“Gud Nius” Blong Apokalips

“Nao mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol.”​—REVELESEN 14:6.

1. Ol Witnes blong Jeova oli bilif se buk blong Apokalips i kamaot long God be, ?from wanem yumi no save talem se oli wan “grup blong jos we i stap prijimaot jajmen dei”?

OL WITNES BLONG JEOVA oli no wan “grup blong man we i talemaot en blong wol” no wan “grup blong jos we i stap prijimaot jajmen dei,” olsem sam man oli bin talem agensem olgeta. I tru, ol Witnes oli bilif long Apokalips, no buk blong Revelesen, se hem i wan haf blong Tabu Tok blong God. Mo i tru tu se, buk blong Revelesen i tokbaot jajmen we bambae i kamaot agensem ol rabis man. Be, taem ol man blong God oli go prij long narafala man, oli laekem moa blong tokbaot nambawan hop we i stap long Baebol, mo we i stap tu long Apokalips, no Revelesen. Taswe, oli no ademap no karemaot sam haf blong olgeta profet tok we oli stap insaed long buk ya.​—Revelesen 22:18, 19.

Ol Man Blong Karem Gud Nius

2. ?Wanem sam long ol vas blong Baebol we plante taem ol Witnes blong Jeova oli yusum long wok blong prij?

² Wan vas blong Baebol we plante taem ol Witnes blong Jeova oli yusum long wok blong prij, hemia toktok blong Jisas we i talem se: “Bambae ol man oli stap talemaot gud nius blong kingdom blong God. Bambae oli talemaot long olgeta man. Nao biaen, bambae en i save kam.” (Matiu 24:14, NW) ?Wanem ya “gud nius blong kingdom”? Blong ansa long kwestin ya, plante Witnes oli yusum ol vas we oli stap long Revelesen japta 20 mo 21 we oli tokbaot Wan Taosen Yia Rul blong Kraes, Kingdom gavman blong hem mo niufala fasin blong laef long wol ya we bambae ded, krae mo fasin blong harem nogud, “oli lus olgeta.”​—Revelesen 20:6; 21:​1, 4.

3. ?Wok blong prij we ol Witnes blong Jeova oli mekem, i joen wetem wanem?

³ Ol Witnes blong Jeova oli man blong talemaot ol gudfala nius ya. Wok blong olgeta i laenap wetem wok we wan narafala man blong karem mesej i stap mekem long heven. Buk blong Revelesen i tokbaot wok blong hem se: “Mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” (Revelesen 14:6) “Gud nius ya we i blong stap oltaem nomo, gogo i no save finis,” hem i wan nius we i talemaot se “ol kingdom [no, rul] blong wol ya” bambae oli “kam aninit long paoa [no, Kingdom] blong Hae God blong yumi, wetem Mesaea blong hem.” Ale, “naoia i taem” we Jeova i mas “spolem ol man ya we oli stap spolem wol.” (Revelesen 11:​15, 17, 18) !Hemia i rili wan gudfala nius ya!

Wanem We Revelesen i Promes Long Yumi

4. (a) ?Wanem ol bigfala trutok we oli kamaot long japta 1 blong Revelesen? (b) ?Ol man we oli wantem kasem ol blesing we gud nius i stap tokbaot, oli mas mekem wanem?

⁴ Faswan japta blong buk blong Revelesen i talem long saed blong Jeova se: “Mi mi Alfa mo mi mi Omega, . . . mi mi Hemia we i stap naoia, mo we i stap fastaem, bifo olgeta, mo we bambae i kam. Mi mi gat olgeta paoa.” Faswan japta ya i tokbaot Jisas Kraes, we i Pikinini blong Jeova, se hem i “Trufala Witnes,” “fas man blong i laef bakegen long ded,” mo “hae king blong ol king blong wol.” Mo tu, japta ya i tokbaot Jisas olsem man we i “laekem yumi tumas, mo long ded blong hem, we blad blong hem i ron, hem i tekemaot ol sin blong yumi, i mekem yumi fri.” (Revelesen 1:5, 8, NW) Yes, long fas haf ya nomo, buk blong Revelesen i talemaot finis ol stamba trutok we oli save sevem laef blong man. “Olgeta man long wol” oli no save kasem ol blesing blong gud nius ya we oli harem, sipos oli no luksave fastaem se Jeova i gat raet blong rul. Mo tu, oli mas bilif long blad blong Jisas, oli mas bilif se Jeova i mekem Jisas i laef bakegen long ded mo se, naoia, Kraes hem i King we God i putumap blong rul antap long wol.​—Ol Sam 2:​6-8.

