?Yu Yu Stap Soem Wanem Kaen Tingting?
1 Pol i finisim leta blong hem long kongregesen blong Filipae wetem tok ya blong leftemap tingting se: “Hemia prea blong mi, we Jisas Kraes, Masta blong yumi bambae i stap givhan long yufala long tingting blong yufala, long gladhat blong hem.” (Fil. 4:23) Hem i talem ol gudfala tok long saed blong trufala intres we oli gat blong talemaot gud nyus mo tu fasin kaen, lav we oli gat long olgeta wanwan.—Fil. 1:3-5; 4:15, 16.
2 Yumi mas wantem blong soem sem tingting long kongregesen blong yumi. Taem evriwan oli soem fasin blong wok strong, kaen fasin, mo fasin blong tekem ol narafala oli kam long haos, samting ya i soem wan tingting we ol narafala man oli luk klia. Wan positif tingting mo lav i mekem se i gat yuniti mo fasin blong kamgud moa long saed blong speret. (1 Kor. 1:10) Wan negatif tingting i mekem tingting i foldaon mo man i no moa wok wetem ful hat blong hem.—Rev. 3:15, 16.
3 Ol Elda Soem Rod: Ol elda oli gat wan responsabiliti blong holem wan gud, positif tingting long medel blong olgeta mo long kongregesen blong olgeta. ?From wanem? From tingting mo fasin blong olgeta i save gat paoa long kongregesen. Yumi glad blong gat ol elda we oli wok strong long wok blong prij, we oli talem halo long yumi wetem gudfala smael mo oli kaen long toktok, mo we oli positif mo leftemap tingting long ol advaes blong olgeta, nating se oli givim long yumi wanwan no antap long platfom.—Hib. 13:7.
4 I tru, yumi evriwan yumi mas joen blong mekem kongregesen i joengud, i gat fasin blong tekem ol narafala i go long haos, wok strong, mo gat tingting long saed blong speret. Yumi wanwan i save soem fasin kaen mo lav taem yumi stap kampani wetem ol narafala. (1 Kor. 16:14) Yumi no mas mekem i defren long saed blong yia blong man, kala, edukesen, no long olgeta we oli rij no pua long medel blong yumi. (Skelem Efesas 2:21.) From hop blong yumi, yumi save soem wan tingting blong glad, glad blong soem fasin blong tekem ol narafala i go long haos, mo wok strong long minista wok.—Rom 12:13; Kol. 3:22, 23.
5 Evriwan we oli stap joen wetem yumi, ol nyuwan tu, oli mas harem se oli welkam mo haremsave lav mo fasin blong onagud long God blong kampani blong ol brata. Tru long minista wok blong yumi mo tru long ol gudfala Kristin fasin we yumi soem, yumi givim pruf se kongregesen i olsem wan pos we i sapotem trutok.’ (1 Tim. 3:15) Mo tu yumi haremgud long fasin sef long saed blong speret from “pis blong God’ we i stap lukaot long hat mo tingting blong yumi. (Fil. 4:6, 7) I gud se yumi evriwan i rili traehad blong soem tingting we bambae i mekem yumi sua blong kasem gladhat blong Jeova tru long Masta Jisas Kraes.—2 Tim. 4:22.