Reregud Blong Tijim Ol Man
1. ?From wanem yumi mas traehad oltaem blong halpem man we yumi stadi Baebol wetem, blong i gat tangkiu from ol trutok we hem i lanem?
1 Taem yumi mekem Baebol stadi long wan man, yumi mas reregud fastaem sipos yumi wantem pulum hem blong mekem wok blong Jeova. Ol traehad blong yumi bambae oli karem frut sipos yumi halpem man ya blong gat tangkiu from ol trutok blong Baebol we hem i lanem. Samting ya nao bambae i pulum hem blong wantem mekem wok blong Jeova. (Dut 6:5; Prov. 4:23; 1 Kor. 9:26) ?Olsem wanem yumi save halpem hem blong gat tangkiu?
2. ?Olsem wanem prea i save givhan long yumi blong reregud from stadi blong yumi?
2 Prea Bifo We Yumi Rerem Stadi: Jeova nao i mekem sid blong trutok i gru long hat blong studen, taswe bifo we yumi rerem stadi, i stret we yumi prea long saed blong studen ya mo ol nid blong hem. (1 Kor. 3:6; Jem. 1:5) Prea i save givhan long yumi tu blong tingbaot ol rod blong halpem studen moa, blong i “savegud” samting we Jeova i wantem mo i fulumap hat blong hem wetem ol save ya.—Kol. 1:9, 10.
3. ?Olsem wanem yumi save tingbaot studen blong yumi taem yumi rerem stadi?
3 Tingbaot Studen: Jisas i save se wan gudfala tija i tingbaot studen blong hem oltaem. I gat tu defren man we tufala i askem long Jisas se: “?Bambae mi mas mekem olsem wanem blong kasem laef ya we i no save finis?” Jisas i no givim semfala ansa long tufala man ya. (Luk 10:25-28; 18:18-20) Taem yumi rerem stadi, yumi mas tingbaot ol nid blong studen. ?Wanem ol vas long stadi we bambae yumi ridim wetem hem? ?Bambae yumi stadi long hamas paragraf? ?Wanem save long stadi ya we maet studen i faenem i had blong kasem save long hem mo bilif long hem? I gud tu blong traem tingbaot sam kwestin we maet studen i askem, olsemia, bambae yumi rere moa blong givim gudfala ansa long hem.
4. ?Olsem wanem blong reregud from stadi blong yumi?
4 Tingtingbak: Nomata hamas taem yumi stadi long wan save bifo finis, be hemia faswan taem we bambae yumi stadi long save ya wetem studen blong yumi. Blong mekem trutok i kasem hat blong hem, yumi mas reregud long evri stadi. Hemia i min se yumi mas mekem samting we yumi talem long studen blong yumi blong mekem. Yumi mas tingtingbak long ol save mo ol vas long stadi, traem joenem i go long laef blong studen, mo maet yumi putum laen aninit long ol bigfala poen tu.—Rom 2:21, 22.
5. ?Olsem wanem yumi save folem fasin blong Jeova?
5 Jeova i intres bigwan long ol studen mo olsem wanem oli stap gohed. (2 Pita 3:9) Sipos yumi tektaem blong reregud from ol Baebol stadi wanwan, yumi soemaot lav mo intres long ol studen, olsem Jeova.