?Yu Yu Save Mekem Haftaem Paenia?
1 Jisas i leftemap tingting blong ol man blong hem blong oli givim taem blong olgeta long minista wok, mo i talem long olgeta se rod ya i save mekem se oli glad mo oli save kasem plante blesing long saed blong speret. (Mat. 10:8b; Wok 20:35) Long las Epril bitim 13 man oli glad from we oli mekem moa wok olsem haftaem paenia. ?Yu yu save givim nem blong yu blong mekem wok olsem haftaem paenia long manis Maj no Epril no tufala wantaem, mo kasem ol blesing olsem long yia ya?—Sam 34:8.
2 Skelem Sipos Yu Gat Jans Blong Mekem: Taem yu kam long ekspiryens we i stap daon, askem long yu wan se: ‘?Wan long ol eksampel ya i stret long mi? ?Olsem wanem mi save jenisim sam samting long laef blong mi blong mi save mekem haftaem paenia?’
3 Wan sista i save mekem haftaem paenia nating se hem i gat faef pikinini mo hem i wok fultaem. ?Wanem pei hem i kasem from? Hasban mo ol pikinini blong hem oli givhan gud long hem, mo from gudfala eksampel blong sista ya, nekis manis biaen hasban blong hem we i no baptaes yet, i kam wan pablisa.
4 Long wan kongregesen olgeta elda mo ol man blong givhan oli mekem haftaem paenia long wan manis. Plante long olgeta oli wok fultaem, be long wiken oli bisi tumas blong mekem wok long saed blong speret. Gudfala eksampel ya long wok blong prij mo mekem miting blong prij i givhan long evriwan long kongregesen. Long olgeta 77 pablisa long kongregesen ya i gat 73 we oli mekem sam kaen wok olsem paenia long sem manis ya.
5 Wan gel we i gat 15 yia mo i stap skul yet i yusum tu wik we hem i spel blong mekem haftaem paenia. Hem i talem se: “Mi mi luksave wan samting we i kamaot from wok ya, fasin blong toktok blong mi i kam gud moa. Mi mi save toktok moa wetem ol man long doa blong olgeta.”
6 Olgeta we oli finis long wok from we oli olfala tumas, samtaem oli gat gudfala jans blong oli tingbaot ol samting long saed blong Kingdom. Afta hasban blong hem i ded, wan sista we i gat 84 yia, i raetem se: “Olgeta pikinini blong mi oli mared finis mo oli gat prapa famle blong olgeta. Nating se oli stap kam luk mi, be samting ya i no winim filing we mi gat from we mi lusum man blong mi mo mi stap mi wan. Nao wan long ol elda long kongregesen blong mifala i askem mi blong traem mekem haftaem paenia. Mi no sua gud fastaem, be biaen mi tingting blong traem. !Mi harem gud! Mi harem olsem we Jeova i letem mi blong laef kasem yia ya, blong mi save mekem haftaem paenia. Stat long taem ya, mi gohed blong paenia evri manis.”
7 Wan brata we hem i stap salem ol haos i jenisim program blong wok blong hem blong salem ol haos, mekem se hem i save gat taem blong paenia. I gat sam narafala man we oli mekem sem mak, oli jenisim wok blong olgeta blong oli save gat taem blong mekem moa long wok blong prij.
8 Mekem Ol Plan Blong Yu Naoia: Ating i gud yu save mekem ol plan blong yu naoia blong mekem haftaem paenia long Maj mo Epril. Blong kasem mak ya yu mas gat plan. Samting ya i tru from ol ekspiryens blong olgeta we oli save mekem haftaem paenia nating se oli gat plante responsabiliti long famle, oli wok fultaem, mo oli gat ol narafala responsabiliti we oli mas mekem. Toktok wetem ol narafala paenia we oli gat gudhan, blong yu lanem ol gudfala samting from ekspiryens blong olgeta. Mo tu kam kolosap long Jeova long prea, askem hem blong i givhan long yu.—Aes. 40: 29-31; Jem. 1:5.
9 I tru tumas, olgeta we oli jenisim ol samting long laef blong olgeta blong mekem haftaem paenia, oli harem gud tumas. Sipos yu no mekem fultaem paenia yet, ?yu save mekem haftaem paenia blong yu save harem gud from? Sipos yu traehad blong wok moa blong talemaot gud nyus long ol narafala man, Jeova bambae hem i givim ol bigfala blesing long yu.—Mal. 3:10.