5. ?Japta 2 mo 3 blong Revelesen oli tokbaot se Jisas Kraes i stap mekem wanem wok?

⁵ Nekis tufala japta i tokbaot Jisas Kraes olsem wan man we i stap long heven, we i gat lav mo i Man blong Lukaot long olgeta kongregesen blong ol disaepol blong hem long wol ya. Ol leta we oli go long seven defren Kristin kongregesen blong Esia Maena long faswan handred yia K.T., oli leftemap tingting mo oli givim strongfala advaes we oli save givhan long yumi tede tu. Plante long ol mesej ya we oli go long ol kongregesen, oli stat wetem ol tok olsem “mi mi save finis fasin blong yufala” no “mi mi save finis ol trabol blong yufala.” (Revelesen 2:​2, 9) Yes, Jisas Kraes i save gud wanem we i stap hapen long ol kongregesen blong ol disaepol blong hem. Hem i presem sam long olgeta from lav we oli soemaot, bilif we oli gat, strongfala wok we oli mekem blong prij, fasin blong olgeta blong stanap strong, mo fasin we samfala oli gat blong stap tru long nem mo tok blong hem. Be, i gat sam narafala long olgeta, we Jisas i stretem olgeta from we oli bin letem lav blong olgeta long Jeova mo Pikinini blong hem, i kam kolkol. Sam long olgeta ya oli stat folem ol rabis fasin long saed blong seks, oli wosip long ol aedol, no oli folem ol grup blong apostasi.a

6. ?Vison blong japta 4 i halpem ol man blong kasem save long wanem samting?

⁶ Japta 4 i givim wan nambawan vison long saed blong bigfala jea blong Jeova God long heven. Vison ya i givhan long yumi blong luksave nambawan glori blong Jeova mo plan we bambae hem i folem long heven blong rulum olgeta samting. Ol king we bambae oli rul, we jea blong olgeta i stap raon long bigfala jea ya blong heven mo wol, oli stap obei long Jeova mo oli stap talemaot se: “Yu yu Masta blong mifala, mo yu God blong mifala. Yu yu mekem olgeta samting evriwan. Mo from we yu yu wantem olsem, yu yu mekem olgeta, nao oli stap, mo oli gat laef. From samting ya, i stret nomo blong ol man oli leftemap nem blong yu, mo blong oli bodaon, oli ona long yu, mo blong oli stap aninit long paoa blong yu oltaem.”​—Revelesen 4:11.

7. (a) ?Enjel ya i singaot olgeta man long wol blong oli mekem wanem? (b) ?Wanem wan impoten haf long wok blong yumi blong tijim man?

⁷ ?Tok ya i gat mining long ol man we oli laef tede? Yes, hem i gat bigfala mining. Sipos man i wantem laef aninit long Kingdom blong Wan Taosen Yia, hem i mas lesin long tok blong “enjel we i stap flae antap long skae” we i se: “Yufala i mas ona gud long God, mo yufala i mas leftemap nem blong hem, from we taem i kam finis blong hem i jajem olgeta man.” (Revelesen 14:​6, 7) Wan stamba risen biaen long wok we ol Witnes blong Jeova oli stap mekem blong tijim Baebol long man, hemia blong halpem “olgeta man long wol” blong oli save Jeova mo wosipim hem. Olgeta man oli mas luksave se Jeova nao i Wokem Olgeta Samting, mo oli mas rere blong stap aninit long stretfala rul blong hem.

