‘Yufala i Mas Stap Long Laef Ya We Oltaem God i Lavem Yufala’
“Yufala i mas stap long laef ya we oltaem yufala i save se God i stap lavem yufala, mo oltaem yufala i mas luk long Jisas Kraes, Masta blong yumi, blong hem bambae i gat sore long yufala, i givim laef long yufala we i no save finis.”—JUD 21.
1, 2. ?Olsem wanem Jeova i soemaot lav blong hem long yumi? ?I tru se Jeova bambae i lavem yumi olwe, nomata wanem samting we yumi jusum blong mekem?
JEOVA GOD i soemaot lav blong hem long yumi long plante rod. Be samting we i soemaot moa bitim ol narafala samting se Jeova i lavem yumi, hemia ransom sakrefaes. Lav we hem i gat long ol man long wol, i bigwan tumas nao hem i sanem stret Pikinini blong hem, we hem i lavem tumas, i kam long wol blong i ded from yumi. (Jon 3:16) !Jeova i mekem samting ya from we hem i wantem we yumi kasem laef we i no save finis, mo tu, hem i wantem we yumi haremgud long lav blong hem blong olwe!
2 ?Olsem wanem? ?I tru se Jeova bambae i lavem yumi olwe, nomata wanem samting yumi jusum blong mekem? Nogat. Jud vas 21 i talem se: “Yufala i mas stap long laef ya we oltaem yufala i save se God i stap lavem yufala, mo oltaem yufala i mas luk long Jisas Kraes, Masta blong yumi, blong hem bambae i gat sore long yufala, i givim laef long yufala we i no save finis.” Tok ya, ‘stap long laef ya we oltaem God i stap lavem yufala,’ i soemaot se i gat sam samting we yumi mas mekem. ?Ale, wanem samting we yumi mas mekem blong stap long laef ya we oltaem God i lavem yumi?
?Olsem Wanem Blong Stap Oltaem We God i Lavem Yumi?
3. ?Wanem samting we Jisas i talem se hem i mas mekem blong hem i save stap long laef ya we oltaem Papa blong hem i lavem hem?
3 Yumi faenem ansa blong kwestin ya long prapa tok blong Jisas, we hem i talem long laswan naet blong hem long wol, se: “Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi.” (Jon 15:10) I klia olsem Jisas i talem long vas ya, se sipos hem i wantem gat gudnem long fes blong Papa blong hem, hem i mas obei long ol loa blong Jeova. Ale, sipos Pikinini blong God we i stretgud olgeta i mas obei gud, ?yu no ting se yumi tu, yumi mas mekem sem mak?
4, 5. (a) ?Wanem bigfala rod blong soem se yumi lavem Jeova? (b) ?From wanem yumi no nid blong harem nogud long tok ya se yumi mas obei long ol loa blong Jeova?
4 Ale bigfala samting we i soemaot se yumi lavem Jeova, hemia fasin blong yumi blong obei long hem. Aposol Jon i talem olsem: “Sipos yumi lavem God, hemia i min se yumi stap folem ol tok blong hem. Mo ol tok blong hem oli no strong tumas blong folem.” (1 Jon 5:3) I tru, plante man tede oli no wantem nating blong obei long narafala man. Be traem luk wanem we vas ya i talem: “Ol tok blong hem oli no strong tumas blong folem.” Jeova i no askem long yumi blong mekem samting we i strong tumas long yumi.
5 Tingbaot pijatok ya: ?Yu yu save askem long wan gudfala fren blong i karem sam samting we yu yu save se oli hevi tumas blong hem i karem? !Ating nogat! Jeova i kaen moa i bitim yumi, mo Jeova i savegud wanem we yumi naf blong mekem. Baebol i talem se Jeova i “savegud we hem i mekem yumi long graon.” (Sam 103:14) Bambae hem i neva askem long yumi blong mekem samting we yumi no naf blong mekem. Taswe i no nid blong yumi harem nogud long tok ya se yumi mas obei long ol loa blong Jeova. Defren olgeta, yumi mas luksave se taem yumi obei, yumi gat nambawan janis blong soem long Papa blong yumi long heven se yumi rili lavem hem, mo se yumi wantem stap long laef ya we oltaem hem i lavem yumi.
