?From Wanem Yumi Mas Wantem Mekem Wan Baebol-Stadi?
1 Wan Kristin i rili harem gud taem Jeova i yusum hem blong halpem wan narafala man blong kam wan disaepol blong Kraes. (Mat. 28:19, 20; 1 Korin 3:6, 9) Maet ol man we yumi givhan long olgeta oli save kasem laef we i no save finis.
2 Plante taem, ol tija mo ol studen oli frengud tugeta from we olgeta oli trastem olgeta. Taem wan studen i gohed gud long saed blong speret, evriwan i harem glad from samting ya. (1 Tes. 2:11, 19, 20) Ol Kristin wanwan oli mas gat plan blong mekem wan Baebol-stadi wetem wan man we i no famle blong hem. Tru tumas, long ol famle ol papa oli gat wok blong lidim Baebol-stadi blong famle. Stadi i mas gohed evri wik mo hem i mas dip. Sipos hasban blong wan sista i no stap long trutok, sista ya bambae i putumap sam gudfala rod blong mekem Baebol-stadi wetem ol pikinini blong hem.
Yumi Prea Blong Kasem Sam Baebol Stadi
3 En blong rabis wol ya i kolosap nomo naoia, taswe taem yumi mekem stadi wetem ol man, yumi mas wok had blong mekem gudfala stadi wetem ol. Taem yumi prea oltaem long Jeova blong hem i givim wan Baebol-stadi long yumi, yumi soemaot we yumi wantem mekem wan Baebol-stadi. Samting ya i soemaot tu we yumi luksave se laef mo ded tufala i stanap long bisnes ya. (Esik. 33:7-9, 14-16) Jeova bambae i blesem ol hadwok we yumi mekem blong faenem olgeta we oli wantem stadi long Baebol.—1 Jon 5:14, 15.
4 Sipos yumi wantem kasem frut long wok blong mekem disaepol, yumi mas reregud fastaem. Yumi mas lukluk gud olsem wanem ol pablisa we oli gat gudhan oli stap mekem ol Baebol-stadi blong ol. Long ol manis we oli stap kam, seket elda wetem ol pablisa we oli kasem gud mak long wok blong mekem disaepol, olgeta ya bambae oli save givim sam gudfala advaes long yumi. Sam haf blong Kingdom Wok we bambae oli kamaot oli save givhan long yumi blong statem mo mekem ol Baebol-stadi we oli karem gud frut.
Ol Haf We Bambae Yumi Kasem i No Longtaem
5 ?Wanem ol poen we bambae i no longtaem yumi save faenem long Kingdom Wok Blong Yumi? Bambae yumi luk olsem wanem plante pablisa mo paenia oli statem ol Baebol-stadi mo bambae yumi tokbaot ol defren fasin we oli yusum blong tajem hat blong ol stadi blong ol. Bambae yumi kasem ol advaes we oli stret blong pulum ol stadi blong yumi blong oli soemaot tangkyu long ogenaesesen blong Jeova mo bambae yumi luk wanem samting yumi mas mekem blong olgeta tu oli wantem joen long wok blong prij. Bambae yumi kasem sam advaes blong mekem we Baebol-stadi blong yumi long famle i dip moa. Rod ya bambae i pulum ol pikinini blong yumi blong mekem fren moa wetem Jeova.
6 Long ol 4 sevis yia we i pas, 959,834 man oli tekem baptaes raonabaot long wol, 38 long Vanuatu. Bighaf blong ol man ya oli gohed go kasem baptaes from we wan Wetnes i stadi Baebol wetem ol. Namba blong ol man we oli stap long Memorial mo long ol distrik asembli blong yumi i soemaot klia we yumi save givhan long plante man yet blong oli gohed gud go kasem baptaes. Sipos yumi trahead oltaem blong statem mo mekem Baebol-stadi wetem ol man ya, bambae yumi halpem plante long olgeta blong oli kam disaepol, ale olgeta tu oli save kasem laef we i no save finis.—1 Tim. 6:12, 19.