Paoa Blong Ol Fren—?I Save Givhan Long Yu?

Yumi evriwan i bon wetem filing blong wantem se ol fren blong yumi oli glad long yumi. I no gat wan man we i wantem se ol narafala oli no laekem hem, mo sakemaot hem. Taswe, ol fren oli save gat paoa long yumi long plante samting.

WAN fren i minim “wan man we i sem mak wetem narafala man. . . . Tufala i kamaot long sem ples, mo plante taem, tufala i gat sem yia, sem edukesen, no sem posisen.” Taswe, paoa blong fren, hemia strongfala paoa we ol fren oli gat long yumi. Nao, nating sipos yumi luksave no nogat, be oli pulum yumi blong folem tingting mo fasin blong olgeta. Plante man, oli ting se ol fren oli blong pulum man i go long trabol nomo. Be, bambae yumi luk se ol fren oli save givhan long yumi tu.

Ol Fren Oli Gat Paoa Long Evri Man

I no ol yangfala nomo we ol fren oli save pulum olgeta. Nomata hamas yia wan man i gat, ol fren oli save pulum hem. I klia se ol fren oli pulum yumi finis sipos yumi stap askem ol kwestin olsem: “Ol narafala oli stap mekem samting ya, ?from wanem mi no save mekem tu?” “?From wanem mi mas defren oltaem long narafala?” “?Bambae ol narafala oli tingting no oli talem wanem?” “Olgeta fren blong mi, evriwan oli stap mekem boefren no gelfren, mo oli stap mared, be mi mi no mared yet. ?I gat wan samting we i rong long mi?”

Nating se ol fren oli gat paoa long yumi evriwan, be oli gat moa paoa long ol yangfala. The World Book Encyclopedia i talem se, “bighaf blong ol yangfala oli joen plante wetem ol fren blong olgeta​—hemia ol grup blong ol yangfala we oli savegud olgeta. Ol yangfala ya, oli wantem mekem ol fren blong olgeta oli glad long olgeta, bitim we oli wantem mekem papa mama blong olgeta i glad. Mo oli jenisim fasin blong olgeta, blong mekem se ol fren blong olgeta oli glad long olgeta.” Buk ya i ademap se, ol yangfala ya oli “bilif se laef blong olgeta i stap rongud sipos ol fren blong olgeta oli glad long olgeta mo oli laekem olgeta.” From samting ya, “oli putum ol defren stael blong klos, oli traem lidimgud narafala, mo oli fren wetem narafala blong mared.” Oli ting se ol fasin ya bambae i mekem ol fren blong olgeta oli laekem olgeta.

Ol fren oli save gat paoa long disisen blong ol man mo woman we oli mared. Maet olgeta ya we oli mared, oli faenem se ol fren oli gat paoa long ol disisen we oli mekem, olsem: wanem haos blong pem no rentem, wanem kaen trak blong draevem, bambae oli gat pikinini no no gat, mo plante narafala samting olsem​—folem wanem we ol manples blong olgeta, ol fren, mo ol laen, oli agri long hem. Sam famle oli mekem bigfala kaon from we oli wantem gat ol samting olsem ol man raonabaot mo ol fren blong olgeta. Tru ya, plante taem, ol mak, ol disisen, mo ol tingting blong yumi, oli soemaot klia se ol fren oli gat paoa long yumi. Yes, ol fren oli rili gat bigfala paoa blong pulum yumi long rod we i no stret. ?Be, yumi save mekem se ol fren oli givhan long yumi blong folem wan rod we i stret, rod we yumi wantem folem? !Yes, yumi save mekem!

Karem Frut From Ol Gudfala Fren

Ol dokta mo olgeta we oli wok long saed blong helt, oli save se i givhan bigwan, taem ol man we oli gat gudfala tingting mo fasin, oli stap klosap long ol sikman. Taem ol man olsem oli stap wetem ol sikman, ol sikman oli save kamgud bakegen. Eksampel, hemia olgeta we oli lusum wan han no leg blong olgeta. Plante taem, olgeta ya oli haremgud bakegen long saed long bodi mo filing, taem oli harem ol gudfala toktok mo taem oli luk gudfala eksampel blong ol narafala we oli kasem semfala trabol olsem olgeta. I klia se taem yumi joen wetem olgeta we oli gat gudfala tingting, gudfala eksampel blong olgeta bambae i pulum yumi. Nao long rod ya, yumi kasem gudfala frut from ol gudfala fren.