Wan Spesel Presen We Jeova i Givim
6, 7. (a) ?Wanem ya voes blong hat? (b) Talem wan pijatok blong soem olsem wanem voes blong hat i save halpem yumi blong stap long laef ya we oltaem God i lavem yumi.
6 Wol we yumi laef long hem i fasfas from ol defdefren tingting, taswe yumi mas mekem plante desisen we oli traem fasin blong yumi blong obei long God. ?Olsem wanem yumi save sua se ol desisen we yumi mekem oli laenap gud wetem samting we God i wantem? Jeova i givim wan presen long yumi we i save halpem yumi bigwan blong obei. Hemia voes blong hat. ?Wanem ya voes blong hat? Hem i wan spesel kaen fasin we yumi gat blong jekemap ol wok, ol tingting, mo ol jus we yumi mekem. Voes blong hat i olsem wan jaj we i stap insaed long yumi, blong givhan long yumi blong skelem gud ol jus we yumi mas mekem long laef, mo blong tingtingbak long ol samting we yumi mekem finis, mo blong skelem sipos yumi mekem i stret no yumi mekem i no stret.—Ridim Rom 2:14, 15.a
7 ?Voes blong hat blong yumi i save halpem yumi long wanem rod? Tingbaot wan pijatok: Wan man i stap wokbaot krosem wan bigfala draeples. I no gat rod we man i save wokbaot long hem, mo i no gat saen pos. Be nating, hem i gohed nomo, i wokbaot i go blong kasem ples we hem i wantem go long hem. ?Olsem wanem hem i save ples we hem i mas wokbaot long hem? Hem i gat wan kampas. Long fes blong kampas ya, oli makem ol fo ples ya not, saot, wes mo is, mo i gat wan nidel we i magnet, we i poen oltaem i go long not. Man ya i save lusum rod blong hem isi nomo sipos hem i no holem wan kampas. Sem mak, wan man we i no gat voes blong hat, bambae hem i no save olsem wanem blong mekem ol gudfala jus long laef, we oli laenap wetem ol gudfala fasin mo ol stamba trutok.
8, 9. (a) ?Yumi mas tingbaot wanem samting we i save mekem se voes blong hat i no wokgud? (b) ?Yumi save mekem wanem blong voes blong hat blong yumi i rili save givhan long yumi?
8 Be i gat sam samting we oli mekem se voes blong hat i no save wokgud, olsem we i gat sam samting tu we oli mekem kampas i no moa wokgud. Sipos man ya i putum wan magnet klosap long kampas blong hem, bambae nidel i no moa poen i go long not. Taswe, ?sipos yumi letem ol samting we hat blong yumi i wantem oli bos long ol desisen blong yumi, wanem samting i save kamaot? Fasin blong tingbaot yumi nomo i save mekem voes blong hat blong yumi i gorong. Baebol i givim woning se: “Hat i save giaman long yumi moa bitim ol narafala samting mo i wantem win.” (Jer. 1:7:9, NW; Prov. 4:23, NW) Antap moa, sipos man ya i no bin gat wan map we i stretgud blong lidim hem, kampas blong hem bambae i givhan long hem smol nomo, no maet i no givhan nating. Sem mak, sipos yumi no trastem advaes blong Tok blong God, Baebol, we i no save jenis mo i sua blong lidimgud yumi, maet voes blong hat blong yumi i no save givhan long yumi nating. (Sam 119:105) Sore tumas, plante man long wol ya oli folem samting we hat blong olgeta i wantem, nao oli no moa folem ol rul we oli stap long Tok blong God, no maet oli folem smol nomo. (Ridim Efesas 4:17-19.) Taswe, nating we ol man oli gat wan voes blong hat, plante oli stap mekem ol rabis samting nomo.—1 Tim. 4:2.
