Lidim Wan Baebol Stadi
1 ?Olsem wanem blong lidim wan Baebol stadi? ?Wanem sam stampa eksampel we yumi gat? ?Olsem wanem blong tokbaot ol vas we oli stap long ol haf blong stadi ya? ?Hu bambae i ridim ol paragraf? Mo tu, wetem olgeta samting we yumi mekem finis blong lidim wan Baebol stadi, ?i nidim wanem moa blong halpem studen ya blong hem wan i save mekem trutok i wok long laef blong hem? ?Wanem sam trap we yumi no mas foldaon long olgeta?
2 Olsem Wanem Blong Lidim Wan Baebol Stadi: Yumi save talem se fasin blong mekem wan Baebol stadi i sem mak long Wajtaoa stadi. Fastaem, oli mas ridim paragraf ya we bambae yumi tokbaot. Nao wan we i stap lidim stadi ya i mas askem kwestin we oli raetem finis we i stret long paragraf ya mo letem studen ya blong givim ansa. Sipos studen ya i tekem taem blong ansa, man we i stap lidim stadi ya, hem i mas rere blong askem kwestin we i lidim studen ya blong tingting long wanem we i stap long paragraf ya mo kasem stret mining blong hem.
3 Tingbaot olsem wanem ol vas oli laenap wetem ol poen we i stap long paragraf. Soem long studen olsem wanem blong luksave ol vas we oli raetem i stap long paragraf, mo tokbaot gud wetem hem olsem wanem oli joen wetem ol save long paragraf. Sipos oli putum sam vas be oli no raetem i stap long paragraf, hem i gud blong jekemap wetem Baebol, sipos oli no longfala tumas. Nao letem studen i ridim olgeta mo tokbaot olsem wanem oli sapotem no kliarem wanem we i stap long paragraf.
4 Halpem Studen Blong Mekem Trutok i Kam Haf Long Laef Blong Hem: Leftemap tingting blong studen ya blong reregud blong stadi. Makemgud long tingting blong hem se i impoten we hem i rid plante blong mekem se hem i gohed blong lanem plante samting. Studen we i rid plante long ol samting we i stap lanem mo tingting dip long hem, hem i save kamgud moa. Samfala taem oli lidim wan stadi, oli letem studen i ridim olgeta paragraf long taem blong Baebol stadi ya. Sam narafala oli jenis wetem studen blong ridim ol paragraf. Yumi mas yusum fasin luksave, tingbaot we studen ya i mas gohed long saed blong speret.
5 Fasin blong tokbaot olgeta poen nomo long stadi i save givim save long studen ya, ?be hem i bilif wanem hem i stap lanem? Sipos hem wan i mas mekem trutok i wok long laef blong hem, hem i mas luksave olsem wanem samting we hem i stap lanem i save gat paoa long hem wan. ?Hem i tingting olsem wanem long ol samting we hem i stap lanem? ?Olsem wanem hem i save yusum ol samting we hem i stap lanem? Yusum sam kwestin blong kasem hat blong studen ya.
6 Lukaot Long Trap: I gat sam trap we yu mas lukaot long hem, taem yu stap lidim wan Baebol stadi. Taem wan poen i kamaot we i no joen wetem samting we yumi stap tokbaot long stadi ya, hem i gud blong tokbaot olgeta long en blong stadi no long wan narafala taem. Mo tu, hem i impoten blong mekem studen i ansa wetem prapa toktok blong hem, bitim we i ridim long buk. Samting ya i save halpem yu we yu stap mekem stadi blong luksave sipos studen ya i kasem save long wanem we hem i stap lanem.
7 ?From wanem yu no putum wan mak blong yu blong mekem wan Baebol stadi? I no wan hadwok sipos yu dipen long Jeova mo folem sem fasin blong mekem Wajtaoa stadi. Wan gudfala rod blong tijim trutok long ol narafala mo mekem disaepol i blong mekem Baebol stadi. Taem yu mekem samting ya, yu tu yu save kasem glad from yu joen fulwan blong mekem tok blong Jisas long Matyu 28:19, 20 i kamtru.