?Olsem Wanem Blong Tijim Pikinini Long Saed Blong God?—?Wanem Ol Rod We i Beswan Blong Tijim Pikinini?

“Yufala i no mas fogetem ol tok ya we mi mi stap givim long yufala tede. Oltaem, yufala i mas tijim ol pikinini blong yufala long hem. Sipos yufala i stap long haos, no yufala i stap wokbaot, no yufala i go blong slip, no yufala i girap bakegen, be yufala i mas tokbaot ol samting ya.”—DUTRONOME 6:6, 7.

SAMTAEM ol papa mama oli harem se wok ya blong trenem pikinini blong olgeta i bigwan tumas. Tingting blong olgeta i fasfas moa taem oli stap lukaotem advaes, from we i gat plante tumas advaes. Plante taem, ol famle mo ol fren oli wantem talemaot tingting blong olgeta. Mo tu, ol buk, ol magasin, mo Intenet i givim plante advaes we samtaem wan advaes i agensem narawan.

Defren olgeta, Baebol i givim gudfala advaes. Hem i talem wanem samting we papa mama i save tijim pikinini long hem, mo i eksplenem se tufala i save tijim hem olsem wanem. Vas blong Baebol we i stap antap, i soemaot se evri dei, ol papa mama oli mas faenem rod blong toktok wetem pikinini long saed blong God. Bambae yumi tokbaot fo tingting we oli stanap long Baebol. Fofala tingting ya oli halpem plante taosen papa mama finis, blong oli tijim pikinini blong olgeta long saed blong God.

1. Yu yusum ol samting we God i mekem. Aposol Pol i raetem se: “Yumi no save luk ol fasin ya blong hem stret long ae blong yumi. Hem i God. Hem i stap oltaem, mo paoa blong hem i no save finis. Be i stat long taem ya we hem i mekem wol ya fastaem, i kam kasem tede, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya we hem i bin mekem.” (Rom 1:20) Ol papa mama oli save givhan bigwan long pikinini, blong i kasem save se hem i save fren wetem God. Oli mekem olsem, taem oli pulum pikinini blong luk ol samting we God i mekem, biaen, oli halpem hem blong tingbaot ol fasin blong God.

Jisas i yusum ol samting we God i mekem blong tijim ol disaepol blong hem. Hem i talem se: “Yufala i traem tingbaot ol pijin ya we oli stap flae olbaot. Olgeta oli no planem garen, oli no go karem kakae i kam, mo oli no putumgud kakae i stap long haos. Be Papa blong yufala long heven i stap givim kakae long olgeta. Mo long fes blong hem, yufala i gud moa i winim ol pijin.” (Matiu 6:26) Long vas ya, Jisas i makem gud tufala fasin blong Jehova, hemia lav mo sore. Mo tu hem i halpem ol disaepol blong oli tingbaot, olsem wanem Jehova i soemaot ol fasin ya long ol pikinini blong hem.

Waes King Solomon i tokbaot waes we Jehova i givim long ol anis, mo hem i yusum ol anis ya blong tijim yumi long wan nambawan lesen. Hem i talem se: “I moa gud ol lesman oli lanem fasin blong anis. Ol anis oli no gat lida, no jif, no gavman blong olgeta, be long gudtaem, oli stap putumgud kakae blong olgeta i stap rere, blong oli save kakae long hadtaem.” (Ol Proveb 6:6-8) !Hemia wan nambawan rod blong tijim pikinini blong putum ol gudfala mak, mo blong yusum paoa we God i givim long hem blong kasem ol mak ya!

Ol papa mama oli save mekem olsem Jisas mo Solomon. Oli save tijim gud pikinini blong olgeta taem oli mekem trifala samting ya: (1) Oli askem long pikinini blong i talemaot wanem kaen tri mo anamol we hem i laekem. (2) Oli faenemaot moa save long saed blong tri no anamol ya. (3) Oli yusum tri no anamol ya blong tijim hem long saed blong God.