Smol Sipsip Ya We i Stret Blong Yumi Ona Long Hem

8. (a) ?Japta 5 mo 6 i tokbaot Jisas Kraes olsem wanem? (b) ?Olgeta man we oli lesin long gudfala nius ya oli save lanem wanem tru long vison ya?

⁸ Nekis tufala japta, 5 mo 6, oli tokbaot Jisas Kraes olsem wan Smol Sipsip we i naf blong brekemaot ol seven lok. Pijatok ya i soemaot sam long ol samting we bambae oli hapen long taem blong yumi. (Skelem wetem Jon 1:​29.) Sam voes long heven oli talem long Smol Sipsip ya se: “Yu yu gudfala tumas. Ol man oli kilim yu finis, mo long ded blong yu, we blad blong yu i ron, yu yu pemaot ol man, oli blong God. Olgeta ya oli kamaot long olgeta laen, mo long olgeta lanwis, mo long olgeta kantri, mo long olgeta kala. Yu yu king, nao yu mekem olgeta oli kam ol man blong yu, we oli pris blong mekem wok blong God blong mifala, mo bambae oli king, oli rul long olgeta man long wol. From ol samting ya nao, i stret nomo blong yu yu tekem buk ya, yu brekemaot ol lok blong hem.” (Revelesen 5:​9, 10, Nyutesteman Wetem Ol Sam Long Bislama) Vison ya i tijim yumi se, from blad blong Jisas Kraes, sam man we oli kamaot long olgeta ples blong wol, bambae oli go stap wetem hem long heven, mo bambae oli ‘king blong rul long olgeta man long wol.’ (Skelem wetem Revelesen 1:​5, 6.) Long sam narafala japta blong Revelesen yumi save faenem stret namba blong olgeta ya evriwan.

9. ?Japta 6 i talem se Jisas Kraes i kamtru olsem wanem?

⁹ Wan narafala vison i tokbaot Jisas Kraes olsem man we i stap sidaon long wan waet hos mo i werem hat blong king. Hem i “win long faet finis, nao i go blong faet bakegen, blong bambae i win bakegen.” Yumi hapi tumas from we bambae hem i winim ol tri narafala man we oli stap sidaon long hos. Trifala hosman ya blong Apokalips oli pija blong ol nogud faet, ol trabol blong kakae we i sot, mo ded, we oli stap spolem ol man long wol stat long 1914 i kam kasem tede. (Revelesen 6:​1-8) Jisas Kraes, we i Smol Sipsip blong God, hem i kasem impoten wok ya blong sevem olgeta man mo mekem ol nambawan promes blong Jeova oli kamtru. Hemia nao stamba toktok we ol Witnes blong Jeova oli stap talemaot taem oli mekem wok ya blong tijim Baebol long ol man.

10. (a) ?Wanem impoten save i stap long japta 7? (b) ?Olsem wanem Jisas Kraes i tokbaot ol man ya we bambae oli go long Kingdom?

¹⁰ Japta 7 i tokbaot sam gud nius we oli gud tumas. Long buk blong Revelesen nomo, yumi save faenem stret namba blong ol man ya we Jisas i singaot olgeta se “smol kampani.” Hemia olgeta we Papa blong Smol Sipsip bambae i givim Kingdom i go long olgeta. (Luk 12:​32, NW; 22:​28-​30) Jeova God nao i jusum olgeta mo i makemaot olgeta wetem tabu spirit blong hem. (2 Korin 1:​21, 22) Aposol Jon, we i kasem ol tok ya blong Revelesen, i talem se: “Nao mi harem namba blong ol man we mak blong God i stap long olgeta. I gat wan handred foti fo taosen man olgeta.” (Revelesen 7:4) Yumi save faenem namba ya bakegen long wan narafala japta we i talem se hemia fulnamba blong olgeta we “God i pemaot olgeta, i tekemaot olgeta long wol ya” blong rul wetem Smol Sipsip long bigfala Hil ya Saeon long heven. (Revelesen 14:​1-4) Ol jos blong Krisendomb oli no givim klia save long saed blong namba ya. Be, yumi intres blong harem toktok blong E. W. Bullinger, wan man blong stadi dip long Baebol, we i talem se: “Hemia wan fasin blong toktok we i soemaot se tok ya i tru: wan stret namba blong man we oli defren long wan narafala grup blong man we namba blong olgeta i no kliagud.”

