Jisas Kraes—?Tijing Blong Hem i Mekem Wanem Long Ol Man?
“Wan samting we i soemaot klia se waes man ya blong Kapaneam i gat paoa, hemia se hem i stap yet long hat mo tingting blong plante man.”a—GREG EASTERBROOK, WAN MAN BLONG RAETEM BUK.
OL TOK oli gat paoa. Taem man i jusum gud ol tok blong hem we oli waes, samting ya i save tajem hat blong narafala man, i mekem tingting blong man i strong long saed blong fiuja, mo i jenisim laef blong man tu. I no gat wan man samtaem we tok blong hem i gat moa paoa i bitim tok blong Jisas Kraes. Wan man we i lesin long Jisas taem hem i givim Bigfala Toktok blong hem antap long hil, i raetem se: “Taem Jisas i finisim ol tok ya, ol man oli sapraes tumas long tok blong hem.”—Matiu 7:28.
Tede, ol man long olgeta ples long wol oli tingbaot yet plante toktok blong Jisas. Tingbaot sam eksampol blong ol tok blong hem we oli gat bigfala mining.
“Yufala i no save mekem we God i bos blong yufala, be long semtaem nomo, mane tu i bos blong yufala.”—Matiu 6:24.
“Yufala i mas mekem i gud long ol narafala man, olsem we yufala i wantem blong olgeta oli mekem long yufala.”—Matiu 7:12.
“Samting we i blong Sisa, yufala i givimbak long Sisa. Mo samting we i blong God, yufala i givimbak long God.”—Matiu 22:21.
“Man we i stap givim presen i go, hem i save harem gud moa, i winim man we i stap kasem presen blong hem.”—Ol Wok 20:35.
Be Jisas i no jes talem nomo ol tok we ol man oli tingbaot yet. Tijing blong hem i gat paoa from we i givim trutok long ol man long saed blong God, i tijim olgeta olsem wanem blong faenem mining blong laef, mo i soemaot klia se Kingdom blong God nao i rod blong finisim olgeta trabol we i mekem man i safa. Taem yumi tingting gud long tijing ya long ol haf we oli kam biaen, bambae yumi luk from wanem Jisas i stap yet “long hat mo tingting blong plante man.”
[Futnot]