Buk Stadi Blong Kongregesen i Givim Save Long Saed Blong Wok
1 Buk stadi blong kongregesen i wan impoten haf long program blong ogenaesesen blong Jeova blong tijim ol man. Buk stadi i stap long plante defren ples long teritori, blong mekem i moa isi blong evriwan blong kam long hem. From we i gat stadi kolosap long ples blong olgeta, maet ol man we oli intres oli save glad moa blong akseptem, taem yumi askem olgeta blong kam.
2 Oli traehad blong mekem ol grup oli stap smol. Hemia blong givim jans long brata we i lukaot long buk stadi blong save givhan long olgeta wanwan. Evriwan oli no kasem save kwik. Sipos wan i faenem i had blong kasem save long wan poen nating se hem i mekemrere stadi finis, brata we i lukaot long buk stadi i save tokbaot moa wetem hem afta long stadi. Antap moa, wetem wan smol grup, i gat moa jans blong givim ansa mo joen blong ridim sam vas blong Baebol. ?Yu yu traem ansa oltaem blong joen long stadi? ?Yu yu stap traehad blong ansa wetem prapa tok blong yu? Fasin blong yu blong rere blong joen i save givhan long yu mo long ol narafala. Taem yu rere, yusum tingting blong yu blong luksave olsem wanem yu save mekem sam poen long stadi ya oli wok long laef blong yu.—Hib. 5:14.
3 Sipos yu luklukgud fasin we brata we i lukaot long buk stadi i stap yusum blong tij, yu save lanem olsem wanem blong mekem ol gudfala Baebol stadi long wan fasin we i pulum intres blong man mo i save tijimgud olgeta. Afta we wan brata we i gat gudfala fasin i ridim ol paragraf, olgeta i save storeyan long ol kwestin. Brata we i lukaot long buk stadi i leftemap tingting blong evriwan blong yusum paoa blong voes blong olgeta taem oli toktok. Sipos i gat i naf taem, hem i traem blong askem sam kwestin long ol vas blong Baebol we oli no raetem olgeta tok blong hem long paragraf, blong givhan long yumi olsem wanem blong mekem i wok. (Skelem wetem Nehemaea 8:8.) Samtaem hem i save ademap sam smol tok blong hem wan blong mekem i klia, no yusum sam narafala kwestin blong makem wan bigfala poen. Wan eksampel no wan pijatok i save givhan long yumi blong luksave olsem wanem save ya i stret long laef blong yumi.
4 Long sam Buk Stadi blong kongregesen i no gat plante man we oli stap kam. ?Yu yu stap go oltaem? Sipos no, yu bin mestem wan impoten samting we i save givhan long yu. Plan blong buk stadi i wan long ol rod we Jeova i yusum blong soemaot se hem i kea long yumi. (1 Pita 5:7) Hem i wantem we yumi gru long saed blong save mo waes blong bambae yumi strong long saed blong speret. Long defren fasin, Setan i wantem blong mekem yumi no moa gru long saed blong speret mo mekem yumi kam slak blong bambae yumi no wok tumas blong Jeova mo ogenaesesen blong hem. !No letem samting ya i kamaot! Letem kaen fasin, lav we i stap long grup ya we ol man blong hem oli joengud, i kasem hat blong yu mo pusum yu blong gohed blong presem Jeova.—Skelem wetem Ol Sam 111:1.
5 Ol miting blong prij oli stap long ol ples we buk stadi i stap long hem, blong i isi blong ol pablisa blong kam long hem. Ol miting ya oli blong medel wik, wiken, no wok blong prij long sapa. Brata we i lukaot long buk stadi i mas mekem sua se i gat i naf teritori mo bambae i gat wan i stap blong i lidim wok blong prij. Ol miting blong prij oli no mas bitim 10-15 menet. Brata we i lukaot long miting ya bambae i tokbaot kwiktaem nomo vas blong dei sipos i laenap long wok blong prij, mo talem wan no tu stret poen blong yusum long wok blong prij, no mekem wan smol pleplei long buk we bambae oli seremaot.
6 Brata we i lukaot long buk stadi i mas traehad blong wok wetem ol wanwan memba blong grup blong hem, blong leftemap tingting mo trenem olgeta.—Skelem wetem Mak 3:14; Luk 8:1.