Vison We I Soemaot Olgeta Long Heven

JEHOVA I HAE MOA LONG EVRIWAN

“Wan bigfala jea olsem jea blong king i stap long heven, mo wan Man i stap sidaon long hem. Man ya i saen we i saen, olsem tu gudfala ston ya jaspa mo kanilian we tufala i red. Mo i gat wan renbo i goraon long jea ya, mo laet blong hem i saen olsem gudfala ston ya emeral, we i grin.”​—Revelesen 4:2, 3.

‘Bodi blong hem i olsem faea we i laet, mo bigfala laet i stap saen raonabaot long hem, we i gat olgeta kala blong renbo long hem. Bigfala laet ya i soemaot we Jehova i stap.’​—Esikel 1:27, 28.

Ol vison ya we aposol Jon mo profet Esikel i kasem, oli soemaot we Hae God Jehova i saen we i saen. Blong mekem se yumi kasem save long samting ya, oli yusum ol samting olsem ol gudfala ston, renbo, mo bigfala jea blong king. Ol vison ya oli soemaot se laet we i goraon long Jehova i naes we i naes, i mekem man i harem gud mo i gat pis.

Ol tok long ol vison ya oli laenap wetem tok blong man blong raetem sam, we i se: ‘Jehova i hae we i hae, mo yumi mas presem hem, yumi mas leftemap nem blong hem. Hem i hae moa long ol narafala god, mo i stret blong yumi ona moa long hem, i winim we yumi ona long ol narafala god. Olgeta god ya blong ol man blong ol narafala kantri oli giaman god nomo, oli no save mekem wan samting, be Jehova, hem i mekem skae wetem olgeta samting we i stap long hem. Bigfala laet i stap saen raonabaot long hem i soemaot we hem i King, nem blong hem i hae we i hae. Olgeta samting long haos blong hem oli soemaot we paoa blong hem i bigfala tumas, mo we hem i gud we i gud.’​—Ol Sam 96:4-6.

Nating se Jehova i hae moa long evriwan, be hem i askem long yumi blong prea long hem mo hem i mekem yumi sua se hem i lesin long yumi. (Ol Sam 65:2) God i lavem yumi tumas mo i kea long yumi, taswe aposol Jon i raetem se: “God i stamba blong fasin ya blong lavem man.”​—1 Jon 4:8.

JISAS I STAP WETEM GOD

“Steven, Tabu Spirit i fulap long hem, mo hem i lukluk i go antap long heven. Nao hem i luk God, we hem i King, i stap sidaon long bigfala jea blong hem, mo Jisas i stap stanap long raet saed blong hem. Nao hem i talem se, ‘Yufala i luk. Mi mi luk we heven i open, mo we Pikinini blong Man hem i stap stanap long raet saed blong God.’”​—Ol Wok 7:55, 56.

Bifo we Steven i luk vison ya, ol lida blong ol man Jiu oli kilim Jisas i ded, olgeta ya nao we Steven i stap toktok long olgeta. Vison ya i pruvum se Jisas i laef bakegen mo i laef i stap, mo God i givim haenem long hem. Aposol Pol i tokbaot samting ya se: ‘Jehova i mekem Kraes i laef bakegen long ded, mo i tekem hem i go sidaon long raet saed blong hem long heven. Mo nem blong Kraes i hae moa long nem blong olgeta enjel we oli haeman, mo long ol lida, mo long ol man we oli gat paoa long heven, mo long ol jif blong ol devel we oli stap olbaot long wol ya. Nem blong hem i antap moa long olgeta narafala nem we i gat paoa, long wol ya mo long narafala wol we bambae i kam.’​—Efesas 1:20, 21.

Baebol i no tokbaot nomo hae posisen blong Jisas, be i soemaot tu se Jisas i lavem tumas ol man olsem Jehova. Taem Jisas i stap long wol, hem i hilim ol sikman mo olgeta we bodi blong olgeta i nogud, mo i mekem ol dedman oli laef bakegen. Hem i soemaot se hem i lavem God mo ol man tumas taem hem i givim laef blong hem olsem wan sakrefaes. (Efesas 2:4, 5) Klosap nao Jisas bambae i yusum paoa blong hem, mo bambae i blesem ol man long evri ples we oli obei long hem.

OL ENJEL OLI MEKEM WOK BLONG GOD

“Taem mi [profet Daniel] stap lukluk, mi luk sam man oli karem ol spesel jea blong king i kam, nao oli putumrere olgeta i stap wanples. Mo mi luk wan Olfala [Jehova] we i stap fastaem bifo olgeta, mo bambae i stap gogo i no save finis, hem i kam sidaon long wan long ol jea ya. . . . Mo i gat plante taosen man we oli man blong wok blong hem, oli stap long ples ya, mo i gat plante narafala man we oli plante we plante tumas, man i no save kaontem olgeta, oli stap stanap long fes blong hem.”​—Daniel 7:9, 10.

Long vison ya, Daniel i luk plante taosen enjel. !Ating hem i sapraes tumas! Ol enjel oli ol spirit we oli gat paoa mo oli waes. Samfala oli gat hae posisen, olsem ol Seraf mo ol Jerubim. Baebol i tokbaot ol enjel bitim 250 taem.

Ol enjel oli no ol man we i laef long wol bifo. God i wokem ol enjel longtaem bifo we i wokem ol man. Taem God i wokem wol ya, ol enjel oli stap lukluk, oli harem gud mo oli stap singsingaot.​—Job 38:4-7.