9 !Yumi neva mas kam olsem olgeta ya! Be yumi mas gohed nomo blong letem Tok blong God i tijim mo trenem voes blong hat blong yumi, blong i save givhan gud long yumi. Yumi mas lesin long voes blong hat blong yumi we Baebol i trenem, i bitim we yumi letem ol samting we yumi nomo i wantem oli bos long yumi. Long semtaem, yumi mas traehad blong respektem voes blong hat blong ol Kristin brata sista blong yumi. Yumi traehad long evri rod blong blokem fasin we i save mekem olgeta oli foldaon. Yumi mas tingbaot se, maet voes blong hat blong olgeta i blokem olgeta blong oli no mekem samting we yumi ting se i oraet nomo.—1 Kor. 8:12; 2 Kor. 4:2; 1 Pita 3:16.
10. ?Bambae yumi tokbaot wanem trifala rod blong obei long Jeova mo soem se yumi lavem hem?
10 Rod blong soemaot se yumi lavem Jeova, hemia taem yumi obei long hem long tri samting long laef blong yumi. Long trifala samting ya, voes blong hat bambae i givhan long yumi. Be bigfala samting we i mas lidim voes blong hat blong yumi, blong yumi gat gudfala fasin blong laef, hemia ol stamba trutok blong Baebol. Tri rod ya blong obei long Jeova mo soem se yumi lavem hem, hemia: (1) Yumi lavem olgeta we Jeova i lavem, (2) yumi soem respek long olgeta we oli gat wok blong lidim yumi, mo (3) yumi traehad blong stap klin long fes blong God.
Lavem Ol Man We Jeova i Lavem
11. ?From wanem yumi mas lavem ol man we Jeova i lavem?
11 Faswan rod, yumi mas lavem ol man we Jeova i lavem. Taem yumi draonem wan pis bred long wota, kwiktaem nomo bred ya bambae i dring wota ya. Yumi ol man yumi sem mak taem yumi joen wanples. Yumi pikimap isi nomo ol tingting mo fasin blong ol man we oli stap raonabaot long yumi. Man we i wokem yumi i save gud we taem ol sinman oli joen wanples, fasin joen ya i save spolem gud olgeta no i save givhan gud long olgeta. Taswe, hem i givim waes advaes long yumi se: “Sipos man i go joen long ol waes man, bambae hem i save kam waes, be sipos hem i go mekem fren wetem ol man we oli no gat hed, bambae hem i spolem hem nomo.” (Prov. 13:20; 1 Kor. 15:33) Yumi no wantem we yumi ‘spolem yumi’ nomo. Yumi wantem we yumi wanwan i “kam waes.” Jeova i no save kam waes moa, hem i waes finis, mo neva wan man i save mekem hem i kam nogud. Nating se i olsem, hem i soemaot wan nambawan eksampol long yumi long saed blong fasin joen wetem narafala. Tingting smol long samting ya: ?Hu ol sinman we Jeova i jusum blong oli kam fren blong hem?
12. ?Jeova i jusum wanem kaen fren?
12 Jeova i talem se olfala Ebraham i ‘fren blong hem.’ (Aes. 41:8) Man ya i nambawan eksampol blong fasin blong stap tru long God, stret fasin, mo fasin obei—hem i bilif long God mo i mekem ol samting we God i talem long hem. (Jem. 2:21-23) Hemia nao kaen man we Jeova i jusum blong i kam fren blong hem. Tede, Jeova i mekem sem mak. Sipos hem i jusum ol fren olsem, ?yu no ting se i impoten we yumi tu, yumi jusum gud ol fren, blong yumi save wokbaot wetem olgeta we oli waes mo kam waes?
13. ?Wanem samting i save halpem yumi blong jusum ol gudfala fren?
