Yumi Gotru Long Ol Nyufala Buk We Yumi Kasem Long Asembli
1 Long asembli “Wan Klin Lanwis,” yumi kasem 2 gudfala tul bakegen long Engglis mo Franis: Wan buk mo wan buklet. Ol nyufala tul ya oli mekem se yumi gat plante moa kakae long saed blong speret i stap. I klia nomo se ol buk ya bambae oli givhan gud long yumi long minista wok mo bambae oli halpem yumi blong yumi toktok gud long klin lanwis.—Sef. 3:9.
2 Yumi glad tumas taem yumi harem se yumi gat 3 nyufala buk long Bislama. Long wik ya nomo, long ol Buk Stadi, yumi stat blong mekem stadi long buk ?Olsem Wanem Blong Mekem Famle Blong Yu i Hapi?
3 Taem we nyufala buklet i kamaot long asembli, brata we i givim tok i bin talem se: “Taem we yumi joen long wok blong prij, maet yumi stap prij long ol haos wanwan, yumi mekem ol visit no ol Baebol-stadi, plante taem ol man oli askem long yumi from wanem yumi no tekem blad. Mifala i glad tumas blong talem long yufala se Sosaete i mekem wan nyufala buklet we i ansa gud long kwestin ya. Nyufala buklet ya i bigwan olsem wan magasin mo nem blong hem i How can blood save your life?” ?Yu yu ridim buklet ya finis blong faenemaot ol stampa poen we i stap long hem? I impoten we yumi mekem olsem sipos yumi wantem we bilif blong yumi i stap strong oltaem mo blong yumi save talemaot long ol man ol tok blong Baebol long saed blong blad.—Wok 15:28, 29.
4 Buklet ya i gat plante gudfala poen i stap long hem, taswe samting ya i mekem se i isi moa long yumi blong talemaot tingting blong yumi long saed blong blad mo ol samting we yumi wantem se ol dokta oli mekem long bodi blong yumi. Be Sosaete i no mekem buklet ya fastaem blong ol dokta we oli wok long haospetal mo ol jaj blong kot. Sosaete i mekem buklet ya blong olgeta man. From samting ya, yumi save glad from we rili yumi gat wan gudfala tul long han blong yumi. Mifala i pulum yufala blong tekem wan no tu buklet ya long wok blong prij. Ridimgud ol gudfala poen we i stap long buklet ya mo givhan long ol narafala blong olgeta tu oli gat respek long blad.
WAN NYUFALA BUK
5 Traem tingbaot ol gudfala poen we i stap long buk Mankind’s search for God. Yumi gat jans blong yusum ol poen ya long wok blong prij. Sipos yumi stadi long hem, bambae yumi save gud long ol narafala skul mo olgeta samting we oli bin mekem long taem we i pas finis. Long fasin olsem, bambae yumi rere gud blong go talemaot gud nyus long ol memba blong ol jyos blong Krisendom mo yumi save go luk ol man blong ol narafala jyos bakegen. Long taem blong yumi, plante moa man oli muv long wan ples i go long naraples, taswe maet yumi mitim sam man we oli toktok wan narafala lanwis, mo oli joen long ol narafala skul. Sipos yumi no save long ol bilif mo ol kastom blong olgeta, bambae i hadwok long yumi blong givhan long olgeta. Wetem help blong nyufala buk ya, bambae yumi no moa kam slak taem yumi mitim ol man blong narafala skul.
6 Olgeta we oli raetem mo oli jekem ol haf blong nyufala buk ya oli save gud long ol bisnes we oli tokbaot. Taswe, yumi no mas fraet taem yumi ridim bakegen long ol man ol poen we yumi makem long buk ya. Ol gudfala poen ya we yumi save talemaot long ol man tede oli soemaot gud se Jeova i laekem tumas ol man blong olgeta nesen. Bambae yumi traehad oltaem blong save gud long ol samting we i stap long nyufala buk ya, mo bambae yumi yusum ol poen ya blong givhan long olgeta we oli lesin long yumi, nomata wanem ples oli kam long hem no wanem lanwis oli toktok long hem. Yes, sipos yumi yusum gud nyufala buk ya long ples blong prij blong yumi, bambae yumi glad tumas blong halpem olkaen man blong oli save gud nyus.—Mat. 28:19, 20; Taet. 2:11.