Ol Gudfala Studen Oli Kam Ol Gudfala Misinari

WAN man we nem blong hem Will, tokbaot trening we hem mo waef blong hem, Patsy, i jes bin kasem long klas Namba 103 blong Wajtaoa Baebol Skul Blong Gilead. Hem i se: “!Mi no save bilivim yet se mitufala i bin kasem bigfala blesing ya!” Zahid mo Jeni i agri: “Mitufala i ting se i wan bigfala ona blong stap long skul ya.” Olgeta studen oli bin wokgud long skul ya. Naoia, oli wantem tumas blong statem wok blong olgeta olsem ol misinari. Be fastaem, long miting blong givimaot ol stefeket blong olgeta long Septemba 6, 1997, oli kasem advaes long kaengud fasin, we i save givhan long olgeta blong stanap strong long ples we oli go wok long hem olsem misinari.

Theodore Jaracz, wan memba blong Hed Kampani, i jeaman blong miting ya. Hem i talemaot se, ol memba blong famle blong Betel mo samfala we oli kam long ol ofis blong Wajtaoa Sosaeti long 48 kantri, oli stap. Mo wetem olgeta ya, i gat sam fren mo famle blong ol studen blong skul ya, we oli aot long Kanada, Yurop, Porto Riko, mo Yunaeted Stet blong kam sapotem ol studen mo soemaot se oli laekem olgeta tumas. Brata Jaracz i talem se plante misinari blong ol jyos blong Krisendom,a oli fogetem wok we oli mas mekem long ol defren kantri. Ale, oli stat folem ol narafala stadi mo kos, mo sam long olgeta oli joen long politik tu. Be ol studen blong skul blong Gilead, oli mekem wok we oli bin kasem trening blong mekem. Oli tijim ol man long saed blong Baebol.

Robert Butler we i wok long ofis blong Sosaeti long Bruklin, i givim wan tok nem blong hem, “Karem Gudfala Frut Long Laef Blong Yu.” Hem i eksplenem se, ol man blong wol oli ting se oli karem gudfala frut long laef blong olgeta sipos oli winim plante mane, no wan narafala samting olsem we i mekem i gud long olgeta bakegen. Be samting we i rili impoten, hemia frut we God i wantem yumi blong karem. Jisas i karem frut long wok blong prij we hem i mekem, i no from we hem i pulum fulap man blong folem hem, be from we hem i holemstrong long wok ya. Hem i givim ona long Jeova, mo i stap longwe long ol doti fasin blong wol. (Jon 16:33; 17:4) Hemia nao samting we evri Kristin i mas mekem.

Robert Pevy we hem i bin wok olsem misinari long Esia, i givim advaes ya: “Kam Wan Slef Blong Ol Narafala Man.” Aposol Pol i wan gudfala misinari. ?From wanem i olsem? From we hem i kam olsem wan slef blong ol narafala man. (1 Korin 9:​19-​23) Brata we i givim tok ya i eksplenem se: “Wan studen blong Gilead we i gat tingting olsemia, bambae i no tingbaot wok blong misinari olsem wan rod blong kam hae moa, we i mekem i isi moa long hem blong kasem wan haeples long ogenaesesen blong Jeova. No gat. I mas gat wan tingting nomo i pusum hem taem i go long wan narafala ples blong wok olsem misinari​—hemia blong mekem wok blong ol narafala, hemia nao samting we ol slef oli mekem.”

Gerrit Lösch, wan memba blong Hed Kampani, i givim advaes we i stanap long 2 Korin japta 3 mo 4. Hem i pulum ol studen blong “Soemaot Bigfala Laet Blong Jeova Olsem Wan Glas We i Soemaot Fes Blong Man.” Hem i mekem olgeta oli tingbaot se, save blong God i olsem wan laet we Kristin i kam fulap long hem taem i openem hat blong hem blong kasem ol save ya. Yumi mekem laet ya i saenaot taem yumi talemaot gud nyus mo folem ol gudfala fasin. Hem i talem se: “Sam samtaem, bambae yu harem se yu no naf. Taem yu harem olsemia, dipen long Jeova, mo soemaot se ‘paoa ya we i bigfala tumas i blong God, i no blong yu.’” (2 Korin 4:7) Brata Lösch i yusum tok blong Pol long 2 Korin 4:​1, mo i talem long ol studen se: “Yu no mas kam slak long misinari wok blong yu. !Meksua se glas blong yu i saengud oltaem!”

