Kasem Ol Gudfala Samting From Tiokratik Skul Long 1996—Haf 1
1 ?Yu ridim finis ol advaes we i joen wetem “Program Blong Tiokratik Skul Blong 1996”? ?Yu luksave se i gat sam jenis? Plante taem long Tok N. 1, bambae yumi tokbaot nambawan histri blong ogenaesesen blong Jeova long taem blong yumi. Long yia 1996, bambae yumi tokbaot 178 pej blong buk ya Jehovah’s Witnesses—Proclaimers of God’s Kingdom. I no gat ol kwestin long en blong Tok No 1. we i stanap long Proclaimers buk, ?taswe yumi save mekem wanem blong lukaotgud long tijing blong yumi mo kasem plante gudfala samting from tok ya?—1 Tim. 4:16.
2 I gud blong makemaot sam taem evri wik blong ridim haf blong Proclaimers buk we bambae yumi mekem long wik ya. Ol brata oli mas mekem Tok N. 1 long fasin we i laef mo i pulum intres blong olgeta we oli lesin. Mo tu, oli mas soemaot olsem wanem blong wokem ol save ya long laef blong yumi. Oli mas yusum save ya blong tijim yumi blong gat moa respek long ogenaesesen blong Jeova, mo blong soem moa tangkyu from ol jans we yumi gat olsem ol man blong God. Sipos wanwan famle i karem wan Proclaimers buk i kam long miting, olgeta memba blong famle oli save folemgud ol toktok blong brata, mo lukluk ol pija mo foto we oli joen wetem tok ya.
3 Tok N. 3 mo 4: Stat long Janewari go kasem Epril, Tok N. 3 bambae i stanap long Bible Topics for Discussion. Mo stat long Mei go kasem Desemba, bambae hem i stanap long nyufala buk ya Save. Wan sista bambae i mekem tok ya. Taem tok ya i stanap long Bible Topics for Discussion, hem i mas mekem olsem we hem i stap prij long evri haos wanwan no i tekem jans blong prij. Taem tok i stanap long buk ya Save, sista i mas mekem olsem wan visit bakegen no wan Baebol stadi. Samting ya i save givhan bigwan long yumi, from we bambae yumi yusum buk ya Save oltaem long ol Baebol stadi.
4 Sipos sista i mekem tok olsem wan Baebol stadi, tufala sista oli save sidaon. Oli save go stret long stadi wetem sam sot toktok nomo blong statem, mo askem kwestin we i joen wetem faswan haf. Sista we i mekem woman blong haos, i mas mekem i sem mak olsem wan Baebol stadi i save mekem. Ol vas we oli no stap fulwan long buk, tufala i save ridim olgeta long Baebol sipos i gat taem. Sista i mas soem gudhan blong tij, tru long ol kwestin we hem i askem long woman blong haos, mo tru long fasin blong mekem woman ya i tingtinggud long ol vas blong Baebol.
5 ?Sista i save mekem wanem sipos i gat plante tumas vas blong tokbaot long faef menet? Jusum ol impoten vas we oli sapotem ol bigfala poen. Sipos i no gat plante vas, hem i save yusum moa taem blong tokbaot ol bigfala poen. Wanwan taem, hem i save ridim wan paragraf no wan sentens long buk mo tokbaot biaen.
6 Long en blong evri japta blong buk ya Save, i gat wan smol bokis, “Jekem Save Blong Yu.” Pablisa we i mekem tok long laswan paragraf blong ol japta, i save toktok smol long ol kwestin long bokis ya. Sipos i gat taem, hem i save tokbaot ol bokis we oli stap insaed long haf we tok blong hem i stanap long hem. Sipos i gat wan bokis long medel blong haf blong wan wik mo haf blong nekis wik, sista we i mekem fas haf i save joenem ol save long bokis ya wetem tok blong hem. Sista i save tokbaot ol pija long buk taem oli joen wetem tok blong hem.
7 Sipos yumi yusum fulwan ol trening we yumi kasem long Tiokratik Skul, bambae yumi save ‘talemaot tok blong God’ long fasin we i moa gud, mo we i soemaot ‘gudhan blong tij.’—2 Tim. 4:2.