13 ?Wanem samting i save givhan long yu blong jusum gud ol fren? Fasin blong stadi long laef blong samfala long Baebol, i save pusum yumi blong mekem olsem. Tingbaot olsem wanem Rut i frengud wetem Nomi, mama blong man blong hem, mo Deved i frengud wetem Jonatan, mo Timoti i frengud wetem Pol. (Rut 1:16, 17; 1 Sam. 23:16-18; Fil. 2:19-22) Oli frengud tugeta from wan risen we i bigwan moa i bitim ol narafala samting: Oli frengud from we oli lavem Jeova. ?Yu yu save faenem ol fren we oli lavem Jeova olsem yu? Yu mas save se Kristin kongregesen i fulap long ol kaen fren olsem, we oli save kam ol gudfala fren blong yu. Ol fren ya oli no save pulum yu blong mekem samting we Jeova i no glad long hem. Be bambae oli halpem yu blong yu obei long Jeova, kam klosap long hem, mo blong yu wokem ol fasin we tabu spirit i wantem. (Ridim Galesia 6:7, 8.) Bambae oli halpem yu blong stap long laef ya we oltaem God i lavem yu.
Respektem Olgeta We God i Givim Wok Long Olgeta Blong Lidim Yumi
14. ?Wanem samting we i mekem se i had long yumi blong respektem olgeta we oli lidim yumi?
14 Namba tu rod blong soem se yumi lavem Jeova, i joen wetem fasin blong respektem olgeta we oli lidim yumi. Yumi mas soem respek long olgeta we oli holem wok blong lidim yumi. ?From wanem i had samtaem blong mekem olsem? Wan samting, se ol man we oli lidim yumi oli sinman. Mo yumi tu, yumi sinman. Yumi faet strong agensem stronghed fasin we yumi bon wetem.
15, 16. (a) ?From wanem i impoten we yumi soem respek long olgeta we Jeova i givim wok long olgeta blong lidim ol man blong hem? (b) ?Wanem tingting blong Jeova long saed blong fasin stronghed we ol man Isrel oli mekem agens long Moses, mo yumi lanem wanem from?
15 Maet yu stap tingting se sipos i had blong respektem olgeta we oli lidim yumi, ?from wanem yumi mas mekem samting ya? Ansa i joen wetem wan kwestin long saed blong hu i gat raet blong rulum ol man. ?Bambae yu yu jusum hu, olsem hae rula blong yu? Sipos yumi jusum Jeova olsem Hae Rula blong yumi, yumi mas respektem fasin blong hem blong rul long yumi. Sipos yumi no mekem samting ya, ?olsem wanem yumi save singaot hem se Rula blong yumi? Antap moa, klosap oltaem Jeova i givim wok long ol sinman blong oli lukaot long ol man blong hem. ?Sipos yumi mekem stronghed, mo yumi no wantem lesin long ol man ya, bambae Jeova i tingbaot yumi olsem wanem?—Ridim 1 Tesalonaeka 5:12, 13.
16 Tingbaot, taem ol man Isrel oli mekem stronghed mo oli toktok smol agens long Moses, Jeova i luk olgeta olsem we olgeta oli mekem stronghed agens long hem stret. (Namba 14:26, 27) God i no jenis, hem i sem mak oltaem nomo. !Sipos yumi mekem stronghed agens long olgeta we God i givim wok long olgeta blong lidim yumi, yumi mekem stronghed agens long hem stret!
17. ?Wanem stret tingting mo fasin we yumi mas traehad blong gat long olgeta ya we oli holem wok insaed long kongregesen?
17 Aposol Pol i soemaot stret tingting we yumi mas gat long olgeta we oli holem wok insaed long Kristin kongregesen. Hem i raetem se: “Yufala i mas obei long olgeta we oli stap lidim yufala, mo yufala i mas stap aninit long olgeta. Olgeta ya oli stap lukaotgud long laef blong yufala, from we oli mas talemaot long God se oli holem wok ya olsem wanem. I gud yufala i mekem we ol man ya oli glad blong mekem wok ya, i nogud oli harem se oli taed long wok ya, from we samting ya i save spolem yufala.” (Hib. 13:17, NW) I tru se yumi mas wok strong blong gat fasin obei mo fasin ya blong stap aninit long olgeta we oli holem wok insaed long kongregesen. Be rimemba se yumi stap wok strong from we yumi wantem stap oltaem we God i lavem yumi. ?Yu no ting se hemia nambawan mak ya we i stret se yumi stap traehad blong kasem?
