Yu No Moa Gat Paoa

Adriana blong Brasil, i talem se: “Oltaem mi wari, mi harem nogud, mo mi no gat hop. Taswe mi ting se i moa gud sipos mi endem laef blong mi.”

?OLSEM WANEM? ?Samtaem yu tu yu harem nogud tumas, we yu no moa wantem laef? Sipos yes, ating yu kasem save long tingting blong Adriana. Dokta i talem se hem i gat wan sik we i mekem tingting blong hem i foldaon olgeta.

Tingbaot Kaoru blong Japan, we i stap lukaot long olfala papa mo mama blong hem. Kaoru i talem se: “Long taem ya, mi bisi tumas long wok tu, mo mi gat tumas wari. Mi no moa wantem kakae, mo mi no save slip gud. Mi stat blong tingbaot se i gud mi mi ded nomo, olsem nao, ol problem blong mi bambae oli finis.”

Ojebode blong Naejeria i talem se: “Oltaem mi harem nogud mo mi stap krae. Mi stap tingbaot wan rod blong endem laef blong mi.” Yumi glad tumas se Ojebode, Kaoru, mo Adriana, trifala i no endem laef blong trifala. Be evri yia i gat plante taosen narafala man we oli kilim olgeta bakegen i ded.

?WEPLES YU SAVE KASEM HELP?

Ol man nao oli kilim olgeta i ded, i bitim ol woman. Plante long ol man ya oli sem tumas blong askem help blong narafala. Jisas i talem se man we i sik i nidim dokta. (Luk 5:31) Taswe sipos tingting blong yu i foldaon mo yu ting se i moa gud yu endem laef blong yu, plis, yu no mas sem blong askem help. Plante man we tingting blong olgeta i foldaon, oli kam gud taem oli kasem stret meresin. Ol gudfala dokta oli givhan long Ojebode, Kaoru, mo Adriana, mo naoia trifala i harem gud moa.

Plante taem, dokta i givim meresin long man we tingting blong hem i foldaon, mo tu, oli toktok plante wetem hem. Ol famle mo fren tu oli mas traem kasemsave long hem, halpem hem, mo gat longfala tingting. Besfren we yumi save gat, hemia Jehova. Hem i givim ol nambawan advaes long Tok blong hem, Baebol.

?WETAEM OL SAMTING YA BAMBAE OLI FINIS?

Plante man we tingting blong olgeta i foldaon, oli mas tekem meresin longtaem, mo maet oli mas jenisim fasin blong laef blong olgeta. Sipos yu tu yu kasem sik ya, yu save putum tingting blong yu i stap long wan gudfala fiuja, olsem Ojebode we i talem se: “Mi stap wet long taem ya we tok blong Aesea 33:24 bambae i kamtru, se i no moa gat man i save talem se ‘hem i sik.’” Olsem Ojebode, yu save harem gud long promes blong God, blong wan “niufala wol” we man bambae i no moa “harem nogud long bodi” blong hem. (Revelesen 21:1, 4) Mo tu, bambae i no moa gat man i harem nogud long tingting o filing blong hem. Ol nogud filing blong yu bambae oli lus blong olwe. ‘Bambae yu no moa save tingbaot olgeta, bambae oli lus olgeta.’ —Aesea 65:17.

Advaes Blong Baebol

God i kasem save filing blong yu.

‘!Mi mi Hae God, mi God blong yu! Mi nao mi stap mekem yu yu strong, mo mi stap talem long yu se, “!Yu no fraet! !Mi bambae mi givhan long yu!”’—Aesea 41:13.

I no gat wan man we i kasem save filing blong yu olsem Jehova, mo hem i wantem givhan long yu.

Tingting dip long Tok blong God.

“[Elaeja] i stap tingting se, ‘Sipos mi mi ded nomo, bambae i moa gud.’ Nao hem i prea, i talem se, ‘Hae God . . . plis yu tekemaot laef blong mi.’”—1 King 19:4.

Ojebode i talem se: “Taem mi tingting dip long Tok blong God, mi kasem save se profet Elaeja i gat sem filing olsem mi.”

Lanem sam lesen long ol stori blong Baebol.

“Mi [Jisas] mi prea from yu [Pita] finis, blong bilif blong yu i no foldaon.”—Luk 22:32.

Taem aposol Pita i giaman tri taem se hem i no save Jisas, hem i harem nogud mo i krae we i krae. Kaoru i talem se: “Mi tingting dip long stori blong Pita, nao mi luksave se Jehova mo Jisas i kasem save filing blong Pita. Hemia i leftemap tingting blong mi.”

‘Bambae yu no moa save tingbaot’ ol nogud samting we oli mekem yu yu harem nogud.—Aesea 65:17.