Wan rod we ol enjel oli folem tede blong mekem wok blong God, hemia taem oli joen long impoten wok ya blong talemaot gud nius blong Kingdom, we i stap gohed long fulwol. (Matiu 24:14) Long wan vison, Aposol Jon i talemaot olsem wanem oli joen long wok ya, i se: “Mi luk we wan narafala enjel i stap flae antap long skae, i stap talemaot gud nius ya we i blong stap oltaem nomo, gogo i no save finis. Enjel ya i stap talemaot gud nius ya long olgeta man long wol, long olgeta blong evri kala, mo kantri, mo laen, mo lanwis.” (Revelesen 14:6) I tru, tede ol enjel oli no toktok long ol man olsem oli mekem bifo, be oli lidim olgeta we oli stap talemaot gud nius, oli go long ol man we hat blong olgeta i stret.

SETAN I LIDIM PLANTE MILIAN MAN OLI GORONG

“Nao i gat bigfala faet i stat long heven. Mikael [Jisas Kraes] wetem ol enjel blong hem oli stap faet agens long bigfala algita ya. Nao bigfala algita ya wetem ol enjel blong hem oli traem faet agens long Mikael olgeta, be oli lus, mo i no moa gat ples blong olgeta long heven. Bigfala algita ya, hem i snek ya blong bifo we nem blong hem “Setan” no “Man we i agensem man”, we i stap giaman long olgeta man long wol, i lidim olgeta oli go krangke. Nao olgeta long heven oli sakemaot hem wetem olgeta enjel blong hem oli aot long heven, oli kamdaon long wol.”​—Revelesen 12:7-9.

Bifo i no gat pis long heven. Long stat olgeta, wan enjel i wantem tumas we ol man oli wosipim hem, nao i agensem Jehova God, ale hem i kam Setan, we i minim “Man Blong Agens.” Biaen, sam narafala enjel oli joen wetem hem, mo oli kam ol rabis spirit. Olgeta ya oli nogud we oli nogud, oli agensem Jehova, mo oli pulum bighaf blong ol man oli agensem samting we Jehova i talem.

Setan wetem ol rabis enjel blong hem oli nogud we oli nogud, mo oli stap spolem ol man. Olgeta oli enemi blong ol man mo oli stap mekem ol man long wol oli safa. Eksampol, Setan i kilim i ded olgeta anamol mo ol wokman blong gudfala man ya Job. Biaen, hem i kilim i ded ol ten pikinini blong Job taem hem i mekem “wan bigfala win” i kam flatemgud haos we oli stap long hem. Afta, hem i mekem “ol soa i kam kavremapgud bodi blong Job, i stat long hed blong hem, i go kasem leg blong hem daon.”​—Job 1:7-19; 2:7.

Be klosap nao Setan bambae i lus. Stat long taem we oli sakemaot hem i kamdaon long wol, hem i save se “hem i gat smol taem nomo blong hem i stap yet.” (Revelesen 12:12) !Setan bambae i lus, hemia wan gud nius!

OLGETA WE OLI KAMAOT LONG WOL

“Yu [Jisas] yu pemaot ol man, oli blong God. Olgeta ya oli kamaot long olgeta kala, mo long olgeta kantri, mo long olgeta laen, mo long olgeta lanwis. Yu yu King, nao yu mekem olgeta oli kam man blong yu, we oli pris blong mekem wok blong God blong mifala, mo bambae oli king, oli rul long olgeta man long wol.”​—Revelesen 5:9, 10.

Jisas i laef bakegen blong go long heven, long sem fasin, ol narafala tu bambae oli go long heven. Jisas i talem long ol aposol blong hem se: “Mi mi go mekemrere ples blong yufala. Mo, . . . bambae mi save kambak blong tekem yufala i kam stap wetem mi, blong bambae yufala i save stap long ples ya we mi bambae mi stap long hem.”​—Jon 14:2, 3.

Olgeta we oli go long heven, oli go from wan risen. Bambae oli joen wetem Jisas long wan Kingdom, blong rul long olgeta man long wol, mo oli mekem olgeta oli kasem blesing. Kingdom ya nao we Jisas i tijim ol man blong hem blong oli prea from, se: ‘Papa blong mifala. Yu yu stap long heven. Nem blong yu i tabu. Plis, yu mekem Kingdom blong yu i kam. Plis yu mekem samting we yu yu wantem i kamaot long wol, olsem we i kamaot long heven.’​—Matiu 6:9, 10.

SAMTING WE BAMBAE OLI MEKEM

“Mi [aposol Jon] harem wan tok we i kamaot long bigfala jea blong God, we i singaot bigwan, i talem se, ‘!Yu luk! Naoia God i mekem ples blong hem wetem ol man . . . Hem bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.’”​—Revelesen 21:3, 4.

Vison ya i olsem wan profet tok. Hem i soemaot taem ya we Kingdom blong God bambae i finisim rul blong Setan, mo i mekem wol i kam paradaes. Jisas wetem olgeta we oli laef bakegen mo go long heven, oli rul long Kingdom ya. Ol samting we oli stap spolem ol man mo i mekem olgeta oli harem nogud, bambae oli finis. Ded tu bambae i lus.

?Be olsem wanem long ol bilian man we oli ded be oli no blong laef long heven? Long fiuja, olgeta ya bambae oli laef bakegen blong kasem laef we i no save finis long Paradaes long wol.​—Luk 23:43.