot long Baebol blong leftemap tingting blong ol studen blong Gilead, mo blong evriwan we i stap long miting ya tu.

Faswan brata we i givim tok hem i William Malenfant, wan studen blong klas namba 34 blong Gilead. Naoia hem i givhan long Tijing Komiti blong Hed Kampani. Stamba tok blong hem se “!I No ‘Olgeta Samting’ We Oli Blong Nating Nomo!” Tok ya i stanap long Prija 1:2. Brata i askem kwestin ya se: “?Long tok blong Solomon, hem i rili minim se, olgeta samting oli blong nating nomo?” Hem i ansa se: “No gat. Solomon i stap tokbaot ol plan blong man we i sakemaot wil blong God, ol mak we man i traehad blong kasem, we oli no laenap wetem wil blong God​—olgeta samting ya nao oli blong nating nomo.” Be, wosip we i go long trufala God, Jeova, hemia i no blong nating nomo; fasin blong stadi long Tok blong God, Baebol, mo tijim tok ya long ol narafala man, oli no blong nating. God i no save fogetem ol traehad ya we ol man blong hem oli mekem. (Hibru 6:​10) Tru ya, nating sipos trabol i kasem olgeta we God i glad long olgeta, be bambae Jeova i ‘lukaot gud long olgeta.’ (1 Samuel 25:29) !Tok ya i nambawan! Olgeta man we oli wosipim Jeova bambae oli glad oltaem sipos oli stap rimemba ol tok ya.

John Barr, wan memba blong Hed Kampani, i leftemap tingting blong ol studen blong klas ya wetem tok ya, “Haremgud Long Misinari Wok We Yu Kasem.” Brata ya i soemaot se, oltaem Jeova God i bin soemaot se hem i laekem wok blong misinari. “Wok ya i laenap stret wetem lav we Jeova i gat long olgeta man blong wol. Hem i sanem stret Pikinini blong hem i kam long wol ya. Jisas i misinari we i hae moa long ol narawan, hem i faswan long ol misinari.” Ol studen oli save tingting dip long ol jenis we Jisas i mas mekem blong finisim wok blong hem long wol. Tede olgeta we oli wantem oli save kasem yet ol blesing we misinari wok blong Jisas i karem. Brata Barr i talem se hemia i from we Jisas i laekem blong mekem wok blong God, mo hem i laekem ol man. (Ol Proveb 8:30, 31) Brata Barr i leftemap tingting blong ol studen blong no lego long wok ya we bambae oli kasem, i no from we oli mas stanap strong nomo, be from we oli laekem mekem wok ya. Hem i talem long ol studen se: “Trastem Jeova; bambae hem i no save mekem yu yu harem nogud.”​—Ol Sam 55:22.

Biaen, nekis brata we i givim tok hem i Lloyd Barry, wan narafala memba blong Hed Kampani. Stamba tok blong hem se, “Wokbaot Blong Olwe Long Nem Blong Jeova.” Brata Barry i joen long klas namba 11 blong Gilead, biaen hem i mekem wok blong misinari bitim 25 yia long Japan. Hem i talem sam stori blong ol faswan misinari mo hem i eksplenem ol traem we oli bin fesem. ?Wanem gudfala advaes we hem i givim blong givhan long ol studen? “Samting we i moa impoten hemia blong stap strong long saed long spirit. Mo tu, i gud blong lanem lanwis mo kastom blong ples we bambae yu i go long hem. No tinghae tumas long yu wan; holemstrong long wok blong yu; yu no mas kam les, no gat tingting blong lego wok ya.” Brata Barry i talem long ol studen se, long wok blong olgeta long ol narafala kantri, bambae oli faenem ol man we oli wokbaot long nem blong plante defren god. Nao hem i mekem olgeta oli tingtingbak long ol tok blong Maeka se: “From we olgeta nesen, bambae oli wokbaot long nem blong god blong olgeta. Be yumi, bambae yumi wokbaot olwe, long nem blong Jeova, God blong yumi, yes, gogo i no save finis.” (Maeka 4:5, NW) Eksampel blong ol misinari blong bifo i pulum strong ol man blong God blong gohed blong wokbaot long nem blong Jeova mo stap tru long hem.