11. (a) ?Wanem gudfala nius i stap long japta 7? (b) ?Wanem gudfala hop i stap blong ol man we oli haf blong “bigfala hip”?

¹¹ ?Bullinger i stap tokbaot wanem namba ya we i no kliagud? Long vas 9, aposol Jon i raetem se: “Nao biaen long samting ya, mi mi luk wan vison bakegen, mo mi luk wan bigfala hip blong ol man, we olgeta i plante we plante, i no gat man i save kaontem olgeta. Ol man ya oli kamaot long olgeta kala, mo long olgeta kantri, mo long olgeta laen, mo long olgeta lanwis.” (Revelesen 7:9) ?Hu olgeta we oli haf blong bigfala kampani ya? ?Wanem tingting blong God long saed blong olgeta ya, mo wanem fiuja blong olgeta? Ansa we i kamaot long apokalips, i wan gudfala nius blong olgeta man we oli laef long wol. Yumi ridim se: “Hemia ol man ya we oli kasem bigfala trabol, we ol man oli spolem olgeta tumas, be naoia oli winim ol trabol ya finis. Oli wasem klos blong olgeta finis long blad blong Smol Sipsip ya we i ded, blong mekem ol klos ya oli waet.” From we ol man ya oli bilif long blad blong Jisas Kraes we i ron blong sevem olgeta, bambae oli kasem sef long taem blong “bigfala trabol.” Jisas Kraes “bambae i lidim olgeta oli go dring long ol springwota ya we i save givim laef. Mo God bambae i ravemaot wota blong ae blong olgeta.” (Revelesen 7:​14-​17) Yes, plante milyan man we oli stap laef tede, oli save joenem bigfala kampani blong ol man ya we bambae oli sef taem rabis wol blong naoia i lus. Biaen, bambae oli stap aninit long Wan Taosen Yia Rul blong King Jisas Kraes. Bambae hem i lidim olgeta blong kasem laef we i no save finis long wol ya. ?Yu ting se hemia wan gudfala nius ya?

“Fasin Blong Hem Blong Jajem Man i Tru, Mo i Stret Olgeta”

12, 13. (a) ?Wanem i stap long japta 8 kasem 19? (b) ?From wanem ol man we hat blong olgeta i stret, oli no nid blong wari long ol profet tok ya?

¹² Japta 8 go kasem 19 hemia ol japta we oli bin mekem se plante man oli tingbaot buk blong Apokalips, no Revelesen, olsem wan buk blong talemaot trabol nomo mo blong mekem man i fraet. Ol japta ya oli tokbaot sam strongfala mesej blong jajmen (oli yusum pijatok blong ol enjel we oli blo pupu, sam nogud trabol, mo ol besin blong kros blong God) we bambae oli kam agensem ol defren haf blong wol ya blong Setan. Fastaem, jajmen ya bambae i go agensem olgeta giaman skul (“Bigfala Babilon” NW). Biaen, jajmen bambae i go agensem ol politik paoa we oli no obei long God mo we oli olsem ol wael anamol.​—Revelesen 13:​1, 2; 17:​5-7, 15, 16.c

¹³ Ol japta ya oli tokbaot wok blong klinimaot heven, taem Jisas i sakem Setan wetem ol rabis enjel blong hem oli kamdaon long wol. Samting ya i eksplenem from wanem ol trabol long wol oli kam antap bigwan stat long 1914. (Revelesen 12:​7-​12) Mo tu, ol japta ya oli yusum sam pija tok blong tokbaot jajmen we bambae i finisim rabis fasin blong laef long wol ya blong Setan. (Revelesen 19:​19-​21) ?Ol man we hat blong olgeta i stret, oli mas wari long ol nogud jajmen ya? Nogat, from we long taem ya we ol jajmen blong God oli hapen, wan voes long heven i singaot se: “!Yumi presem God! Hem i God blong yumi, mo hem i sevem yumi finis. Nem blong hem i hae we i hae, mo olgeta paoa i blong hem nomo. Fasin blong hem blong jajem man i tru, mo i stret olgeta.”​—Revelesen 19:​1, 2.

