Haremgud Blong Givim Wan Gudfala Wetnes
1 Yumi evriwan i haremgud blong mekem samting we yumi gat gudhan long hem. Long saed blong Jisas, ol man oli talem tok we i stap long Mak 7:37, i se: “Man, olgeta samting we hem i stap mekem oli gud tumas.” !I klia from wanem Jisas i haremgud tumas blong mekem wok blong God! (Skelem wetem Ol Sam 40:8.) Sipos yumi tingtinggud long ol advaes we i kam biaen, bambae yumi tu i save faenem glad taem yumi obei long tok blong Jisas blong ‘talemaot gud nyus mo givim wan gudfala wetnes long ol man.’ (Wok 10:42) Long Janewari, yumi seremaot eniwan long ol buk we kongregesen i gat, we oli bin kamaot bifo long 1985, mo we oli gat 192 pej blong olgeta. Sipos no, yumi save seremaot Save buk. ?Olsem wanem yumi save yusum ol buk ya blong givim wan gudfala wetnes?
2 Plante man oli wari long saed blong helt blong olgeta, taswe yu save talem se:
◼ “Nating se ol dokta oli faenem plante gudfala meresin mo oli winim sam sik, plante man oli stap safa yet from we oli sik tumas. ?Long tingting blong yu, from wanem i olsem? [Wet long ansa.] Jisas Kraes i talem se ol strong sik, hemia wan long ol samting we oli makemaot ol las dei. (Luk 21:11) Be tu, Baebol i tokbaot wan taem we i no moa gat sik. [Ridim Aesea 33:24.] Traem luk olsem wanem buk ya i save givhan long yumi blong bilif strong long stampa tijing ya blong Baebol.” Tokbaot sam poen long buk, mo askem man blong haos blong karem.
3 Taem yu tekem jans blong prij long taon, yu save talem halo mo askem se:
◼ “?Yu yu luk se i hadwok naoia blong pem ol samting we yumi nidim from we oli sas tumas? [Wet long ansa.] ?Yu ting se bambae i gat wan taem we ol man oli gat naf samting blong laef mo oli no moa wari?” Wet long ansa. Ale, ridim wan vas blong Baebol long buk we yu stap seremaot. Nao, gohed olsem: “Buk ya i soemaot olsem wanem God bambae i yusum Kingdom blong hem blong winim olgeta problem we oli mekem laef i had tede.” Askem hem blong karem buk ya blong stret praes blong hem. Maet yu talem se yu glad tumas blong storeyan wetem hem, nao askem se: “?Yu ting se yumitu save storeyan bakegen wan narafala taem?” Long rod ya, maet yu save kasem adres no namba blong telefon blong hem.
4 Maet yu gat jans blong storeyan long saed blong pis long fulwol, wetem “Save” buk:
◼ “Long tingting blong yu, ?from wanem i hadwok blong gat pis long wol ya? [Wet long ansa, nao soem pija long pej 100, 101.] Baebol i eksplenem from wanem yumi kasem plante problem long taem blong yumi. [Ridim Revelesen 12:7-9, 12 long haf 3, pej 99.] Wol ya i no gat pis, from we Setan we oli sakem hem i aot long heven, i stap daon naoia long wol ya. Buk ya i givim ansa long plante impoten kwestin, mo mi mi glad blong livim wetem yu blong yu ridim.”—Blong faenem sam narafala rod blong seremaot Save buk, lukluk laswan pej blong Kingdom Wok Blong Yumi, Maj mo Jun, 1997.
5 Taem yu gobak long olgeta we oli bin soem intres, yu save yusum samting olsem tok ya we i kam biaen, blong traem statem wan Baebol stadi:
◼ “Lastaem we yumitu storeyan, yu bin talem wan samting we i pulum intres blong mi. [Talem wan samting we man ya i bin tokbaot lastaem.] Mi mi stap tingbaot samting ya, mo mi glad blong storeyan wetem yu long sam save we mi bin faenemaot long saed ya. [Ridim wan gudfala vas blong Baebol.] Mifala i givhan long ol man blong mekem wan kos we oli no pem. Kos ya i bin halpem plante milyan man blong kasem save long ol stampa tijing blong Baebol, long wan sot taem nomo. Wan stadi olsem i save mekem bilif blong yu i strong se God bambae i mekem ol promes blong hem oli kamtru.” Talem sam kwestin we stadi i save ansarem. Sipos hem i no wantem stadi, eksplenem se i gat wan kos we i kwik nomo, hemia 15 menet evri wik, blong 16 wik. Soem buklet ya, Samting We God i Wantem, ale, openem i go long Stadi 1, mo askem sipos yu save tokbaot faswan haf ya wetem hem.
6 No Fogetem Pepa Blong Talemaot Ol Miting: Yumi save yusum ol smol pepa ya long fastok blong yumi, blong wekemap intres blong man long ol samting long saed blong speret. Sipos no, yumi save givim wan long ol man we oli no wantem karem wan buk. Sipos man i intres, tokbaot smol mesej long narasaed blong pepa ya, blong pulum hem blong stadi Baebol no blong kam long miting.
7 Traem blong gat gudhan long wok blong yu, nao bambae yu haremgud long wok ya. Traehad oltaem blong givim wan gudfala wetnes, mo haremgud blong mekem olgeta haf blong wok blong prij long fasin we i gud tumas.—1 Tim. 4:16.