Hemia Disisen Blong Yumi—Yumi Folem Fasin Blong Laef We God i Glad Long Hem
1 Wan stamba poen blong ol asembli “Fasin Blong Laef We God i Glad Long Hem,” hemia disisen we yumi mekem long laswan tok. Disisen ya i stat wetem tok ya: “Mifala . . . i gat strong tingting ya se Rod we Jeova i givim long ol man blong oli wokbaot long hem, hem i beswan rod.” I gud blong tingbaot sam impoten poen blong disisen ya we yumi talem “!YES!” long hem.
2 Hemia disisen blong yumi se yumi stap klin long fored blong Jeova, blong bambae wol ya i no save mekem yumi kam doti. Bambae yumi gohed blong putum wil blong God long fasples long laef blong yumi. Yumi yusum Tok blong God, Baebol, blong lidim yumi, mo bambae yumi no save lusum rod ya blong ronwe i go long raetsaed no blong ronwe i go long lefsaed. No gat. Rod blong God i moa gud, i bitim olgeta rod we ol man oli stap folem.
3 Bighaf blong ol man long wol oli daonem fasin blong laef we God i glad long hem, be oli kasem ol frut blong rabis fasin blong laef blong olgeta. (Jer. 10:23) Taswe yumi mas gohed blong kasem tijing blong Bigfala Tija blong yumi, Jeova, we i talem se: “Hemia rod. Yufala i folem.” (Aes. 30:21). Fasin blong laef we God i glad long hem, olsem Baebol i talem, hem i hae moa long ol narafala rod. Sipos yumi wantem folem rod ya, yumi mas mekem se ol tijing blong Jeova oli wok long laef blong yumi.
4 Haefala Tijing Program Blong Jeova: Jeova i tijim long yumi trufala mining blong laef mo olsem wanem yumi save yusum laef ya long beswan fasin. Hem i tijim long yumi olsem wanem blong mekem laef blong yumi i kam moagud long saed blong tingting, long saed blong ol fasin blong yumi, mo long saed blong spirit. Hem i tijim long yumi fasin blong gat pis wetem ol Kristin brata blong yumi, wetem prapa famle blong yumi, mo wetem ol man we oli stap raonabaot long yumi. Hem i mekem olsem tru long Tok blong hem, Baebol, mo tru long ogenaesesen blong hem.
5 Ol miting blong kongregesen oli impoten tumas long saed ya. I gud we yumi go oltaem mo yumi ansa long ol faef miting, olsem ya bambae yumi kasem wan nambawan trening olsem ol minista blong gud nyus, mo wan tijing we i stret long saed blong ol Kristin fasin blong laef. (2 Tim. 3:16, 17) Bigfala Tija blong yumi i givim tiokratik tijing long ol asembli. Sipos yumi fri, mo sipos helt blong yumi i oraet, yumi mas gat strong tingting blong neva mestem wan miting.
6 Yumi mas gohedgud blong traehad blong folem fasin blong laef we God i glad long hem. !Olsem ya bambae yumi givim ona long Jeova mo Hem bambae i blesem yumi blong olwe!—Aes. 48:17.