?Yu Yu Save Givhan Long Olgeta Ya?
1 Aposol Pol i givim advaes ya se olgeta wanwan memba blong kongregesen oli mas stap “lukaot gud blong givhan long ol narafala haf blong [kongregesen].” (1 Kor. 12:25) From samting ya, yumi mas soem intres long olgeta man wanwan mo yumi mas rere blong halpem olgeta wetem lav, taem i nidim blong mekem olsem. Eksampel, sam long ol Kristin sista blong yumi oli stap olgeta nomo long trutok blong lukaot long ol pikinini blong olgeta. Ol sista ya oli mas mekem fulwan wok blong trenem ol pikinini blong olgeta long saed blong spirit. I sua se, ol sista ya oli nidim we yumi leftemap tingting blong olgeta wetem kaen fasin. Oli nidim help we i rili save givhan long olgeta blong kasem ‘samting we oli sot long hem.’ (Rom 12:13a) ?Yu yu save halpem olgeta ya?
2 Sam Rod Blong Givhan: Plante taem ol sista ya oli mas pem pablik transpot blong go long ol miting no long ol asembli. Sipos yumi gat wan trak, maet yumi save mekem plan blong tekem olgeta i go long olgeta miting ya no long ol asembli, long rod ya bambae oli sevem mane blong olgeta. Long taem blong ol miting, maet yumi save halpem wan mama blong lukaot long smol pikinini blong hem, nao bambae hem i save lesingud long program blong miting. Long sem fasin, yumi save askem hem sipos hem i wantem we yumi halpem hem taem hem i karem ol pikinini blong hem i kam long wok blong prij, samting ya i save mekem hem i harem gud. Taem yumi soem se yumi rili intres long ol pikinini—yumi frengud wetem olgeta—fasin ya i save gat bigfala paoa long tingting blong olgeta ya blong pulum olgeta i go long stret rod. Wan wantaem, maet yumi save singaot wan sista we i stap lukaot hem wan long ol pikinini blong hem, blong joen wetem yumi taem yumi mekem famle stadi blong yumi. Hemia wan gudfala rod blong mekem olgeta oli strong moa long saed blong spirit.
3 Soem Waes Fasin: Yumi mas lukaot blong no fosem narafala blong akseptem help blong yumi sipos oli talem se oli no nidim help. I nogud tu, blong yumi intres tumas long prapa bisnes blong olgeta taem yumi stap halpem olgeta. Mo tu, i moagud sipos wan sista, no wan hasban wetem waef blong hem, oli halpem ol sista ya we oli nidim help.
4 Evri Kristin i mas “rere blong tekem ol Kristin man blong ol narafala ples oli kam insaed long haos” blong olgeta. (Rom 12:13b) Fasin blong halpem ol Kristin brata mo sista blong yumi, hem i wan rod we yumi save folem blong soemaot lav we Kraes i bin soemaot.—Jon 13:35.