Fasin ya i mas stap tu insaed long Kristin Kongregesen. Yes, wan long ol risen from wanem Jeova i talem long ol man blong hem blong joen tugeta oltaem, hemia blong pulum ol fren blong gat gudfala tingting. God i talem se yumi mas “givgivhan long yumi blong mekem yumi strong blong lavem ol man, mo blong mekem ol gudfala fasin.” (Hibrus 10:24, 25) Fasin blong leftemap tingting olsem i impoten tumas from we long wol tede, i gat plante samting we oli save mekem tingting i foldaon mo i mekem man i harem nogud. From samting ya, ol Kristin oli “mas traehad” blong stap strong long saed blong spirit. (Luk 13:24) Taswe, yumi nidim we ol narafala Kristin oli givhan long yumi wetem lav, mo yumi talem bigfala tangkiu from. Mo tu, maet samfala oli mas fesem ol ‘trabol we i olsem nil blong aranis, we i stap stikim olgeta.’ Maet oli sik bigwan no oli handikap. (2 Korin 12:7) Sam narafala, maet oli stap traehad blong winim ol nogud fasin no tingting we i foldaon, no maet oli faenem se i had blong mekem ol samting we oli mas mekem long laef. From samting ya, i waes blong kampani wetem ol man we oli stap klosap long Jeova God, mo we oli glad blong wosipim hem. Ol fren olsem, bambae oli leftemap tingting blong yumi mo halpem yumi blong “stanap strong gogo kasem en.”​—Matiu 24:​13, NW.

Sipos yumi jusum ol gudfala fren, samting ya i save givhan long yumi blong blokem paoa blong ol fren blong i no spolem yumi. Antap long hemia, ol nambawan kakae long saed blong spirit mo ol gudfala advaes we yumi kasem long ol Kristin miting, oli givhan blong mekem tingting blong yumi i kam strong moa.

I tru, i no isi oltaem blong kam long ol Kristin miting. Samfala, maet hasban no waef blong olgeta i givhan smol, no i no givhan nating long olgeta. Sam narafala, maet oli mas mekem se ol pikinini blong olgeta oli rere, mo sam narafala bakegen, oli no gat rod blong go long ol miting. Be tingbaot: Sipos yu no letem ol problem ya oli blokem yu, bambae eksampel blong yu i givhan bigwan long olgeta we oli stap fesem sem problem olsem. Blong talem long narafala tok, yu mo olgeta we oli olsem yu, yufala i soem nambawan eksampel, be tu, ol gudfala fasin blong yufala oli pulum ol fren blong yufala blong mekem i gud​—mo i no gat man i fosem olgeta blong mekem olsem.

Aposol Pol we i bin fesem plante hadtaem mo trabol, i leftemap tingting blong ol Kristin blong folem nambawan eksampel blong hem, mo ol Kristin we oli strong long bilif. Hem i talem se: “Ol brata mo sista. I gud yufala evriwan i biaen long mak blong mi. Mifala i soemaot stret fasin finis long fes blong yufala, mo i gud yufala i stap luklukgud long olgeta we oli folem ol fasin ya.” (Filipae 3:​17; 4:9) Ol faswan Kristin long Tesalonaeka oli luklukgud long nambawan eksampel blong Pol. Pol i tokbaot olgeta ya long leta blong hem, se: “Yufala i stap folem sem rod ya we mifala i folem, mo we Masta blong yumi tu i folem. Taem yufala i kasem tok ya blong gud nius, i tru we yufala i kasem plante trabol, be Tabu Spirit i mekem yufala i harem gud tumas. Long fasin ya, yufala i soemaot wan gudfala eksampol long fes blong ol man Masedonia mo ol man Akaea, blong oli biaen long yufala.” (1 Tesalonaeka 1:​6, 7) Gudfala tingting mo eksampel blong yumi i save mekem semfala samting long ol man we yumi kampani wetem olgeta.

