?Yu Yu Rimemba?

?Yu yu bin glad blong ridim ol Wajtaoa we oli kamaot long ol manis we i jes pas? Ale, traem luk sipos yu save ansa long ol kwestin ya:

• ?Buk blong Maeka i gat hamas japta blong hem, oli raetem long wanem yia, mo wanem i stap hapen long taem ya?

Buk blong Maeka i gat seven japta. Profet Maeka i raetem buk ya long ol yia 700 B.K.T., Long taem ya ol man we oli mekem kontrak wetem God oli seraot long tu nesen​—nesen blong Isrel mo nesen blong Juda.​—8/15, pej 9.

• ?Long Maeka 6:8 (NW ), wanem samting we God i wantem we yumi mekem?

Yumi mas “wokem stret fasin.” Stret fasin blong God blong mekem ol samting, hemia nao fasin we yumi mas traehad blong folem. Taswe yumi mas sapotem rul blong hem blong tok tru oltaem mo no gat tu fes. Hem i talem long yumi blong “laekem kaen fasin.” Ol Kristin oli soemaot kaen fasin taem oli givhan long ol narafala, olsem long taem blong disasta. Mo tu, taem yumi ‘wokbaot wetem God we tingting blong yumi i stap daon’ yumi mas dipen long hem mo luksave wanem samting we yumi no naf blong mekem.​—8/15, pej 20-​22.

• ?Sipos wan Kristin i lusum wok, wanem samting we hem i mas mekem?

I waes sipos hem i lukluk gud long laef blong hem wan. Maet i gud blong holem wan laef we i no fasfas tumas wetem plante samting, hemia i min se maet yu mas muf i go long wan haos we i smol moa, no lego sam samting we yu no rili nidim. Tru ya, yu no mas wari tumas long ol samting blong evridei, trastem Jeova blong mekem rod blong yu gat wanem we yu nidim. (Matiu 6:​33, 34)​—9/1, pej 14-​15.

• ?Wanem we yumi mas tingbaot taem yumi givim mo kasem presen long taem blong wan mared?

Yumi no nid blong kasem wan presen we i sas. Wanem we i stap long hat blong man we i givim presen, hemia nao i impoten. (Luk 21:​1-4) Blong talemaot nem blong man we i givim presen, hemia i no soemaot kaen fasin nating. Fasin ya i save mekem sam man oli sem. (Matiu 6:3)​—9/1, pej 29.

• ?From wanem yumi mas prea oltaem?

Fasin blong prea oltaem, i mekem fasin fren we yumi gat wetem God i strong moa mo i rerem yumi taem yumi kasem ol strongfala traem. Ol prea blong yumi wanwan oli save sot no oli longfala folem samting we yumi stap askem mo ples we yumi stap long hem taem yumi prea. Prea i save mekem bilif blong yumi i strong mo i save givhan long yumi blong dil wetem ol problem.​—9/15, pej 15-​18.

• ?Olsem wanem yumi save kasem save long 1 Korin 15:​29, we long sam Baebol oli tanem se man i mas ‘baptaes long ples blong ol dedman’?

Aposol Pol i soemaot se, ol man blong Kraes we tabu spirit i makemaot olgeta, oli baptaes blong folem wan fasin blong laef we i olsem Kraes, we bambae oli stap tru long God gogo kasem ded. Be afta, bambae oli laef bakegen blong kam spirit man olsem Jisas hem wan.​—10/1, pej 29.

• ?Olsem wanem yumi save se blong kam wan Kristin i no naf nomo blong agens long ol nogud samting we 1 Korin 6:​9-11 i tokbaot?

Taem aposol Pita i tokbaot ol nogud fasin olsem fasin slip olbaot, wosip long ol aedol, mo fasin drong, hem i no talem se hemia nomo samting we wan Kristin i mas lukaot long hem. Hem i soem se i gat sam samting moa yet blong mekem. Long nekis wan vas hem i gohed i se: “Yumi fri blong mekem evri samting . . . be i no evri samting we oli gud long yumi.”​—10/15, pej 18-​19.

• ?Hu ya sam long ol woman we oli laef bifo we oli mekem hat blong Jeova i glad?

Sam long olgeta hemia Sifraha mo Pua we oli no obei long oda blong king blong Ijip blong kilim i ded ol pikinini boe we ol woman Isrel oli bonem. (Eksodas 1:​15-20) Woman Kenan ya Rehab, we i wan woman blong rod, hem i haedem tu man Isrel long haos blong hem. (Josua 2:​1-13; 6:​22, 23) Abigel we i soemaot gudfala tingting, i sevem laef blong plante man mo i blokem Deved blong hem i no kilim ol man oli ded. (1 Samuel 25:​2-35) Ol eksampol ya i save halpem ol woman tede.​—11/1, pej 8-​11.

• ?Olsem wanem “ol sta ya long skae tu oli stap joen long faet” agens long Siseraha, olsem Jajes 5:20 i tokbaot?

Long tingting blong sam man, hemia i min se God nao i bin givhan long olgeta. Sam narafala oli talem se ol enjel oli bin halpem olgeta, ol bigfala ston oli foldaon long skae, no maet i minim ol sta we Siseraha i lukluk long olgeta blong oli talemaot fiuja long hem. From we Baebol i no talem plante samting long saed ya, yumi kasem save se ol tok ya oli blong soemaot se God i tekem aksin blong givhan long ol ami blong Isrel.​—11/15, pej 30.

• ?Nating se ol man oli no moa intres mo kea long ol jos, from wanem i gat plante man yet we oli talem se oli bilif long God?

Sam man oli go long jos blong gat pis long tingting blong olgeta. Ol narafala oli hop blong gat wan laef afta we oli ded, no blong gat gud helt, blong kam rij, mo blong win long laef. Long sam ples, ol man we bifo oli no moa trastem tingting blong Komunis nao oli wantem tumas blong mekem bisnes blong olgeta wan, oli hanggri long saed blong spirit, ale oli stat go long jos. Taem wan Kristin i luksave ol tingting ya, ale bambae hem i save wanem we hem i mas talem blong pulum intres blong man.​—12/1, pej 3.