Brata we i kam biaen hem i wan tija blong Gilead, nem blong hem Lawrence Bowen. Stamba tok blong hem i leftemap kwestin ya se “?Bambae Yu Soem Se Yu Wanem Kaen Man?” Hem i talem se, blong karem gudfala frut long wok blong God i dipen long bilif mo fasin blong trastem Jeova. King Asa i trastem Jeova fulwan, taswe hem i winim ami blong wan milyan man we oli enemi blong hem. Be, profet Asaria i mekem Asa i tingbaot se hem i mas gohed blong trastem God: “Jeova i stap wetem yu oltaem sipos yu soem se yu stap oltaem wetem hem.” (2 Kronikel 14:​9-​12; 15:​1, 2) Nem blong God, Jeova, i minim se hem i naf blong kam wanem we hem i wantem blong mekem stamba tingting blong hem i kamtru. Jeova i save kam olsem Man we i Givim Ol Samting, Man blong Protektem, no Man we i Givim Panis. Taswe, ol misinari we oli trastem Jeova mo we oli folem stamba tingting blong God long wok blong olgeta, bambae oli win long wok we oli kasem blong mekem. (Eksodas 3:14) Brata Bowen i finisim tok blong hem olsem: “Neva fogetem se sipos yu mekem stamba tingting blong God i kam stamba tingting blong yu, bambae God i mekem se yu yu naf blong kam wanem we i nidim blong finisim wok we yu kasem.”

Laswan man blong givim tok long haf ya blong program hem i Wallace Liverance. Bifo hem i wan misinari mo naoia hem i sekretari blong Gilead skul. Stamba tok blong hem se, “Mekem Tok Blong God i Laef Mo i Stap Wok Oltaem Long Yu.” Tok ya i pulum tingting i go long mesej, no promes blong God, we i win mo i stap kamtru oltaem. (Hibru 4:​12) Baebol i gat paoa long laef blong olgeta man we oli letem hem i wok long laef blong olgeta. (1 Tesalonaeka 2:​13) ?Olsem wanem tok ya i save laef oltaem mo wok long laef blong yumi? Tru long fasin blong stadi dip long Baebol oltaem. Brata Liverance i mekem ol studen oli tingbaot ol defren rod blong stadi Baebol we ol studen ya oli bin lanem long Gilead, olsem taem ya we oli bin ridim Tok blong God mo traem faenem mining blong hem mo soemaot olsem wanem blong yusum ol tok ya long laef blong olgeta. Brata ya i yusum tok blong Albert Schroeder, wan memba blong Hed Kampani, we bitim 50 yia bifo hem i jeaman blong komiti we i stanemap Gilead Skul, hem i se: “Man we i lukluk ol vas raonabaot, hem i naf blong kasem paoa long saed long spirit we God i putum insaed long Tok blong hem, long fasin we i fulwan mo i stret.” Fasin ya blong stadi Baebol i mekem se tok blong God i laef oltaem mo i wok long yumi.

Ol Gudfala Ekspiryens Mo Toktok Blong Ol Studen

Biaen long ol tok ya, program i givim jans long ol man we oli joen long miting ya blong harem gudfala ekspiryens blong ol studen. Mark Noumair, we i bin misinari bifo mo naoia hem i wan tija blong Gilead, i askem long sam studen blong oli eksplenem mo oli soemaot olsem wanem oli traehad blong prij long defren rod. Samfala oli statem mo lidim ol Baebol stadi wetem ol man long teritori blong olgeta, from we oli bin makem gud ol defren samting ol samting we oli stap long laef blong ol man ya mo long ol toktok we oli talem, mo from we oli soem intres long olgeta tu. Long rod ya, ol studen blong skul ya oli ‘lukaot gud long fasin blong olgeta, mo long ol tok we oli stap tijim ol man long hem’ mo oli wantem tumas blong givhan long ol narafala man blong kasem sef.​—1 Timoti 4:​16.

