Jeova i Stap Givhan Long Yumi

“Hae God ya we i mekem skae mo graon, hem nomo i stap givhan long mi.”​—OL SAM 121:2.

1, 2. (a) ?From wanem yumi save talem se sam samtaem yumi evriwan i nidim narafala blong givhan long yumi? (b) ?From wanem Jeova i save givhan moa long yumi?

?HU MAN we i neva nidim narafala blong givhan long hem? Sam samtaem yumi evriwan i nidim help​—taem wan problem i hevi tumas long yumi, taem yumi harem nogud from yumi lusum wan famle no fren, taem wan bigfala traem i kasem yumi. Plante taem ol man oli go luk wan fren blong olgeta taem oli nidim help. Taem yumi talemaot trabol blong yumi long wan fren, yumi harem se trabol ya i no moa hevi tumas. Be ol man oli naf blong givhan long yumi long sam samting nomo. Mo tu, maet wan samting i blokem narafala blong givhan long yumi taem yumi rili nidim help.

² Be i gat wan Man blong Givhan we hem i gat olgeta paoa mo we evri samting oli blong hem nomo. Antap long hemia, hem i promes se bambae hem i no save lego yumi. Wan man blong raetem Ol Sam i talem hu ya Man ya, long ol tok blong hem we i soem strong tingting. Hem i se: “[Jeova] i stap givhan long mi.” (Ol Sam 121:2) ?From wanem man ya i sua se Jeova bambae i givhan long hem? Blong ansa long kwestin ya, i gud yumi stadi long Sam 121. Nao bambae yumi kasem save from wanem yumi tu yumi save gat strong tingting se Jeova bambae i givhan long yumi.

Jeova i Rere Blong Givhan Oltaem

3. ?Ating man we i raetem Sam ya i stap lukluk i go antap long wanem hil? ?From wanem hem i lukluk i go antap long hil ya?

³ Fastaem, man we i raetem Sam ya i tokbaot se Jeova i wokem olgeta samting, mo samting ya nao i save mekem se yumi trastem hem. Man ya i talem se: “Olgeta. ?Man blong givhan long mi bambae i kamaot long weples? Mi mi lukluk i go antap long ol hil . . . [Jeova] we i mekem skae mo graon, hem nomo i stap givhan long mi.” (Ol Sam 121:​1, 2) Man ya i no stap tokbaot enikaen hil, be hem i stap lukluk i go long wan spesel hil. Taem hem i raetem ol tok ya, haos blong Jeova i stap long taon ya Jerusalem. Jerusalem we i olsem hom blong Jeova, i stap antap long ol hil blong Juda. (Ol Sam 135:21) Man we i raetem Sam ya wetem strong tingting se Jeova bambae i givhan long hem, ating i stap lukluk i go antap long ol hil ya we haos blong Jeova i stap antap long hem. ?From wanem man ya i save sua se Jeova bambae i givhan long hem? From we Jeova i “mekem skae mo graon.” I olsem we man blong raetem Sam ya i stap talem se, ‘!God ya we i mekem evri samting i gat olgeta paoa, taswe i no gat wan samting nating we i save blokem hem blong givhan long mi!’​—Aesea 40:26.

4. ?Man blong raetem Sam ya i talem wanem blong soem se oltaem Jeova i stap rere blong givim help we ol man blong hem oli nidim? ?From wanem samting ya i mekem yumi haremgud?

⁴ Nao man we i raetem Sam ya i tokbaot se oltaem Jeova i stap rere blong givim help we ol man blong hem oli nidim. Hem i se: “Hem bambae i no save letem yumi foldaon. Hem i no save slip, mo oltaem hem i stap lukaot gud long yumi. Yumi ol laen blong Isrel, mo oltaem hem i stap lukaot gud long yumi. Neva ae blong hem i kam hevi, mo neva hem i slip.” (Ol Sam 121:​3, 4) God i no save letem olgeta we oli trastem hem oli “foldaon” we oli no moa save girap bakegen. (Ol Proveb 24:16) ?From wanem? From we Jeova i olsem wan man blong lukaot long sipsip we hem i stap wekap oltaem blong gad long ol sipsip blong hem. ?Olsem wanem? ?Samting ya i mekem yu yu haremgud? Jeova i no save satem ae blong hem, nating se i blong smoltaem nomo, long ol samting we ol man blong hem oli nidim. Long dei mo long naet, hem i stap wajemgud olgeta.

