Tiokratik Skul Blong 2015 i Givhan Long Yumi Blong Kamgud Moa Long Fasin Blong Tij

¹ Deved i talem se: “Hae God. Yu yu strong ples blong haed blong mi, mo yu yu mekem mi mi fri. Prea blong mi, we ol tok blong mi mo ol tingting blong mi bambae oli stret gud long fes blong yu.” (Sam 19:14) Yumi tu, yumi wantem we ol toktok blong yumi oli leftemap Jehova, from we yumi tinghae long janis ya we yumi gat blong tokbaot trutok long kongregesen mo long wok blong prij. Tiokratik skul hem i wan long ol rod we Jehova i yusum blong trenem yumi blong mekem wok blong hem. Trening ya i stap gohed evri wik long bitim 111, 000 kongregesen, long olgeta ples long wol. Trening ya i givhan long ol brata mo sista raon long wol we oli gat ol defdefren fasin blong laef, blong oli kam ol gudfala man blong talemaot gud nius. Mo i givhan long olgeta blong oli gat strong tingting blong pulum ol man blong bilif long samting we oli tijim.—Wok 19:8; Kol. 4:6.

² Long program blong Tiokratik skul blong yia 2015 bambae yumi yusum ol buk ya: ?Hu i Stap Mekem Samting We Jehova i Wantem? (jl), ‘Stap Long Laef Ya We God i Lavem Yu’ (lv), Buk Blong Ol Baebol Stori (my), mo ?Wanem Save i Stap Long Baebol? (igw) Mo tu, i gat sam jenis long taem, blong ol bigfala poen blong Baebol riding, mo Tok N. 1. Long ol haf we oli kam biaen, bambae yumi tokbaot ol jenis ya, mo sam advaes we oli tokbaot olsem wanem blong mekem ol haf long skul.

³ Ol Bigfala Poen Blong Baebol Riding: Brata we i mekem haf ya i gat tu minit nomo blong tokbaot wan poen we hem i laekem long Baebol riding blong wik. Sipos brata i rere gud long wan gudfala poen, bambae hem i givhan long kongregesen, we hem i no bitim tu minit. Biaen, ol brata mo sista oli gat sikis minit blong tokbaot ol vas we oli laekem, mo oli save tokbaot ol poen ya we oli no bitim 30 seken. Blong mekem wan gudfala komen we i no bitim taem, evriwan oli mas rere gud mo oli mas bos long olgeta. Hemia wan gudfala trening blong yumi. Mo tu, yumi givim janis long plante moa brata mo sista blong oli save talemaot ol gudfala poen blong olgeta, we oli rere finis long hem.

⁴ Tok N. 1: Brata we i mekem Baebol riding ya, hem i no mas bitim 3 minit. Maet hem bambae i ridim wan haf pej blong Baebol. Olgeta we oli kasem pepa blong mekem tok ya, oli mas lanem blong rid bakegen mo bakegen long bigfala voes. Mo oli mas talem klia ol tok we oli ridim, long fasin we i stret blong ol man oli kasem save long riding blong olgeta. Yes ol man blong Jehova oli mas lanem blong rid gud, from we fasin blong rid gud hem i impoten long wosip blong yumi. !Yumi glad tumas blong luk se plante long ol pikinini blong yumi, oli save rid gud! I gud we yumi talem ol gudfala toktok long ol papa mo mama, from traehad we oli mekem blong givhan long ol pikinini blong olgeta, blong oli save rid gud.

⁵ Tok N. 2: Wan sista i mekem tok ya blong 5 minit. Hem i mas yusum stamba tok we hem i kasem. Sipos tok blong hem i stanap long buk ya ?Wanem Save i Stap Long Baebol?, hem i mas mekem tok long wan fasin blong prij we i stret long ples blong yumi, mo i save wok gud long teritori blong kongregesen. Be sipos tok blong hem i kamaot long Buk Blong Ol Baebol Stori, sista ya i mas stadi gud long stori ya, mo hem i save mekem risej long buk ya Insight on the Scriptures, Volume 1. Hem i mas jusum ol stret vas we hem i save yusum, mo hem i mas tokbaot samting we yumi lanem long stori ya. Brata we i lukaot long skul bambae i jusum wan narafala blong joen wetem sista ya.

