Halpem Ol Man We Oli Soem Intres
1 Bilif mo lav blong yumi long ol narafala man bambae i mas pusum yumi long Maj blong askem ol man we oli intres long mesej blong Kingdom blong oli kam long Memoriol. Ol man olsem oli nidim blong lidim olgeta i kam long ol samting we Jeova i mekem rere finis blong sevem man we ol stanap long ransom sakrifaes blong Kraes.—Heb. 9:28.
2 Wan gudfala tingting blong mekem lis blong ol man we yu wantem askem olgeta long Memoriol. Yu save raetemdaon nem blong olgeta we oli kam long miting samtaem mo tu olgeta we oli jes stadi no sam we oli soem intres. Yu no fogetem ol hasban mo waef we oli no bilif mo ol narafala memba blong famle. Afta we yu raetem lis blong ol nem finis, yu mas traehad blong visitim ol man ya wanwan. Maet yu save askem ol elda blong givhan blong mekem sam long ol visit ya.
3 ?Bambae yu save talem wanem long visit ya?
Afta we yu talem halo, yu save talem wan samting olsem ya:
◼ “Long samtaem i pas yu bin soem se yu intres long ol samting long speret, mo mi ting se bambae yu glad sipos mi askem yu blong kam long wan taem. [Givim pepa blong invaetem man long Memoriol long man blong haos.] Memoriol blong ded blong Kraes i wan lafet ya nomo we masta Jisas Kraes i givim oda long ol man blong hem blong oli tingbaot. Yumi stap wet blong luk bakegen long wanem Kraes mekem tru long ded blong hem, mo olsem wanem yumi save kasem itenel laef from. Long las yia, bitim 11 milian man oli bin stap long spesel miting ya. Bambae mi glad sipos yu kam wetem mi long yia ya.” Yu mas sua blong raetem daon taem mo ples we Kongregesen blong yu bambae i mekem Memoriol long hem. Mo tu, sipos i nidim givhan long hem long saed blong transpot.
4 Yumi mas mekem welkam long ol nyuwan we oli kam long Memoriol. Halpem olgeta blong frengud wetem ol lokol pablisa mo mekem olgeta i mitim wan man we i intres long trutok we i stap laef kolosap long ples blong olgeta. Bambae samting ya i leftemap tingting blong olgeta blong save se i gat sam man raonabaot long olgeta, we oli intres long trutok. Askem olgeta blong sidaon wetem famle blong yu long taem blong Memoriol, sipos yu save mekem olsem.
5 I tru, blong kam long Memoriol nomo i no save mekem olgeta oli kasem sef. Be, plante long olgeta we yu askem, maet i save kam faswan step blong soem bilif long blad blong Jisas we i ron. Long rod, taem yufala i stap gobak long haos afta long miting, askem man ya sipos hem i save kam long Pablik tok mo Wajtaoa stadi long sande. Yu mas kaen mo frengud wetem hem. Mekem hem i save se yu rere blong halpem hem long olgeta rod we yu save mekem. Sipos hem i stat blong joen wetem yumi kwik taem nomo, bambae hem i gru kwik long speret. Hem i wan bigfala glad blong yumi blong laef tru long “bigfala trabol” wetem plante narafala man we yumi halpem olgeta!—Rev. 7:9, 14.