5. ?From wanem Sam ya i talem se Jeova i stap long “raet saed” blong ol man blong hem?

⁵ Man we i raetem Sam ya i trastem Jeova se bambae hem i lukaotgud oltaem long ol man blong hem. Hem i talem se: “Jeova i stap gad long yu. Jeova i stap long raet saed blong yu olsem wan sado. Long dei, san i no save kilim yu, mo long naet, laet blong mun i no save kasem yu.” (Ol Sam 121:​5, 6, NW ) Long Medel Is, wan man we i stap wokbaot i go samples, i glad tumas sipos hem i save spel long wan sado we i blokem bigfala san. Long sem fasin, Jeova i olsem wan sado we i blokem ol man blong hem long ol bigfala trabol we i save kilim olgeta olsem strong san. Makemgud se Jeova i stap long “raet saed” blong ol man blong hem. Long taem bifo, ol soldia oli holem sil blong olgeta long lef han blong olgeta, mekem se sil ya i no save blokemgud raet han blong olgeta taem oli stap faet. Taswe, maet wan narafala soldia we i gudfala fren blong olgeta, i stanap long raet saed blong olgeta blong protektem olgeta. Jeova nao i olsem fren ya we oltaem hem i stanap klosap long ol man blong hem, oltaem hem i rere blong givhan long olgeta.

6, 7. (a) ?Wanem tok blong Ol Sam i mekem yumi sua se Jeova i no save stop blong givhan long ol man blong hem? (b) ?From wanem yumi save trastem Jeova, olsem man we i raetem Sam ya i trastem hem?

⁶ ?Olsem wanem? ?Jeova i save lego ol man blong hem samtaem? Samting ya i no save hapen. Man we i raetem Sam ya i talem se: “Hae God bambae i blokemgud yumi blong trabol i no save kasem yumi. Hem bambae i lukaot gud long yumi, i sevem yumi. Taem yumi goaot long haos blong yumi, gogo yumi kambak bakegen, be hem i stap lukaot gud long yumi. Hem bambae i save lukaot gud long yumi oltaem nomo, i stat naoia, gogo i no save finis.” (Ol Sam 121:​7, 8) Vas 5 blong Sam ya i talem se “Jeova i stap gad long yu,” hemia i min se naoia. Mo vas 7 i talem se “Hae God bambae i blokemgud yumi,” hemia i min se long fiuja. Yes, Jeova i promes long ol man we oli wosipim hem long trufala fasin se bambae hem i givhan long olgeta naoia mo long fiuja. Nomata se oli go wea, nomata se oli fesem wanem trabol, be han blong hem i no save sot, bambae hem i stap klosap long olgeta oltaem blong givhan long olgeta.​—Ol Proveb 12:21.

⁷ Tru ya, man we i raetem Sam 121 i trastem gud Jeova we i gat Olgeta Paoa, se Hem bambae i lukaotgud long ol man blong hem. Bambae hem i kaengud long olgeta olsem wan man blong lukaot long sipsip we i laekem tumas ol sipsip blong hem, mo bambae hem i wajemgud olgeta olsem wan gad we i stap wekapgud. Olsem man we i raetem Sam ya, yumi tu yumi save trastem Jeova, from we Jeova i no save jenis samtaem. (Malakae 3:6) ?Hemia i min se bambae Jeova i blokem yumi oltaem long ol sik mo ol narafala samting we i save spolem bodi blong yumi? Nogat. Be sipos yumi lukluk i go long Jeova blong givhan long yumi, bambae hem i blokem yumi long ol samting we oli save spolem yumi long saed blong spirit. Naoia, i stret we yumi askem kwestin ya se: ‘?Jeova i save yusum wanem blong givhan long yumi?’ Bambae yumi tokbaot fo samting we Jeova i save yusum. Long stadi ya bambae yumi tokbaot olsem wanem hem i bin givhan long ol man blong hem long taem bifo. Long nekis stadi, bambae yumi tokbaot olsem wanem hem i stap givhan long ol man blong hem tede.

