Halpem Ol Baebol Studen Blong Rere Long Stadi Blong Olgeta
1 Ol Baebol studen we oli rere long stadi blong olgeta evri wik oli soem trufala intres long stadi mo oltaem oli gru kwik moa long saed blong speret bitim olgeta we oli no stap rere long stadi blong olgeta. Samtaem wan studen i no rere from hem i no save olsem wanem blong mekem. Maet i nidim blong soem long hem olsem wanem blong mekem rere stadi. ?Olsem wanem blong mekem samting ya?
2 Fastaem we yu statem stadi, tekem smol taem blong mekem sua se studen i kasem save se fasin blong mekem rere i olsem stadi wanwan. Nating se plante oli save rid, be oli no tijim olgeta olsem wanem blong stadi. Ol pej 33-43 long Theocratic Ministry School Guidebook i givim plante gud tingting we yu save yusum blong givhan long studen taem i nidim.
3 Soem Long Studen Se i Impoten Blong Stadi: Maet yu save soem long studen prapa buk blong yu we yu bin makem ol stampa wod mo ful toktok. Letem hem i luksave olsem wanem fasin blong lukluk kwiktaem long ol mak ya i save mekem hem i tingbaot ol poen we hem i save talem long prapa tok blong hem. Long rod ya bambae hem i no ridim wan bigfala haf long buk blong hem taem hem i ansa long ol kwestin. Wan gud trening olsem bambae i halpem hem biaen blong givim ol ansa we i gat mining long ol miting blong kongregesen. Ol ansa blong hem bambae oli soem fasin tangkyu blong hem long ol save we hem i stap kasem mo soemaot dip save blong hem.
4 Tijim Hem Blong Yusum Baebol: Studen i mas lanem olsem wanem blong faenem ol vas long Baebol we oli stap long buk blong stadi. Taem hem i save olsem wanem blong mekemgud, bambae hem i luksave moa se hem i wan trufala Baebol studen. Fastaem maet i nidim blong hem i yusum lis blong nem blong ol buk blong Baebol we i stap long fored blong Baebol, be i gud blong leftemap tingting blong studen blong savegud ol 66 buk blong Baebol mo olsem wanem oli folfolem olgeta long oda. Taem hem i lukaotem mo ridim wan vas, halpem hem blong faenemaot haf blong vas ya we i sapotem poen we i stap long paragraf we yufala i stap stadi long hem, mo no letem tingting blong hem i go long haf blong vas ya we i no laenap stret long stadi we yufala i stap mekem naoia.
5 Taem studen i stap gohed, leftemap tingting blong hem blong ridim Baebol long stat kasem en. Soemaotgud long hem se ful Baebol i kamaot from tabu speret blong God mo we ol tru Kristin oli mas kasem kakae blong speret we i stap long hem.—Mat. 4:4; 2 Tim. 3:16, 17.
6 Soem Ol Narafala Tiokratik Buk Long Hem: Taem studen i gohed kasem wan mak we yu ting se i naf, hem i save stat blong yusum sam narafala tiokratik buk. Wetem fasin luksave, leftemap tingting blong hem blong faenem sam moa save we oli stap long ol buk blong Sosaeti we bambae hem i savegud long olgeta taem hem i stap go long ol miting blong kongregesen. Tijim hem olsem wanem blong yusum ol nara haf blong New World Translation, olsem “Bible Words Indexed.” Taem hem i stat blong wokem wan tiokratik laebri blong hem wan, soem long hem olsem wanem blong yusum buk Reasoning From the Scriptures, Index, mo Aid to Bible Understanding.
7 Sipos yumi tijim ol Baebol studen olsem wanem blong rere long Baebol stadi blong olgeta, bambae yumi mekem olgeta i naf blong stap gohed long trutok olsem ol Baebol studen we oli nafgud, nating se Baebol stadi blong olgeta wanwan we oli stap gat long haos i kasem en blong hem.