Ol Buk Stadi
Haf 1: Wok Blong Ol Brata We Oli Lukaot Long Ol Grup
1 Ol Buk Stadi oli givhan bigwan long ol man blong Jeova, long saed blong speret. Long sam manis we oli kam, bambae yumi storeyan long sam poen long saed blong Buk Stadi, mo yumi tingbaot olsem wanem oli save givhan long yumi. Long haf ya, bambae yumi tokbaot olsem wanem brata we i lukaot long Buk Stadi i save mekem se stadi ya i leftemap tingting blong ol brata mo mekem bilif blong olgeta i kam strong moa.
2 Blong tijimgud ol man, brata we i lukaot long Buk Stadi i mas rere gud. Hem i mas tinghevi long ol samting we hem i stadi long Tok blong God. Taswe hem i mas save stret ansa long ol kwestin, mo hem i mas save from wanem ol ansa ya oli stret. Hem i mas traehad blong givhan long olgeta we oli kam long stadi blong kasem save from wanem oli ansa olsem. (1 Pita 3:15) Samting ya bambae i mekem olgeta oli tinghae long ol save we oli stap stadi long hem.
?WANEM OL MAK WE HEM I MAS KASEM LONG STADI?
3 Wan mak we brata ya i mas kasem i blong yusum ol save long stadi blong mekem bilif blong olgeta long miting i strong moa, nao oli wantem mekem wok blong God moa. (Sam 110:3; 2 Tes. 1:3-5) Blong mekem olsem, taem we hem i ting se i stret, hem i mas stop smol blong ‘makemgud’ ol poen we oli save givhan long ol brata blong trastem moa Jeova, ogenaesesen blong hem mo Baebol long hat blong ol. (Gal. 6:6, Ref. Bi. ftn.) Hem i mas gat gudhan blong askem ol kwestin we oli pulum ol brata blong talemaot ol poen we oli save mekem bilif blong ol i strong moa.
4 Wan narafala mak we hem i mas kasem, hem i mas givhan long ol brata blong luksave olsem wanem blong mekem ol save ya i wok long laef blong ol. ?Olsem wanem oli save yusum long wok blong prij? ?Blong enkarajem ol brata mo ol nyuwan long kongregesen? ?Blong mekem olgeta mo famle blong ol i kam strong moa? Taem ol brata we oli lukaot long ol grup oli rerem stadi blong olgeta, oli mas traehad blong luksave olsem wanem ol brata long grup oli save yusum sam poen insaed long stadi, mo mekem i wok.
5 Maet oli yusum sam poen blong givhan long famle blong olgeta we oli no gat bilif, no long ol fren long skul no long wok. Maet sam narafala poen oli givhan long sam famle we samfala nomo oli stap long trutok, mo sam famle we papa nomo i stap wetem olgeta, no mama nomo i stap wetem olgeta. Brata we i mekem Buk Stadi i save givhan long olgeta blong tingbaot olsem wanem oli save mekem ol poen ya oli wok long laef blong ol. Hem i save pulum olgeta blong ansa long saed ya. Brata ya i no mas mekem stadi i olsem ol kwestin mo ansa nomo. Hem i mas traehad blong mekem we ol brata oli intres long stadi ya.—Skelem wetem 1 Korin 14:9, 19.
INTRES LONG OLGETA WANWAN
6 Sipos brata we i lukaot long grup i intres long ol brata wanwan, hem i save pulum olgeta blong joen fulwan long stadi. Samfala we oli sem blong ansa, hem i save talem sam vas long olgeta bifo long stadi, nao oli save ridim ol vas ya long stadi. No hem i save talem wan kwestin long olgeta, nao oli save mekemrere ansa blong hem fastaem. I moa gud we oli traehad blong ansa long prapa toktok blong olgeta. Sipos brata we i lukaot long grup i lesingud long ol ansa, hem i save luksave sipos samfala oli nidim help. Hem i save askem sam we oli gat ekspiryens blong givhan long olgeta we oli nidim help.
7 Ol Buk Stadi long kongregesen oli bigfala blesing long yumi. Yumi gat jans blong joen long ol smol grup nomo, nao yumi wanwan i save kasem help. Yumi neva mas ting se stadi ya i no impoten olsem ol narafala miting. Brata we i stap lukaot long Buk Stadi blong yufala hem i tinghevi long wok blong hem. Hem i traehad blong yusum stadi ya blong bildimap bilif long Jeova long yufala, mo fasin tangkyu from ol samting we God i givim long yufala long saed blong speret.