14, 15. (a) ?Olsem wanem rabis laef blong naoia bambae i lus long fasin we i stret nomo? (b) ?From wanem haf ya blong Apokalips, i mekem ol man we hat blong olgeta i stret oli glad?

¹⁴ Bifo we Jeova i save putum stretfala fasin blong laef long wol ya, hem i mas karemaot ol man we oli stap spolem wol. (Revelesen 11:​17, 18; 19:​11-​16; 20:​1, 2) I no gat wan man no wan gavman we i gat raet no paoa blong mekem samting ya. Jeova nomo, wetem King mo Jaj ya we hem i putumap, hemia Jisas Kraes, tufala nomo i save mekem samting ya long fasin we i stretgud olgeta.​—2 Tesalonaeka 1:​6-9.

¹⁵ Buk blong Apokalips i soem klia se, stamba tingting blong Jeova i blong finisim rabis wol blong naoia. Hemia wan samting we i karem bigfala glad i kam long olgeta man mo woman we oli “trabol, oli stap harem nogud from ol samting nogud ya we ol narafala man ya oli stap mekem.” (Esikel 9:4) Ol man mo ol woman ya oli mas luksave se i impoten tumas blong folem tok blong enjel ya blong karem gud nius, we i stap talemaot se: “Yufala i mas ona gud long God . . . from we taem i kam finis blong hem i jajem olgeta man. Hem i mekem skae mo wol mo solwota mo springwota, mo yufala i mas bodaon long fes blong hem blong mekem wosip long hem.” (Revelesen 14:7) I gud ol man olsem oli kam wosipim Jeova mo mekem wok blong hem wetem ol Witnes blong hem we oli stap “obei long ol tok blong God, mo we oli stap holem ol tok we Jisas i talemaot se i tru.”​—Revelesen 12:17.

Nambawan Rul Blong Wan Taosen Yia

16. (a) ?From wanem ol jos blong Krisendom oli sakemaot hop blong Wan Taosen Yia? (b) ?From wanem ol Witnes blong Jeova oli bilif se prea blong Masta bambae i mas kasem ansa blong hem?

¹⁶ Japta 20 go kasem 22 long buk blong Revelesen oli tokbaot hop we Baebol i givim long taem blong Wan Taosen Yia. Ol japta ya nomo, long ful Baebol, oli tokbaot wan taosen yia we bambae i kamaot bifo long hapi laef blong olwe long heven mo long wol. Ol jos blong Krisendom oli sakemaot hop blong Wan Taosen Yia. From we jos i talem se olgeta stret man bambae oli go long heven mo ol rabis man bambae oli go long helfaea, i min se hem i no gat tijing long saed blong wan paradaes long wol. Prea blong Masta, we i askem God blong “mekem ol samting we hem i wantem, oli kamaot long wol ya olsem we oli kamaot finis long heven,” i no moa gat mining long ol memba blong ol jos blong Krisendom. (Matiu 6:​10, New International Version) Be, samting ya i no sem mak long ol Witnes blong Jeova. Olgeta ya oli bilif fulwan se Jeova God i no mekem graon ya “blong i ples nating nomo,” be hem i mekem blong bambae “man i save stap long hem.” (Aesea 45:​12, 18) Yes, yumi luk se ol profet tok blong bifo, wetem prea blong Masta mo hop blong Wan Taosen Yia we apokalips i tokbaot, evriwan oli laenap gud. Long Wan Taosen Yia Rul, Jisas Kraes bambae i meksua se olgeta samting we Jeova i wantem, oli mas kamtru long wol, olsem we i kamtru finis long heven.

17. ?Wanem i soemaot se “wan taosen yia” ya i wan stret namba blong ol yia?