Stap Klin Long Fes Blong Jeova
18. ?From wanem Jeova i wantem we yumi stap klin oltaem?
18 Namba tri rod we i soemaot lav we yumi gat long Jeova, se yumi traehad blong stap klin long fes blong hem. Ol papa mama oli wok strong blong meksua se ol pikinini blong olgeta oli stap klin. ?From wanem? Wan risen, se fasin klin i impoten long helt blong pikinini mo blong hem i haremgud. Mo tu, pikinini we i klin i givim gudnem long famle, i soemaot se papa mama blong hem oli lavem hem mo oli keagud long hem. Ating from semfala risen ya, Jeova i wantem we yumi klin. Hem i save se fasin klin i impoten blong yumi haremgud long laef. Hem i save tu se taem yumi klin, hemia i givim gudnem long Papa blong yumi long heven. Hemia i impoten tumas, from maet sam man oli luksave se yumi defren long ol man blong wol ya we i doti, nao samting ya i save pulum olgeta blong mekem wok blong God.
19. ?Olsem wanem yumi save se fasin klin long saed blong bodi i impoten?
19 ?Yumi mas stap klin oltaem long wanem samting? Long ol defdefren fasin blong laef. Long taem blong ol man Isrel bifo, Jeova i talem klia long ol man blong hem se fasin klin long saed blong bodi i rili impoten. (Lev. 15:31) Loa blong Moses i talem ol rul long saed blong fasin klin, hemia blong berem sitsit, klinim ol samting we yumi yusum blong kakae, wasem leg, han mo klos. (Eks. 30:17-21; Lev. 11:32; Nam. 19:17-20; Dut. 23:13, 14) Ol man Isrel oli kasem ol tok bakegen mo bakegen se God blong olgeta, Jeova, i tabu, we i min se hem i “klingud,” “i no gat wan doti nating long hem.” Ol man blong tabu God ya oli mas tabu tu.—Ridim Levitikas 11:44, 45.
20. ?Yumi mas stap klin long wanem samting?
20 Taswe, yumi mas stap klin afsaed long bodi blong yumi mo long insaed blong yumi tu. Yumi traehad blong mekem tingting blong yumi i klin. Yumi holemstrong long ol gudfala rul blong Jeova long saed blong klin fasin, nomata we ol man raonabaot long yumi oli stap mekem rabis fasin long saed blong seks we i mekem olgeta oli doti long fes blong God. Samting we i impoten moa, se yumi traehad blong blokem ol giaman wosip blong i no spolem klin wosip blong yumi. Yumi mas tingbaot woning we i stap long Aesea 52:11 se: “Yufala ya we yufala i stap karem ol samting blong yusum long haos blong Hae God, yufala i mas aot gud nomo long kantri ya Babilonia. Yufala i no mas tajem ol samting we i doti long fes blong hem, yufala i mas mekem we yufala i klin long fes blong hem, nao yufala i mas aot.” Tede, yumi mekem wosip blong yumi i klin taem yumi stap longwe long giaman wosip, i min se yumi no tajem nating enikaen samting long saed blong wosip we Papa blong yumi long heven i luk se i doti. From samting ya, yumi meksua se yumi no joen long ol samting olsem ol lafet mo ol holide blong ol giaman skul we ol man long wol tede oli laekem tumas. Tru, i no isi blong stap klin oltaem. Be ol man blong Jeova oli traehad blong stap klin from we samting ya i halpem olgeta blong stap oltaem we God i lavem olgeta.