Blokem Ol Rabis Fren

Sipos yumi wantem blokem ol rabis fren, yumi mas agensem paoa blong “olgeta we oli mekem rabis fasin we tingting blong olgeta nomo i wantem.” (Rom 8:​4, 5; 1 Jon 2:​15-​17) Sipos yumi no mekem olsem, ol rabis fren bambae oli pulum yumi blong lego Jeova mo ol waes advaes blong hem. Ol Proveb 13:20 i talem se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” ?Yu yu save wan man we i mekem i nogud from we hem i kampani wetem ol rabis fren? Eksampel, sam Kristin oli ronem ol samting long saed blong bodi, oli mekem rabis fasin long saed blong seks, oli yusum drag mo dring tumas alkol from we ol fren blong olgeta oli bin pulum olgeta blong mekem olsem.

Insaed long Kristin kongregesen tu, ol fren oli save pulum yumi sipos yumi jusum blong kampani wetem olgeta we oli slak long saed blong spirit. (1 Korin 15:33; 2 Tesalonaeka 3:​14) Ol man olsem, oli no gat tingting blong tokbaot ol samting long saed blong spirit. Mo tu, oli jikim olgeta we oli glad blong tokbaot ol samting long saed blong spirit. Sipos yumi jusum blong fren wetem ol man olsem, bambae fasin blong olgeta i pulum yumi, nao smoltaem biaen, fasin mo tingting blong yumi bambae i kam olsem olgeta. Ale, maet yumi stat blong ting nating long olgeta we bilif blong olgeta i strong mo we oli stap traehad blong gohed moa long saed blong spirit.​—​1 Timoti 4:​15.

!I moa waes blong frengud wetem olgeta we oli stap traehad blong mekem Jeova i glad, mo we oli laekem ol samting long saed blong spirit! Ol fren olsem, bambae oli halpem yumi blong soemaot “waes we i kam long heven.” Man we i gat waes ya, “laef blong hem i klin gud, mo hem i man blong pis, i kwaet man, i man blong joen gud long narafala man, mo i man we i gat sore long man. Waes blong man ya i gat plante gudfala frut long laef blong hem . . . hem i no save giaman.” (Jemes 3:​17) Hemia i no minim se olgeta we oli laekem ol samting long saed blong spirit oli no save tokbaot ol narafala samting blong laef, be ol samting long saed blong spirit nomo. !No gat! Traem tingbaot ol defren samting we ol buk blong Watch Tower Sosaeti, olsem magasin ya Wekap! oli tokbaot. I tru, i gat plante gudfala samting blong tokbaot, mo taem yumi intres blong lanem moa samting, yumi soem se yumi laekem laef mo ol samting we Jeova i wokem.

Sipos wan man i wantem gat gudhan blong plei tenis, hem i mas plei wetem olgeta we oli gat gudhan long saed ya. Long sem fasin, ol gudfala fren oli givhan bigwan long yumi long saed blong spirit, tingting, mo filing. Defren olgeta, ol nogud fren oli save pulum yumi blong giaman mo blong gat tu fes. !I moa gud blong gat wan tingting we i klin mo blong respektem yumi wan!

Samfala We Oli Kasem Blesing

Plante man oli faenem se i no strong tumas blong lanem ol tijing blong Baebol, ol rul long saed blong ol fasin, mo ol samting long saed blong spirit we Jeova i askem yumi blong mekem. Be, samting we i strong, hemia blong mekem ol samting ya oli wok. Ol eksampel we oli kam biaen oli soem se ol gudfala fren oli save halpem yumi blong wosipim Jeova wetem ful laef blong yumi.

Wan Witnes we i fultaem paenia wetem waef blong hem, i talem se eksampel blong ol fren blong hem i gat bigfala paoa long ol mak long laef blong hem. Taem hem i stap gruap, hem i mas stanap strong agensem ol rabis fren. Be hem i jusum blong frengud wetem olgeta we oli givhan long hem blong prij oltaem mo blong joen long ol Kristin miting. From we hem i frengud wetem olgeta ya, samting ya i givhan long hem blong kam bigman long saed blong spirit.

