Tok Blong Kingdom—Kasem Mining Blong Hem
1 Long parabol blong man we i sakem sid, Jisas i talem se sid we i foldaon long “gudfala graon,” i pija blong “man we i harem tok ya mo i save mining blong hem.” (Mat. 13:23) Naoia, we yumi harem finis tok blong Kingdom, ?yumi kasem “mining blong hem”? ?Hem i gat paoa long laef blong yumi olsem wanem? ?Yumi putum ol samting long saed blong Kingdom long fas ples, we i soem se yumi kasem mining blong mesej ya finis?
2 Yumi mas stadi yumi wan, blong kasem stret mining blong mesej blong Kingdom. Yumi mas tekem taem blong tingtingdip long ol kakae long saed blong speret we yumi kasem. Taem yumi spid blong ridim Wajtaoa, i olsem we yumi solemdaon wantaem nomo, wan kakae we i gud tumas we i blong givhan long bodi. ?Yu yu tekem taem blong tingbaot fulwan, ol kakae long saed blong speret? Blong yumi save kasem ol gudfala samting from, i mas gat wan samting we i pusum yumi mo yumi mas hanggrigud long saed blong speret. Sipos ol samting ya i no gat, ol narafala wok oli save mekem se yumi no kasem tumas frut long stadi blong yumi wan, no oli save spolem taem we yumi nidim blong mekem. I no isi blong folem oltaem wan gudfala program blong mekem stadi. Nating se yumi mas skelemgud ol samting we oli mas kam long fas ples, be ol rij samting we yumi save kasem long saed blong speret, oli sas tumas.—Prov. 3:13-18; Kol. 1:27.
3 Ridimgud ol Vas i givhan long yumi evri dei, blong holem ol positif mo gudfala tingting long saed blong Kingdom. Olgeta we oli ‘luksave ol nid blong olgeta long saed blong speret,’ oli mekem plan blong tekem sam menet evridei blong ridim vas blong dei mo ol komen. (Mat. 5:3) Plante vas oli eksplenem ol defren samting long saed blong Kingdom. Eksampel: Long Novemba 22, 1994, vas blong dei ya i Matyu 13:4. Komen i tokbaot hop blong Kingdom mo i mekem yumi tingbaot ol denja blong fasin fren wetem ol memba blong famle no ol man we oli stap kolosap long yumi, we i save spolem yumi. Long olgeta Betel long wol, i gat wan toktok blong 15 menet long saed blong vas blong dei, long moning blong evri dei we oli wok long hem. Samting ya i soem klia, ol gudfala frut we yumi save kasem from, mo se i impoten blong lukluk vas blong dei tugeta. ?Famle blong yu tu i putum samting ya long program blong hem evri dei?
4 Moa fasin tangkyu blong yu long saed blong Kingdom i gru, moa bambae yu wantem serem mesej blong Kingdom wetem ol narafala. Wajtaoa mo Wekap! oli givim samting olsem kakae blong bren, i fidim tingting blong yumi wetem ol gudfala save, we oli jes kamaot. Oli givhan long yumi blong gohed blong luksavegud se wol ya i rili nidim Kingdom blong God. Oli halpem yumi blong kam man long saed blong speret, we yumi “kasem tingting blong Kraes.” (1 Kor. 2:15, 16) Ol samting ya oli save mekem hop blong yumi i kam strong moa. Mo tu, yumi strong moa blong serem hop blong Kingdom wetem ol narafala.—1 Pita 3:15.
5 I impoten tumas we yumi wanwan i kasem mining blong mesej blong Kingdom. Kingdom ya nao i rod we God bambae i yusum blong leftemap rul blong hem, finisim rabis fasin, mo stanemap wan nyu wol—wan paradaes. Jisas i talem long yumi, blong putum kingdom ya i stap long fas ples long laef blong yumi. Yumi mas ol man blong obei we oli olsem ol sipsip, blong stap aninit long rul blong hem. (Mat. 6:10, 33) Yusum fulwan ol jans we yu yu gat blong kasem ol blesing blong hem.