Ol Enjel Oli Givhan

8. ?From wanem yumi save se ol enjel oli intres bigwan long ol man blong God long wol ya?

⁸ I gat plante milian enjel we oli wok blong Jeova. (Daniel 7:​9, 10) Ol enjel ya oli stap rere oltaem blong obei long ol tok blong hem. (Ol Sam 103:20) Oli save se Jeova i lavem tumas ol man we oli mekem wosip long hem, mo se hem i wantem tumas blong givhan long olgeta. Taswe, ol enjel tu oli intres bigwan long ol man blong God long wol ya. (Luk 15:10) Yumi save se ol enjel oli mas glad tumas taem Jeova i yusum olgeta blong givhan long yumi. ?Long taem bifo, Jeova i yusum ol enjel olsem wanem blong givhan long ol man blong hem long wol?

9. Talem sam stori blong Baebol we oli soem se God i save givim paoa long ol enjel blong oli protektem ol man blong hem.

⁹ God i givim paoa long ol enjel blong protektem mo sevem ol man we oli stap tru long hem. Taem God i spolem Sodom mo Gomora, tu enjel i bin givhan long Lot mo tufala gel blong hem blong trifala i stap sef. (Jenesis 19:​1, 15-​17) Wan enjel i kilim i ded 185,000 soldia blong Asiria we oli kam blong faet agens long Jerusalem. (2 King 19:35) Taem ol man oli sakem Daniel i go long hol we i fulap long ol laeon, Jeova i “sanem enjel blong hem i kam satem maot blong ol laeon ya.” (Daniel 6:​21, 22) Taem aposol Pita i stap kalabus, wan enjel i kam, i mekem Pita i fri. (Ol Wok 12:​6-​11) Baebol i tokbaot plante narafala taem tu we ol enjel oli protektem ol man blong God. Ol samting ya i pruvum se tok blong Ol Sam 34:7 i tru, se: “Oltaem enjel blong [Jeova] i stap lukaot gud long olgeta we oli ona long hem, mo i stap tekemaot olgeta long trabol.”

10. ?Olsem wanem Jeova i yusum wan enjel blong leftemap tingting blong profet Daniel?

¹⁰ Sam samtaem, Jeova i yusum ol enjel blong leftemap tingting blong ol man blong hem mo blong mekem tingting blong olgeta i strong. Daniel japta 10 i tokbaot wan taem we hem i mekem olsem. Long taem ya, profet Daniel i gat klosap 100 yia blong hem. Tingting blong hem i foldaon bigwan from we taon ya Jerusalem i kam nogud olgeta, mo from we ol man oli stap tektaem tumas blong bildim bakegen haos blong God. Daniel i luk wan vison tu we i mekem hem i fraet. (Daniel 10:​2, 3, 8) God i lavem Daniel, ale hem i sanem wan enjel blong leftemap tingting blong hem. Enjel ya i talem bakegen mo bakegen long Daniel se God ‘i lavem hem tumas.’ ?Samting ya i mekem wanem long Daniel? Olfala profet ya i talem long enjel ya se: “Naoia yu mekem mi mi harem gud bakegen finis.”​—Daniel 10:11, 19.

