‘Pulum Intres Olsem Wan Faea We i Laet Long Hat Mo Tingting’

“I no gat tok blong eksplenem glad mo intres we mi kasem taem mi stat ridim buk ya Is There a Creator Who Cares About You? Buk ya i mekem mi mi wantem tumas blong save moa. Tangkiu from we yufala i pulum intres blong mi, olsem wan faea we i laet long hat mo tingting blong mi.”

HEMIA toktok we wan Witnes blong Jeova long Not Karolaena, Yunaeted Stet, i talem long saed blong niufala buk ya we Watch Tower Sosaeti i givimaot long ol Distrik Asembli ya “Fasin Blong Laef We God i Glad Long Hem,” long 1998 go kasem 1999. Nating sipos yu no gat buk ya, ridim tok blong sam long ol man we oli bin kasem buk ya.

Sam dei afta we wan man i kasem buk ya long asembli blong San Diego, Kalifonia, Yunaeted Stet, hem i raetem se: “Mi faenem se buk ya i givhan bigwan blong mekem bilif blong mi i strong moa. Hat blong mi i fulap wetem bigfala tangkiu from ol nambawan wok blong Jeova. !Mi ridim kasem pej 98 blong buk ya, mo mi harem nogud taem mi tingbaot se i no longtaem bambae mi finis blong ridim buk ya! Hem i rili mekem mi mi glad.”

Wan woman blong wan kantri blong Is i raetem se: “Brata we i mekem tok blong talemaot buk ya hem i talem se ‘buk ya i spesel.’ Mi mi agri fulwan long tok ya, from we ol save we oli stap insaed long buk ya oli rili spesel. Wan nambawan samting long saed blong buk ya se, hem i no fosem man blong luksave se i gat wan God, be hem i givim ol pruf blong soemaot samting ya.”

Ol pruf ya oli ol samting we sayens i faenemaot long saed blong ol samting long skae, long saed blong laef, mo long saed blong yumi. Ol pruf ya oli mekem plante man oli sapraes. Wan woman long Kalifonia, i raetem se: “Mi no save talem wan tok we i naf blong talem olsem wanem we smol buk ya i rili kasem hat blong mi. Taem mi gotru long ol pej blong hem we oli tokbaot ol nambawan samting long skae, mo ol narafala samting raonabaot long mi, mi no moa save stop blong rid. !Mi lanem fulap samting! Bambae mi lukaotgud long smol buk ya mo bambae mi serem hem wetem olgeta man raonabaot long mi.”

Wan nambawan samting we plante man oli laekem hemia fasin we buk ya i yusum Baebol blong tokbaot ol fasin blong Man ya we i Wokem olgeta samting. Wan tok we plante man oli talem se: “Toktok we i stap long ol laswan pej blong buk ya, i tokbaot Baebol long wan fasin we i nambawan i bitim eni narafala buk we mi bin ridim.” Jes afta long wan asembli long Niu Yok, Yunaeted Stet, wan woman i raetem se: “Niufala buk ya i beswan buk we yufala i bin prentem. Mi mi sapraes tumas long ol pruf we sayens i givim blong soemaot se i rili gat wan Man we i Wokem olgeta samting. Sotfala toktok ya nomo we buk ya i givim long saed blong Baebol, hem i naf blong eksplenem ol impoten poen mo pulum intres blong man blong wantem ridim buk ya moa.”

Sayens We i Klia Blong Kasem Save

Ol japta blong buk ya, we oli tokbaot sayens, maet oli mekem man i tingting se buk ya i strong blong kasem save long hem, be tingbaot toktok blong ol man ya.

Wan man Kanada i raetem se: “Buk ya i defren olgeta long ol narafala buk blong ol man we oli yusum sam bigfala toktok blong eksplenem samting. Save we yufala i gat long saed blong bodi, meresin, ol smosmol sel we oli sapotem laef, mo narafala samting olsem, oli nambawan tumas, mo oli kliagud blong mifala i kasem save long hem. !Ating i moagud sipos yufala nao i bin raetem ol buk we mi bin yusum long ol stadi blong mi long yunivesiti plante yia bifo!”

Wan tija blong fisiks long yunivesiti, i raetem se: “[Buk ya i] soemaot ol poen long fasin we i klia nomo, hem i no mekem tingting blong man i fasfas wetem plante bigfala toktok. Hem i pulum man we i ridim hem, blong tingting, mo hem i yusum ol tok blong plante bigman blong sayens. Hemia wan buk we ol man oli ‘mas ridim’ sipos oli intres blong save stamba blong olgeta samting blong skae mo wol, mo long saed blong laef, nomata sipos yumi man blong sayens no yumi man olbaot.”

