Man We i Hae Moa Long Olgeta Man
1 Fastaem we yumi kasem nyufala buk ya, yumi intres tumas long nem blong hem, Man We i Hae Moa Long Olgeta Man. Blong talem se wan man i hae moa, i min se hem i moa gud long olgeta bilyan man we oli bin laef long wol ya samtaem. Mining blong “hae” se “moa gud long saed blong ol fasin mo laef.” !Man we i stret long mining ya i rili nambawan!
2 Jisas Kraes, Pikinini blong God, i stret nomo blong kasem ona olsem. Ol samting we hem i mekem long wol ya, oli no joen nating wetem mane mo ol rij samting, ol bisnes blong wol ya, no politik. Hem i kamaot long wan famle we i no rij. Mo hem i spenem bighaf blong laef blong hem olsem wan man we i no impoten nating. Be taem hem i gat 30 yia blong hem, hem i stat blong pulum tingting blong olgeta man long kantri blong Palestaen, wetem ol tok mo wok blong hem. Hem i soemaot ol fasin mo ol stampa tingting blong Jeova God, long wan fasin we ol man oli neva luk bifo. Hem i mekem moa long wok blong prij bitim olgeta man bifo long hem. Hem i mekem ol bigfala merikel. Mo hem i putum faondesen blong wan nyufala grup blong man long wol ya.
3 Pol i talem long yumi blong “stap luk” Jisas oltaem, olsem eksampel blong yumi mo man we yumi mas biaen long hem. (Hib. 12:2) Stat long 1985 go kasem 1991, Sosaeti i prentem long Wajtaoa, 149 store long saed blong laef mo minista wok blong Jisas. Ol store ya oli mekem se yumi evriwan i savegud ol samting we Jisas i talem, mo ol samting we hem i mekem blong givhan long yumi. Oli soemaot se yumi mas folem eksampel blong hem. Biaen, oli sotem ol save ya mo putum long wan buk. !Buk ya i wan gudfala tul blong halpem ol narafala blong stap luk Jisas oltaem, mo blong kam ol man we oli obei long Hemia we Jeova i mekem hem “i hae moa long ol gavman, ol haeman, ol man blong paoa, mo ol masta”!—Efes. 1:21, NW.
4 Afta we yu talem halo long man blong haos, yu save talem samting olsemia:
◼ “Tede, mifala i stap askem ol man we oli stap raonabaot long mifala, wanem tingting blong olgeta taem oli ridim long Baebol long saed blong laef we i no save finis. [Letem man i ansa.] Hemia samting we yumi intres tumas long hem, from we Baebol i tokbaot hop ya blong kasem laef we i no save finis, samwe long 40 taem. ?Laef olsem i save givim wanem blesing long yumi? Makem tok blong Revelesen 21:4. [Ridim.] ?Yu luk promes we i stap long vas ya? [Wet long ansa.] ?Olsem wanem yumi save kasem laef ya we i no save finis?” Ridim Jon 17:3. Nao tokbaot nid blong kasem save long God mo long Pikinini blong hem, Jisas Kraes. Soemaot Man We i Hae Moa buk, mo yusum ol smol stampa tok long ol fastok blong hem blong pulum intres blong man moa.
5 Taem yu soem buk ya, yu save askem:
“?Wanem samting we i mekem se Jisas i hae moa long olgeta man long wol?” Yu save ansarem kwestin ya taem yu poen i go long sam long ol 133 japta we oli tokbaot laef, fasin, ol tijing, mo ol wok blong hem. Japta 24 i tokbaot risen from wanem hem i kam long wol. Japta 35 i tokbaot Bigfala Toktok Blong Hem Antap Long Hil. Japta 43 i tokbaot nambawan fasin blong Jisas blong tijim ol man wetem ol pijatok. Japta 133 i soem smol ol blesing we ol man bambae oli haremgud long olgeta, taem hem i finisim ol wok blong hem. Maet yu faenem se i gud blong yusum ol kwestin long en blong ol japta, blong pulum man blong joen long storeyan. Ol vas we oli stap, oli soem weples blong faenem ol store long Baebol. Yu save tokbaot ol nambawan pija. Oli soemaot olsem wanem ol fasin blong Jisas oli gat paoa long ol man. Oli soemaot tu, dip fasin sore we hem i gat long ol narafala, mo fasin blong hem blong neva kam taed blong wok strong long wok blong prij.—Makem japta 44, 95, 117, mo 123.
6 Bambae yumi givimaot nyufala buk ya long manis ya. Ol spesel samting insaed long hem oli givim gudfala risen long yumi, blong pulum ol man blong ridim, mo blong wok wetem bigfala glad taem yumi stap givimaot. Evriwan we i wantem kasem laef we i no save finis, oli mas kasem save long Jisas Kraes. (Jon 17:3) Fasin blong yumi blong wok strong blong givimaot buk ya, i save mekem se man ya we i hae moa long olgeta man, i save tajem laef blong plante man we hat blong olgeta i stret.