⁶ Tok N. 3: Wan brata no wan sista i save mekem tok ya, blong 5 minit. Sipos wan sista i mekem tok ya, hem i mas folem ol advaes blong Tok N. 2. Mo sipos wan brata i mekem tok ya, hem i mas mekem long fasin olsem we hem i givim wan tok long kongregesen. Hem i mas luk japta blong buk ya, Buk Blong Ol Baebol Stori. Mo hem i save mekem risej long buk ya Insight on the Scriptures, Volume 1. Hem i mas jusum ol vas blong Baebol we oli laenap wetem tok blong hem. Mo hem i mas tokbaot samting we yumi lanem long tok ya.

⁷ Niufala Rod We Ol Brata Bambae Oli Folem Blong Mekem Tok N. 3: Sipos tok ya i stanap long buk ya, ?Wanem Save i Stap Long Baebol? brata we i mekem tok, hem i mas mekem tok ya olsem wan pleplei long famle wosip, no long wok blong prij. Brata we i lukaot long skul bambae i jusum wan narafala blong wok wetem brata we i mekem tok, mo bambae hem i jusum fasin blong tok we brata bambae i mekem. Pablisa we i mekem man blong haos, i mas wan famle blong brata we i mekem tok, no wan brata long kongregesen. Brata we i mekem tok i save yusum sam narafala vas we oli makem poen we i laenap wetem stamba tok blong tok ya. Wanwan taem maet wan elda i save mekem tok ya. Elda ya bambae i jusum fasin blong mekem tok blong hem, mo hemia we i joen wetem hem blong mekem tok ya. Hemia bambae i leftemap tingting blong kongregesen, blong luk olsem wanem ol elda oli soemaot gudfala fasin, taem oli tijim gud wan memba blong famle blong olgeta, no wan narafala brata long kongregesen.

⁸ Advaes: Brata we i lukaot long skul i gat tu minit blong talem ol gudfala toktok, afta we ol wanwan studen oli mekem tok. Hem i givim ol advaes we oli kamaot long buk blong, Tiokratik Skul. Bifo we ol studen ya oli mekem tok, brata we i lukaot long skul i no mas talemaot poen we ol wanwan studen oli wok long hem. Afta we ol wanwan studen ya oli mekem tok blong olgeta, brata we i lukaot long skul bambae i talem ol gudfala toktok long olgeta, mo i talemaot poen we ol wanwan studen ya oli wok long hem. Hem i mas talemaot klia, gudfala samting we studen ya i mekem, no long kaen fasin hem i save talem long studen, poen we maet hem i save kam gud moa long hem.

⁹ Ol poen we ol studen oli wok long hem, oli stap long buk blong Tiokratik Skul, pej 79 kasem 81. Afta we studen i mekem tok blong hem, brata we i lukaot long skul bambae i raetem daon, ol samting long buk blong studen ya, mo taem tufala nomo i stap, hem i save askem long studen sipos hem i mekem haf ya, “Trenem Yu Wan.” Mo maet afta long miting no long wan narafala taem, brata i save talem ol gudfala toktok long samting we studen i mekem. Ol advaes we ol wanwan studen oli kasem long skul ya, i mas mekem ol studen ya oli tingbaot se, hemia wan nambawan janis we oli gat blong mekem oli kam strong moa long trutok.—1 Tim. 4:15.

¹⁰ Sipos studen we i mekem tok i bitim taem, brata we i lukaot long skul, no wan narafala brata, i save mekem saen, no i save ringim bel blong soemaot se taem blong hem i finis. Mo studen i mas respektem saen ya, taem bel i ring hemia nao stret taem we hem i mas lego platfom.—Yu luk buk ya, Tiokratik Skul, pej 282, haf 4.

¹¹ Olgeta we oli kasem ol mak blong oli save joen long Tiokratik Skul, oli save givim nem blong olgeta, long brata we i lukaot long skul. (Yu luk buk ya, Tiokratik Skul, pej 282, haf 6.) Trening we skul ya i givim, i givhan bigwan long ol Witnes blong Jehova blong oli prij mo tijim gud nius blong Kingdom long ol man. Mo tu oli gat strong bilif, mo oli gat bigfala respek mo lav, taem oli stap mekem wok ya. !Yumi sua se Jehova i glad tumas long olgeta we oli kasem ol gudfala trening long Tiokratik Skul!—Sam 148:12, 13; Aes. 50:4.