‘Ol Woman We Oli Stap Wok Strong Long Wok Blong Masta’

¹ Pol i talem tok ya antap, taem hem i tokbaot tufala sista ya Trifaena mo Trifosa blong kongregesen long Rom, we tufala i stap wok had. Hem i tokbaot wan narafala sista bakegen, nem blong hem Perisis, i se: “Woman ya i wok had tumas long wok ya blong Masta.” Long sem fasin, Pol i tokbaot Fibi olsem wan woman we i “givhan gud long plante man.” (Rom 16:​2, 12) Baebol i makem fasin blong Dokas, se hem i wan woman we “i stap mekem ol gudfala wok, mo i stap givhan long ol puaman.” (Wok 9:36) !Ol woman ya we oli strong long saed blong spirit oli wan bigfala blesing long kongregesen!

² ?Yumi gat tangkiu long ol sista we oli stap wokhad long kongregesen blong yumi? Ol sista nao oli mekem bighaf blong wok blong prij, oli lidim bighaf blong ol Baebol stadi, mo oli givim help long plante niuwan. Mo tu, oli spenem bigfala taem blong halpem ol pikinini blong gru long saed blong spirit. Ol Kristin woman oli mekem haf blong wok blong olgeta we i blong soem lav, glad, pis, mo strong tingting blong wok, insaed long kongregesen. Long plante defren rod, oli sapotem hasban blong olgeta mo ol narafala memba blong famle blong olgeta blong mekem se olgeta ya oli save gohed moa long wok blong Jeova.

³ Ol Sista Long Fultaem Wok: Long olgeta ya we oli wokhad long ol wok blong Masta, i gat ol misinari sista we oli bin givhan blong mekem wok i gru long narafala kantri. Ol waef blong ol elda we oli goraon blong visitim ol kongregesen oli bisi long wok blong prij, mo oli leftemap tingting blong plante sista. Yumi no mas fogetem tu, ol sista we oli wok long ol Betel haos. Oli wok wetem strong tingting blong mekem tabu wok ya we i blong sapotem ogenaesesen blong Jeova. Mo tu, i gat ol sista we oli fultaem paenia, we bilif blong olgeta i pusum olgeta blong traehad blong presem God. Ol sista ya oli halpem plante taosen man blong lanem trutok.

⁴ Olgeta woman ya we oli gat strongfala bilif, oli faenem bigfala glad long laef blong olgeta from we oli lego samting we olgeta nomo i wantem. (1 Tim. 6:​6, 8) I stret blong yumi presem olgeta mo yusum evri jans blong leftemap tingting mo sapotem olgeta.

⁵ Olgeta Kristin woman oli ol impoten tul we ogenaesesen blong Jeova i yusum. Oli stap mekem ol wok we oli soemaot bilif mo ol wok ya oli karem blesing i kam long yumi evriwan. I gud yumi gohed blong gat tangkiu from ol woman olsem, mo prea blong bambae Jeova i blesem olgeta taem oli gohed blong “mekem wok blong Masta.”