Samfala Nomo Oli Rul, Be Plante Oli Kasem Blesing From
STAT long taem blong ol aposol i kam, God i stap jusumaot wan stret namba blong ol trufala Kristin long wol ya, mo i adoptem olgeta olsem ol pikinini blong hem. From we jenis we i hapen long olgeta ya i bigwan we i bigwan, Tok blong God i tokbaot olgeta se oli bon bakegen. Stamba risen from wanem oli mas bon bakegen, hemia se God i stap rerem olgeta blong oli kam ol king we oli rul long heven. (2 Timoti 2:12, NW) Blong oli save rul, oli mas laef bakegen mo go laef long heven. (Rom 6:3-5) Long heven, “bambae oli king, oli rul” wetem Kraes “long olgeta man long wol.”—Revelesen 5:10; 11:15, NW.
Be Baebol i talem se sam narafala man tu bambae oli kasem laef blong olwe, i no olgeta we oli bon bakegen nomo. Baebol (long Hibru haf mo Kristin Grik haf) i talemaot plan blong God se bambae hem i sevem tu grup blong man. Wan smol grup bambae i laef long heven blong rul, mo narafala grup we i bigwan, bambae i laef long wol ya aninit long Kingdom blong God. Ridim wanem we aposol Pol i talem long ol Kristin we oli bon bakegen. Hem i tokbaot Jisas se: “Kraes ya, hem i man we i ded blong mekem rod blong God i tekemaot ol sin blong yumi [smol grup ya]. Mo i no blong yumi nomo, i blong olgeta man long wol [bigfala grup ya].”—1 Jon 2:2.
Long sem fasin, aposol Pol i raetem se: “Olgeta samting we God i mekem [bigfala grup ya] oli stap wet, we oli wantem tumas blong luk we God bambae i soemaot ol pikinini blong hem [smol grup ya].” (Rom 8:19-21) ?Ol tok ya blong Jon mo Pol oli minim wanem? Oli min se: Olgeta we oli bon bakegen bambae oli kam haf blong wan gavman long heven. ?Blong mekem wanem long heven? Blong givim blesing ya, laef we i no save finis, long plante milian man we bambae oli laef long wol ya aninit long rul blong gavman blong God. Hemia nao from wanem Jisas i tijim ol disaepol blong hem blong oli prea se: “Plis, yu mekem kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.”—Matiu 6:10, NW.
Hibru haf blong Baebol tu i talem se i gat tufala grup we God bambae i sevem olgeta. Ridim ol tok we Jeova i talem long Ebraham we i bubu blong Jisas. Hem i talem se: “Mo from sid blong yu [smol grup], olgeta neson long wol [bigfala grup] bambae oli blesem olgeta nomo.” (Jenesis 22:18, NW) Yes, tru long “sid” blong Ebraham, bambae olgeta neson oli save kasem plante blesing.
?Hu nao i “sid” ya? Hemia Jisas Kraes mo olgeta we bambae oli joen wetem hem, olgeta ya we oli bon bakegen mo God i adoptem olgeta olsem ol pikinini blong hem. Aposol Pol i eksplenem se: “Sipos yufala i blong Kraes, ale, yufala i olsem ol laen ya [“sid,” NW] blong Ebraham.” (Galesia 3:16, 29) ?Mo wanem ol blesing we ol man long olgeta neson oli kasem from “sid” ya? Oli save gat bigfala ona ya we God i glad long olgeta, mo oli save harem gud blong laef olwe long wol ya we bambae i kam wan paradaes. Deved, man blong raetem plante Sam, i talem wan profet tok i se: “Ol stret man ya bambae oli tekem graon ya i blong olgeta, mo bambae oli stap long hem gogo i no save finis.”—Ol Sam 37:29; Aesea 45:18; Revelesen 21:1-5.
Yes, samfala nomo bambae oli go rul long heven, be plante milian man oli save kasem blesing we i kamaot from rul blong olgeta, hemia blong laef olwe long wol, mo ol gudgudfala samting we oli joen wetem laef ya. I gud tumas sipos yu mo famle blong yu i stap long grup ya we bambae i kasem blesing blong olwe from Kingdom blong God long heven.