11. Talem wan stori we i soem se God i yusum ol enjel blong lidim wok blong talemaot gud nius.

¹¹ Jeova i yusum ol enjel blong lidim wok blong talemaot gud nius tu. Wan enjel i pulum Filip blong talemaot Kraes long wan haeman blong Itiopia. Biaen man ya i tekem baptaes. (Ol Wok 8:​26, 27, 36, 38) Smoltaem biaen bakegen, God i wantem se gud nius i go long ol man we oli no man Isrel mo oli no sakomsaes. Konilias, wan man we i mekem wosip long God be i no wan man Isrel, i luk wan vison. Long vison ya, wan enjel i kamtru long hem, i talem long hem blong singaot aposol Pita i kam. Ale, Konilias i sanem sam man blong oli faenem Pita, nao oli talem long hem se: “Wan enjel blong God i talem long [Konilias] blong hem i singaot yu, blong yu kam long haos blong hem, blong hem bambae i save harem ol tok blong yu.” Pita i prij long Konilias, nao Konilias i kam faswan man long Kristin kongregesen we i no man Isrel mo i no sakomsaes. (Ol Wok 10:22, 44-​48) !Traem tingbaot olsem wanem bambae yu haremgud tumas sipos yu save se wan enjel i givhan long yu blong faenem wan man we hem i wantem trutok!

Tabu Spirit i Givhan

12, 13. (a) ?Wanem save i mekem ol aposol oli bilif strong se tabu spirit i save givhan long olgeta? (b) ?Olsem wanem tabu spirit i givim paoa long ol Kristin long faswan handred yia?

¹² Jes bifo we Jisas i ded, hem i promes long ol aposol blong hem se bambae oli kasem help. Papa blong hem bambae i sanem “Spirit ya blong Givhan, we hem i Tabu Spirit.” (Jon 14:26) From save we ol aposol oli gat, oli bilif strong se tabu spirit i save givhan long olgeta. Baebol i fulap long ol stori we oli soem olsem wanem Jeova i yusum tabu spirit, paoa ya we i bigwan moa bitim ol narafala paoa, blong givhan long ol man blong hem.

¹³ Plante taem, tabu spirit i givim paoa long ol man blong oli naf blong mekem samting we Jeova i wantem. Tabu spirit i givim paoa long ol Jaj long taem bifo blong oli sevem ol man Isrel oli aot long han blong ol enemi blong olgeta. (Jajes 3:​9, 10; 6:​34) Long faswan handred yia, semfala tabu spirit ya i givim paoa long ol Kristin blong oli no fraet blong gohed blong prij, nating se plante man oli agensem olgeta. (Ol Wok 1:8; 4:​31) Wok blong prij we oli mekem, i karem bigfala frut, mo samting ya i soemaot se tabu spirit i stap wetem olgeta. Tabu spirit nomo i save mekem se ol man we oli ‘no gat nem, mo oli no skul gud,’ oli naf blong talemaot Kingdom long olgeta man blong wol long taem ya.​—Ol Wok 4:​13; Kolosi 1:​23.

14. ?Olsem wanem Jeova i yusum tabu spirit blong givim save long ol man blong hem?

¹⁴ Jeova i yusum tabu spirit tu blong givim save long ol man blong hem. Tabu spirit i givhan long Josef blong talemaot mining blong ol drim blong Fero. (Jenesis 41:16, 38, 39) Jeova i yusum tabu spirit blong soemaot ol plan blong hem long ol man we oli gat tingting daon, mo blong haedem ol plan ya long fes blong ol man we oli gat flas tingting. (Matiu 11:25) Aposol Pol i tokbaot ol save we Jeova i givim long “ol man we oli lavem hem,” i se: “God i yusum Spirit blong hem blong soemaot ol samting ya long yumi.” (1 Korin 2:​7-​10) Man i nidim tabu spirit blong kasem save gud long ol samting we God i wantem.

Baebol i Givhan

15, 16. ?Josua i mas mekem wanem blong hem i save kam waes?

¹⁵ Tok blong Jeova long Baebol i “stret gud blong tijim” man, mo i mekem se ol man blong God oli ‘kam waes long olgeta samting, nao oli savegud ol rod blong mekem ol gudfala wok.’ (2 Timoti 3:​16, 17) Plante stori blong Baebol oli soem olsem wanem ol man blong God long taem bifo oli kasem help from sam haf blong Baebol we samfala oli raetemdaon finis.

