“Tijim . . . Tok Ya We Mi Mi Givim Finis Long Yufala”
1 Mekem disaepol i joen long fasin blong tijim tu. Bifo wan man i kam wan disaepol blong Kraes, oli mas tijim hem ‘blong hem i folem olgeta tok’ we Jisas i givim finis. (Mat. 28:19, 20) Wan nambawan rod blong mekem samting ya, hem i tru long wan Baebol stadi long haos.
2 I no isi oltaem blong statem ol Baebol stadi. Sipos yu faenem i had blong kasem wan Baebol stadi, tingting blong yu i no mas foldaon from. Blong kasem mak ya blong statem wan Baebol stadi, i nidim strong tingting mo fasin blong wantem tumas blong talemaot trutok long ol narafala.—Gal. 6:9.
3 Wok Long Intres: Ating fas storeyan blong yu i mekem man i intres be smol nomo. Maet yu bin livim wan traket, wan buklet, no wan magasin wetem man blong haos. Ating yu save yusum wan long ol samting ya blong statem Baebol stadi. Sipos man blong haos i soem sam moa intres long mesej ya, yu save lidim hem i go long wan narafala buk we i stret, long nekis visit.
4 Fasin blong reregud fastaem i rod blong karem frut from. ?Maet i gud blong jusum wan vas blong Baebol we i stap finis long traket, buklet, no magasin we yu tingting blong yusum long visit blong yu, no? Long fasin ya bambae yu save joenem sam tok blong buk wetem storeyan blong yu. Maet yu save ridim wan no tu haf we i stap long buk.
5 Yu save talem olsem ya se:
◼ “Mifala i stap tokbaot sam save long ol man long saed long sam profet tok we oli stap kamtru naoia.” Ridim Matyu 24:3, mo joenem wetem tok long pej 19 kasem 22 long buk ya “?God i Rili Kea?” Yu save yusum sem fasin olsem taem yu soemaot traket ya ?Wol Ya Bambae i Lus No i Stap?
6 Yumi mas wokgud long intres kwiktaem. Traehad blong gobak long bifo wan wik i pas blong mekem se laswan storeyan i stapgud long tingting blong man blong haos yet. Evritaem we yu go, lukluk sam haf blong buk we yu bin livim wetem man. Afta, long wan stret taem, yu save soem Laef Foreva buk, mo folem sem rod.
7 Tede i gat fulap wok yet blong mekem long bigfala wok ya blong karem kakae long garen we Jisas i bin talem. (Mat. 9:37, 38) Taem yu gohed blong tijim ol man we hat blong olgeta i stret, yumi gat tok ya blong Jisas we i save mekem yumi strong se hem i ‘stap wetem yumi oltaem, gogo wol ya i finis.’