Sam narafala brata we oli kam long Wajtaoa Edukesen Senta blong kasem trening long skul blong ol memba blong branj komiti, oli bin serem sam gudfala advaes tu, mo givim moa glad long ol misinari tru long ol ekspiryens blong olgeta. Brata Samuel Herd mo Robert Johnson, we tufala i wok long hedkwota, oli askem sam kwestin long ol memba blong ol branj ofis blong Sosaeti we oli stap long Bolivia, Simbabwe, Nikaragwa, Ripablik blong Sentrol Afrika, Dominikan Ripablik, Papua Niu Gini, mo Kamerun.

Afta long ol ekspiryens mo ol toktok ya, Gerrit Lösch, wan studen blong klas namba 41 blong Gilead, we naoia hem i wan memba blong Hed Kampani, i givim laswan tok we i wekemap tingting se, “?Ol Man Oli ‘Lavem Yu Tumas’?” Brata Lösch i mekem ol studen oli tingbaot se ol man oli no laekem Jisas, stret pikinini blong God, oli ‘lukluk nogud long hem, oli tanem baksaed long hem.’ (Aesea 53:3) Taswe, tede yumi no sapraes we long plante ples long wol, ol man oli lukluk ol misinari olsem ol strenja we oli no welkam nating. Be, tingbaot Daniel, we i wok longtaem long Babilon. God i yusum wan enjel blong singaot Daniel tri taem se, man we Jeova i ‘lavem hem tumas.’ (Daniel 9:​23; 10:11, 19) ?Wanem i mekem se God i lavem Daniel olsem? Hemia from we Daniel i neva daonem ol rul blong Baebol taem hem i laef long medel blong ol man Babilon wetem ol kastom blong olgeta. Hem i stap tru long ol samting we hem i mekem, mo neva hem i yusum posisen blong hem blong kasem samting we hem i wantem. Mo hem i stadi oltaem long Tok blong God. (Daniel 1:​8, 9; 6:4; 9:2) Hem i prea oltaem long Jeova mo hem i rere oltaem blong leftemap God nomo, taem ol samting we hem i mekem oli rongud. (Daniel 2:​20) Sipos ol man blong God oli folem eksampel blong Daniel, bambae oli save kasem lav, i no blong wol ya, be blong Jeova God.

Blong finisim program ya we i leftemap tingting long saed long spirit, jeaman i ridim sam long ol mesej we oli kam long olgeta ples long wol. Biaen, olgeta 24 brata wetem waef blong olgeta, oli kasem stefeket blong olgeta, mo oli harem wanem kantri we bambae oli go wok long hem. Afta, wan long ol studen ya i ridimaot wan leta we i go long Hed Kampani mo famle blong Betel. Leta ya i talemaot filing we klas ya i gat taem hem i kasem trening long ol faef manis we oli pas, blong rerem olgeta long wok we oli mas mekem.

Taem program i finis, yumi harem se ol man we oli aot long ples blong miting ya oli ‘glad mo oli gat fasin tangkiu.’​—Nehemaea 12:27.

[Bokis blong pija long pej 27]

Kaontem Klas Ya

Oli kamaot long hamas kantri: 10

Oli go wok long hamas kantri: 19

Hamas studen: 48

Hamas hasban mo waef tugeta: 24

Oli gat hamas yia: 33

Hamas yia long trutok: 16

Hamas yia finis oli prij fultaem: 13

[Tok Blong Pija Long Pej 25]

Klas Namba 106 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Deakin , D.; Puopolo, M.; Laguna, M.; Davault S.; Dominguez, E.; Burke, J. (2) Gauter, S.; Vazquez, W.; Seabrook A.Moska, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. 4) McLeod, J.; Thompson, J. Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R. Helly, F.; Smith, M.; Beyer, D.; Mosca, A.(6) Scott, K.; Seabrook, V.; Speta, R.; Coleman, R.; Breward, L.; Davault, W.(7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.