Wan yangfala woman we i stap tekem kos blong kam wan nes, i talem se: “!Mi sapraes tumas taem mi ridim japta 4 blong buk ya! Mi luk se hem i yusum semfala toktok we i stap long wan buk we mifala i stap yusum long kos blong mifala. Mi givim buk ya long tija blong mifala mo mi talem long hem se mi sua we bambae hem i laekem ol tok insaed long buk ya. Mi soem pej 54 long hem, we i tokbaot bren. Hem i ridim haf ya mo i talem se, ‘!Mi intres long samting ya! Bambae mi ridim buk ya.’ ”

Wan memba blong palemen long Beljiom i raetem se: “Samting we i pulum intres blong mi bigwan, hemia fasin we buk ya i soemaot se sayens i no agensem Baebol long saed blong tijing ya se i gat wan God nomo. Be, buk ya i soem se sayens i sapotem tingting blong Baebol. Hemia wan poen we i impoten tumas blong makem.”

Kasem Moa Save Long Man We i Wokem Olgeta Samting

Buk ya i halpem ol man long plante kantri, blong save moa long saed blong God mo blong kam klosap moa long Hem. Wan woman we i ridim buk ya, long taon blong Fukuoka, Japan, i talem se: “I olsem we buk ya i pulum ae blong olgeta man i go stret long Jeova. Buk ya i rili pulum man blong bilif. Hem i yusum sam tingting we neva mi bin save long hem, blong halpem mi blong save moa long saed blong Jeova.” Wan man long El Salvado, i raetem se: “Yufala i eksplenem klia se God i gat sore, i kaengud, i slou blong kam kros, i gat lav mo kaen gud fasin. Tru tumas, hemia stret samting we yumi nidim blong kam klosap moa long Hem mo long Pikinini blong hem. Hemia faswan buk we i eksplenem filing blong Jeova mo filing blong Pikinini blong hem, Jisas, taem hem i stap long wol ya.” Mo wan man we i ridim buk ya long Sambia, i talem se: “Naoia tingting we mi gat long saed blong Jeova i defren olgeta.”

I klia se ol Witnes blong Jeova oli glad tumas blong serem buk ya Is There a Creator Who Cares About You? wetem ol narafala man. Wan woman i talem se: “Taem mi finis blong ridim japta 10 [“If the Creator Cares, Why So Much Suffering?”], mi talemaot se, ‘!Hemia nao buk we mifala i nidim long Japan!’ Mi wantem savegud olgeta haf blong buk ya, olsem nao, bambae mi save yusum hem moa long wok blong prij.” Wan narafala woman i stap stadi long Baebol wetem wan gel we i gruap long tempel we papa blong hem i wok long hem olsem pris. “Gel ya i faenem i had blong bilif se i gat wan Man we i Wokem olgeta samting. Ol toktok blong buk ya oli no fosem man blong bilif, be hem i soemaot plante pruf, we mi ting se bambae i naf blong pulum intres blong ol Budis tu. Hem i mekem yumi harem save moa se Jeova i lavem yumi.”

Wan leta we i kam long Engglan i talem se: “Mi jes finis blong ridim buk ya Creator mo mi rere nao blong ridim hem bakegen. !Hem i wan nambawan buk! Man we i ridim hem, bambae i lavem Jeova moa. Mi givim wan kopi blong buk ya long woman we i stap klosap long haos blong mi, hem tu i ridim tu japta nomo blong buk ya nao hem i se, ‘Mi no save stop blong rid, hem i pulum intres blong mi tumas.’ Mi sua se buk ya bambae i halpem ol man blong save moa long saed blong Bigfala Man ya we i Wokem Yumi, mo pulum olgeta blong lavem Hem moa.”

Wan man long Merilan, Yunaeted Stet, i talem se: “!Buk ya i go insaed long ol bun blong mi long saed blong spirit! Mi plan blong givim wan kopi blong buk ya long olgeta bisnesman we oli wok wetem mi. Samtaem mi faenem i had blong prij long ol man ya we oli bisi mo we oli skulgud. Be, wetem buk ya, naoia bambae i isi moa long mi blong statem storeyan mo pulum intres blong ol man.”

I klia se, buk ya Is There a Creator Who Cares About You? bambae i karem gudfala frut long laef blong ol man raonabaot long wol.

[Foto Credit Line Blong Pija Long Pej 25]

Cover photo above, Eagle Nebula: J. Hester and P. Scowen (AZ State Univ.), NASA