21. ?Olsem wanem yumi save meksua se yumi stap oltaem we God i lavem yumi?
21 Jeova i wantem lavem yumi oltaem, gogo i no save finis. Be yumi evriwan i mas meksua se yumi mekem bes blong yumi blong stap we oltaem God i save lavem yumi. Yumi save mekem olsem, sipos yumi folem eksampol blong Jisas mo obei long ol loa blong Jeova blong pruvum se yumi lavem hem. Sipos yumi mekem olsem, yumi save sua se bambae i no gat wan samting nating “we i save tekemaot yumi long God, we hem i lavem yumi tumas, we yumi joen long Jisas Kraes, Masta blong yumi.”—Rom 8:38, 39.
[Futnot]
a Rom 2:14, 15, NW: “Ol man blong ol neson oli no gat loa, be taem oli folem tingting blong olgeta, oli mekem ol fasin we i laenap wetem loa ya. Taswe, nating se ol man ya oli no gat loa, be oli loa blong olgeta wan. Fasin blong olgeta ya i stap soemaot we ol samting we loa ya i talem, i stap finis long hat blong olgeta, olsem we wan man i raetem i stap. Voes blong hat blong olgeta i witnes blong olgeta, hem i stap talemaot long olgeta se oli mekem i stret no oli mekem i no stret.”
?Yu Yu Tingbaot?
• ?Olsem wanem voes blong hat i save halpem yumi blong stap oltaem we God i lavem yumi?
• ?From wanem yumi mas lavem ol man we Jeova i lavem?
• ?From wanem yumi mas soem respek long olgeta we oli holem wok ya blong lidim yumi?
• ?From wanem i impoten we ol man blong God oli stap klin?
[Bokis/Foto blong pija long pej 31]
WAN BUK WE I LEFTEMAP GUDFALA FASIN
Long Distrik Asembli blong 2008/2009, i gat wan niufala buk i kamaot we i gat 224 pej blong hem, mo we nem blong hem se, “Keep Yourselves in God’s Love.” ?Wanem wok blong niufala buk ya? Oli mekem buk ya blong givhan long ol Kristin blong oli kasem save long ol samting we Jeova i wantem, mo lavem ol samting ya, mo buk ya i tokbaot plante ol gudfala fasin we oli Kristin oli mas gat. Yumi mas stadi gud long buk ya, “Keep Yourselves in God’s Love.” Samting ya bambae i mekem tingting blong yumi i strong moa se, sipos yumi folem ol samting we Jeova i wantem, hemia i beswan fasin blong laef naoia, mo i save lidim yumi blong kasem laef we i no save finis long fiuja.
Antap long hemia, oli wokem buk ya blong halpem yumi blong kasem save se i no strong tumas blong obei long Jeova. Defren olgeta, hemia rod blong soem se yumi lavem Jeova tumas.Taswe, buk ya bambae i pulum yumi blong tingbaot kwestin ya se, ‘?From wanem mi mi obei long Jeova?’
Taem samfala oli mekem bigfala mastik ya blong lego laef ya we i pulum Jeova blong lavem olgeta, klosap oltaem hemia from we oli mekem nogud fasin, i no from we oli no kasem save long saed blong wan tijing, nogat. !From samting ya, i impoten blong mekem lav mo tangkiu blong yumi i strong moa, long ol loa blong Jeova mo ol stamba trutok blong hem, we oli save lidim yumi evri dei long laef blong yumi! !Yumi suagud se niufala buk ya bambae i halpem ol sipsip blong Jeova long ful wol blong stanap strong long stret fasin, blong soem se Setan i wan man blong giaman, mo antap moa, blong stap long laef ya we oltaem God i lavem olgeta!—Jud 21.
[Tok blong pija long pej 28]
“Sipos yufala i stap obei long ol tok blong mi, bambae mi mi lavem yufala olwe, stret olsem we mi mi stap obei long ol tok blong papa blong mi, nao oltaem hem i stap lavem mi”