?Wanem Presen We i Gud Moa?

“Olgeta gudfala presen mo ol presen we oli nambawan oli kamaot long heven, long Papa ya we i mekem olgeta laet long skae.” (Jemes 1:17) Vas ya i soemaot kaen fasin blong Papa blong yumi long heven, Jehova God. Be long olgeta presen we hem i givim long man, i gat wan we i bigwan moa long ol narafala presen. ?Wanem presen ya? Tok blong Jisas long Jon 3:16 we plante man oli savegud, i ansa long kwestin ya, i se: “God i lavem tumas ol man long wol, nao hem i givim stret Pikinini blong hem, wan nomo we hem i gat, blong olgeta man we oli soemaot se oli bilif long hem, oli no ded be oli kasem laef we i no save finis.”

Presen we God i givim, hemia stret pikinini blong hem. Presen ya i gud moa i bitim ol narafala presen we yumi save kasem, from we tru long presen ya, yumi save kam fri long ol samting we i stap holemtaet yumi olsem, sin, olfala, mo ded. (Ol Sam 51:5; Jon 8:34) Yumi wan yumi no save kam fri long ol samting ya, nating se yumi traehad blong kam fri. Be from bigfala lav we God i gat, hem i givim samting we yumi nidim blong kam fri. Taem Jehova i givim stret pikinini blong hem olsem wan ransom, hem i mekem se olgeta we oli obei long hem oli save kasem laef we i no save finis. ?Be wanem ya ransom? ?Mo from wanem yumi nidim? ?Yumi save kasem wanem gudfala samting from ransom?

Wan ransom hem i praes we wan man i pem blong karembak wan samting we i lus o blong mekem samting we i fas i kam fri. Baebol i eksplenem se taem God i wokem faswan papa mo mama blong yumi, Adam mo Iv, tufala i no gat sin. Tufala wetem ol pikinini we bae oli kamaot biaen long tufala, oli save harem gud blong laef olwe long paradaes long wol ya. (Jenesis 1:26-28) Be sore tumas, tufala i lusum evri samting ya, taem tufala i jusum blong no moa obei long God. Ale tufala i kam sinman. ?Wanem i kamaot from? Baebol i ansa se: “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.” (Rom 5:12) Adam i no moa pasem laef we i stret gud long ol pikinini blong hem, be hem i pasem sin mo frut blong hem, ded.

Blong mekem wan ransom, man i mas yusum sem samting blong pemaot wanem we i lus. Taem Adam i jus blong no obei long God, hem i sin, ale hem i lusum laef we i stret gud. Samting ya i mekem se ol pikinini we oli kamaot biaen long hem oli kam slef blong sin mo ded. Taswe, i nidim wan man we stret gud olgeta, hemia Jisas, blong givim laef blong hem olsem wan sakrefaes blong tekemaot yumi long sin. (Rom 5:19; Efesas 1:7) Be samting ya i kamaot nomo from we God i lavem yumi. Taswe hem i givim ransom ya blong mekem ol man oli kasem gudfala samting ya we Adam i lusum, hemia laef we i no save finis long paradaes long wol ya.—Revelesen 21:3-5.

Samting we Jehova i mekem, i soemaot se presen ya ransom we i mekem se yumi save kasem laef we i no save finis, i wan presen we i gud moa long ol narafala presen. Blong yumi glad long ‘nambawan presen’ ya, i gud yumi luk olsem wanem fasin blong Jehova blong givim presen ya i sem mak long ol rod we yumi save folem blong givim wan gudfala presen we yumi tokbaot finis long ol haf bifo.

Samting we yumi wantem. Yumi ol man yumi wantem tumas blong laef olwe. Be yumi no naf blong kasem samting ya we yumi wantem. Ransom nomo i save mekem se yumi laef olwe. Baebol i talem se: “Pei blong sin, hemia ded. Be presen we God i givim tru long Masta blong yumi Kraes Jisas, hemia laef we i no save finis.”—Rom 6:23.

Samting we yumi nidim. Ol man oli no save givim ransom. Baebol i eksplenem se: “Man i no save pem laef blong hem long God blong bambae i stap laef olwe, from we praes blong laef blong man i hae tumas. Olgeta samting we man i save givim, neva bambae i naf long samting ya.” (Ol Sam 49:8) Taswe, yumi rili nidim we God i givhan long yumi blong yumi fri long sin mo ded. Be tru long “ransom we Kraes Jisas i pem,” God bae i givim stret samting we yumi nidim.—Rom 3:23, 24.

Yumi kasem long stret taem. Baebol i talem long yumi se: “Kraes i ded blong sevem yumi taem yumi stap mekem sin yet.” (Rom 5:8) From we God i givim presen ya ransom “taem yumi stap mekem sin yet,” hemia i soem bigfala lav we hem i gat long yumi nating se yumi sinman. Mo presen ya i mekem se yumi save putum tingting blong yumi long plante gudfala samting, nating se yumi stap kasem ol trabol we oli kamaot from sin we i stap long yumi.

Samting we i pusum God blong givim presen. Baebol i tokbaot samting we i pusum God blong givim pikinini blong hem olsem wan ransom. Hem i se: “God i soemaot lav ya long yumi olsem: Hem i sanem stret Pikinini blong hem, wan nomo we hem i gat, i kam long wol, blong yumi save kasem laef from hem. Hem i soemaot lav ya, i no from we yumi lavem hem, be hem nao i lavem yumi.”—1 Jon 4:9, 10.

?Olsem wanem yu save soem se yu glad long presen ya we i gud moa long ol narafala presen? Makem tok blong Jisas we i stap long Jon 3:16, we i se olgeta nomo we “oli bilif long hem” bae oli sef. Folem Baebol, “sipos yu gat bilif, bambae yu no gat tu tingting se samting we yu putum hop blong yu long hem, bambae i kamtru no nogat.” (Hibrus 11:1) Blong gat strong bilif, i impoten blong gat stret save. Hemia nao from wanem mifala i askem yu blong tekem taem blong lanem moa long saed blong man we i givim ‘nambawan presen’ ya, Jehova God. Mo tu blong faenemaot samting we yu mas mekem blong save harem gud long laef we i no save finis, we yu save kasem from ransom sakrefaes blong Jisas.

Yu save lanem ol samting ya taem yu ridim ol save blong Baebol we i stap long websaet ya www.jw.org. Ol Witnes blong Jehova oli glad blong givhan long yu. Mifala i save se taem bae yu lanem ol samting ya mo yu kasem gudfala samting we i kamaot from nambawan presen ya, bae yu save talem tu se: “Mi mi talem tangkiu long God from we bambae hem i yusum Masta blong yumi Jisas Kraes blong sevem mi!”—Rom 7:25.