2. Yu tingbaot ol man olsem we Jisas i tingbaot olgeta. I no gat wan man we i olsem Jisas. Jisas i gat plante impoten samting blong talem. Nating se i olsem, hem i spenem bighaf blong taem blong hem blong askem ol kwestin. Hem i wantem tumas blong save tingting mo filing blong ol man we hem i stap tijim. (Matiu 17:24, 25; Mak 8:27-29) Long sem fasin, ol papa mama oli gat plante impoten samting blong tijim long pikinini blong olgeta. Be blong tijim gud pikinini, oli mas folem fasin blong Jisas, mo oli mas givhan long pikinini blong i no fraet blong talemaot se hem i harem olsem wanem.

?Olsem wanem sipos pikinini i soemaot se hem i no gat stret tingting no hem i slo blong lanem samting? Traem tingbaot olsem wanem Jisas i tijim ol aposol blong hem. Samtaem ol aposol oli raorao long olgeta, mo oli slo blong lanem se oli mas gat tingting daon. Nating se i olsem, Jisas i gat longfala tingting long olgeta mo i talem bakegen mo bakegen se oli mas gat tingting daon. (Mak 9:33, 34; Luk 9:46-48; 22:24, 25) Ol papa mama we oli folem fasin blong Jisas, bambae oli gat longfala tingting taem oli stretem pikinini blong olgeta. Mo bambae oli mas talem sem samting bakegen mo bakegen gogo kasem we pikinini i lanem samting.a

3. Yu mas mekem samting we yu talem. I gud blong ol papa mama oli folem advaes we aposol Pol i givim long ol Kristin long Rom. Pol i raetem se: “Yes i tru, yufala i save tijim ol narafala man. ?Be from wanem yufala i no save tijim yufala bakegen? Yufala i stap talem long olgeta se, ‘Bambae yu no mas stil.’ ?Be from wanem yufala i stap stil?”—Rom 2:21.

Advaes ya i stret from we pikinini i lanem moa samting, taem hem i luk wanem we papa mama i mekem i bitim wanem we tufala i talem. Yes, pikinini i lesin moa long papa mama taem tufala i mekem samting we tufala i talem.

4. Yu mas stat taem pikinini i smol nomo. Timoti i fren blong aposol Pol. Ol man ples blong hem oli stap talem ol gudfala toktok long saed blong hem. (Ol Wok 16:1, 2) Wan risen from wanem i olsem, hemia from we “taem hem i pikinini yet,” mama mo bubu blong hem tufala i tijim hem long “ol tok blong Baebol.” Tufala i no ridim ol vas blong Baebol nomo long Timoti. Be tufala i halpem hem tu blong tingting gud long ol trutok we oli stap long Baebol.—2 Timoti 1:5; 3:14, 15.

?Weples Yu Save Faenem Advaes Blong Givhan Long Yu?

Ol Witnes blong Jehova oli mekem plante buk we i blong halpem ol papa mama blong tijim trutok long saed blong God long pikinini blong olgeta. Sam long ol buk ya, oli raetem blong ol smol pikinini. Sam narafala i blong halpem ol papa mama mo ol yangfala blong oli toktok tugeta oltaem.b

I tru, bifo we papa mama i save tijim pikinini long saed blong God, tufala i mas save ansa blong sam kwestin we i had, we maet pikinini i askem. Traem tingbaot se bambae yu yu ansa olsem wanem long ol kwestin ya: ?From wanem God i letem man i safa? ?Wanem stamba tingting blong God long saed blong wol ya? ?Ol dedman oli stap wea? Ol Witnes blong Jehova bambae oli glad blong halpem yu blong kasem ansa blong ol kwestin ya, mo ol narafala kwestin bakegen. Olsem nao, yu mo famle blong yu, yufala evriwan i save kam klosap long God.—Jemes 4:8.

[Ol futnot]