?Yu Yu Traem Finis Wok Blong Prij Long Sapa?

¹ Yumi evriwan i laekem blong karem frut long wok blong yumi. Be, taem yumi no luk gudfala frut, yumi les mo yumi no haremgud long wok blong yumi. Wok we i gat mining i mekem yumi haremgud, mo hem i wan blesing. (Skelem wetem Eklesiastis 3:​10-​13.) Samting ya i tru long saed blong wok blong prij tu. Yumi save finis se taem yumi prij long ol wanwan haos mo yumi storeyangud wetem ol man long saed blong Baebol, yumi haremgud long saed blong speret taem yumi gobak long haos. Yumi harem se yumi rili mekem wan gudfala wok.

² Long sam ples naoia, i hadwok blong faenem ol man long haos blong olgeta long dei. Sam ripot oli soem se long plante ples, bitim stret haf blong ol man oli no stap long haos long moning. Plante kongregesen oli traem winim problem ya, oli mekem wok blong prij long sapa. Mo oli karem gudfala frut long rod ya. Ol pablisa oli talem se taem oli prij long sapa, plante moa man oli stap long haos, mo oli glad moa blong storeyan mo blong lesin long mesej blong Kingdom. ?Yu yu traem finis wok blong prij long sapa long ples blong yu?​—Skelem wetem Mak 1:​32-​34.

³ Ol Elda Oli Mekem Plan Blong Prij Long Sapa: Long sam ples, plante oli sapotem ol miting blong prij long aftenun mo sapa. I gud blong tingbaot ol yangfala pablisa we oli finis skul long aftenun, mo ol bigman we oli finis wok long sapa. Sam pablisa we oli no save kam prij long wiken, oli faenem se wok blong prij long sapa i wan gudfala rod blong joen oltaem long wok blong prij.

⁴ I gat plante defren kaen wok we yu save mekem taem yu prij long sapa. Yu save prij long evri haos wanwan wetem ol magasin no wetem buk we yumi stap seremaot long manis ya. Sapa i wan gudfala taem blong gobak long ol haos we oli no gat man, taem sam pablisa oli bin prij long olgeta long sem dei no long wiken. Mo tu, maet i gat gudfala frut i kamaot from wok blong prij long rod long sapa, taem yu mitim ol man we oli stap kambak long wok. Plante man oli faenem se sapa i beswan taem blong visitim bakegen ol man we oli bin soem intres bifo.

⁵ Lukaotgud mo Soem Waes: Long sam ples, i wan denja blong wokbaot long sapa no afta we tudak i kam. I gud blong wokbaot tutu no wetem wan grup, pas long ol rod we oli gat laet, mo go long ol haos no rum we yu save se oli sef. Taem yu kilim doa, stanap long wan ples we man blong haos i save luk yu, mo talemaot klia se yu hu. Yusum fasin luksave. Sipos yu luk se yu kam long wan taem we i no stret, olsem taem famle i stap kakae, talem long olgeta se bambae yu kambak long wan narafala taem. Kolosap oltaem, i moagud blong prij eli long sapa, bitim we yu go let tumas, long taem we ol man oli rere blong slip.

⁶ Taem yumi ‘stap mekem wosip long Jeova long dei mo long naet,’ i sua se bambae hem i blesem ol traehad blong yumi.​—Rev. 7:​15.