Karl Adams, wan tija blong skul blong Gilead, i tokbaot wan kwestin we i pulum intres blong evriwan, hemia: “?Wehem Jeova?” Kwestin ya i no long saed blong ples we Jeova i stap long hem long heven, no gat. Hem i tokbaot nid blong rimemba tingting blong Jeova oltaem, mo luksave ol rod we Jeova i soemaot long olgeta. Hem i talem se: “Nating se wan man i bin mekem wok blong Jeova longtaem finis, be taem hem i kasem traem, hem i save fogetem tingting blong Jeova.” (Job 35:10) ?Wanem i bin hapen long ol yia we oli pas finis? Long 1942, ol man blong God oli nidim se God i lidim olgeta. Oli wantem save se, ?wok blong prij i stap kam kolosap long en blong hem, no i gat plante wok yet we oli mas mekem? ?Jeova i wantem se ol man blong hem oli mekem wanem long taem ya? Ale, oli stadi long Tok blong God, nao ansa blong ol kwestin ya i kam klia. Brata Adams i talem se: “Bifo we yia 1942 i finis, oli mekem plan blong stanemap Wajtaoa Baebol Skul Blong Gilead.” Tru ya, Jeova i rili bin blesem wok blong ol misinari we oli tren long skul ya.

Mark Noumair i wan narafala tija blong skul blong Gilead, mo hem i givim tok ya, “?Bambae Yu Yusum Sas Samting Blong Yu Long Wanem Fasin?” Hem i pulum ol studen blong yusum kwik ol trening we oli bin kasem long Gilead, taem oli go long wan nyufala kantri olsem misinari. Hem i talem se: “Traehad bigwan blong soem intres long ol narafala. Joen wetem ol manples mo soem intres long fasin blong laef blong olgeta. Soem se yu wantem tumas blong save ol kastom blong olgeta, store blong ples blong olgeta long ol yia we oli pas, mo ol samting we i mekem olgeta oli laf. Sipos yu kwik blong lanem lanwis tu, bambae yu haremgud moa.”

Ol Studen Oli Faenem Glad Long Wok Blong Prij

Antap long bigfala stadi we ol studen blong Gilead oli mekem, oli joen wetem 11 kongregesenb raonabaot long ples we skul i stap long hem. Wetem strong tingting, oli joen evri wiken long wok blong prij. Wallace Liverance we i wan tija long skul blong Gilead, i askem long sam studen blong talemaot ol samting we i bin hapen long wok blong prij. I klia se oli glad tumas taem oli tokbaot wok blong prij long ol stoa, ol ples we ol man oli putum trak i stap, ol ofis, long rod, mo long olgeta haos wanwan. Sam long olgeta oli bin lukaot ol man we oli toktok ol narafala lanwis, we oli laef mo wok long teritori blong kongregesen. Ol studen blong klas namba 103 ya oli bin statem mo gohed blong mekem ten Baebol stadi, long faef manis we oli stap kasem trening.

Ol Olfala Misinari Oli Talem Ol Rod Blong Karem Frut

Afta we ol store ya oli finis, Patrick Lafranca mo William Van de Wall oli singaot seven memba blong wan narafala kos we i stap gohed long semtaem ya, hemia kos blong ol Komiti blong ol Ofis blong Sosaeti long ol defren ples blong wol. Ol seven brata ya oli givhan long ol studen, taem oli tokbaot ol lesen we oli bin lanem long ol yia we oli mekem wok blong misinari. Oli talem long ol studen blong tingbaot ples we oli go wok long hem olsem wan ples we Jeova hem wan i sanem olgeta long hem, mo blong holem strong tingting blong stap oltaem long ples ya. Oli tokbaot ol gudfala wok we ol misinari blong Gilead oli mekem finis long ol defren kantri blong wol.

?Wanem i bin givhan long ol memba blong ol Komiti ya blong stap glad blong plante yia long wok blong misinari, mo karem plante frut? Oli wokgud wetem ol brata we oli manples, mo oli lanem plante samting from olgeta. Kwiktaem nomo, oli bin lanem lanwis blong nyufala kantri we oli go long hem. Oli bin jenisim plante fasin blong olgeta blong mekem oli laenap wetem kastom blong ol manples. Charles Eisenhower we i wan studen blong faswan klas blong Gilead mo i wok olsem misinari blong 54 yia finis, i tokbaot faef “rod” blong kam wan gudfala misinari: (1) Stadi Baebol oltaem, (2) stadigud long lanwis blong kantri, (3) joen oltaem long wok blong prij, (4) wok blong holem pis long haos blong ol misinari, mo (5) prea oltaem long Jeova. Ol studen oli glad tumas, i no jes from we oli kasem gudfala advaes ya we i givhan bigwan long olgeta, be from we oli luk bigfala glad we ol olfala misinari ya oli stap kasem long wok blong Jeova. Armando mo Lupe i talem se, “oli glad tumas taem oli tokbaot laef blong olgeta.”

