!Mekem Plan Long Fiuja!
1 Ogenaesesen blong Jeova i givim long yumi ol samting we yumi nidim long saed blong spirit, olsem wan program blong wok evri dei. Blong soem tangkiu from samting ya, yumi wantem yusum fulwan ol visit blong seket elda, ol asembli mo ol narafala spesel taem blong wok long saed blong spirit we ol brata oli mekem plan long hem long ples blong yumi. (Mat. 5:3) Be i gat sam man we oli mestem plante spesel taem olsemia, from we oli mekem narafala plan finis. ?Olsem wanem blong no mekem olsem? ?Olsem wanem yumi mas save mekem sua se ol plan blong yumi oli no blokem ol “fasin we i stret gud”?—Fil. 1:10.
2 Yumi Mas Mekem Plan Wetem Fasin Waes: Proveb 21:5 i givim advaes ya se: “Man we i mekem gudfala plan mo i stap wok strong long hem, hem i save kasem plante samting, be man we i stap wok hareap, neva hem i save kasem i naf.” Blong “kasem plante samting” long saed blong spirit, yumi mas mekem gudfala plan, yumi mas tingbaot ol wok long saed blong spirit we kongregesen i mekem plan long hem finis. Plan blong yumi i mas laenap wetem ol plan long saed blong spirit. Sipos yumi hareap blong mekem plan long ol samting we yumi nomo yumi wantem, be yumi no kea long ol samting long saed blong spirit, bambae yumi kam ‘sik’ long saed blong spirit.
3 !Yu No Mas Mestem! Yumi evriwan i mekem plan long fiuja, yumi plan blong go spel, no blong go wok samples, visitim ol famle blong yumi, mo plante moa samting bakegen. Bifo we yu mekem promes long narafala man, no yu mekem plan blong yu finis, lukluk fastaem long program blong ol samting we yu mas mekem long saed blong spirit. Sipos yu luk we bambae seket elda i kam, no i gat wan asembli long taem we bambae yu no stap, i gud yu traehad blong jenisim plan blong yu, mekem se bambae yu save joen long wok ya long saed blong spirit. Longtaem bifo we kongregesen i mekem ol impoten wok ya blong hem, yumi save wetaem bambae yumi mekem. Ol elda long kongregesen blong yu oli save talem long yu stret dei blong ol samting ya.
4 Sipos yumi tingtinggud fastaem, mo yumi mekem plan long ol impoten samting, bambae yumi fulap long “ol stret fasin . . . blong yumi save presem God, mo blong yumi save leftemap nem blong hem i go antap oltaem.”—Fil. 1:11.