¹⁶ Baebol i givim gudfala advaes blong lidim ol man blong God. Taem Josua i kam lida blong ol man Isrel, hem i kasem advaes ya: “Oltaem, ol tok we yu yu stap tijim ol man long hem oli mas kamaot long buk blong Loa ya [we Moses i raetemdaon]. Mo yu mas tingting gud long ol tok blong hem long dei mo long naet, blong yu save mekem olgeta samting we hem i talem. Sipos yu mekem olsem, bambae ol wok blong yu i gat frut blong hem, mo bambae yu save win.” Makemgud se God i no promes blong mekem wan merikel long Josua blong hem i kam waes wantaem nomo. Nogat. Josua i mas ridim “buk blong Loa ya” mo tingting dip long hem, nao bambae hem i save kam waes mo win long evri samting we hem i mekem.​—Josua 1:8; Ol Sam 1:​1-3.

17. ?Olsem wanem Daniel mo King Josaea tufala i kasem help long haf blong Baebol we oli gat finis long taem ya?

¹⁷ God i yusum Baebol tu blong soemaot samting we hem i wantem mekem no ol plan blong hem. Daniel i stadi long ol hanraet blong Jeremaea nao hem i luksave hamas yia we Jerusalem bambae i stap nogud. (Jeremaea 25:11; Daniel 9:2) Mo tu, tingbaot samting we i hapen long taem blong King Josaea blong Juda. Long ol yia bifo we hem i kam king, sloslo nesen ya i gowe long Jeova, mo ol king oli no raetemdaon Loa blong God blong oli gat prapa kopi blong olgeta blong folem. (Dutronome 17:18-​20) Be taem oli stap wokemgud haos blong God bakegen, oli faenem “buk blong Loa blong Hae God,” ating hemia Loa we we God i bin givim long Moses. Maet hemia faswan hanraet blong Loa ya we Moses i bin raetem samwe 800 yia bifo long taem ya. Nao Josaea i askem long wan man blong i ridim buk ya long hem. Taem hem i stap lesin, hem i luksave se nesen ya i go longwe tumas long samting we Jeova i wantem. Ale king ya i tekem strong aksin blong mekem samting we buk ya i talem. (2 King 22:8; 23:​1-7) I klia se ol man blong God bifo oli kasem help long haf blong Tabu Baebol we oli gat finis long taem ya.

Ol Narafala Kristin Oli Givhan

18. ?From wanem yumi save talem se help we wan Kristin i givim long narafala Kristin i rili kamaot long Jeova?

¹⁸ Plante taem Jeova i yusum ol narafala Kristin blong givhan long yumi. Evri taem we wan Kristin i givhan long narafala Kristin, God nao i stamba blong help ya. ?From wanem yumi talem olsem? I gat tu risen. Faswan, se tabu spirit blong God i joen long bisnes ya. Spirit ya i karem frut long laef blong olgeta we oli traehad blong kasem spirit ya. Tu long ol frut ya, hemia lav mo gudfala fasin. (Galesia 5:​22, 23) Taswe, taem wan man blong God i wantem givhan long wan Kristin brata blong hem, hemia tabu spirit blong Jeova we i stap wok long hem. Seken risen, se God i wokem yumi blong yumi tekem fasin blong hem. (Jenesis 1:​26) Hemia i min se yumi naf blong soemaot ol semfala fasin we God i gat, olsem kaen fasin mo sore. Taswe, taem wan man blong Jeova i givhan long wan Kristin brata blong hem, help ya i rili kamaot long God from we hem nao i stamba blong gudfala fasin we man ya i stap soemaot.

19. ?Wanem sam stori long Baebol we oli soem se Jeova i save yusum ol man blong hem blong givhan long ol brata blong olgeta?