Afta we ol brata ya oli ansarem ol kwestin, laswan tok i stat. Albert Schroeder, wan memba blong Hed Kampani, i jusum stampa tok ya, “Fasin Blong Lukaotgud Long Tok Blong God i Mekem Plante Sas Trutok Oli Kam Klia.” Baebol nao i nambawan buk we ol studen ya oli bin yusum long Skul blong Gilead, taswe oli intres tumas long tok ya. Brata Schroeder i soem se taem wok i stat long New World Translation of the Holy Scriptures 50 yia bifo, ol tabu memba blong New World Translation Komiti oli no gat tingting blong traem mekem ol man oli glad, be oli dipen long tabu speret nomo blong lidim olgeta. (Jeremaea 17:​5-8) Ale, i no longtaem i pas, sam haeman blong wol ya oli luksave nambawan wok we komiti ya i bin mekem long New World Translation. Wan man blong hae save i raetem leta i kam long Sosaeti, i se: “Mi mi naf blong luksave wan gudfala buk, mo mi talem tru se, ‘New World Translation Komiti’ i mekem wan nambawan wok ya.”

Afta long tok ya, ol studen oli kasem stefeket blong olgeta, mo ol man we oli stap, oli harem nem blong ol defren ples we ol studen ya bambae oli go wok long hem. Wan studen i ridimaot wan leta we klas i raetem blong talemaot bigfala tangkyu blong olgeta. Samting ya i pulum filing blong plante studen, mo wora i ron long ae blong olgeta. Sam long olgeta, oli bin stap mekemrere from wok blong misinari plante yia finis. From we skul blong Gilead i stap long Engglis lanwis, samfala oli bin muf i go long kongregesen we ol man long hem oli toktok Engglis, blong oli save kamgud moa long lanwis ya. Sam narafala oli bin muf i go long wan ples we i nidim moa paenia, long kantri blong olgeta no long wan narafala kantri. Sam narafala bakegen oli bin ridim ol store blong laef blong ol narafala, oli bin stadi dip, mo oli bin lukluk bakegen mo bakegen kaset video ya blong Sosaeti, To the Ends of the Earth.

Will mo Patsy, we yumi tokbaot fastaem finis, oli haremgud tumas long intres we ol narafala long miting ya oli soem long ol studen wanwan. “Ol man we oli no save mifala nating oli holem mifala mo karem foto blong mifala. Wan memba blong Hed Kampani i sekhan long mifala mo i talem se, ‘!Mifala i flas from yufala!’” I klia nomo se, plante man oli laekem tumas ol studen blong klas namba 103 ya. Oli kasem gudfala tijing finis. Yes, trening blong Gilead bambae i givhan long ol gudfala studen ya blong oli kam ol gudfala misinari.

[Ol futnot]

[Bokis blong pija long pej 22]

Kaontem Klas Ya

Oli kamaot long hamas kantri: 9

Oli go wok long hamas kantri: 18

Hamas studen: 48

Hamas hasban mo waef tugeta: 24

Oli gat hamas yia: 33

Hamas yia long trutok: 16

Hamas yia finis oli prij fultaem: 12

[Tok Blong Pija Long Pej 23]

Klas Namba 103 Blong Wajtaoa Baebol Skul Blong Gilead

Long ol nem aninit, yumi kaontem ol laen i stat long fored i gobak biaen, mo stat long lefsaed i go long raetsaed.

(1) Bunn, A.; Dahlstedt, M.; Campaña, Z.; Boyacioglu, R.; Ogando, G.; Nikonchuk, T.; Melvin, S. (2) May, M.; Mapula, M.; Lwin, J.; Hietamaa, D.; Hernandez, C.; Boyacioglu, N.; Sturm, A.; Melvin, K. (3) Thom, J.; Mapula, E.; Nault, M.; Teasdale, P.; Wright, P.; Pérez, L.; Shenefelt, M.; Pak, H. (4) Murphy, M.; Campaña, J.; Stewart, S.; Cereda, M.; Reed, M.; Pérez, A.; Teasdale, W.; Pak, J. (5) Stewart, D.; Wright, A.; Cereda, P.; Nikonchuk, F.; Reed, J.; Hietamaa, K.; Ogando, C.; Shenefelt, R. (6) Murphy, T.; Hernandez, J.; Nault, M.; Bunn, B.; Thom, R.; Dahlstedt, T.; Lwin, Z.; May, R.; Sturm, A.

[Tok Blong Pija Long Pej 24]

?Bambae mifala i go wok weples?