¹⁷ Tok ya “taosen yia” i stap sikis taem long ol fasfala seven vas blong Revelesen japta 20. I gud blong makem se i gat tri taem we tok ya i kamaot wetem wod “ya” biaen long hem. Hemia i min se wan taosen yia i wan stret namba blong ol yia, hem i no wan tok jes blong soemaot se bambae i gat wan longfala taem i pas. Hemia tingting we plante man long Krisendom oli wantem yumi blong bilif long hem. ?Wanem bambae i hapen long Wan Taosen Yia ya? Fastaem, Setan i go kalabus mo bambae hem i stap kalabus gogo taosen yia ya i finis. (Revelesen 20:​1-3; skelem wetem Hibrus 2:​14.) !Tru, hemia wan gudfala nius ya!

18. (a) ?From wanem yumi save talem se Wan Taosen Yia ya hem i “dei” blong jajmen? (b) ?Wanem bambae i hapen long en blong wan taosen yia?

¹⁸ Olgeta we “oli joen wetem Kraes we hem i King, nao oli rul wetem hem, gogo wan taosen yia i pas,” oli kasem raet “blong jajem ol man.” From samting ya, taosen yia ya hem i wan “dei” blong jajmen. (Revelesen 20:​4, 6; skelem wetem Ol Wok 17:31; 2 Pita 3:8.) Ol dedman bambae oli laef bakegen, mo bambae oli joen wetem olgeta we oli laef tru long “bigfala trabol.” Nao bambae God i jajem olgeta folem ol wok, no fasin, we oli mekem long taem ya. (Revelesen 20:​12, 13) Long en blong wan taosen yia, Setan bambae i gofri blong sot taem. Hemia laswan jans blong hem blong traem olgeta man. Biaen bambae hem i go lus blong olwe wetem olgeta rabis enjel blong hem mo eni stronghed man long wol ya we bambae oli folem hem. (Revelesen 20:​7-​10) Ol man we oli no lus long laswan traem ya bambae nem blong olgeta i go long ‘buk blong laef’ mo bambae oli kasem hapi laef we i blong olwe. Bambae oli mekem wok blong Jeova mo wosipim hem long wan paradaes long wol.​—Revelesen 20:​14, 15; Ol Sam 37:​9, 29; Aesea 66:​22, 23.

19. (a) ?From wanem yumi sua se ol nambawan promes we oli stap long buk blong Revelesen oli mas kamtru? (b) ?Bambae yumi tokbaot wanem long nekis stadi?

¹⁹ Hemia nao ol gudfala nius we oli stap long Apokalips. Oli no olsem promes blong ol man we oli giaman nomo. Aposol Jon i raetem se: “Man ya we i stap sidaon long bigfala jea blong hem i talem se, ‘!Yu luk! Mi mi stap mekem olgeta samting oli kam niuwan bakegen.’ Nao hem i talem long mi bakegen se, ‘Yu raetem tok ya, from we tok blong mi i tru, mo ol man oli save bilif long hem.’” (Revelesen 21:5) ?Yumi mas mekem wanem sipos yumi wantem stap long taem we ol gudfala nius ya oli kamtru? Buk blong Revelesen i givim plante advaes long olgeta we oli wantem mekem God i glad. Sipos yumi folem ol advaes ya bambae yumi kasem bigfala glad naoia, mo blong olwe, olsem nekis stadi bambae i soemaot.

[Ol futnot]

Ol Poen Blong Tingtingbak

◻ ?Wanem sam stamba trutok long Revelesen japta 4 kasem 6 we oli wan impoten haf blong gudfala nius?

◻ ?Wanem gudfala nius i stap long Revelesen japta 7?

◻ ?From wanem ol mesej blong jajmen we oli stap long buk blong Revelesen oli no givim wari long ol man we hat blong olgeta i stret?

◻ ?Weswe yumi save talem se Wan Taosen Yia ya hem i wan “dei” blong jajmen?

[Tok Blong Pija Long Pej 10]

King Jisas Kraes bambae i mekem se wol i no moa gat ol trabol olsem faet, kakae we i sot, mo ded