¹⁹ ?Long taem bifo, olsem wanem Jeova i yusum ol man blong hem blong givhan long ol brata blong olgeta? Plante taem Baebol i tokbaot wan man we Jeova i yusum blong stretem wan narafala man blong hem. Jeremaea i stretem Baruk, mo advaes we hem i givim i sevem laef blong Baruk. (Jeremaea 45:​1-5) Sam samtaem, Jeova i pulum ol man blong hem blong givim presen long ol brata blong olgeta. Ol Kristin long Masedonia mo Akaea oli glad tumas blong givhan long ol brata blong olgeta long Jerusalem we oli sot long sam samting. Aposol Pol i talem se gladhat blong olgeta blong givim presen i mekem se ‘plante man oli save talem tangkiu long God from ol samting we oli givim.’​—2 Korin 9:​11.

20, 21. ?Olsem wanem ol Kristin brata blong Rom oli mekem tingting blong aposol Pol i strong?

²⁰ Ol stori blong Baebol we oli tajem hat blong yumi moa, hemia ol stori blong ol man blong Jeova we oli leftemap tingting blong ol brata blong olgeta mo mekem tingting blong olgeta i strong. Tingbaot samting we i hapen long aposol Pol. Taem oli stap tekem Pol i go long Rom olsem wan presina, oli wokbaot long wan rod we ol man Rom oli wokem, nem blong hem Rod blong Apia. Las haf blong trip ya i had, from we oli mas pastru long wan ples we i gat sofmad mo wota long hem.a Ol brata long kongregesen blong Rom oli save se Pol i stap kam. ?Oli mekem wanem? ?Oli wet nomo long ol gudfala haos blong olgeta gogo Pol i kamtru, nao oli jes go sekhan long hem? Nogat.

²¹ Luk we i raetem haf blong Baebol, i mekem trip ya wetem Pol. Luk i tokbaot samting we i hapen se: “Ol brata blong yumi long Rom oli harem nius blong mifala, nao oli aot, oli kam blong mitim mifala long rod. Oli kam stap long ples ya we Apias i putum haos blong maket long hem, mo long ples ya we i gat tri hotel long hem.” Traem tingbaot. Ol brata oli save se Pol i stap kam, nao oli sanem sam brata blong Rom oli go blong mitim Pol. Haf long ol brata ya oli wet long maket ples blong Apias, 74 kilometa afsaed long Rom. Hem i wan ples blong spel we ol man oli savegud long hem. Narafala haf blong ol brata ya oli wet long wan ples blong spel we i gat tri hotel long hem, 58 kilometa afsaed long Rom. ?Taem Pol i kasem tufala ples ya mo i luk ol brata blong hem, hem i mekem wanem? Luk i talem se: “Hem i talem tangkiu long God from, mo tingting blong hem i kam strong moa.” (Ol Wok 28:15) !Tingbaot​—taem Pol i jes luk ol brata ya we oli bin wokbaot longwe blong kam mitim hem, be hemia nomo i naf blong mekem tingting blong hem i strong mo mekem hem i haremgud! ?Taem Pol i kasem help ya, hem i talem tangkiu long hu? Hem i talem tangkiu long Jeova God from we help ya i rili kamaot long hem.

22. ?Wanem stamba vas blong yia 2005? ?Bambae yumi tokbaot wanem long nekis stadi?

²² Ol stori blong Baebol oli soemaot klia se God i stap givhan long ol man blong hem. I no gat wan narafala man we i save givhan long yumi olsem Hem. From samting ya, ol Witnes blong Jeova oli jusum Ol Sam 121:2 olsem stamba vas blong yia 2005: ‘Jeova i stap givhan long mi.’ ?Olsem wanem Jeova i stap givhan long yumi tede? Bambae yumi tokbaot samting ya long nekis stadi.

[Futnot]

?Yu Yu Tingbaot?

?Blong givhan long ol man blong hem, olsem wanem Jeova i yusum​—

• ol enjel?

• tabu spirit?

• Baebol?

• ol narafala man blong hem?

[Tok blong makem poen pija long pej 15]

Stamba vas ya blong yia 2005 hemia: ‘Jeova i stap givhan long mi.’—Ol Sam 121:2.

[Tok blong pija long pej 16]

Pol i talem tangkiu long God from help we ol brata blong Rom oli givim long hem