Wan narafala Witnes i raetem se: “Afta we mi mo waef blong mi, mitufala i mared, mitufala i muf i go long wan kongregesen we i gat wan man mo woman blong hem we oli gat sem yia olsem mitufala. Tufala ya i fultaem paenia. Eksampel blong tufala i pulum mitufala blong joen long fultaem wok blong prij. Ale mitufala tu i givhan blong pulum ol narafala long kongregesen blong gat tingting blong paenia. From samting ya, plante man oli joen wetem mifala long wok blong paenia.”

Taem yumi kampani wetem olgeta we oli gat ol mak long saed blong spirit, samting ya i mekem i moa isi long yumi blong obei long Jeova. Hemia wan narafala blesing we i save kamaot from ol gudfala fren. Wan Witnes i statem fultaem paenia taem hem i yang, nao biaen hem i kam wan elda blong visitim ol kongregesen, mo naoia hem i stap wok long wan branj ofis blong Watch Tower Sosaeti. Hem i raetem se: “Sam long ol gudfala samting we mi bin luk taem mi pikinini, mo oli stap yet long memori blong mi, hemia taem olgeta we oli prij fultaem oli kam long haos blong mifala. Oltaem i gat inaf ples blong wan moa man i kam kakae wetem mifala. Taem mi gat ten yia, wan seket elda i givim long mi wan bag blong prij. Kam kasem naoia, mi mi stap lukaotgud yet long bag ya.”

Witnes ya i tingtingbak long yangtaem blong hem mo i talem se: “Plante yangfala man long kongregesen oli wantem joen long wok blong kongregesen, mo eksampel blong olgeta i pulum mifala blong gat sem tingting.” Ol gudfala fren oli halpem yangfala ya, we hem i olsem wan smol tri, blong gru i kam wan Kristin man, we i olsem wan nambawan tri. Ol papa mama, ?yufala i stap singaot olgeta we oli save givhan long ol pikinini blong yufala oli kam long haos blong yufala?​—Malakae 3:​16.

Tru ya, i no evriwan long yumi we i save joen long fultaem wok olsem olgeta ya we yumi jes tokbaot. Be yumi evriwan i save lanem blong lavem Jeova ‘long olgeta hat blong yumi, mo long olgeta laef blong yumi, mo long olgeta tingting blong yumi.’ (Matiu 22:37) Yes, ol fren we yumi jusum oli save givhan bigwan long yumi blong gru long lav ya, mo long hop ya blong gat laef we i no save finis.

Man blong raetem Ol Sam i talem wan rod we i isi blong folem mo i karem gudfala frut long laef, se: “Olgeta we oli no wantem folem toktok blong ol man nogud, mo we oli no wantem folem fasin blong olgeta, mo we oli no wantem joen wetem olgeta we oli stap laf long God, olgeta ya oli save harem gud. Ol man olsem, oli glad blong folem Loa blong Hae God, mo oltaem oli stap ridim, mo oli stap tingting long hem long dei mo long naet. Olgeta ya oli olsem ol tri we oli gru long saed blong wota we i stap ron. Ol tri ya oli stap karem frut long stret taem blong olgeta, mo lif blong olgeta i no save drae. Mo long sem fasin, ol man ya tu oli stap win long evri samting we oli stap mekem.”​—Ol Sam 1:​1-3.

!Vas ya i soemaot wan nambawan samting! Nating se yumi sin man mo yumi mekem mastik samtaem, be bambae laef blong yumi i rongud sipos yumi letem Jeova i lidim yumi mo sipos yumi rere blong folem eksampel blong ol gudfala fren we God i givim long yumi.​—hemia ‘olgeta brata mo sista blong yumi long evri ples long wol.’​—1 Pita 5:9.

[Tok Blong Pija Long Pej 24]

Kongregesen i pulum yumi blong mekem samting we i gud

[Tok Blong Pija Long Pej 25]

Ol papa mama, leftemap tingting blong ol pikinini blong yufala blong joen wetem ol fren we oli save givhan gud long olgeta