Ol Rod Blong Mekem Wok Blong Yumi Blong Talemaot Kingdom i Kamgud Moa
1 Wok blong prij blong yumi i impoten moa naoia bitim bifo. samting we ol man oli mekem afta we oli harem gud nyus bambae i givim laef no ded long olgeta. (1 Pita 4:5, 6, 17; Rev. 14:6, 7) From risen ya oltaem yumi mas lukaotem ol nyufala rod blong mekem wok blong yumi blong talemaot Kingdom i kamgud moa. ?Wanem sam long ol rod ya blong kamgud moa?
2 Reregud: Yusum nyufala Kingdom Wok Blong Yumi, jusum wan fasin blong storeyan we yu ting se bambae ol man long teritori oli intres long hem. I impoten blong mekem ol tok blong yu oli laenap long ol samting we oli hapen long ples blong yufala. Maet yu laekem moa blong rere long wan fasin blong storeyan blong yu wan, taem yu yu yusum ol tingting mo sam vas blong Baebol we yu wan yu faenem se oli wok. Bambae yu nidim wan fastok we i wekemap intres blong man. (Lukluk Reasoning buk, pej 9-15.) Maet yu mekem plan blong askem wan kwestin we i pulum tingting blong man no blong askem man blong haos blong talem tingting blong hem long sam nyufala samting we oli hapenlong ples blong yufala. Taem yu gat fasin blong storeyan blong yu long tingting blong yu, mekem i rere wetem wan memba blong famle no wetem wan narafala pablisa we i save givim sam tingting blong yu kamgud moa.
3 Storeyan Wetem Ol Man: Plan blong yumi i blong talemaot wan impoten mesej. Yumi save mekem samting ya taem yumi pulum man we i lesin long yumi blong joen long wan storeyan we i gat mining. Sipos man blong haos i talem wan se hem i no agri long wan poen no i talem wan tingting, lesingud long wanem hem i talem. Tok blong hem bambae i givhan long yu blong givim wan ansa long Baebol blong soem hop we yu gat. (1 Pita 3:15) Sipos tingting blong hem i no agri wetem Baebol, maet yu save talem long kaen fasin se: “Plante man oli tingting olsem yu. Be, hemia wan narafala rod blong tingbaot poen ya.” Afta, ridim wan vas we i stret long poen ya, mo askem tingting blong hem.
4 Gat Wan Program We i Isi Blong Jenisim: Fasin blong yu blong reregud bambae i no impoten tumas sipos yu no save toktok wetem ol man. Tede plante taem yumi faenem smol man nomo long haos blong olgeta taem yumi visitim olgeta. Sipos hemia i tru long teritori blong yufala, traem blong stretem program blong yu blong mekem se yu save prij ol haos wanwan taem plante man oli stap long haos blong olgeta. Maet yu faenem se i moa gud blong go long ol wiken; maet yumi save faenem sam long medel wik be long aftenun. Long sam eria ol pablisa oli faenem i gud blong prij long ol taem blong holide blong wol from oli faenem plante moa man long haos. Plante man oli stap spelgud mo maet oli rere moa blong lesin long storeyan long ol taem olsem. I gud blong mekem fastok blong yu i laenap long taem olsem mo joenem storeyan blong yu wetem wan poen long Baebol.
5 Jekem Sipos Fasin Blong Storeyan Blong Yu i Wokgud: Afta we yu lego wanwan haos, askem yu wan se: ‘?Mi bin kasem hat blong man blong haos? ?Mi bin pulum hem blong talemaot tingting blong hem mo mi bin lesin long wanem hem i talem? ?Mi bin ansa wetem waes fasin? Folem samting we oli kamaot, ?mi bin yusum beswan rod blong storeyan?’ Bambae i givhan sipos sam samtaem yu wok wetem wan pablisa we i gat ekspiryens no wan paenia mo yu lesingud long fasin blong hem blong storeyan wetem tingting blong mekem minista wok blong yu i kamgud moa.
6 Sipos yu gat gudhan long wok blong yu, bambae yu save talemaot trutok blong Kingdom we bambae “i sevem yu wetem ol man we oli stap lesin long yu.”—1 Tim. 4:16; Prov. 22:29.