Yumi Wantem Tumas Blong Talemaot Gud Nius
1 “Mi mi wantem tumas blong kam luk yufala . . . Mi mi wantem tumas blong talemaot gud nius ya long yufala tu.” Hemia ol tok blong aposol Pol taem hem i statem leta blong hem we hem i raetem i go long ol Kristin blong Rom. ?From wanem Pol i wantem tumas blong go luk olgeta? Hem i se: “Mi wantem we wok blong mi bambae i gat frut long ples blong yufala tu . . . Mi mi no sem nating long gud nius ya, from we hem i paoa blong God blong sevem olgeta man.”—Rom 1:11-16.
2 Taem Pol i toktok wetem ol elda blong Efesas, hem i gat sem fasin ya blong wantem tumas blong givhan long olgeta. Hem i talem bakegen long olgeta se: “Stat long taem ya we mi kamtru long Esia . . . , mi stap talemaot gud nius . . . mi stap tijim yufala long fes blong ol man, mo long ol haos blong yufala, mi mi no haedem sam samting we i save givhan long yufala. Mo long fes blong ol laen blong Isrel mo long fes blong ol narafala man, mi mi stap talemaot ol trutok long olgeta.” (Wok 20:18-21) Long olgeta ples we Pol i mekem wok blong hem, mak blong hem i blong serem gud nius blong sevem ol man mo blong karem ol gudfala frut blong Kingdom. !Hemia wan gudfala eksampel blong folem!
3 Ating yumi askem long yumi wan se: ‘?Mi mi soem sem fasin ya blong wantem tumas blong talemaot gud nius long ples blong mi? ?Mi mi tingbaot wok blong prij olsem wan wok nomo, no mi wantem tumas blong serem gud nius ya long plante moa man? ?Mi mi prea mo tingtinggud long laef blong mi blong traem mekem moa? ?Mi mi traem ol defren rod blong prij long teritori blong mi, olsem wok long ol haos wanwan, long ol stoa, wetem telefon, no tekem eni jans blong prij?’
4 Wantem Tumas Blong Prij Long Epril: Manis Epril i wan gudfala taem blong mekem moa long wok blong talemaot gud nius. From we naoia aoa blong ol paenia i godaon, i isi blong plante moa brata sista oli joen long wok blong haftaem paenia. Maet bambae yu gat jans blong mekem wok blong haftaem paenia long manis Epril mo Mei. No maet yu wantem kam wan fultaem paenia. Sipos yu wan pablisa long kongregesen, ?yu save spenem moa aoa long wok blong prij long manis ya mo long narafala manis tu, blong sapotem olgeta we bambae oli mekem wok blong paenia? !Samting ya bambae i mekem hat blong Jeova i glad!
5 Olgeta pablisa oli save gohed blong soem fasin olsem Pol, blong wantem tumas blong givhan long ol narafala, taem oli mekem moa long wok blong prij. Sipos yumi traehad blong mekem moa long wok blong prij bambae yumi kasem trufala glad. Hemia filing blong Pol long saed blong tabu wok blong hem. I gud yumi folem eksampel blong hem.—Rom 11:13; 1 Kor. 4:16.